1. ¿Imatata seguro capanchi?

 JEHOVATA sirvijcunaca Jehová Dios ñucanchita juyajta pai ñucanchicuna ali cachun munashcataca yachapanchimi (Rom. 8:35-39). Bibliapa consejocunata cazushpaca ñucanchillata beneficiarina cashcatami seguro capanchi (Is. 48:17, 18). Pero na yashcapi imapash problemacuna ricurijpica ¿imatashi rurashun?

2. ¿Ima problemacunatata chari ushapanchiman? Chai problemacunahuan cashpaca ¿imatata pensaripanchiman?

² Jehovata sirvishpapash tucuicunallatami problemacunata charipanchi. Por ejemplo talvez shuj familiami imatapash nishpa o rurashpa llaquichinga. O ñucanchi salud nali cashcamandami pundashna Jehová Diosta sirvitaca na ushapashun. O na cashpaca talvez terremotocunamanda, acapanacunamandami llaquicunata charita ushapanchi. Shinallata talvez ñucanchipa crishcacunamandami catiriashpa llaquichita ushan. Cashna llaquicunata charishpaca: “¿Imashpata ñucata shina pasahuan? ¿Imatapash nalitachu rurashcani? O na cashpaca ¿Jehová Diosca na ayudahuajunllu?” nishpami pensaripanchiman. ¿Nachu huaquinbica shina pensaripashcangui? Shina sintirijushpaca ama desanimaripanguichu Jehovata sirvijcunaca ashtacacunami shinallata sintiripashca (Sal. 22:1, 2; Hab. 1:2, 3).

3. Salmo 34:19​pica ¿imatata yachachin?

³ (Salmo 34:19​ta liipangui). Cai textopica ishcai importante yuyaicunatami ricupashun: 1) Alita rurajcunaca llaquicunata charingami. 2) Chai llaquicunata aguantachunmi Jehová Diosca ayudanga. Jehová Diosca llaquicunata aguantachunga cai mundopi llaquicunata charinallata cashcata yachachunmi cunanmandallata yachachishpa ayudan. Jehová Diosca paita sirvijpica cushilla causaitami charinga nishpami prometishca. Shinapash cai  tiempopica imapash llaquicuna illa causanataca na nijunllu (Is. 66:14). Jehová Diosca ñucanchicuna ali causaiguta charichunmi munan. Chaimandami paraíso alpagupi para siempre ali causaigu tianapi pensarichun munan (2 Cor. 4:16-18). Chaicamanga Jehová Diosca cada punlla llaquicunata ñucanchicuna aguantashpa catichunmi ayudan (Lam. 3:22-24).

4. Cai temapica ¿imatata yachajugripanchi?

⁴ Cai temapica punda tiempopi Jehovata sirvijcunamanda y cunan punllacunapi Jehová Diosta sirvijcunapa ali ejemplocunamandami yachajupashun. Shinallata na yashcapi imapash llaquicunata charinalla cashcatami yachajugripanchi. Pero Jehová Diospi siempre confiajpica paica siempremi ayudanga (Sal. 55:22). Shina llaquicunata charishpaca ¿imatashi ruraiman carcani? Cai ejemplocunaca ¿imashinata Jehovapi ashtahuan confiachun ayudahuan? Cai ejemplocunamandaca ¿imatata yachajui ushani? nishpa pensaripashunchi.

5. Labán runaca ¿imashinata Jacobtaca llaquichirca? (Callari paginapi dibujota ricupangui).

⁵ Bibliapi parlashca Taita Diosta sirvijcunaca na yashcapimi llaquicunata chimbapurana tucurca. Jacob runagupi pensaripashun: Paipa taitaca Labanba shuj ushiguhuan cazarachunmi mandarca. Labanba familiapash Jehová Diosta sirvijcunami carca. Shinallata Jehová Dios bendicianatapashmi nirca (Gén. 28:1-4). Shinaca Jacobca Canaán llactamanda Labán causajuj llactacaman rishpa paipa taitata cazushpami alita rurashcata ricuchirca. Labán runaca Lea y Raquel shuti ushicunatami charirca. Jacob runaguca Labán runagupa cati ushi Raquelmandami enamorarirca. Chaimandami Raquel huarmihuan cazarangapaca Labán runapa 7 añosta trabajangapaj dispuesto carca (Gén. 29:18). Shinapash Jacob runaguta umachishpami Labán runaca paipa ushi Leatara curca. Shinallata shuj semana jipaca siete huatacunata ashtahuan paihuan trabajangapaj tratoshpami Jacob runagutaca Raquel huarmiguhuan cazarachun saquirca (Gén. 29:25-27). Chaita rurashca jahuapash negociocunapipashmi Jacob runagutaca umachirca. Labán runaca Jacobtaca 20 huatacunata nali tratashpami charirca (Gén. 31:41, 42).

6. Jacob runaguca ¿ima llaquicunatata ashtahuan charirca?

⁶ Jacobca shuj llaquicunatapashmi charirca. Jacob runaguca jatun familiatami charirca. Y paipa churicunaca na siemprechu ali llevarin carca. Chaimandami paicunapa huauqui Josetaca esclavotashna jaturca. Shinallata Simeón y Leví runacunaca Jacobpa familiata y Jehová Diostaca nalipi quidachirca. Ashtahuanbash paipa juyashca huarmigu Raquelca paipa cati churita ungushpami huañurca. Shinallata yarjai tiempo chayajpimi Jacob runagu mayorllagu cashpapash Egipto llactaman causangapaj rina tucurca (Gén. 34:30; 35:16-19; 37:28; 45:9-11, 28).

7. Jehová Diosca Jacob runaguhuan cushilla cashcataca ¿imashinata ricuchirca?

⁷ Jacob runaguca llaquicunata charishpapash Jehová Diospi y paipa promesacunapipash confiashpami catirca. Shinallata Jehová Diosca Jacob imata rurashcata ricushpa, paihuan cushilla cashcatami ricuchirca. Por ejemplo Labán runa Jacobta cutin cutin umachishca cajpipash, Jehová Diosca Jacob runagu ashtaca cosascunata charichunmi ayudarca. Shinallata Jacobca paipa churigu José huañushcami can yashpami pensarca. Chaimandami ashtaca huatacuna jipa paihuan cutin tuparishpaca Jehová Diosta ninanda agradicirianga. Jacobca Jehová Dioshuan ali amigo cashcamandami chai tucui llaquicunataca aguantai usharca (Gén. 30:43; 32:9, 10; 46:28-30). Cunanbipash na yashcapi llaquicuna shamujpica Jehová Dioshuan ali amigocuna cashpami llaquicunata aguantai ushashun.

8. Rey Davidca ¿imatata rurangapaj munarca?

 ⁸ Rey Davidca Jehová Diosta adorangapaj pai rurangapaj munashca tucui cosascunataca na rurai usharcachu. Por ejemplo Davidca Jehová Diospa templo huasiguta rurangapami tucui shungu munarca. Chaimandami profeta Natanda tapujpica paica: “Tucui imata rurangapaj cambaj shungupi yarijushcataca rurailla. Taita Diosca canhuanmi” nircami (1 Crón. 17:1, 2). Natán chaita nijta uyashpaca Davidca ninandami cushijurianga. Chai jatun trabajota callaringapaca imata cashpapash uchallami rurai callaringapaj munashcanga.

9. Natán villashca shimicunata uyashpaca Davidca ¿imatata rurarca?

⁹ Shinapash chai tutallatami profeta Natanga “canga Diospa templotaca na huasichinguichu. Canba churimi huasichigrin” nishpa Davidmanga villarca (1 Crón. 17:3, 4, 11, 12). Chaita uyashpaca Davidca ¿imatata rurarca? Davidca paipa churi Salomón templo huasiguta rurachunmi materialcunata y culquigucunatapash tandachi callarirca (1 Crón. 29:1-5).

10. Jehová Diosca Davidtaca ¿imashinata bendiciarca?

¹⁰ Jehová Dios canga ñuca templo huasita na ruragringuichu nishca jipallami Davidhuanga shuj tratota rurarca. Jehová Diosca Davidtaca, canba familiamanda llujshishca shuj reymi para siempre mandanga nircami. Shina nishpami Davidtaca bendiciarca (2 Sam. 7:16). Jesús ña mil huatacunata mandajujpi David paipa familiamanda Jesús cajta chayaj chayashpaca ninandami cushijunga. Cai ejemploca Jehová Diosta ñucanchi munashcashna na sirvi ushashca cashpapash Jehová Dios ñucanchita bendicianata seguro cai ushashcatami yachachin.

11. Punda cristianocunaca ¿ima bendiciongunatata chasquirca? (Hechos 6:7).

¹¹ Punda tiempopi cristianocunaca na yashcapimi huaquin llaquicunata charirca. Por ejemplo Diospa Gobierno mandachun munashpapash chai Gobierno ima hora chayamunataca na yacharcachu (Hech. 1:6, 7). Shinaca chai punlla chayamuchun shuyashpandimi paicunaca predicashpa catirca. Chai cristianocuna shuj shuj pushtucunapi predicanajujta ricushpami Jehová Dios paicunata bendiciajushcata cuenta japirca (Hechos 6:7​ta liipangui).

12. Yarjai tiempo chayajpica punda cristianocunaca ¿imatata rurarca?

¹² Punda cristianocuna causashca tiempopica “cai alpa enteropica” ninan yarjai tiempomi chayarca (Hech. 11:28). Chai shinlli tiempocunaca cristianocunatapashmi llaquichirca. Shinallata huaquin taitacunaca seguromi paicunapa familiata imashina mantinishpa catinamanda preocupado cashcanga. Shinallata Jehová Diosta ashtahuan sirvingapaj munanajun jovengunapash, “¿ashata shuyanacha cani?” nishpami pensaririanga. Paicunapa causaipi cambiocuna tiajpipash chai huauquipanicunaca predicashpa Judea llactamanda huauquipanicunaman ima charishcaguta tucui shunguhuan carashpami catirca (Hech. 11:29, 30).

13. Yarjai tiempopica cristianocunaca ¿ima bendiciongunatata chasquirca?

¹³ Chai shinlli punllacunapica cristianocunaca ¿ima bendiciongunatata chasquirca? Minishtirishca cosascunata chasquishca cristianocunaca Jehová Dios paicunata cuidajushcatami ricurca (Mat. 6:31-33). Shinallata paicunata ayudashca huauquipanicunahuanbash ashtahuan alimi llevari callarishcanga. Shinallata imagutapash carashpa o llaqui apashca huauquipanicunata ayudaj huauquipanicunaca cushillami sintirishcanga (Hech. 20:35). Chai cambiocuna tiajpipash ali cosascunata rurashpa catishcamandami Jehová Diosca paicunata bendiciarca.

14. Apóstol Pablo y Bernabetapash ¿imata pasarca? Shinallata ¿imatata rurashpa catirca? (Hechos 14:21, 22).

¹⁴ Punda tiempopi cristianocunataca huaquinbica na yashcapimi catiriashpa llaquichin carca. Listra llactapi Bernabé y apóstol Pablo predicanajushpa ima pasashcata ricupashun. Callaripica  gentecunaca paicunata uyashpami aliguman chasquirca. Shinapash jipamanga huaquin contracunaca gentecuna Pablopa contra shayarichunmi convincirca. Chaimi gentecunaca Pablota rumicunahuan pigashpa, huañushcami can yashpa shitashpa saquirca (Hech. 14:19). Shina pasashca cajpipash Pablo y Bernabepash shuj pushtuman rishpami predicashpa catirca. Shina rurashcamandami paicunaca ashtaca gentecuna Jesuspa ‘discipulocuna’ tucuchun ayudarca. Shinallata huauquipanicunata animashpa ali ejemplota ricuchishpami ayudarca (Hechos 14:21, 22​ta liipangui ). Catiriashpa llaquichijpipash Pablo y Bernabeca na desanimarircachu, chaimandami ashtaca gentecuna beneficiarirca. Shinallata ñucanchicunapash na desanimarishpa Jehová Diospa mingashcacunata pactachishpa catishpaca ashtaca bendiciongunatami charipashun.

15. Alexander Macmillan huauquigupa ejemplomandaca ¿imatata yachajupangui?

¹⁵ 1914 huata nara chayajpillata Jehová Diosta sirvijcunaca huaquin cosascunaca ñapachami pactarimunga nishpami shuyanajurca. Cunanga huauqui Alexander Macmillan causashca tiempopi pensaripashunchi. Chai tiempopi ashtaca huauquipanicunashnami huauquigupash Jesushuan mandangapaj ñapachami rishun nishpami pensanajurca. Cai huauquigu 1914 huatapi septiembre quillapi shuj discursota cujushpaca: “Talvez cai viajemi Bibliamanda ñuca último discurso canga” nircami. Chai discursoca na ultimochu carca. Shinallata huauquiguca cashna nishpa escribirca: “Huaquingunaca jahua cieloman Jesushuan mandangapaca ñallami rishun nishpami pensarcanchi. Shina pensanajunapa randica Jehová Diosta sirvishpami ocupado yalina carcanchi” nircami. Chaimandami cai huauquiguca cushilla ashtahuan predicashpa, paicunapa crishcacunamanda carcelpi caj huauquipanicunata animashpa, ña mayorllagu cashpapash tandanajuicunaman rinata na saquishpami catirca. Jesushuan mandangapaj rina tiempo chayangacamanga cai huauquiguca paipa tiempotaca alipachami aprovecharca. Shina rurashcamandaca ¿imashinata beneficiarirca? Cai huauquigu nara huañushpallata 1966 huatapica cashna nishpami escribirca: “Cunan punllacamanmi shinlli feta charishpa catipashcani” nircami. Cai ali ejemploca seguromi ashtahuanbachaca cai mundopi llaquicunata aguantashpa catinajuj huauquipanicunatami ninanda ayudajupashca (Heb. 13:7).

16. Huauqui Jennings y paipa huarmigupash ¿ima llaquicunatata charirca? (Santiago 4:14).

¹⁶ Ashtaca Jehovata sirvijcunaca cungashcapimi imapash unguicunata charita ushan. Cunanga huauqui Herbert Jenningspa experienciata ricupashun. Huauquiguca paipa huarmigundi Ghana llactapi misionero shina cushilla sirvinajushcatami parlan. b Shinapash shuj tiempo jipaca huauquigutaca psicosis maniacodepresiva nishca millai unguita charingui nishpami doctorca nirca. Huauquigu Jenningsga chai llaquita charimandami Santiago 4:14​pi shimicunata yarishpami “cayandi punlla imapash llaquicuna japi ushashcatami” nirca, (chai textota liipangui). “Chai llaquita charimandami Ghana llactamandaca rina tucurcanchi. Shinallata ñucanchi juyashca amigocunamandapashmi dispidirishpa, Canadá llactaman tigrashpa shuj tratamientota catina tucurcani” nishpami escribirca. Cai huauquigu chai shinlli llaquicunata charijpipash Jehová Diosca huauquiguta y paipa huarmigupash Jehová Diosta sirvishpa cati ushachunmi ayudashpa catirca.

17. Huauqui Jenningspa experienciaca ¿imashinata shuj huauquipanicunata ayudashca?

 ¹⁷ Huauqui Jenningspa experienciaca shuj huauquipanicunataca ninandami ayudashca. Shuj paniguca cashna nishpami escribirca: “Jennings turigupa experienciaca shungumanmi chayahuarca. Jennings turiguca paipa saludta cuidangapami shuj jatun privilegiota saquina tucurca. Cai experienciata yachanami ima llaquicuna ricurimujpipash, cai llaquicunata chimbapurai ushachun ayudahuarca”. Shuj huauquigupash cashna nishpami escribirca: “Ñuca congregacionbica 10 huatacunata yalimi anciano shina sirvircani. Shinapash depresión unguita charimandami anciano shina sirvinata saquina tucurcani. Chaimandami nalipacha, llaquilla sintirishpa huauquipanicunapa experienciacunata liingapapash na munarcani. Pero huauqui Jennings llaquicunata charishpapash ñaupaman catishcata yachanami shinlli tucushpa ñucapash ñaupaman catichun ayudahuarca” nircami. Cai experienciacunaca ñucanchicuna llaquicunata charishpa aguantashpa catijpica, shuj huauquipanicunapash aguantashpa catichun ayudai ushashcatami yarichin. Ñucanchi munashcashna na ali causai ushashpapash imapash llaquicunata charishpa aguantashpaca, shuj huauquipanicunapash shinlli feta charishpa aguantashpa catichun ayudaita ushapanchi (1 Ped. 5:9).

18. Nigeria llactamanda viuda panigupa ejemplomandaca ¿imatata yachajupanchi? (Panigupa experienciata ricuchij fotocunata ricupangui).

¹⁸ COVID-19 pandemia unguica ashtaca huauquipanicunatami llaquichishca. Por ejemplo Nigeria llactamanda shuj viuda paniguca ashalla micunagutami charirca y culquigutapash na charircachu. Shuj viajeca ashalla último arrozgutallami paniguca charirca. Chaimi cai panigupa ushiguca ¿imatashi jipamanga micushun? nishpami tapurca. Shina tapujpimi paniguca micunaguta y culquigutapash ñana charinchichu, pero Sarepta llactamanda viuda huarmigupa ejemplotami catina canchi nircami. Panigucunaca cai último micunaguta yanushca jipaca Jehová Diospimi confiana carca (1 Rey. 17:8-16). Panigucuna chai punllapa almuerzota nara rurajpillatami, huauquipanicunaca minishtirishca micunaguta carangapaj chayarca. Chai micunaguca ishcai semana yalitami sirvina carca. Chaita ricushpami panigu paipa ushiguman ima nijta Jehová  Dios uyashcata cuenta japirca. Na yashcapi imapash llaquicuna ricurijpi Jehová Diospi tucui shunguhuan confiashpaca paimanga ashtahuanmi quimirishun (1 Ped. 5:6, 7).

19. Alexéi Yershov huauquiguca ¿ima llaquicunatata aguantana tucurca?

¹⁹ Tauca huatacunatami ashtaca huauquipanicunaca na yashcapi catiriashpa llaquichi callarijpi aguantana tucushca. Rusia llactamanda Alexéi Yershov huauquigupa experienciata ricupashun. 1994 huatapi testigo de Jehová tucungapaj bautizarijpica pipash na jarcajpi espiritual cosascunataca tucuicunallata tranquilomi ruran carca. Shinapash tiempohuanga Rusia llactapica pundashna espiritual cosascunata ruraitaca ñana usharcanchichu. Huata 2020​pica chai llactapi soldadocunaca huauqui Yershovpa huasiman yaicushpami pai charishca cosascunata mascashpa quichurca. Huaquin quillacuna jipaca chai llactamanda autoridadcunaca huauquiguta carcelpi churangapami juiciota rurarca. Shina jahuapash paica culpablemi can nishpa juchachingapaca, shuj personapa grabashca videocunatami utilizarca. Cai personaca Bibliamanda yachajungapaj munaita charini nishpa llullashpami cazi shuj huata yalita estudiajushca carca. Chai personaca umachishpami chashna nalita rurashca carca.

20. Huauquigu Yershov Jehová Dioshuan ashtahuan ali amigo cashpa catingapaca ¿imatata rurashca?

²⁰ Alexéi Yershov huauquiguca cai llaquicunata charishcamandaca ¿imatata yachajui ushashca? Paica Jehová Dioshuanga ashtahuan ali amigo tucui ushashcatami cuenda japishca. Paica ninmi: “Ñuca huarmiguhuanga cazi siempremi ishcandi Jehová Diosta mañanchi. Jehová ayudashcamandallami cai llaquicunataca mishashpa ñaupaman cati ushashcanchi” ninmi. Shinallata ninmi: “Bibliata estudianami ama yapata desanimarichun ninanda ayudahuashca. Shinallata punda Diosta sirvijcunapa ejemplopimi pensarini. Chai ejemplocunaca tranquilo cana y Jehovapi confiana ninan minishtirishca cashcatami ricuchihuashca” ninmi.

21. Cai temapica ¿imatata yachajupashcanchi?

²¹ Cai temapica ¿imatata yachajupashcanchi? Cai mundopica cungashcapimi llaquicunaca japita ushan. Shinapash Jehová Diospi confiajpica Jehová Diosca siempremi ñucanchita ayudangapaca listo canga. Cai temapa textopi nishcashnami: “Imatapash cashcatapacha rurajtaca, ashtaca llaquicunami japin. Ashtahuangarin tucui chaicunamandaca, Mandaj Diosmi cacharichinga” nijunmi (Sal. 34:19). Chaimandami llaquicunapillaca na concentrarina capanchi. Ashtahuangarin Jehová Dios ñucanchita ayudangapaj poderta charishcapimi pensarina capanchi. Shinallami apóstol Pablo nishcashna: “Taita Dios poderta cujpimi, ñucaca tucui cosascunata mishangapaj fuerzata charipani” nita ushapashun (Filip. 4:13).