1. Shuj huahuaguca huañushcacuna causarina esperanzapi tucui shungu feta charishcataca ¿imashinata ricuchirca?

 MATTHEW shuti jovenguca shuj millai unguita charishcamandami tauca viajecunata operarina tucushca. Pai siete huatacunata charijpica cashnami pasarca. Shuj punllaca paihuan, paipa familiahuan JW Broadcasting^® programata ricunajushpami chai programa ña tucurijujpi, cántico videota ricushpaca shuj huauquipanicuna huañushcacuna causarishcata tuparishpa chasquinajujta ricuchirca. b Chaita ricushpami paipa taitamamapaman quimirishpa, paicunapa maquita japishpa cashna nirca: “Ricuichi. Ñuca huañushpaca causarishami. Chaipi shuyahuanguichi. Tucuimi ali llujshinga” nirca. Paipa huahuagu huañushcacuna causarinapi tucui shungu feta charishcata ricushpaca paipa taitacunaca ¿imashinashi sintirirca? Matthew huahuagupaca huañushcacuna causarina esperanzaca ciertopachami carca.

2, 3. Cutin causachina esperanzapi pensarinaca ¿imamandata ali can?

² Taita Dios huañushcacunata causachina nishca promesapi huaquinbillapash pensaringapaj tiempoguta llujchinaca alimi can (Juan 5:28, 29). ¿Imamandata ali can? Ñucanchicunaca na yashcapi shuj ungui japinata o ñucanchipa familiamanda maijanbash huañunataca na yachapanchichu (Ecl. 9:11; Sant. 4:13, 14). Jehová Dios cutin causachina nishca esperanzata charinami shinlli llaquicuna shamujpipash aguantachun ayudanga (1 Tes. 4:13). Bibliapica ñucanchi Taita Diosca ñucanchita ali ali rijsishcata, ñucanchita ninanda juyashcatami ricuchin (Luc. 12:7). Jehová Diosca ñucanchita ali ali rijsimandami ñucanchi imashna cashcashnallata, ñucanchi charishca tucui pensamientocunahuanllata cutin causachitaca ushanga. Jehová Diosca ñucanchita ninanda juyaimandami para siempre causana oportunidadta carajun. Shinallata masqui huañujpipash cutin causachina oportunidadtami carajun.

³ Cai yachajuipica Jehová Dios cutin causachina promesapi imamanda  confiana cashcatami ricugripanchi. Cai temapa callari textopica: “Jesusca quiquinba turica causaringami” nircami (Juan 11:23). Cai shimicunata ashtahuan yachajunaca ñucanchipa fe ashtahuan shinlli cachunmi ayudanga. Ultimopica Jehová Dios cutin causachisha nishca esperanzapi ashtahuan tucui shungu cringapaj imata rurana cashcatami ricupashun.

4. Shuj promesapi confiangapaca ¿imacunapita seguro cana capanchi? Shuj ejemplomanda parlapai.

⁴ Shuj promesapi confiangapaca prometij persona prometishcata cumplina munaita charishcapi, cumplingapaj poderta charishcapimi seguro cana capanchi. Por ejemplo, ñucanchipa huasi ninanda huairahuan tamiashcamanda dañarishca cashcanman. Shinapi shuj amigo shamushpa, “canba huasiguta arreglashpami ayudasha” nishcanman. Chai amigo ciertopacha ayudana munaita charijpi, huasicunatapash alipacha construinata yachajpi, herramientacunatapash charijpimi pai ayudanapica seguro sintiripanguiman. Paipa nishcacunapica confiapanchimanmi. Jehová Dios cutinmi causachisha nishca promesamandapash ¿imatata pensapanchi? Jehová Diosca ¿pai prometishcata cumplina munaita, cumplingapaj poderta charinllu?

5, 6. Jehová Dios huañushcacunata causachingapaj munajtaca ¿imamandata seguro capanchi?

⁵ Jehová Diosca huañushcacunata causachina munaitami charin. Taita Diosmi huañushcacunata causachina promesataca Bibliapi escribichishpa saquishca (Is. 26:19; Os. 13:14; Apoc. 20:11-13). Jehová Diosca paipa prometishcacunataca pactachinbachami (Jos. 23:14). Jehová Diosca huañushcacunataca causachingapapachami munan. ¿Imashpata shina nipanchi?

⁶ Job runagupa nishca shimicunapi pensaripashunchi. Paica pai huañujpipash Jehová Dios paita causachingapaj munanataca seguromi carca (Job 14:14, 15). Jehová Diosta sirvijcunaca ashtacacunami huañushca. Paicunatapash causachina munaitami charin. Paicuna sano, cushilla causachunmi Jehová Diosca causachingapaj munan. Jehová Diosca paimanda na yachajushpa huañushca gentecunatapashmi causachingapaj munan (Hech. 24:15). Paicunapash paipa amigo cana, para siempre causana oportunidadta charichunmi munan (Juan 3:16). Shinaca Jehová Dios huañushcacunata causachina munaita charishcataca seguromi capanchi.

7, 8. ¿Imamandata Jehová Dios huañushcacunata causachingapaj poderta charishcataca seguro caita ushapanchi?

⁷ Jehová Diosca huañushcacunata causachingapaca tucui podertami charin. Paica “Tucui Ushaita” Charij Diosmi can (Apoc. 1:8). Paica contracunata mishangapaj y huañuita mishangapaj podertami charin (1 Cor. 15:26). Chaita yachanami tranquilo sintirichun y shinlli feta charichunbash ayudan. Emma panigupa experienciata ricupashun. Pai y paipa familiapash Segunda Guerra Mundialpimi ashtaca llaquicunata chimbapurana tucurca. Paica campo de concentracionbi familiarcuna huañushcamanda paipa ushigu llaquirijujpimi paita consolangapaj munaimanda cashna nirca: “Huañushca gentecuna nunca na causarijpica huañui Taita Diosta yali poderta charishcatami ricuchijunman ¿nachu?” nircami. Shinaca Jehová Diosta yali podertaca pipash na charinllu. Paimi tucuicunaman causaita curca. Chaimandami paillata pitapash causachingapaj poderta charin.

⁸ Jehová Diosca tucuitami yarita ushan. Chaimandapashmi huañushcacunata causachi ushashcataca yachapanchi. Bibliapica Jehová Diosca tucuilla estrellacunapa shutita yachajtami ricuchin (Is. 40:26). Shinallatami tucuilla huañushca gentecunatapash yarin (Job 14:13; Luc. 20:37, 38). Jehová Diosca shuj personamandaca tucui tucuitami yarita ushan. Por ejemplo, pai imashina causashcata, pai imashina pensamientota charishcatapashmi yarita ushan.

9. Jehová Dios huañushcacunata causachisha nishcapica ¿imamandata cripangui?

 ⁹ Caicamanga Jehová Dios huañushcacunata causachina munaita y poderta charishcatami ricupashcanchi. Shinaca Jehová Dios huañushcacunata causachinapimi confiaita ushapanchi. Shinallata huaquin gentecunata ña causachishca cashcamandami Jehová Dios huañushcacunata causachinataca yachapanchi. Punda tiempocunapica Jehová Diosca Jesusman y huaquin jaricunamanga huañushcacunata causachichunmi poderta curca. Cunanga Jesús shuj personata causachishcata ricupashunchi. Chaitaca Juan capítulo 11​pi ricupashunchi.

10. Jesús Jordán yacu chimba ladopi predicajujpica ¿imata pasan? Shinapash ¿imamandata chaipi quidanata decidin? (Juan 11:1-3).

¹⁰ (Juan 11:1-3​ta liipangui). Jesusca Betania llactapica Lázaro y paipa ishcai pani María y Marta ali amigocunatami charirca (Luc. 10:38-42). Huata 32 ña tucurijujpimi Lázaro runaguca ninanda irquiyan. Chaimi paipa ishcai panicunaca ninanda preocuparishpa Jesusman villachun cacharca. Jesusca Jordán yacu chimba ladopimi carca. Chaiman chayangapaca ishcai punllatami rina tucurca (Juan 10:40). Shinapash Jesús chaira yachaj chayajhuanmi Lázaro runaguca huañun. Jesús Lázaro huañushcata yachashpapash Betania llactaman nara rishpallata Jordán yacu chimba ladopi ishcai punllata quidanatami decidin. Shinaca Jesús Betania llactaman ña chayajpica Lázaro runaguca chuscu punllatami huañushca carca. Lázaro huañushcata yachashpapash ¿imamandata Jesusca na ucha rirca? Jesusca Jehová Diospa poderhuanlla causachita ushashcata ricuchingapaj y paipa amigocunatapash ayudangapaj munaimandami shina rurarca (Juan 11:4, 6, 11, 17).

11. Ali amigo canamandaca ¿imatata yachajupanchi?

¹¹ Ali amigo canamandaca ¿imatata yachajupanchi? María y Marta Lázaro huañujujta Jesusman villachun cachaspaca Jesustaca, “Betania llactaman shamupai” nishpaca na nircachu. Jesusmanga paipa juyashca amigo huañujujta villachunllami cacharca (Juan 11:3). Lázaro huañujpica Jesusca pai maipi cashca pushtumandallatami Lázaro runagutaca causachita ushanman carca. Shinapash María y Martapash paipa alipacha amigacuna cashcamandami paicunata cumbangapaj Betania llactaman rirca. Quiquinga ¿Jesushna ayudangapaj dispuesto ali amigota charipanguichu? Shina ali amigota charishpaca ‘llaqui punllacunapi’ cai ali amigo quiquinda ayudanata seguromi caita ushapangui (Prov. 17:17). Jesuspa ejemplota catishpaca ñucanchipashmi shuj ali amigo caita ushapanchi. Cunanga Jesús imata rurashcata ricushpa catipashunchi.

12. Jesusca ¿imatata Martamanga prometirca? Martaca ¿imamandata chai promesapica confiaita usharca? (Juan 11:23-26).

¹² (Juan 11:23-26​ta liipangui). Jesús Betania llacta ladopi cajta yachaj chayashpaca Martaca paita tuparingapami uchalla rin. Paihuan tuparishpaca: “Señor Jesús, quiquin caipi cashca cajpica ñuca turiguca na huañupanmanllu carca” nircami (Juan 11:21). Jesusca Lázaro runagutaca ñapashmi causachita ushanman carca. Pero Jesusca tucui gentecuna Diospa poderhuan causachi ushashcata ricuchunmi munarca. Jesusca Martataca: “Quiquinba turica causaringami”  nishpami prometirca. Shinallata tucui shunguhuan Marta crichunmi Jesusca: “Ñucami causachijpash, causaita causagrinata carajpash cani” nircami. Jehová Diosmi Jesusmanga huañushcacunata causachi ushana poderta curca. Lázaro runagu nara huañujpillatami Jesusca chairalla huañushca shuj cuitsaguta causachirca. Shinallata shuj jovendapashmi causachirca (Luc. 7:11-15; 8:49-55). Pero Lázaro runaguca ña chuscu punllatami huañushca carca. Paitaca ¿causachita ushanachu carca?

13. Juan 11:32-35​pi ricuchishcashnaca María y shujcunapash huacanajujta ricushpaca Jesusca ¿imatata rurarca? (Dibujota ricupangui).

¹³ (Juan 11:32-35​ta liipangui). Lázaro runagupa caishuj pani Mariapash Jesuspaman quimirishpa imata nishcata ricupashunchi. Paica: “Señor Jesús, quiquin caipi cashca cajpica ñuca turiguca na huañupanmanllu carca” nircami. María y shujcunapash llaquillapachami carca. Paicuna llaquilla huacanajujta ricushpaca Jesuspash ninandami llaquiyarca. Jesusca paipa amigocunata ninanda llaquishcamandami paipash huacai callarirca. Shuj juyashca persona huañujpi ninanda llaquirijtaca Jesusca alimi intindirca. Chaimandami paipa amigocuna charishca llaquitaca tucuchishpa saquingapaj munarca.

14. María huarmigu huacajpi Jesús ninanda llaquirishcata yachashpaca ¿imatata Jehová Diosmandaca yachajupanchi?

¹⁴ María huacajujpi Jesús llaquirishpaca Jehová Diospash ninan llaquij Dios cashcatami ricuchin. ¿Imamandata shina nipanchi? Caishuj temapi yachajushcashnaca Jesusca paipa Taita imata pensajta, imata sintishcatami ricuchin (Juan 12:45). Shinaca Jesús paipa amigocuna llaquilla cajta ricushpa huacashcata yachashpaca Jehová Diospash ñucanchicuna llaquilla cajta ricushpa ñucanchimanda llaquirishcatami yachapanchi (Sal. 56:8). Caita yachashpaca ¿nachu Jehová Diosman ashtahuan quimiringapaj munapanchi?

15. Juan 11:41-44​pi nishcashnaca Lazarota pambashca bovedapica ¿imata pasarca? (Dibujota ricupangui).

¹⁵ (Juan 11:41-44​ta liipangui). Jesusca Lazarota pambashca bovedaman chayashpami chaiman yaicuna entradapi tapashca rumita anchuchichun mandarca. Shinapash Lazaropa pani Martaca: “Señor Jesús ñamari chuscu punllacunata huañushca, ña ashnajungamari” nircami. Chaimi Jesusca: “¿Nachu nircani, crishpaca Taita Dios ninan poderta charijtami ricui  ushangui?” nirca (Juan 11:39, 40). Chaipimi Jesusca jahua cielota ricushpa tucuicunapa ñaupapi Taita Diosta mañarca. Jesusca pai ruragrijuj milagrota Jehovapa ayudahuan ruragrijushcata gentecuna yachachunmi munarca. Chai jipaca: “Lázaro, llujshimui” nishpami caparirca. Shina caparijpimi Lazaroca pai pambashca bovedamandaca llujshirca. Jesusca huaquingunapa ricuipica na crinayai milagrotami rurarca (español shimipi, Juan 11:17​pa nota de estudiota ricupangui).

16. Juan capítulo 11​pi Jesuspa milagroca Jehová Dios huañushcacunata causachinapi ashtahuan confiachunga ¿imashinata ayudan?

¹⁶ Juan capítulo 11​pi Jesús rurashca milagroca Jehová Dios huañushcacunata cutin causachina esperanzapi ashtahuan confiachunmi ayudan. Jesús Marta huarmiguman imata nishcata yaripashun. Paica: “Quiquinba turica causaringami” nircami (Juan 11:23). Jesusca paipa taitashnallatami chai promesataca pactachingapaj munan. Paicunaca chaita pactachingapachami. Jesús huacashpaca huañui gentecunata ninanda llaquichishcamanda huañuitaca ciertopacha tucuchingapaj munashcatami ricuchirca. Shinallata Lazarota causachishpaca huañushcacunata causachingapaj poderta charishcatami cutin ricuchirca. Jesús Marta huarmiguman imata nishcata cutin yaripashun. Jesusca: “¿Nachu nircani, crishpaca Taita Dios ninan poderta charijtami ricui ushangui” nircami (Juan 11:40). Jehová Diosca huañushcacunata causachishami nishcami. Jehová Dios chai shimicunata pactachinataca crita ushapanchimi. Pero chai esperanzapi tucui shungu confiangapaca ¿imatata rurai ushapanchi?

17. Huañushcacuna causarishcata Bibliapi liishpaca ¿imatata rurana capanchi?

¹⁷ Huañushcacuna causarishcataca aliguta pensarishpa liipashunchi. Bibliapica ochopura gentecuna cai alpapillata causangapaj cutin causarishcatami parlan. c Chaicunamanda ashtahuan aliguta yachajungapaj esforzaripashunchi. Chaicunata yachajujushpaca chai causarishca gentecuna  ciertopacha tiashcatami yarina capanchi. Chai ejemplocuna imashna ñucanchita ayudajta ricupashunchi. Shinallata chai ejemplocuna Jehová Dios huañushcacunata causachingapaj munashcata, chaita rurangapaj poderta charishcatapash imashina ricuchijta ricupashunchi. Ashtahuanbachaca Jesús causarishcapi pensaripashunchi. Pai causarishcaca tucuita yali importantepachami carca. Jesús causarishcataca ashtaca ashtaca gentecunami ricurca. Jesús causarishcamandami shujcunapash cutin causarinataca tucui shungu crita ushapanchi (1 Cor. 15:3-6, 20-22).

18. Huañushcacuna causarinamanda parlaj canticocunata candanaca ¿imamandata ali can? (Notata ricupangui).

¹⁸ Huañushcacuna causarinamanda parlaj “musicacunata” candapashunchi (Efes. 5:19). d Chai canticocunaca huañushcacuna causarinapi ashtahuan crichun ayudashcamandami uyana capanchi. Shinallata familiahuan Bibliamanda yachajujushpami chai canticocunata candashpa, canticocunapa letracunamanda imata yachajushcatapash parlaita ushapanchi. Chai canticocunapa letracunata yaringapaj y ñucanchi shungupi charingapami chai canticocunataca de memoria yachajuna capanchi. Shinami imapash llaquicunamanda ñucanchi causai peligropi cajpi o shuj familiar huañujpica Jehová Diosca paipa espíritu santohuan cai canticocunata yarichun ayudapanga. Cai canticocunata yarinami ñucanchita cushichita y shinllichita ushanga.

19. Huañushcacuna causarinapi pensarishpaca ¿imacunatallata pensarita ushapanchi? (“ ¿Imatata tapupanguiman?” nishca recuadrota ricupangui).

¹⁹ Paraisopi ña cashcatashna pensaripashunchi. Jehová Diosca paraisopi cashcatashna pensaita ushachunmi ñucanchitaca rurashca. Chaimandami shuj paniguca: “Paraisopi canatami siempre pensarijuni. Shina pensarijushpaca paraisopi sisagucunatapash gushtu ashnachijujtashnami sintini” nin. Punda tiempopi Jehová Diosta ali sirvijcunata rijsishpaca imashna canapi pensaripashunchi. Paicunamandaca ¿pitata ashtahuan rijsingapaj munapangui? Paitaca ¿imatata tapupanguiman? Shinallata ñucanchipa huañushca familiacunahuan cutin tuparinapi pensaripashunchi. Paicunahuan imacunamanda parlanata, paicunata cutin ugllanata, shinallata paicunata ricushpa cushi cushi sintirinatapash pensaripashunchi.

20. ¿Imatata rurashpa catina capanchi?

²⁰ Jehová Dios huañushcacunata causachisha nishcamandami paitaca ninanda agradicipanchi. Pai yachai promesata pactachingapaj munaita, ushaita charishcamandami chaita pactachinataca seguro capanchi. Jehová Diosca cada uno ñucanchicunata, “cangunapa huañushcacunaca causaringami” nijunshnami can. Huañushcacuna causarina esperanzapi ñucanchi feta ashtahuan shinlliyachingapaj esforzaripashunchi. Shina rurashpaca ñucanchillatami Jehová Diosman ashtahuan quimiripashun. Huañushcacuna causarina esperanzataca Jehová Diosmi caran.