1, 2. Jesusca ¿maipi cashpata paipa último shimicunataca nirca?

14 DE NISÁN huata 33​pica Jesustaca contracunaca yangamanda juchachishpami Jesusmanda burlarishpa, llaquinaita maltratashpa, macashpa shuj caspipi clavangapaj apan. Jesusca maquipipash, chaquipipash clavai tucushca cashcamandami samaitapash na aisai ushashpa ninanda sufrijun. Shina cashpapashmi Jesusca nara huañushpallata huaquin shimicunata nin.

² Shinaca Jesús nara huañushpallata nishca shimicunamanda yachajupashunchi. Shuj shimicunapi nishpaca Jesuspa nishcacunata ‘uyapashunchi’ (Mat. 17:5).

3. “Ñuca Taitalla, [perdonapai]” nishpaca ¿picunamandata Jesusca parlajurca?

³ Jesusca caspipi clavai tucushca cashpaca Jehová Diostaca: “Ñuca Taitalla, [perdonapai]” nircami. Cai shimicunahuanga ¿imatata ningapaj munarca? Caimanda ashtahuan yachangapaca imata ashtahuan nijta ricupashun. Jesusca: “Caicunaca na yachaimandami cashna ruranajun” nircami (Luc. 23:33, 34). Shinaca Jesusca, paita clavashca soldadocunata perdonachunmi mañajushcanga. Soldadocunaca Jesús pi cajta nali yachaimandami Jesustaca llaquichishcarca. Shinallata huaquin gentecunapashmi Jesús huañuchunga munanajurca. Shinapash cai gentecuna jipaman, Jesusta catijcuna tucunata ali yachashpami Jesusca Jehová Diostaca, perdonapai nirca (Hech. 2:36-38). Jesusca gentecuna paita llaquichishcamandaca na culira, resentidoca quidarcachu (1 Ped. 2:23). Ashtahuangarin paita llaquichijcunataca, perdonapai nishpami Jehová Diostaca mañarca.

4. Jesusca contracunataca perdonarcallami. Caimandaca ¿imatata yachajui ushapanchi?

 ⁴ Jesusmandaca shujcuna llaquichijpi perdonana cashcatami yachajupanchi (Col. 3:13). Shuj gentecunapash, ñucanchi familiacunapash testigo de Jehová cashcamanda ñucanchipa causaita nalicachishpami ñucanchipa contra tucuita ushan. Talvez paicunaca ñucanchicunamanda imapash llullacunata nishpa, shujcunapa ñaupapi nali quidachishpa o ñucanchi publicaciongunatapash liquishpami ñucanchitaca llaquichi ushanga. Ñucanchita macashun nishpapashmi amenazanga. Shinapash ñucanchicunaca paicunahuan risintirijunapa randica, paicunapash ima horapash Jehovamanda yachajuchunmi Jehovata mañana capanchi (Mat. 5:44, 45). Huaquinbica shujcunata perdonanaca shinllimi caita ushan. Ashtahuanbachaca ñucanchita nalita tratashcajpimi perdonanaca shinlli caita ushan. Shinapash shujcuna nalita rurashcamanda risintirishpa quidanaca ñucanchipallatami nali can. Chaimandami shuj paniguca cashna nirca: “Shujcunata perdonanaca paicuna rurashcacunata alicachishpa saquinataca na nisha ninllu. Chaipa randica perdonanaca shujcunahuan na risintirishpa quidanatami nisha nin” nircami (Sal. 37:8). Ñucanchicuna perdonanata decidishpaca ñucanchicunallata ama culirashca, ama risintirishca cachunmi ayudan (Efes. 4:31, 32).

5. a) Jesús ña huañugrijushpaca shuhua runamanga ¿imatata nirca? b) ¿Imamandata chaitaca nirca?

⁵ Jesustaca ishcai shuhuacunapa chaupipimi clavarca. Callaripica ishcandi shuhuacunallatami Jesusmandaca burlarinajurca (Mat. 27:44). Shinapash jipamanga, shujca Jesús ‘ima nalitapash na rurashcata’ cuenta japishpami ñana Jesusmandaca burlarijurca (Luc. 23:40, 41). Chai jahuapash chai shuhuaca Jesús causarinata, rey tucunatapash crimandami paitaca: “Can mandangapaj shamushpaca, ñucata yarihuangui” nirca (Luc. 23:42). Chai shuhuaca Jesuspica tucui shunguhuanmi crirca. Chaimandami Jesusca paitaca nirca: ‘[Cunanllatami], candaca cashna nini: “Paraíso juyailla” alpagupica ñucahuanmi cagringui’ nishpa. Caita nishpaca jahua cielopi Jesushuan canataca na nijurcachu (Luc. 23:43). ‘Ñucahuanmi cagringui’ nishpaca, Jesusca chai shuhua paraíso alpagupi canata seguro caimandami shina nirca. Jesusca Jehová Dios ninanda llaquij cashcata yachaimandami cai shimicunataca nirca (Sal. 103:8).

6. Jesús shuhua runata imashina tratashcamandaca ¿imatata yachajupanchi?

⁶ Jesusca Jehová Dios imashinapacha cashcatami ricuchijun (Heb. 1:3). Jehová Diosca juyaj, llaquij Dios caimandami ñucanchicuna Jesús ñucanchimanda huañushcapi crijpica, ima pandacunatapash rurashcataca perdonangapaj munan (1 Juan 1:7). Huaquinbica: “Jehová Diosca ñucapa pandarishcacunataca na perdonahuangachu” nishpami pensarinchi. Shinapash cashna pensajushpaca ¿imatata rurai ushapanchi? Shuhua runaca chairami Jesuspica cri callarijurca. Shinapashmi Jesusca chai shuhua runataca llaquishpa, juyaihuan tratarca. Shinaca ñucanchicuna Jehová Diosta sirvingapaj ashtahuan esforzarijujpicarin ¿nachu ñucanchitaca ashtahuan juyaihuan, llaquishpa tratanga? (Sal. 51:1; 1 Juan 2:1, 2).

7. a) Juan 19:26, 27​pi nishcashnaca Jesusca Mariatapash, Juandapash ¿imatata nirca? b) ¿Imamandata shina nirca?

⁷ Jesusca ¿imatata nirca? (Juan 19:26, 27​ta liipangui). Jesusca paipa mama María ali cuidashca cachunmi munarca. Chai tiempopica Mariaca talvez viudami cashcanga.  Jesusca pai huañushca jipaca, paipa huauquicuna paipa mamata ali cuidachunmi munarca. Shinapash chai tiempopica Jesuspa huauquicunaca nara Jesuspa catijcuna cashcachu yarin. Chaimandami paipa mamata cuidachunga apóstol Juanman mingarca. Apóstol Juanga Jesusta ali catij, Jesuspapash ali amigomi carca. Jesuspaca Jehová Diosta ali sirvijcunami paipaca familiashna carca (Mat. 12:46-50). Jesusca, Mariata juyaimandami paimanda preocuparishpa apóstol Juan paita cuidachun mingarca. Jesusca apóstol Juan paipa mama Mariata Jehová Diosta sirvishpa catichun ayudanataca seguromi carca. Mariataca Jesusca: ‘Ricui mamita, caipimi cambaj churi’. Shinallata Juandaca: ‘Ricui, caipimi cambaj mama’  nircami. Chai punllamandapachami Mariaca Juandaca paipa churigutashna ricurca. Juanbash Mariataca paipa mamatashnapachami cuidarca. Mariaca Jesustaca huahuamandapachami juyaihuan cuidarca. Ña huañugrijujpipashmi chaipi cumbajurca. Chaicunamandami Jesusca Mariataca ninanda juyarca.

8. Jesús Mariaman, apóstol Juanman nishca shimicunamandaca ¿imatata yachajupanchi?

⁸ Jesús cuendami ñucanchicunaca huaquinbica congregacionmanda huauquipanicunahuan ñucanchi familiatapash yali llevaripanchi. Testigo de Jehovacuna cashcamandami huaquinbica ñucanchi propio familiacunaca ñucanchitaca contrashpa ricuita ushan. Shinapash Jesús nishcashnaca Jehová Diosman quimirishpa, paipa organizacionbi catijpica imata saquishca cashpapash ashtahuan yalitami chasquishun. Jehovapa organizacionbica ashtacacunami ñucanchipaca churicunashna, ushicunashna, mamacunashna, taitacunashna tucuita ushan (Mar. 10:29, 30). Shinaca Jehovapa organizacionbi ñucanchi huauquipanicuna ñucanchipa shuj familiashna cashcamandaca ¿imashinata sintiripanchi? (Col. 3:14; 1 Ped. 2:17).

9. Mateo 27:46​pi shimicunamandaca ¿imatata yachajui ushapanchi?

⁹ Jesusca ña huañugrijushpami: ‘Ñuca Taita Dioslla, ñuca Taita Dioslla ¿imashpata saquihuashcanguiyari?’ nirca (Mat. 27:46). Bibliapica Jesús imamandapacha cai shimicunata nishcataca na intindichijunllu. Shinapash cai shimicunamanda imata yachajui ushashcata ricupashunchi: Jesusca callaripica Salmo 22:1​pi shimicunata pactachingapami cashna nirca. Shinallata Jesuspa shimicunapimi ricuita ushapanchi chai ratopi Jehová Dios paita na ‘cuidajushcata’ (Job 1:10). Jehová Diosca Jesús ciertopacha paipi crishcata, ciertopacha paita juyashcata ricuchichunmi Jesustaca contracunapa maquipica saquitapacha saquirca. Jesús charishca llaquitaca pipash na charishcachu. Shinallata cai shimicunata nishpaca paita yangamanda huañuchinajushcata ricuchingapapashmi Jesusca cashna nirca. *

10. Jesusmandaca ¿imatata yachajupanchi?

¹⁰ Jesusmandaca ima llaquicunata charishpapash Jehová Dios tucuimanda ñucanchita quishpichinataca na shuyana cashcatami yachajupanchi. Jesushnallatami huañuna cashpapash Jehová Diostalla siempre sirvingapaj listo cana capanchi (Mat. 16:24, 25). Jehová Diosca ñucanchicuna na aguantai ushanalla llaquicunata apachunga na saquingachu. Chaitaca alimi yachapanchi (1 Cor. 10:13, MTQI ). Shinallata Jesusmandaca ñucanchitapash shuj gentecuna yangamanda llaquichinatami yachajupanchi (1 Ped. 2:19, 20). Gentecunaca ñucanchi imapash nalicunata na rurajpi, Taita Diosmanda cabalguta yachachijpimi ñucanchitaca nalicachishpa ricun (Juan 17:14; 1 Ped. 4:15, 16). Jesusca Jehová Dios imamanda pai llaquita apachun saquishcataca alimi intindirca. Cutin punda tiempopi Diosta sirvijcunaca paicunata llaquicuna japijpica imamanda Jehová Dios chai llaquicunata charichun saquishcataca na ashta ali intindircachu (Hab. 1:3). Shinapash Jehová Diosca llaquij, juyaj Dios caimandami imamanda shina pensajtapash ali intindishpa paicunataca cushichirca (2 Cor. 1:3, 4).

11. Juan 19:28​pi shimicunataca Jesusca ¿imamandata nirca?

¹¹ (Juan 19:28​ta liipangui). Jesusca ¿imamandata yacunayanmi nirca? Paica Salmo  22:15​pi shimicuna pactarichunmi shina nirca. Chaipica: “Ñuca ushaipash, callana chaquinshnami tucurishca. Ñuca jallupash, chaquishpami shimi jahuaman llutarirca” ninmi. Jesusca chai racu caspipi huarcushca caimandami cuerpo enterota nanachijushcanga. Yacunayachitapash yacunayachijushcanga. Chaimandami imapash chai nanaita samachichun minishtijushcanga.

12. Jesús imashina sintirishcata parlashcamandaca ¿imatata yachajupanchi?

¹² Jesusmandaca ñucanchicuna imashina sintirishcata parlana cashcatami yachajupanchi. Jesusca pai imashina sintirishcata parlajpi shujcuna paita llaquishpa o lastimahuanmi ricunga yashpaimanga na pensarcachu. Ñucanchipash Jesushnallatami pensana canchi. Talvez huaquinbica ñucanchicuna imata minishtijushcata parlangapaca pinganayachinchimi. Shinapash ñucanchicunaca imapipash ayudachun minishtijushpaca ayudata mañanallami capanchi. Por ejemplo, mayorllagucuna cashpa o asha irquilla cashpaca ñucanchita ayudachun mañanallami capanchi. Shinallata desanimarishcaiman sintirijushpaca shuj ancianohuan o shuj huauquihuan o panihuanmi parlanalla capanchi. Paicunapa ali “rimashca shimicunaca” ñucanchitaca ninandami cushichinga (Prov. 12:25). Ñucanchi huauquipanicunaca ñucanchita juyaimandami ‘llaqui punllacunapipash’ ayudangapaj munan (Prov. 17:17). Shinaca imagupipash ñucanchita ayudachun minishtijushpaca paicunaman villanallami capanchi.

13. Jesús, Jehová Diosta huañungacaman cazushpaca ¿imatata ricuchirca?

¹³ Jesusca 14 de nisán más o menos tres de la tardetami, cashna nirca: “Ñami tucuita pactachircani” nishpa (Juan 19:30). Jesuspa huañuna horas ña chayamujujpica paica Jehová mandashcata pactachijushcataca seguromi carca. Jesús, Jehová Diosta huañungacaman cazushpaca ¿imatata ricuchirca? Shinallata ¿ima bendiciongunatata ñucanchica chasqui ushapanchi? Primero, Jesús huañungacaman Taita Diosta tucuipi cazushpaca Satanaspa nishcacuna llulla cashcata, shinallata Satanás ima jarcaicunata churajpipash pipash Jehová Diosta huañungacaman sirvi ushashcatami Jesusca ricuchirca. Segundo, Jesusca paipa causaiguta cushpaca gentecuna Jehová Dioshuan ali amigo tucuchun, shinallata jipa punllacunapipash para siempre causana bendicionda chasqui ushachunmi ayudarca. Tercero, Jesusca Jehová Dioslla mandana derechota charishcatami ricuchirca. Shinallata Jehová Diospa shutigupash alicachishca o santificado cachunbashmi ayudarca.

14. ¿Imatata cada punlla rurana capanchi?

¹⁴ Jesusmandaca Jehová Diostalla siempre sirvishpa causana cashcatami yachajupanchi. Galaad Escuelapi yachachij Maxwell Friend shuti huauquiguca Jehová Diostalla sirvishpa causanamanda parlashpaca shuj asambleapica caitami nirca: “Imagutapash cunanllata rurai ushashpaca, uchallami rurana capangui. Shinallata cada punllami paraíso alpagupi para siempre causangapaj munashcatapash ricuchishpa causana capangui” nirca. Shinaca chai huauquigu nishcashna cada punllami Jehová Diostaca último punllata sirvijunshna sirvina capanchi. Shinami ña huañugrijushpapash Jehová Diostaca “canda sirvingapaca tucui usharishcagutami rurapashcani, Satanás llullaj cashcata ricuchingapapashmi esforzaripashcani, canba shutiguta alipi quidachingapaj, canlla mandana derechota charishcatapash ricuchingapami esforzaripashcani” ni ushapashun.

15. Lucas 23:46​pi nishcashnaca Jesusca ¿imatata seguro carca?

¹⁵ Jesusca ¿imatata nirca? (Lucas 23:46​ta liipangui) *. Jesusca tucui shunguhuanmi cashna nirca: “Ñuca Taitalla, ñuca causaitaca canba maquipimi saquipani” nishpa. Jesusca pai huañushca jipapash Jehová Dios paita yarinataca seguropachami carca.

16. Joshua shuti huauquigumandaca ¿imatata yachajupanchi?

¹⁶ Jesusmandaca ñucanchi causaita Jehová Diospa maquipi mingana cashcatami yachajupanchi. Chaipaca tucui shunguhuanmi Jehová Diospi confiana capanchi (Prov. 3:5). Cunanga 15 huatacunata charij Joshua shuti huauquigumanda yachajupashunchi. Paica shuj na jambirinalla unguitami charirca. Shinapash Jehová nalicachishca tratamientocunataca na chasquircachu. Paica ña huañugrijushpaca paipa mamitataca cashnami nirca: “Ñuca causaigutaca Jehovapa maquipimi saquipani. Jehová Diosmi ñucataca causachihuanga. Paica shungumanda paita juyashcataca alipachami yachan” nircami. * Chaimandami tucuicunallata tapurina capanchi: “Shuj llaquihuan cashpa o ñucanchi causaigu peligropi cajpica ¿Jehová Diosta tucuipi cazushpa, paipi tucui shunguhuan confiashpa catipashachu? Shinallata Jehová Dios ñucata causachinataca ¿tucui shunguhuanllu cripani?” nishpa.

17, 18. Cunanga ¿imacunatallata yachajupashcanchi? (“ Jesuspa último shimicunamandaca ¿imatata yachajupanchi?” nishca recuadrotapash ricupangui).

¹⁷ Jesús nara huañushpallata nishca shimicunamandaca ashtacatami yachajui ushapanchi. Jesuspa shimicunaca shujcunata perdonana cashcata, Jehová Dios ñucanchita perdonanapi confiana cashcatapashmi yachachin. Ñucanchicunaca tauca huauquipanicunapa ayudatami charinchi. Pero ayudata minishtishpaca mañanami canchi. Ima llaquita, problemata charijpipash Jehová Dios ayudanataca seguromi capanchi. Cada punllami Jehová Diostaca último punllata sirvijunshna sirvina capanchi. Shinallata huañujpipash Jehová Dios ñucanchita causachinataca seguromi capanchi.

¹⁸ Caipi yachajushca yuyaicunata ñucanchi causaigupi pactachingapaj esforzarishpaca Jehová Dios mandashca shimicunatami pactachinajupashun. Paica nircami: ‘Jesús imata yachachishcataca, aliguta uyanguichi’ nishpa (Mat. 17:5).