1. Filipos llactapica ¿picunata congregación tiachunga ayudarca?

APÓSTOL Pablo, Silas, Lucas, Timoteopash, Filipos llactaman chayashpaca Diospa Reinomanda ali villaigucunata uyangapaj munaj tauca gentecunatami tarirca. Paicunami cai llactapi congregación tiachunga ashtacata ayudarca. Tucui Jesusta ali catijcunami tandanajui callarirca. Paicunaca Lidia huarmigupa huasipimi tal vez tandanajun carianga (Hech. 16:40).

2. ¿Ima llaquicunatata Filipos congregacionga chari callarirca?

² Chairalla callarichishca congregacionbi huauquipanicunaca ashtaca llaquicunatami chari callarirca. Satanasca Diosmanda na yachajungapaj munaj gentecunata utilizashpami apóstol Pablota, Silasta, Timoteota, Lucastapash catiriashpa llaquichirca. Autoridadcunaca Pablota, Silastapash japishpami caspihuan macashpa prezo cacharca. Cayandi punlla paicunata libre saquijpica ¿imatata paicunaca rurarca? Paicunaca chairalla huauquipanicuna tucushcacunatami visitangapaj rishpa consolachirca. Jipaca apóstol Pablopash, Silaspash, Timoteopashmi Filipos llactamanda rirca. Shinapash Lucasca talvez chaipillatami quedarianga. Paicuna chaimanda rijpipash filipenses huauquipanicunaca Diospa espiritu ayudajpimi Jehová Diosta sirvishpa ñaupaman catirca (Filip. 2:12). Chaimi apóstol Pabloca paicunamanda ninanda cushijushca carca.

3. Filipenses 1:9manda 11​camanga apóstol Pabloca ¿imatata mañarca?

³ Diez huatacuna jipami apóstol Pabloca shuj cartata filipensescunaman escribirca. Cai cartapica apóstol Pablo huauquipanicunata ninanda juyashcatami cuenta japipanchi. Paicunataca ‘Jesucristo ninanda juyajunshna’ paipash ninanda juyashcatami nirca (Filip. 1:8). Apóstol Pabloca Jehová Diostaca  filipenses huauquipanicunapa juyai mirashpa catichunmi mañarca. Ima ashtahuan minishtirishca cashcata yarichun, ama ishcai shungu cashpa ama shujcunata nitijachichunbashmi mañarca. Shinallata Jesucristopa ali ruraicunamanda tucuicunallata ali causaiguta chasquichunbashmi mañarca. Ñucanchicunapashmi apóstol Pablo mañashca shimicunamandaca yachajui ushapanchi (Filipenses 1:9-11, liingui, NM) *. Cai temapica Filipenses 1:9manda 11​caman nishca yuyaicunata, cai yuyaicunata imashina ñucanchi causaipi pactachinatami yachajupashun.

4. a) 1 Juan 4:9, 10​pi nishca shinaca Jehová Diosca ¿imata rurashpata juyashcataca ricuchishca? b) Jehová Diostaca ¿imashinata juyana capanchi?

⁴ Jehová Diosca paipa shujlla Churiguta ñucanchimanda huañuchun cachamushpami ñucanchita juyashcata ricuchishca (1 Juan 4:9, 10, liingui). Chaimandami Jehová Diostaca ashtahuan juyapanchi (Rom. 5:8). Jehová Diosta juyanamanda parlashpami Jesusca shuj fariseo runamanga cashna nirca: “Cambaj Taita Diostaca, tucui shunguhuan, tucui almahuan, tucui yuyaihuan juyangui” nishpa (Mat. 22:36, 37). Jehová Diostaca tucui shunguhuanmi juyana capanchi. Cada punllami ashtahuan ashtahuan juyashpa catingapaj esforzarina capanchi. Apóstol Pabloca filipenses huauquipanicunatapash ashtahuan juyashpa catinguichi nircami. Jehová Diosta ashtahuan juyashpa catingapaca ¿imatata rurana capanchi?

5. Jehová Diosta ashtahuan juyashpa catingapaca ¿imatata rurana capanchi?

⁵ Jehová Diosta juyangapaca paita rijsinaca minishtirishcapachami can. Bibliapica ninmi: “Na juyashpa causashpaca, Taita Diostaca na rijsinllu. Taita Diosca, ninandapacha juyajmi” can nishpa (1 Juan 4:8). Apóstol Pabloca ‘Taita Diosmanda ashtahuan yachajushpami’, Jehovataca ashtahuan juyanguichi nircami. Shinallata pai imata alicachijta, imata na alicachishpa ricujta ‘aliguta yarishpami’ Jehovataca ashtahuan juyanguichi nirca (Filip. 1:9). Bibliamanda yachajui callarishpaca Jehová Diosmanda huaquin cosascunatami yachajuparcanchi. Paita rijsimandami ashtahuan juyai callarircanchi. Jehová Dios imashina cajta, imata gushtajta o imagutapash paimanda ashtahuan yachajushpaca ashtahuanmi juyashpa catipanchi. Chaimandami Bibliata liina, liishcapi yuyanaca ñucanchipaca minishtirishcapacha can (Heb. 4:12).

6. ¿Picunatallata 1 Juan 4:11, 20, 21​pi nishca shinaca juyana capanchi?

⁶ Taita Dios ñucanchita ninanda juyajushcamandami, ñucanchicunapash huauquipanicunataca juyana capanchi (1 Juan 4:11, 20, 21, liingui). Tucuicunallata Jehová Diosta sirvijushcamanda, pai shina cangapaj esforzarijushcamandami ñucanchi huauquipanicunataca ñapash juyaringalla yashpa pensanchiman. Shinallata Jesús huañushcamanda, paipa ejemplota catijushcamandami ñucanchi huauquipanicunataca talvez ñapash juyaringalla yashpa pensanchiman. Shinapash huauquipanicunata juyanaca huaquinbica na facilchu can. Filipos congregacionbi ima pasashcata ricupashun.

7. Evodia, Síntique shuti panigucunaman cushca consejocunamandaca ¿imatata yachajupanchi?

⁷ Evodia, Síntique shuti panigucunaca ‘na manllashpami’ apóstol Pablohuanga villachin carca. Shinapash ishcandimandami fiñarinajushca carca. Chaimandami apóstol Pablo escribishca cartapica ishcanditallata “shujllashnalla yarishpa causapaichi ninimi” nishpa mandarca (Filip. 4:2, 3). Congregacionbi huauquipanicunatapashmi apóstol Pabloca: “Tucui imata rurashpapash, nalicachishpa parlashpa, fiñanajushpa  rimarishpaca, na ruranachu canguichi” nirca (Filip. 2:14). Cai consejocunami Evodia, Síntique panigucunatapash, congregacionbi tucui huauquipanicunatapash randimanda juyarishpa catichun ayudarca.

8. a) ¿Imamandata ñucanchi huauquipanicunataca na juyaita usharinman? b) Huauquipanicunata juyashpa catingapaca ¿imatata rurana capanchi?

⁸ Evodia, Síntique panigucunashnami ñucanchicunapash huauquipanicunapa pandarishcacunata ricuimandaca paicunataca na fácil juyaita ushashun. Tucuicunallatami cada punlla pandarinchi, shujcunapa pandarishcacunatalla ricujushpaca paicunataca na juyai ushapashunllu. Caipi yuyapashunchi, shuj huauqui o shuj pani tandanajui huasita fichaita na ayudashcanman. Chaita ricushpami paihuan culiranchiman. Paicunapa pandarishcacunapilla yuyashpaca paicunataca na juyaita ushashunllu. Quiquinba congregacionbipash ¿nachu shina pasashca? Shina pasashca cajpica Jehová Dios ñucanchi pandarishcacunata, shujcunapa pandarishcacunatapash cungaj cashcatami yarina capanchi. Pandarijpipashmi, Jehová Diosca tucuicunata juyashpa catin. Chaimi ñucanchicunapash huauquipanicunapa pandarishcacunata ricujunapa randica, ali rurashcacunatami ricuna capanchi. Shinami huauquipanicunataca juyashpa catipashun, congregacionbi shujllashna tandanajushca caitapash ushapashun (Filip. 2:1, 2).

9. Filipenses huauquipanicunaman escribishpaca ¿‘ima ashtahuan minishtirishca cashcacunamandata’ apóstol Pabloca parlarca?

⁹ Diospa espiritu santo yarichijpimi apóstol Pabloca filipenses huauquipanicunatapash, tucui huauquipanicunatapash ‘ima ashtahuan minishtirishca cashcata’ yarichunmi mandarca (Filip. 1:10, NM). Jehová Diospa shutita jatunyachina, paipa tucui nishcacuna pactarinata crina, congregacionbi tranquilo cana, shujlla shina tandanajushca canami ashtahuan minishtirishca can (Mat. 6:9, 10; Juan 13:35). Caicunata pactachinajushpami Jehová Diosta juyashcataca ricuchipanchi.

10. Jehová Diospa ñaupajpi ali ricuringapaca ¿imatata rurana capanchi?

¹⁰ Apóstol Pabloca “ama ishcai shungu” causanguichichu nishpami mandarca. Caita nishpaca jucha illajmi cana canguichi nishpaca na nijurcachu. Ñucanchicunaca Jehová Dioshna jucha illaj caitaca na ushapanchichu. Shinapash Jehová Diosta ashtahuan juyashpa, ashtahuan minishtirishca cashcata ñucanchi causaipi pundapi churashpaca Jehová Diospa ñaupajpi alimi ricuripashun. Huauquipanicunata juyashpaca paicunata na nitijachingapami esforzaripashun.

11. ¿Imamandata shujcunataca na nitijachina capanchi?

¹¹ Apóstol Pabloca nircami ama shujcunata nitijachichun nishpa. Shinaca nipita na nitijachinachu capanchi. Ñucanchi agllashca diversiongunahuan, ñucanchi ropahuan, ñucanchi trabajashcacunahuanbashmi shujcunataca nitijachita ushapanchi. Talvez llaquichingapaj munaimandaca na shina rurapanchichu. Shinapash na ali yuyashpa chaicunata na ali agllashpaca, shujcunapa concienciatami llaquichi ushanchi. Shujcunata nitijachinamanda parlashpaca Jesusca nircami, maijambash ñucata crishpa catinajujta nitijachishpa pandachij runataca, molino jatun rumita cungapi huatashpa, mama cuchapi ucu ucuman huashajuchun shitashpachari ashtahuan ali canman nishpa (Mat. 18:6).

12. Shuj precursor cusahuarmimandaca ¿imatata yachajupanchi?

¹² Shujcunata na nitijachinachu canguichi nishcata pactachingapaj, shuj precursor cusahuarmicuna imata rurashcata ricupashunchi. Paicunapa congregacionbica chairalla bautizarishca cusahuarmicunami tiarca. Jesusta ali catijcunaca cineman shuj peliculata ricungapaca na rinachu can nishpami paicunaca  nin carca. Chaimi precursor cusahuarmicuna cineman rishcata yachaj chayashpaca paicunaca manllarirca. Chaita ricushpami precursor cusahuarmicunaca chairalla bautizarishca cusahuarmicunapa conciencia ali sintiringacaman cinemanga ñana rirca (Heb. 5:14). Shinami huauquipanicunata juyashcata ricuchirca (Rom. 14:19-21; 1 Juan 3:18).

13. ¿Imashinata huauquipanicunataca nitijachinshna pandachi ushapanchi?

¹³ Shuj huauquita o panita ñucanchicuna nalicunata rurashpami nitijachinshna pandachi ushapanchi. ¿Imashinata pandachi ushapanchi? Caipi yuyapashun, Bibliamanda shuj yachajuj yapata ufianata saquingapami ninanda esforzarin. Paipa causaipi ashtaca cambiocunatapash rurashpami ña bautizarin. Ñaupaman catingapaca nimata na ufiana cashcataca paica alimi yachan. Shuj punllaca shuj huauquimi chairalla bautizarishca huauquita, shuj huauquicunatapash paipa huasiman invitan. Chaipimi cai mushuj huauquitaca alitami rurajuni yashpa huasi dueño huauquica cervezata carashpa cashna nin: “Ñami bautizarishca cangui, Jehovapa espiritutapash ñami charingui, caigutaca ufiailla. Canllata jarcarishpa ufiashpaca imapash nalitaca na ruranguichu” nishpa. Chairalla bautizarishca huauqui cai nali consejota cazushpaca, ninan llaquipimi urmanga.

14. Filipenses 1:10​pi shimicunata pactachichunga ¿imashinata tandanajuicunaca ayudan?

¹⁴ Tandanajuicunami Filipenses 1:10​pi shimicunata pactachichun ayudan. Primero, Jehová Diospa ñaupajpi ima ashtahuan minishtirishca cashcatami yachachin. Segundo, imata yachajushcata pactachichunmi ayudan. Tercero,  caishujhuan chaishujhuan ashtahuan juyarishpa causachunmi yachachin (Heb. 10:24, 25). Ñucanchi huauquipanicuna ñucanchita cushichijpica, ashtahuanmi Jehová Diosta, huauquipanicunatapash juyapanchi. Chaimi paicunata nitijachinshna pandachingapaca na imatapash rurashun.

15. ‘Ali ruraicunamanda tucuicunallata ali causaiguta’ japina nishpaca ¿imatata ningapaj munan?

¹⁵ Apóstol Pablo Jehovata mañajushpaca, filipenses huauquipanicuna ‘Jesucristopa ali ruraicunamanda tucuicunallata ali causaiguta chasquishpa’ catichunmi mañarca (Filip. 1:11, NM). Ali ruraicunamanda tucuicunallata ali causaiguta chasquina nishpaca Jehová Diosta, huauquipanicunata juyanamandami apóstol Pabloca parlajurca. Shinallata filipenses huauquipanicunataca “cai pachapi causanajuj jatun nali miraicunapaj chaupipica, punchayachij luzerogushna” canguichi nircami (Filip. 2:15). Caimanda parlashpallatami Jesusca paipa catijcunataca ‘cai pachapi causajcunata punchayachijuj michagushnami canguichi’ nirca (Mat. 5:14-16). Jesusca paipa catijcuna tucuchun “cai pacha tucuri manñacaman ñucamanda villagringuichi” nishpami mandarca (Hech. 1:8; Mat. 28:18-20). ‘Ali ruraicunamanda tucuicunallata ali causaiguta’ charichunmi shujcunaman villachipanchi.

16. Filipenses 1:12-14​pi nishca shinaca ¿imashinata llaquicunata charishpa o na charishpapash punchayachij michagushna caita ushapanchi? (Callari paginapi fotota ricupangui).

¹⁶ Llaquicunata charishpa o na charishpapashmi punchayachij michagushna caita ushapanchi. Huaquinbica villachichun jarcaicunallatami ashtahuan villachishpa catichun ayudan. Apóstol Pablopi pensaripashunchi, paica filipenses huauquipanicunaman escribijushca tiempopica, paipa huasipillatami prezo carca. Prezo cashpapashmi guardiacunaman, paita  visitajcunamanbash tucui shunguhuan, cushilla villachishpa catirca. Filipenses huauquipanicunaca apóstol Pablo cushilla villachishpa catijta ricushpami na manllashpa ‘Diospaj Shimitaca cushijushpa ashtahuan villachishpa’ catinajurca (Filipenses 1:12-14, liingui; 4:22).

17. Na villachi ushashca llactapica ¿imatata huauquipanicunaca rurashca?

¹⁷ Tauca huauquipanicunami apóstol Pabloshna na manllashpa villachi ushashca. Paicunaca na villachi ushashca llactacunapi causashpapashmi imagutapash rurashpa villachishpa catingapaj esforzarin (Mat. 10:16-20). Shuj llactapica superintendente de circuito huauquica tucui publicadorcuna paicunapa rijsicunaman, familiacunaman, vecinocunaman, escuelapi, trabajopi compañerocunaman villachichunmi animarca. Ishcai huatapillami chai llactapica huaquin congregacionguna tiai callarirca. Talvez ñucanchi causajushca llactacunapica villachishpa catichunga na imapash jarcanllu. Shinapash chai publicador huauquipanicunashnami ashtahuan villachishpa catingapaj esforzarina capanchi. Ima llaquicuna ricurijpipash Jehová Diosmi ushaita cushpa chai llaquicunata aguantachun ayudanga (Filip. 2:13).

18. ¿Imacunatallata rurangapaj esforzarina capanchi?

¹⁸ Cai tucurimui punllacunapica apóstol Pablo filipenses huauquipanicunaman escribishca cartamandami yachajushpa catina capanchi. Chaipaca ima ashtahuan minishtirishca cashcata yaringapaj, ama ishcai shungu cashpa ama shujcunata nitijachingapami esforzarina capanchi. Shinallata Jesucristopa ali ruraicunamanda tucuicunallata ali causaiguta chasquingapami esforzarina capanchi. Chaimi ashtahuan juyarishpa causapashun, Jehová Diostapash jatunyachishun.