¿CONGREGACIONBI imapash responsabilidadta charingapaj munapanguimanllu? Huaquinbica mayoriajushcamanda, salud nali cashcamanda, familiata cuidangapaj culquigu faltajlla cashcamandami tal vez pundacunapi charishca responsabilidadta o cunanbi shuj huauqui charishca responsabilidadtaca congregacionbi ñana chari ushapangui. Jehovapa organizacionbi imapash cambiocuna tiajpimi tauca huatacunata charishca privilegiotaca ñana charipangui. Tal vez caicunamandami Jehová Diostaca ñucanchi munashcashnaca ñana sirvi ushapanchi, chaimi llaquilla sintiripanchi. Shinapash ama llaquilla sintirijungapaj, ama ñucanchimandallata culirarijungapaj o ama resintirijungapaca ¿imatata rurana capanchi? Cushilla cangapaca ¿imatata rurana capanchi?

Bautizaj Juanba causaimandaca ashtacatami yachajui ushapanchi. Bautizaj Juanga alipacha privilegiocunatami charirca. Shinapash paipa causaipi imacunalla pasanata, Jehovata sirvijuimanda prezo yalina cashcatapash paica na yachashcangachu. Llaquicunata charishpapash paica cushillami Jehovata sirvirca. Cushilla sirvishpa catichunga ¿imata Bautizaj Juandaca ayudarca? Ñucanchicunapash llaquicunata charishpaca ¿imashinata cushilla sirvishpa cati ushapanchi?

Huata 29 abril quillapica, Jehová mandajpimi Mesías chayamunata Bautizaj Juanga gentecunaman villachi callarirca. Paica: “Juchayu cashcamanda ninanda llaquirishpa, Diospajman tigrarichi. Jahua pachamanda shamuj mandanaca, ñami pactamushca” nishpami villachijurca (Mat. 3:2; Luc. 1:12-17). Ashtacacunami pai nishcataca aliguman chasquirca. Caru llactacunamanda gentecuna shamushpami Bautizaj Juandaca uyanajurca. Taucacunami arrepintirishpa bautizarirca. Bautizaj Juanga na manllashpami, fariseocunataca na arrepintirijpica llaquichi tucunguichimi nirca (Mat. 3:5-12). Huata 29 octubre quillapimi Jesusta bautizana privilegiota charirca, cai punllataca imahorapash na cungashcangachu. Jesús Mesías cashcata yachaimandami chai punllamandapacha gentecunataca Jesusta catichi nishpa animarca (Juan 1:32-37).

Bautizaj Juan alipacha paipa asignacionda pactachishcamandami, Jesusca paimandaca cashna nirca: “Huarmimanda huacharishcapurapica, Bautizaj Juanda yali ali runaguca, shujllapash na tianllu” nishpa (Mat. 11:11). Bautizaj Juanga, Jehovata sirvijushcamandaca  cushijushcapachami carca. Jehová Diospash paitaca ashtacatami bendiciashcarca. Bautizaj Juan shinami cunambi ashtaca huauquipanicunaca Jehovata tucui shunguhuan sirvimandaca ashtaca bendiciongunata chasquishca. Huauqui Terry, paipa huarmigu Sandramanda ashaguta parlapashun. Paicunaca 50 huatacunatami tiempo completopi sirvinajun. Huauqui Terryca ninmi: “Tauca privilegiocunatami charipashcani. Precursor regular, betelita, precursor especial, superintendente de circuito, superintendente de distrito shinami sirvipashcani. Cunanga cutinmi precursor especial capani” nishpa. Cai asignaciongunata chasquinaca ninandami cushichin. Shinapash Bautizaj Juanmandaca cushilla cangapaca asignaciongunata charinallaca na minishtirishca cashcata, cushilla causangapaca cada uno esforzarina cashcatami yachajupashun.

Bautizaj Juanga pai chasquishca bendiciongunamanda agradicishpa causashcamandami siempre cushilla carca. Por ejemplo, Jesusta bautizashca jipaca, Jesusca ashtaca catijcunatami chari callarirca. Cutin Bautizaj Juanga ñana ashtaca catijcunata charircachu. Chaimandami paipa catijcunaca Bautizaj Juandaca cashna nirca: Jesusca “bautizajunmi, paipajmanmi tucuicuna shamunajun” nishpa (Juan 3:26). Chaimi Bautizaj Juanga nirca: “Cazarajuj huarmica, cusapajmi. Ashtahuangarin cusapaj juyashca cumbaca, paipaj ladopi cashpami, chai cusa rimashca shimita uyashpa, ninanda cushijun. Ñucapash, chai cusapaj cumbashna cashpami ninandapacha cushijuni” nishpa (Juan 3:29). Bautizaj Juanga Jesustaca shuj contratashnaca na ricurcachu, Jesús ashtacata rurajushcamandapash paipa rurashcacuna yanga cashcatashnapash na ricurcachu. Chaipa randica “cusapaj cumbashna” cashcamandaca ninandami cushijushca carca.

Paipa asignacionda pactachina na fácil cajpipash, Bautizaj Juanga cushillami sintirin carca. Caipi yuyapashun, Bautizaj Juanga nazareomi carca. Paica nacirishcamandapachami vinotaca na ufiana carca (Luc. 1:15). Paipa causaimanda parlashpami Jesusca cashna nirca: “Bautizaj Juan shamushpaca, micuitapash na micushpa, vinotapash na ufiashpami purijun” nishpa. Jesuspash, paipa catijcunapash nazareocunashnaca na carcachu. Paicunaca shuj gentecunashnami imagutapash rurai ushan carca (Mat. 11:18, 19). Jesuspa huaquin catijcunaca pundapica Bautizaj Juanba catijcunami carca. Bautizaj Juanga Jesushna o paipa catijcunashnapash milagrocunata ruraitaca na ushanllu carca (Mat. 10:1; Juan 10:41). Chaicunata ricushpapash Bautizaj Juanga envidiashpaimanga na ricujurcachu. Paica Jehová Dios paiman imata mingashcata pactachishpami ocupado yalin carca.

Ñucanchicunapash Bautizaj Juan shina Jehová Diosta sirvinata ninanda alicachishpaca cushillami catipashun. Callari parrafocunapi parlashca huauqui Terryca ninmi: “Ima asignacionbi cashpapash imagutapash ali, cushilla rurangapami esforzarin carcani” nishpa. Huauqui Terryca tiempo completopi sirvingapaj decidishcamandaca cushillami sintirishca. Paica ninbashmi: “Imagumandapash na arrepintirinichu ali experienciacunatallami charipashcani” nishpa.

Congregacionbi imapash asignacionda o responsabilidadta charishpaca “ñucanchica, Taita Diosta ayudajcunallami canchi” nishcatami yarina capanchi. Caipi pensarishpami cushilla sintiripanchi (1 Cor. 3:9). Cunanga caipi pensaripashunchi, imapash valishca valishca cosasta charishpaca ali ali cuidangapami esforzaripanchi. Shina cuendami Jehovata sirvina shuj jatun bendición cashcata yachaimandaca, cushilla sirvishpa catingapaj esforzaripanchi. Shinaca Jehovata sirvingapaj ñucanchicuna imata rurashcataca, na shuj huauquipanicunapa ruraicunahuanga chimbapurajunachu capanchi (Gál. 6:4).

Bautizaj Juanga ñana villachishpa catinataca yachashcangami. Shinapash paipa asignación ñapash tucurinataca na yachashcangachu (Juan 3:30). Jesusta bautizashca 6 quillacuna jipallami Bautizaj Juanga prezo apai tucurca. Rey Herodesmi huata 30​pica paita prezo cacharca. Carcelpi cashpapashmi villachishpa catirca (Mar. 6:17-20). Cai cambiocuna tiajpipash Bautizaj Juandaca Jehová Diosta sirvishpa catinami cushilla catichun ayudarca.

Carcelpi cashpaca Bautizaj Juanga Jesús imacunatalla rurajushcatami uyarca (Mat. 11:2; Luc. 7:18). Jesús Mesías cashcataca seguromi carca. Shinapash Diospa Shimipi nishcacunata Jesús imashina pactachinapimi talvez pensarijushcanga. Shinallata Jesusca ¿ñallachu rey shina mandai callarigrijun?  ¿Carcelmanda llujchihuangacha? nishpapashmi Bautizaj Juanga tapurijushcanga. Ashtahuan yachangapaj munaimandami paipa ishcai catijcunataca, Jesusta cashna tapuchun cacharca: “¿Canllu, ñucanchi shuyanajushca Quishpichij Cristo capangui? Na cashpaca, ¿shujtachu shuyapashun?” nishpa (Luc. 7:19). Bautizaj Juanba catijcuna tigramushpaca caitami nirca: “Ñausacunapash ricunajunmi. Jangacunapash, alimi purinajun. Lepra nishca ungüihuan causajcunapash, ali tucunajunmi. Rinri na uyajcunapash uyanajunmi. Huañushcacunatapash, causachijunmi. Imagutapash na charijcunamanbash, ali villaitami villajun” nishpa. Cai ali villaicunata uyashpaca Bautizaj Juanga ninandami cushijushcanga (Luc. 7:20-22).

Cai ali villaicunata uyashpaca Bautizaj Juanga ninandami animarishcanga. Cai ali villaicunami Mesiaspi pactarina profeciacunaca Jesuspi pactarijushcata ricuchijurca. Bautizaj Juanga paita carcelmanda na llujchinata yachashpapash, pai villachishcaca na yanga cashcatami seguro carca. Masqui prezo cashpapashmi paica cushilla catirca.

Bautizaj Juanshna Jehová Diosta sirvishpaca ima llaquicunatapash cushillami aguantai ushapashun (Col. 1:9-11). Bibliata liina, liishcapi pensarinami Jehová Diosta cushilla sirvishpa catichun ayudanga. Shinami Jehovata ñucanchi sirvijushcapash na yanga cashcata cuenta japipashun (1 Cor. 15:58). Callari parrafocunapi parlashca Sandra paniguca ninmi: “Cada punlla Bibliapa shuj capitulota liinami Jehovaman ashtahuan quimirichun, ama ñucapilla pensarichun ayudahuan” nishpa. Shinallata mundo enteropi imacunatalla huauquipanicuna ruranajujta yachanami ama ñucanchipilla pensachun, Jehová Diospa organización ñaupaman catijujta cuenta japichun ayudanga. Sandra paniguca ninbashmi: “Cada quilla JW Broadcasting^® programata ricuimandami Jehovapa organizacionmanga ashtahuan quimirishcanchi. Shinallata ñucanchi asignacionbipash cushilla sintirichunmi ayudashca” nishpa.

“Taita Diosca, paipaj espiritutapash, paipaj ushaitapash Eliasman carashcashnami” Bautizaj Juanmanbash cararca. Bautizaj Juanga asha tiempotalla villachishpapash Elías shinami villachirca. Shinallata Bautizaj Juanga ‘Elias shinami munaicunata charij ñucanchishnallata jari’ carca (Luc. 1:17; Sant. 5:17). Bautizaj Juanshna agradicinata yachashpa, Jehovata sirvinapi ashtahuan preocuparishpaca ima pasajpipash cushillami Jehovata sirvi ushapanchi.