1. Pauline panigushna ¿imatata ñucanchicunapash munapanchiman?

PAULINE * shuti paniguca ninmi: “Bibliata yachajushcamandami ñuca familiandi paraíso alpagupi causangapaj munapashcani. Ashtahuanbachaca ñuca cusagu Jaime, ñuca churigupash ñucahuan Jehová Diosta sirvichunmi munapashcani” nishpa. Ñucanchi familiacunamanda pipash Jehovata na sirvijujpica Pauline panigushnami sintiripanchi.

2. Cai temapica ¿ima tapuicunatata yachajupashun?

² Ñucanchi familiacuna Bibliamanda yachajuchunga na obligaita ushapanchichu. Shinapash paicuna Bibliamanda uyachunga ayudaita ushapanchimi (2 Tim. 3:14, 15). ¿Imamandata ñucanchi familiacunamanga villachina capanchi? ¿Imamandata paicunapi pensarina capanchi? Ñucanchishna Jehová Diosta juyachunga ¿imashinata ayudaita ushapanchi? Congregacionmanda huauquipanicunaca ¿imashinata ayudaita ushan?

3. ¿Imamandata 2 Pedro 3:9​pi nishca shinaca familiacunaman villachina capanchi?

³ Ñallami Jehová Diosca Diablopa cai nali mundota tucuchinga. Para siempre causangapaj munajcunallami salvaringa (Hech. 13:48, NM). Ñucanchi causajushca llactapi gentecunaman villachingapaca tiempota, fuerzatapashmi llujchipanchi. Chaimi ñucanchi familiacunapash Jehová Diosta sirvichun munapanchi.  Ñucanchita juyaj Jehová Diosca “tucuicuna arripintirichunmi munan. Chaimandami pacienciahuan shuyajun” (2 Pedro 3:9, liingui) *.

4. Ñucanchi familiacunahuanga ¿imashinata parlana capanchi?

⁴ Bibliamanda parlajushpaca aliguman, respetohuanmi parlana capanchi. Huaquinbica istacunahuanrami respetohuan aliguman Bibliamandaca parlai ushapanchi. Cutin familiacunahuanrami na shina parlai ushapanchi.

5. Ñucanchi familiacunaman nara villachishpallata ¿imatata yarina capanchi?

⁵ Primera vez ñucanchicuna Bibliamanda familiacunahuan imashna parlashcata yarishpaca llaquillachari sintiripanchi. Cunanbi Bibliamanda parlashpaca alichari villachiman nishpami pensarinchi. Apóstol Pabloca Jesusta ali catijcunataca cashnami nirca: “Pi imata tapuchijpipash, cachihuan mishquiyachishpa churashcatashnami aliguta villangapaca, ña yachajushcalla purina canguichi” nishpa (Col. 4:5, 6). Ñucanchi familiacunaman villachinajushpaca cai shimicunatami siempre yarina capanchi. Caita na pactachijpica Bibliamanda yachajungapaj munaitapash na charingachu.

6, 7. Na testigo cusata o huarmita charishpaca ¿imashinata paicunapi pensarishcata ricuchi ushapanchi? Shuj experienciamanda parlapai.

⁶ Paicunapi pensarina. Callari parrafopi parlashca Pauline paniguca: “Callaripica ñuca cusaguhuanga Jehovamanda, Bibliamandallami parlangapaj munan carcani. Ishcandimanda, trabajopi imashna cashcatapash casi nimata na parlanllu carcanchi” ninmi. Pauline panigupa cusaca Bibliamandapash, pai  imacunamanda parlajushcatapash na tucuitaca intindinllu carca. Paipa religionbillami ashtahuan preocuparin, Paulinetaca chai religionbica umachitapachami umachishca nishpami yan carca.

⁷ Pauline panigullatapashmi cashna nin: “Chishicuna, sábado, domingocunapash turiñañacunahuan villachishpa, paicunapa huasicunapi imagutapash rurashpami ashtahuanbachaca yalin carcani” nishpa. Shinallata “Jaime huasiman chayashpa ñucata, ñucanchi churigutapash na huasipi tupashpaca paillami sintirin carca” ninmi. Jaimeca, Paulinehuan paipa churiguhuanbashmi yalingapaj munan carca. Jaimeca Pauline, paipa churipash picunahuan tandanajujtapash na rijsircachu. Paicunarami ashtahuan importante can yashpami Paulinetaca divorciota mañarca. Pauline panigu paipa cusapi pensarijpica ¿shina pasanmanllu carca?

8. ¿Imatata 1 Pedro 3:1, 2​pi nishca shinaca familiacunaca ashtahuan ricun?

⁸ Ruraicunahuan ricuchina. Ñucanchi familiacunaca ñucanchi imata nijtaca na uyanllu, imata rurajtami ricun (1 Pedro 3:1, 2, liingui). Caitaca Pauline paniguca tiempohuanmi yachajurca. Paica ninmi: “Jaime ñucanchita juyajta, na divorciaringapaj munajtapash yacharcanimi. Shinapash Jaime divorciarishun nijpimi, Jehová Dios cusahuarmicunaman imata mandajta pactachina cashcata cuenta japircani. Jehovamandalla parlajunapa randica, ruraicunahuanmi ricuchircani” nin. Chaimi Bibliamandalla parlajunapa randica ishcandi imatalla rurashcata, trabajopi imashna cashcatapashmi parlai callarirca. Pauline cambiashcata, paipa churigupash ali portarijtami Jaimeca ricui callarirca (Prov. 31:18, 27, 28). Bibliapa nishcacuna familiata  ayudajta ricuimandami, Jaimeca Bibliamanda uyangapaj munarca (1 Cor. 7:12-14, 16).

9. ¿Imamandata Bibliamanda parlashpa catina capanchi?

⁹ Bibliamanda parlashpa catina. Jehová Diosca cutin cutinmi gentecunaman paimanda yachajuchun, para siempre causaiguta charichunbash ali villaigucunata chasquichun shuyajun (2 Crón. 36:15). Apóstol Pabloca, Timoteotaca shujcunata ayudashpa catingui, shinami canbash canda uyajcunapash salvari ushanguichi nircami (1 Tim. 4:16). Ñucanchi familiacunata juyashcamandaca paicunapash Bibliamanda yachajuchunmi munapanchi. Pauline paniguca paipa ruraicunahuanbashmi paipa cusa Bibliamanda yachajuchunga ayudarca. Cunanbica paipa cusagundimi precursorcuna can. Paicunaca cushillami Jehovata sirvinajun. Jaime huauquica ancianomi can.

10. ¿Imamandata familiacunataca na culirashpa tratana capanchi?

¹⁰ Na culirana. Bibliapa nishcacunata ñucanchi causaipi pactachi callarijpica, ñucanchi familiacunaca na ñapash intindingallachu. Paicuna imapash fiestacunata ruranajujpi na cumbajpi o politicapi na chapurijpimi ñucanchihuan culiran (Mat. 10:35, 36). Shinapash imahorapash na Bibliamanda yachajungachu, para siempre causaitapash na chasquingachu nishpaca na pensarijunachu capanchi. Ashtahuangarin Jehová Diosca, Jesustami picunalla causana cashcata, picunalla na causana cashcatapash ricuchun mandashca (Juan 5:22, NM). Na culirashpa paicunata ali tratajpica ima punllapash Bibliamanda yachajungapaj munangami (“ jw.org paginata utilizapashunchi” nishca recuadrota ricupangui).

11-13. Alice panigu respetohuan aliguman parlashcamandaca ¿imatata yachajupanchi?

¹¹ Respetohuan aliguman parlapangui (Prov. 15:2). Cunanga Alice shuti panigumanda yachajupashun. Paica paillami Bibliamandaca yachajui callarirca. Paipa taitamamacunaca carupimi causan carca. Alicepa taitamamacunaca politicapica ashtacatami chapurin carca, Taita Diospipash na crinllu carca. Aliceca Bibliamanda imata yachajushcataca uchallami paipa taitacunaman parlangapaj munarca. Paica ninmi: “Imaguta yachajushcata, cunanbi imata crishcata na ucha parlajpica familiacunaca ashtahuanmi culiranga” nishpa. Chaimandami Bibliapa huaquin temacunamanda, juyaimanda parlashpa huaquin cartacunata paipa taitamamacunaman cachan carca (1 Cor. 13:1-13). Paita ali viñachishcamanda agradicishpami huaquin regalocunatapash cachan carca. Paicunata visitangapaj rishpaca huasipi ruranacunapi imagupipashmi paipa mamataca ayudan carca. Shinapashmi Bibliamanda parlajpica Alicepa taitamamacunaca na alicachishpa uyan carca.

¹² Alice paniguca paipa taitamamacunapa huasipi cashpapashmi cada punlla Bibliataca liin carca. Aliceca ninmi: “Chaita ricushpami ñuca mamitaca, ñucapaca Bibliata liina importante cashcata cuenta japirca” nishpa. Shinallata Alicepa taitaca, paipa ushi imapi crishcata intindingapaj, Biblia pandarijta ricuchingapaj nishpami Bibliata lii callarirca. Aliceca: “Shuj Bibliatami papitomanga cararcani, callari hojapica huaquin shimicunatapashmi escribircani” ninmi. Bibliata liishca jipaca Alicepa taitaca Biblia imapipash na pandarij cashcatami cuenta japirca.

¹³ Ñucanchicunaca catiriashpa llaquichijpipash respetohuan aliguman parlashpami catina capanchi (1 Cor. 4:12b). Por ejemplo, Alice panigupa mamaca paihuan culirami catirca. Chaimi Alice bautizarijpica “ñucanchitaca na juyanguichu” nishpa paipa mamaca nirca. Shina nijpipash Aliceca respetohuanmi paipa mamataca cashna nirca: “Testigo de Jehová canatami ña agllarcani, Jehovata sirvinataca napacha saquishachu” nishpa. Shina nishca jipami paipa mamata juyashcatapash yarichirca.  Ishcandimi ninanda huacarca. Chai jipami Aliceca micunaguta yanurca. Chai punllamandapachami paipa mamaca Bibliapa nishcacuna paipa ushiguta ayudashcata cuenta japirca.

14. Familiacuna paicunapa munaita rurachun cutin cutin ninajujpipash ¿imatata na rurana capanchi?

¹⁴ Familiacunaca ñucanchi imamanda Jehová Diosta tucui shunguhuan sirvijujtaca na ñapash intindingallachu. Por ejemplo, Alice precursora shina sirvingapaj universidadta saquijpica paipa mamaca cutinmi ninanda huacarca. Shina cajpipashmi Aliceca ñaupaman catirca. Paica ninmi: “Familiacunaca shuj viajellapash paicunapa munashcata rurajpica, siempremi chaita rurashpa catichun munanga. Chaimandami primeromandapacha canba crishcacunamanda respetohuan aliguman parlana capangui. Chaimi talvez ñucanchi yuyaicunata respetashpa intindinga” nishpa. Chaitami Alicepa taitamamacunaca intindirca. Cunanbica Alicepa taitamamacunaca precursorcuna shinami sirvinajun. Huauquiguca ancianomi can.

15. Mateo 5:14-16​pi, 1 Pedro 2:12​pi nishca shinaca ¿imashinata huauquipanicunapa ‘ali ruraicunaca’ ñucanchi familiacunata ayudaita ushan?

¹⁵ Huauquipanicuna “aliguta rurashpa causanajujta” ricuchishpapashmi Jehová Diosca gentecunataca paipa organizacionman apamun (Mateo 5:14-16; 1 Ped. 2:12, liingui). Congregacionmanda huauquipanicunataca ¿quiquinba cusa o huarmiguca rijsinllu? Callari parrafopi parlashca Pauline paniguca, paipa cusa congregacionmanda huauquipanicunata rijsichunmi, paicunata huasiman invitan carca. Jaimetaca testigocuna imashinapacha cashcata intindichunga shuj huauquigumi ayudarca. Jaimeca ninmi: “Shuj punllaca chai huauquiguca paipa  trabajopi permisota mañashpami, telepi futbolta ñucahuan ricungapaj shamurca. Chaimi testigocunapash chaita gushtashcata cuenta japircani” nishpa.

16. Familiacunataca ¿imamandata tandanajuicunaman invitana capanchi?

¹⁶ Ñucanchi familiacunataca tandanajuicunaman invitashpapashmi ayudai ushapanchi (1 Cor. 14:24, 25). Jesús huañushcata yarina tandanajuimanmi Jaimeca primera vez rirca. Trabajo jipa cashcamanda, na yapata parajpimi cai tandanajuimanga rirca. Jaimeca ninmi: “Chai tandanajuipi tucui imata nishcataca na yarinichu, shinapash ali tratashcatami ashtahuanbachaca yarini. Tucuicunami cushilla quimirishpa saludahuarca, tucui shunguhuan saludajtami sintircani” nishpa. Congregacionmanda shuj cusahuarmicunami Pauline panigutaca tandanajuicunapi, villachinapipash paipa churita cuidashpa ayudan carca. Chaicunata ricushpami Jaimeca Paulinepa crishcacunata yachajungapaj chai huauquitaca Bibliamanda yachachihuai nirca.

17. ¿Imamandata na culparishpa, ñucanchi familiacunataca ayudashpa catina capanchi?

¹⁷ Tucuicunallatami tucui ñucanchi familiacuna ima punllapash Jehová Diosta sirvichun munapanchi. Bibliamanda yachajuchun tucuita rurajpipash talvez ñucanchi familiacunaca na testigo tucungachu. Shinapash na testigo tucujpica na culparinachu capanchi. Chaipa randica Jehová Diosta sirvijuimanda cushilla causanajujtaca paicunallatami ricunga. Chaimandami paicunamanda mañashpa, Bibliamanda respetohuan asha asha parlashpa, ayudashpa catinalla capanchi (Hech. 20:20). Shina esforzarishpa catijpimi Jehová Diosca bendicianga. Ñucanchi familiacuna imahorapash Bibliata yachajushpaca paicunapash salvaringami.