Gentecunaca tapunmi
Testigo de Jehová cashpata na juchata rurajpita divorciarishpa, cutin shujhuan cazarajpica congregacionga primero matrimoniota, cati matrimoniotaca ¿imashinata ricun?
Chashna pasajpica ña divorciarishpa cutin cazarashpaca primero matrimonioca ña tucurishcata, cutin cati matrimoniopash autoridadcunapa ñaupapica legal cashcatami congregacionga ricuna can. Chaita intindingapaca divorciarishpa cutin cazaranamanda Jesús ima nishcata ricupashunchi.
Mateo 19:9pica Jesusca: “cusaca paipa huarmi huainayana juchapi urmashca cajpillami divorciarita ushan. Paipa huarmi napash huainayana juchapi urmashca cajpita divorciarishpa shujhuan cazarashpaca huainayana juchapimi urmajunman” nircami. Shinaca Jesusca shuj matrimoniopica cusa cashpa o huarmi cashpa shujhuan faltapi urmajpillami divorciarishpa shuj matrimonioca tucurita ushan nircami. Shinallata huarmi cashpa o cusa cashpapash na faltapi urmajpita divorciarishpa shujhuan cazarashpaca huainayana adulterio juchapimi urman nircami. a
¿Jesuspa nishca shimicunaca cusa huainayana juchapi urmashpa paipa huarmimanda divorciarishpaca cutin cazarangapaj libre quidajtachu nijun? Na, na chaitaca nijunllu. Cusa huainayana juchapi urmajpica huarmigumi perdonanata o na perdonanataca ricuna can. Huarmi na perdonashachu nishpa divorciarinata decidijpica, legalmente divorciarishca jipami ishcandillata cutin cazarangapaj libre quidaita ushan.
Pero cusa juchata rurashca cajpipash, ñuca matrimonio tucurichunga na munanichu nishpa huarmigu perdonanimi nijpipash, cusa divorciaringapapacha munashpa paimandallata divorciari callarijpica ¿imashi tucunman? Huarmigu perdonasha nishca jahuapash cusa na uyashpa paillata divorciarishpaca Bibliapi nishcashnaca cutin cazarangapaca na libre quidanllu. Chaita ali yachashpata shujhuan cazarashpaca cutinllatami huainayana adulterio juchapi urman. Chaimandami congregacionmanda anciano huauquicunaca cutin shuj comité judicialta rurana tucunga (1 Cor. 5:1, 2; 6:9, 10).
Taita Diospa ricuipi na divorciarina cajpita divorciarishpa, cutin cazarashca matrimoniotaca ¿congregacionga imashinata ricun? Bibliapi nishcashnaca primero matrimoniomi ¿valin ninchimanllu? Cusa cutin shuj huarmihuan ña cazarashca cajpica, primero matrimoniomanda huarmica ¿ñuca cusa cashcataca cutin perdonanimi nita ushanmanllu? ¿Cati matrimonioca huainayana adulterio juchapi urmashca matrimoniomi ninchimanllu?
Cai tiempocamanga punda huarmi causajujpi, pai nara cutin cazarajpi, o huainayana juchapi na urmajpica, cati matrimonioca huainayana adulterio juchapi urmashca matrimonio cajtami pensapashcanchi. Shinapash divorciarishpa cutin cazaranamanda Jesús parlajushpaca inocente partemandaca na yapa detallecunata curcachu. Pero Taita Diospa ricuipica, na divorciarina cashpata divorciarishpa cutin cazarashpaca huainayana adulterio juchapimi urman nircami. Jesuspa cai yachachishcacunaca divorciarishpa, cutin cazarashpaca primero matrimoniotaca ña chaipi tucuchishcatami ricuchin.
“Cusaca paipa huarmi huainayana juchapi urmashca cajpillami divorciarita ushan. Paipa huarmi napash huainayana juchapi urmashca cajpita divorciarishpa, shujhuan cazarashpaca, huainayana juchapimi urmajunman” (Mat. 19:9).
Cusa ña divorciarishpa cutin shujhuan cazarajpica primero matrimonioca ña chaipi tucuritapachami tucurin. Chaimandami masqui punda huarmi causajujpipash o nara cazarashca cajpipash o huainayana juchapi na urmashca cajpipash congregacionga cati matrimonioca huainayana adulterio juchapi urmashca matrimoniomi nijunataca na charin. b
Callaripica huainayana adulterio juchapi urmajpi matrimonio tucurijtami parlaparcanchi. Pero nara huainayana adulterio juchapi urmashpallata divorciarishpa cutin shuj huarmihuan cazarajpi o na cashpaca divorciarishca jipa huainayana juchapi urmajpi shina jahuapash paipa huarmigu perdonanimi nijpipash, shujhuan cazaraihuan yalijpica primero matrimonioca ña tucuritapachami tucurin. Cutin cati matrimonioca autoridadcunapa ñaupapica legalmi can. Chaimandami La Atalaya del 15 de febrero de 1980 página 30pica, punda cusahuan o punda huarmihuanga ñana tigrai ushana cashcata intindichirca. Divorciarishpa cutin shujhuan cazarajpica primero matrimonioca ña tucurircami. Shinaca punda matrimoniopi imashna causashcamanllata paihuan tigrasha nishpa cutin imatapash ruraitaca ñana ushanllu.
Caipi yachachishcacunaca Taita Diospa ñaupajpi matrimonio yanga cashcata, huainayana adulterio juchapash yangalla cashcataimanga na nijunllu. Chaimandami na divorciarina cajpita paipa huarmimanda divorciarishpa cutin cazarashpaca huainayana adulterio juchapi urmashcamandami, congregacionmanda anciano huauquicunaca comité judicialta rurana tucun. (Cati huarmipash testigo de Jehová cajpicarin, paipash huainayana juchapi urmashcamanda culpable cashcamandami anciano huauquicunaca comité judicialta rurana tucun). Cai matrimonioca huainayana adulterio juchapi urmashca matrimoniomi nishpa na ricujuna cajpipash chai cusaca shina ruraimandaca ashtaca huatacunata congregacionba responsabilidadcunataca na chari ushangachu. Chai nali ruraicunamanda gentecuna nalicachishpa parlashcacunapash tiempohuan tucuillata cungaringacamanmi congregacionbi responsabilidadcunataca na chari ushanga. Chai jahuapash paipa punda huarmi traicionai tucushpa imashna quidashcata, paipa menor de edad huahuacunapash taita jichujpi imashna quidashcatapash ricunarami tucunga (Mal. 2:14-16).
Yangata divorciarishpa cutin shujhuan cazarashpa tauca llaquicunata charinata yaipi charimandami, Testigo de Jehovacunaca Jehová Dios cuenda matrimoniotaca ninan valishca cashcata ricungapaj esforzaripanchi (Ecl. 5:4, 5; Heb. 13:4).
a Cai informacionbica ashtahuan facillla intindi ushangapami cusa juchata ruraj, huarmi inocente cashcata nishpa parlagripanchi. Shinapash Jesús, Marcos 10:11, 12pi nishca shimicunaca tanto jaricunapa, tanto huarmicunapapashmi can.
b Cai tiempocamanga solamente traicionai tucushca huarmi huañujpi o pihuanbash cazarajpi o huainayana juchapi urmajpillami cati matrimonioca huainayana adulterio juchapi urmashca matrimonio canataca saquinga nishpami cripashcanchi. Pero cunan, cai revistapi yachachishcacunaca na shina cashcatami aliguta intindichin.
