1, 2. Salmo 34:8​pi nishcashnaca Jehová Dios ali cajtaca ¿imashinata ricui ushapanchi?

CAIPI yuyapashunchi, pipash ñucanchicuna imahorapash na micushca micunaguta carashcanman. Ima horapash na micushcamandami, chai micunagu imasha cajtaca na yachapanchi. Chaimi ali ali ricunchi, imashna ashnajujta sintinchi, imasha yanushcata tapunchi, o pipash chai micunata ña micushcatami tapupanchi. Pero chai micuna ali o nali cajta yachangapaca ñucanchillatami malina capanchi.

² Bibliapi y publicaciongunapi Jehová Dios paipa sirvijcunata imashina bendiciashcata liishpaca shuj mushuj micunata nara malishcashnallatami capanchi. Jehová paipa sirvijcunata imashinapacha cuidajta yachangapaca ñucanchi causaipimi ‘ricushpa’ yachaita ushapanchi (Salmo 34:8​ta liipangui). Por ejemplo, Jehová Diosta tiempo completopi sirvingapaj munapashcanchiman. Pero chaipaca ñucanchi causaipimi huaquin cambiocunata ruranara capanchi. Jesusca, Diospa Reinota pundapi churajpica Jehová Diosca bendiciangami nishpami yachachirca. Chaitaca talvez cutin cutinmi liipashcashun. Pero chai shimicuna ñucanchi causaipi pactarishcataca nara ricupashcashunllu (Mat. 6:33). Shinapash Jesuspa nishcacunapi crishpami ama trabajashpalla yalingapaj, culquitapash ama yangata gashtangapaj, ashtahuan villachingapapash esforzaripanchi. Caicunata rurashpami ñucanchi propio ñavihuan Jehová Dios imashina ñucanchi causaipi bendiciajta ricui ushapashun.

3. Salmo 31:19​pi nishcashnaca ¿picunatata Jehová Diosca ashtahuan juyan y bendician?

³ Jehová Diosca ‘tucuicunahuanmi ali’ can. Incluso paita na sirvijcunahuanbashmi ali can (Sal. 145:9; Mat. 5:45). Pero ashtahuanbachaca paita tucui shunguhuan sirvijcunatami juyan y  bendician (Salmo 31:19​ta liipangui). Cunanga ñucanchicunamanda Jehová Dios imacunatalla rurashcata ricupashunchi.

4. Paimanda yachajui callarijcunataca ¿imashinata Jehová Diosca bendiciashca?

⁴ Jehovapa mandashcacunata ñucanchi causaipi pactachishpaca ñucanchillatami cushilla causapanchi. Paimanda yachajushpa paita ashtahuan juyashpami ñucanchi causaipi cambiashpa y paimanda caruyachij costumbrecunatapash saquishpa ripashcanchi (Col. 1:21). Y, candallami ñuca causaipica sirvingapaj munapani nishpa bautizarishca jipacarin, Jehová Diosca shuj ali concienciata charichun ayudashpa y paipa amigocuna cachun saquishpami ñucanchitaca ashtahuan bendiciashca (1 Ped. 3:21).

5. Villachinajushpaca Jehová Dios ¿imacunapilla ayudajujtata ricupashcanchi?

⁵ Villachinajushpami Jehová Dios ali Dios cashcataca ricui ushapanchi. Por ejemplo, tauca huauquipanicunapaca ista gentecunahuan parlanaca dificilmi cashca. Shinapash Jehovapa ayudahuanmi huasin huasin rishpa gentecunahuan Bibliamanda parlai callari ushashca. Cunanbicarin Jehovamanda shujcunaman parlanataca ninandami gushtan. Jehová Diosca, villachinajujpi gentecuna nali tratajpi ama ñapash culirachun ayudashpapashmi ali, juyaj Dios cashcataca ricuchishca. Shinallata Bibliamanda pipash yachajungapaj munajujpi shuj juyailla, ayudaj textoguta yarichunbashmi ayudashca. Chai jahuapash territoriopi gentecuna na uyangapaj munajpi, chaicunata aguantachunbashmi Jehová Diosca fuerzata cushpa ayudashca (Jer. 20:7-9).

6. Jehová Dios ali Dios cashcataca ¿imacunapipashta ricupanchi?

⁶ Jehová Diosca ali villachi ushachun, ali yachachi ushachunbash ayudashpami ali Dios cashcataca ricuchishca (Juan 6:45). Chaupi semana tandanajuipica ali villachijcuna, ali yachachijcuna cachunmi tauca sugerenciacunata yachajupanchi. Huaquinbica cai sugerenciacunata pactachi callaringapaca ashata manllanchimi pero ña pactachishpa y ayudajta ricushpaca ninandami cushijupanchi. Tandanajuicunapi, asambleacunapipash shuj shuj ruraicunata rurashpa villachichunmi animan. Talvez shina villachina costumbreta na charishcamandami ashata manllashun. Pero imaguta mandashcata pactachingapaj esforzarijpica Jehovallatami ñucanchitaca bendicianga. Cunanga ñucanchi causaipi paita sirvingapaj esforzarijpi imashina Jehová Dios bendiciajta ricupashunchi. Jipaca Jehová Diosta ashtahuan sirvingapaj imacunatalla rurai ushashcatami yachajupashun.

7. Jehová Diosta ashtahuan sirvingapaj esforzarishpaca ¿ima bendiciongunatata chasquipashun?

⁷ Jehová Diosmanmi ashtahuan quimiripanchi. Cunanga Colombia llactapi sirvij anciano huauqui Samuelmanda * y paipa huarmigumanda yachajupashunchi. Paicunaca paicunapa llactapica precursorcunami carca. Pero shuj minishtirijuj pushtupi sirvingapaj munashpami paicunapa causaipica huaquin cambiocunata rurana tucurca. Huauqui Samuelca ninmi: “Ñucanchicunaca Mateo 6:33​ta pactachingapami esforzariparcanchi. Chaipaca lo necesariotalla randingapami culquigutapash gashtan carcanchi. Shinapash ñucanchi causajushca departamentota saquinami ashtahuan shinlli carca” ninmi. Paicuna chayashca congregacionbi ña sirvinajushpaca pundacunata yashpaca menos culquita gashtanajushcatami cuenta japirca. Huauqui Samuelca: “Jehová Dios ñucanchi mañaicunata contestajushcata, paipacha ñucanchita cuidajushcata, cunanbi ashtahuan ninanda bendiciajushcatami cuenta japipashcanchi”  ninmi. ¿Nachu quiquinbash Jehovata ashtahuan sirvita ushapanguiman? Shina rurajpica, quiquindapashmi Jehová Diosca ninanda bendicianga y cuidanga. Y paimanbashmi ashtahuan quimiri ushapangui (Sal. 18:25).

8. Iván y Viktoria cusahuarmimandaca ¿imatata yachajui ushapangui?

⁸ Jehovata sirvishpami cushilla sintiripanchi. Cunanga Kirguistán llactapi precursorcuna Iván y Viktoria cusahuarmimanda yachajupashunchi. Paicunaca minishtirishcagucunahuanlla causashpa Jehovapa organizacionbi imagupipash ayudangapaj o construccionbipash ayudangapami dispuestocuna carca. Huauqui Ivanga ninmi: “Cada proyectopimi shinllita trabajan carcanchi. Huasiman shaijushca chayashpapash ñucanchi fuerzata Jehovapa munaita rurangapaj utilizashcamandami tranquilo, ninanda cushijushca sintirin carcanchi. Chaicunapi alipacha amigocunata charishcatapash cushijushpami yaripanchi” ninmi (Mar. 10:29, 30).

9. Llaquicunata charishpapash ¿imatata shuj paniguca ruran? Chaita rurashcamandaca ¿imata pasashca?

⁹ Jehovata sirvinaca imapash llaquicunata charijpipash cushilla sintirichunmi ayudan. Por ejemplo, África Occidentalmanda Mirreh shuti paniguca doctorami carca. Pai jubilarishpaca precursorami tucurca. Shinapash artritis unguitami charin. Chaimandami huasin huasin predicacionman llujshishpaca shuj horasgutalla aguantai ushan. Pero predicación publicapica ashtahuan tiempogutami caita ushan. Chai paniguca tauca revisitacunata y tauca estudiocunatami charin. Huaquingunataca telefonopi cayashpami estudiotaca cun. Mirreh panigutaca ¿imata Jehovata ashtahuan sirvichunga animan? Paniguca ninmi: “Ñucaca Jehová Diositota, Jesustapash ninandami juyapani. Chaimi Jehovataca, ‘quiquinda ashtahuan sirvishpa catingapaj fuerzaguta cushpa ayudahuangui’ nishpa mañapani” nin (Mat. 22:36, 37).

10. Jehová Diosca paita ashtahuan sirvingapaj munajcunataca ¿imashinata Isaías 54:13​pi nishcashnaca ayudan?

¹⁰ Jehová Diosca ñucanchitaca ashtahuanmi yachachin. Mauricio llactapi sirvijuj huauqui Kennyca precursormi can. Paica Jehová Dios paita ashtahuan preparajtami cuenta japishca. Bibliamanda yachajui callarishpaca paica universidadpimi carca. Paica universidadta saquishpami bautizarirca y tiempo completopi sirvi callarirca. Huauqui Kennyca ninmi: “Ñucaca profeta Isaías nishcashnallatami ‘ñucami caipi capani, ñucata cachahuailla’ ningapami esforzaripani” nin (Is. 6:8). Huauqui Kennyca construccionbimi huaquin proyectocunapi ayudashca. Shinallata paipa idiomapipashmi publicaciongunata traducishpa ayudashca. Paica: “Ñucaman cushca asignaciongunata ali pactachichunga Jehovapa organizacionllatami yachachihuashca. Shinapash caicunapica tucuita na rurai ushashcata, Jehová munashcashna cangapaj y paita sirvingapaca siempre esforzarina cashcatapashmi yachajupashcani” ninmi (Isaías 54:13​ta liipangui). ¿Nachu quiquinbash huauqui Kennyshnallata Jehová Dios paipa organizacionbi quiquinda ashtahuan yachachishpa catichun munapanguiman?

11. Corea del Surmanda huaquin panigucunaca ashtahuan villachingapaca ¿imatata rurarca? ¿Imata pasarca? (Callari paginapi fotota ricupangui).

¹¹ Tauca huatacunata testigo de Jehovacuna cashca huauquipanicunapashmi Jehovapa organizacionbica yachajushpa catin. COVID-19 ungui tiashcamandami Corea del Sur llactamanda shuj ancianocunaca caitami escribirca: “Huaquin huauquipanicunaca paicunapa salud nali cashcamandami paicuna munashcashnaca na villachi usharca. Pero cunanga videollamadacunata rurashpami villachinajun. 80 yali huatacunata charij quimsa panigucunaca internetta ali manejanata yachajushpami cunanga casi tucui punllacuna villachinajun” nin  (Sal. 92:14, 15). Jehová Diosmanda ashtahuan villachingapaj, Jehová Dios imashina ayudashpa, bendiciashpa catijta ¿ashtahuan ricungapaj munapanguimanllu? Chaipaca cai cati yuyaicunata ricupashunchi.

12. Jehová Diosca paipi confiajcunataca ¿imatata prometin?

¹² Jehová Diospi ashtahuan confiapai. Paipi confiajpi, paita sirvingapaj tucui ñucanchi usharishcata rurajpica Jehová Diosca ninanda bendiciasha ninmi (Mal. 3:10). Cai shimicunata Jehová Dios imashina paipa causaipi pactachijtami Colombia llactamanda panigu Fabiolaca ricurca. Paica bautizarishca jipallami precursora regular cangapaj munarca. Pero paipa cusata, paipa 3 huahuacunatapash ayudangapami tucui punllacuna trabajashpa catina carca. Pero jubilaringapaj requisitocunata ña tandachijushpaca panigu Fabiolaca Jehovatami, ñuca pensionda uchalla aprobachun ayudahuangui nishpa mañarca. Paica ninmi: “Pensionda cuchunga ashtacatami paranata yachan, pero ñuca casopica antsicarin shuj quilla jipallami aprobarca. Chaisi shuj milagromi carca” ninmi. Ishcai quilla jipallami precursora tucurca. Cunanga 70 yali huatacunatami charin y 20 huatacunatami ña precursora can. 8 personacunatapashmi Testigocuna tucuchun ayudashca. Paniguca, huaquinbica débil debilmi sintirini, pero Jehovami villachishpa catichunga ayudahuan ninmi.

13, 14. Jehová Diospi ashtahuan confiachun, paita ashtahuan sirvingapaj munaita charichunga ¿picunapa ejemplocunata ayudanga?

¹³ Jehovapi confiajcunamanda yachajupashunchi. Bibliapica taucacuna Jehovata  ashtahuan sirvingapaj munashpa imacunatalla rurashcatami parlajun. Paicunaca Jehová Diospa bendiciongunata chasquingapaca paicunarami imagutapash primero rurarca. Por ejemplo, Abrahán runaguca paipa llactamandaca “maiman rinatapash na yachashpatami llujshirca”. Chai jipami, Jehová Diosca paitaca bendiciarca (Heb. 11:8). Shinallata Jacobca shuj angelhuan macanajushca jipami, Jehová Diosmandaca shuj bendicionda chasquirca (Gén. 32:24-30). Shinallata Taita Dios carasha nishca alpacunaman nara yaicushpallataca, israelitacunaca sacerdotecuna Jordán yacupi saruchunmi shuyanara carca. Chai jipami israelitacunaca yalita ushana carca (Jos. 3:14-16).

¹⁴ Cunan tiempopi huauquipanicunamandapashmi ashtacata yachajui ushapanchi. Paicunaca Jehovapi confiashpami ashtahuan sirvingapaj imacunatapash rurashca. Por ejemplo, Payton y Diana cusahuarmica “Se ofrecieron para ayudar” * nishca experienciacunatami liinata gushtan carca. Chaipica Jehovata ashtahuan sirvingapaj huaquin huauquipanicuna imata rurashcatami parlan. Huauqui Paytonga ninmi: “Cai experienciacunata liinajushpaca ñucanchi ñaupapi pipash gushtu micunaguta micujujta ricujunshnami carca. Ñucanchipashmi Jehovata shina sirvishpa, pai ali aligu cajta ricungapaj munaparcanchi” nin. Tiempohuanga cai cusahuarmipashmi publicadorcuna minishtirijuj pushtupi sirvingapaj rirca. ¿Quiquinga cashna experienciacunata jw.org paginapipash Predicación en lugares apartados: Australia y Predicación en lugares apartados: Irlanda videocunatapash ricupashcanguichu? Cai juyailla experienciacunami quiquindaca ashtahuan minishtirijuj pushtupi sirvingapaj richun ayudanga.

15. ¿Imashinata shuj huauquipanicunapa ali ejemploca ñucanchita ayudaita ushan?

¹⁵ Jehovata ashtahuan sirvingapaj munajcunahuan tandanajupashunchi. Shuj mushuj micunaguta micugrijushpaca chai micunata gushtajcunahuan cashpami micunataca ashtahuan gushtashpa micupanchi. Shina cuendallatami Jehová Diosta ashtahuan sirvingapaj munajcunahuan tandanajushpaca ñucanchipash ashtahuan sirvingapaj munaita charipashun. Kent huauquita y paipa huarmigu Veronicataca chaita ruranami ayudarca. Kent huauquica ninmi: “Ñucanchi familiacuna, amigocunapash Jehovata ashtahuan sirvichunmi animan carca. Paicunapash Diospa Reinota pundapi churajta ricunami ñucanchitaca chaitallata rurachun ayudarca” nin. Cunanga paicunaca Serbia llactapimi precursor especialcuna can.

16. Lucas 12:16-21​pi nishcashnaca ¿imamandata Jehovata ashtahuan sirvingapaj dispuesto cana capanchi?

¹⁶ Jehovamanda imagutapash rurangapaj dispuesto capai. Jehovata pai munashcashna sirvingapaca tucui tucuita saquinaca na minishtirinllu (Ecl. 5:19, 20). Shinapash ñucanchi gushtashca cosascunata na ladoman saquishpa y Jehová Diosta pai munashcashna ashtahuan na sirvishpaca Jesús parlashca shuj chimbapuraimanda jarishnami capashun. Cai jarica paipilla pensarimandami Taita Diosta sirvinataca ladoman saquirca (Lucas 12:16-21, liipangui). Franciamanda huauqui Christianga: “Ñucaca Jehovata ashtahuan sirvingapaj, familiata ayudangapapash na esforzarijushcatami cuenta japircani” ninmi. Huauqui Christianga paipa huarmigundimi precursorcuna cangapaj dicidirca. Chaipaca paicunapa charishca trabajocunata saquishpami limpiezata shinashpa trabajangapaj shuj uchilla negociota callarichirca. Chai negociomi paicunataca lo necesariota charichun y precursoradotapash pactachichun ayudarca. Huauquica ninmi: “Ashtahuan villachinajushpa,  estudiocunata y gentecunata Jehová Diosmanda yachachinajushpaca ninandami cushijupanchi” ninmi.

17. ¿Imamandata huaquingunaca diferente manera villachinataca manllan?

¹⁷ De diferente maneracuna villachingapaj esforzaripai (Hech. 17:16, 17; 20:20, 21). Estados Unidosmanda Shirley shuti precursora paniguca COVID-19 ungui tiashcamandami de diferente manera villachinata yachajuna tucushca. Callaripica telefonopi cayashpa villachinataca manllanmi carca. Pero superintendente de circuito huauqui visitaj semanapimi imashina telefonopi villachinata yachajurca. Chai viajemandapachami paniguca telefonopi cayashpa villachin. Paniguca ninmi: “Pundami manllan carcani. Pero cunanga telefonopi cayashpa villachinataca ninandami gushtapani, huasin huasin rishpa yalimi telefonopi cayashpaca gentecunahuanga parlai usharin” ninmi.

18. Jehovata ashtahuan sirvingapaj imapash problemacuna ricurijpica ¿imatata rurana capanchi?

¹⁸ Jehovata ashtahuan sirvingapaj imata ruranapi pensaripai y chaita pactachingapaj esforzaripai. Imapash problemacunahuan cashpaca uchallami Jehovata mañashpa, imata ruranata ali ricushpa dicidina capanchi (Prov. 3:21). Panigu Soniaca, romaní shimita parlaj shuj grupopimi apoyajun. Paica precursora regularmi can. Paniguca: “Ñucaca Jehovata ashtahuan sirvingapaj imata ruragrijushcatami shuj papelpi escribini. Ñuca cuartopica ishcai ñanda ricuchij shuj dibujotami charipani. Imatapash decidigrijushpaca chai dibujota ricushpami ñuca decisionguna chai ñangunashnallata maiman apanapi pensarini” nin. Soniaca imapash jarcaita o problemata charishpaca, ñallami arreglaringa yashpami pensan. Paica ninmi: “Siempremi problemacuna tiajpica ama yapata preocuparingapaj, ali decidingapaj esforzarini. Ñuca decisiongunami ñuca imata munashcata pactachichun o na pactachi ushachunbash ayudan” ninmi.

19. Jehová Dios ñucanchita ninanda bendiciashcamanda agradicishcataca ¿imashinata ricuchi ushapanchi?

¹⁹ Jehová Diosca ñucanchicunataca ninandami bendiciashca. Chaimi paita agradicishcata ricuchingapaj, paita alabangapaca imagutapash rurana capanchi (Heb. 13:15). Chaipaca talvez ashtahuanmi villachina capanchi. Shina rurajpimi Jehová Diosca ashtahuan bendicianga. Y ñucanchicunallatapash ñucanchi causaipi Jehová Dios ali Dios cashcata ricui ushapashun. Shinami ñucanchipash Jesús nishcashna nipashun: “Ñucata cachamuj Taita munashcatami, rurashpa tucuchina cani. Chaimi, ñucapaj micunagu capan” nishpa (Juan 4:34).