1. Jehová Diospa tucui rurashcacunapi pensarishpaca ¿imatata tapurita ushapanchiman?

JEHOVÁ DIOS tucui imacunatalla rurashcapi pensarishpaca, rey Davidshnami sintirita ushapanchi. Paica “jahua pachata ricushpaca, cambaj maqui rurashcatami ricujuni. Lunatapash, luzerocunatapash, canmi rurapashcangui. Chaimandami cashna yarijuni: Runaca, ¿ima cajpita paitaca yariangui? Huañuna aichayu runaca, ¿ima cajpita ricungapaj shamungui? yajunimi” nircami (Sal. 8:​3, 4). Ñucanchipash rey Davidshnallatami, jahua cielopi caj jatun estrellacunata ricushpaca yanga shina sintirita ushapanchi. Chaimi talvez pensarinchi, ñucanchicuna ¿ima cajpita Jehová Diosca ñucanchita cuidan? nishpa. Pero imashinami ricugripanchi, Jehová Diosca Adán y Evataca cuidaitallaca na cuidarcachu. Jehová Diosca paicunataca paipa propio huahuacunatashnami ricurca.

2. Jehová Diosca, Adán y Eva ¿imashina causachunda munarca?

² Jehová Diosca cai alpapica pundapica Adán y Evatami rurarca. Juyaj Taita Diosca paicuna mirashpa catichunmi munarca. Chaimi, “ninanda mirashpa, ashtacacunapacha tucushpa, cai pachapi jundanguichi. Cai pachapi imalla tiajcunata cazuchinguichi” nishpa mandarca (Gén. 1:28). Jehová Diosca, Adán y Eva huahuacunata charichun y cai alpagutapash cuidachunmi munarca. Adán y Eva Jehová Diosta cazushca cashpaca paicunapash, paicunapa huahuacunapash Jehová Diospa familiacuna cashpami catita ushanman carca.

3. ¿Imamandata Jehová Diosca paipa familiapi cana bendiciondami Adán y Evamanga curca nipanchi?

³ Jehová Diosca paipa familiapi cana bendiciondami Adán y Evamanga curca. Jehová Dios gentecunata rurashcamanda parlashpaca, rey Davidca cashnami nirca: “Runataca, ashamandallami na angelcunatashna rurashcangui. Jatun canatapash, alicachi tucunatapash, coronata churachinshnami cushcangui” nishpa (Sal. 8:5).  Jehová Diosca angelcunata rurashpaca poderta charichun, inteligente cachun, shuj ruraicunata rurachunbashmi rurarca. Shinapash gentegucunata rurashpaca, na angelcunatashnaca rurarcachu (Sal. 103:20). Shinapash Jehová Diosca gentecunataca ashamandallami na angelcunatashna rurashca. Shinaca Adanda y Evata rurashpaca, Jehová Diosca paicunamanga shuj alipacha causaigutami curca.

4. a) Adanda, Evataca ¿imata pasarca? b) Cunanga ¿imatata yachajugripanchi?

 ⁴ Shinapash Adán y Evaca, Jehová Diosta na cazuimandami Jehová Diospa familiapurapi caitaca ñana usharca. Imashinami yachajugripanchi, Adán y Eva na cazushcamandami paicunapash, paicunapa huahuacunapash ashtaca llaquicunata chari callarirca. Shina pasashcajpipash Jehová Diospa munaica na cambiashcachu. Paica paita cazuj gentecuna para siempre paipa huahuacuna cachunmi munan. Cunanga cai quimsa tapuicunatami yachajupashun: 1) ¿Imashinata Jehová Diosca ñucanchicunata juyashcata ricuchishca? 2) Jehová Diospa familiapi cangapaj munashcataca ¿imashinata ricuchi ushapanchi? 3) Jehová Diospa huahuacunaca ¿ima bendiciongunatata chasquinga?

5. Jehová Diosta agradicishcataca ¿imashinata ricuchipanchi?

⁵ Jehová Diosca ñucanchita juyaimandami paiman rijchajta ñucanchitaca rurarca (Gén. 1:26, 27). Chaimandami ñucanchicunaca Jehová Dioshna shujcunata juyaita, ninanda llaquishpa, alita rurashpa trataitapash ushapanchi (Sal. 86:15; 145:17). Gentecunata shina tratashpami ñucanchicunaca Jehová Diosta alabanchi, shinallata paita agradicishcatapash ricuchipanchi (1 Ped. 1:14-16). Jehová Diospa munaita rurashpaca ñucanchillatami cushilla, ali sintiripanchi. Shinallata paipa familiapi cachun Jehová munashcashna gentecunapash caita ushapanchi.

6. Cai alpata rurashpaca ¿imashinata Jehová Diosca gentecunata juyashcata ricuchirca?

⁶ Jehová Diosca ñucanchicunata juyaimandami cai alpataca rurarca. Adanda nara rurashpallatami Jehová Diosca cai alpagutaca gentecuna causachun rurarca (Job 38:4-6; Jer. 10:12). Jehová Diosca ali, na mitsa Dios caimandami ñucanchicuna cushilla causachunga ashtaca ashtaca cosascunata rurashca (Sal. 104:14, 15, 24). Jehová Diosca paipa tucui rurashcacunata ricushpami ‘aligu cajta ricujurca’ (Gén. 1:10, 12, 31). Shinallata cai alpapi tucui tiashcacunata gentecuna mandai ushachunbashmi Jehová Diosca rurarca (Sal. 8:6). Jehová Diosca jucha illaj gentecuna para siempre cai alpaguta cuidashpa cushilla causachunmi munan. Caimandapashmi Jehová Diostaca agradicina capanchi.

7. Josué 24:15​pica ñucanchicuna ¿imata rurai ushashcatata ricuchijun?

⁷ Jehová Diosca ñucanchicunata juyaimandami ñucanchi causaipi imata ruranata dicidichun saquin. Chaimandami ñucanchicunaca imata ruranatapash dicidi ushapanchi (Josué 24:15​ta liipangui). Ñucanchi causaipi paita sirvinata decidijta ricushpaca Jehová Diosca ninandami cushijun (Sal. 84:11; Prov. 27:11). Ñucanchicunaca huaquin cosascunata rurangapaj dicidishpapashmi Jehová Diostaca cushichi ushapanchi. Chaipaca Jesuspa ejemplota ricupashunchi.

8. Jesusca ¿imata yaipi charishpata dicidin carca?

⁸ Jesusca imatapash dicidigrijushpaca, shujcunapira pensashpami imatapash dicidin carca. Por ejemplo, shuj punllaca paipash paipa apostolcunapash shaijushcacunapachami carca. Chaimandami shuj chulunlla pushtugupi samangapaj rinajurca. Shinapash paicuna chai pushtuman chayajpica, ashtaca ashtaca gentecuna ña chaipi cashcatami ricurca. Chai gentecunaca Jesús paicunaman yachachichunmi munanajurca. Chai gentecunata ricushpaca, Jesusca na culirarcachu. Ashtahuangarin ‘paicunataca ninanda llaquishpami, imagutapash tucuillaman yachachi  callarirca’ (Mar. 6:30-34). Ñucanchicunapash Jesushnallata shuj gentecunata ayudangapaj fuerzata, tiempoguta llujchingapaj dicidishpaca Jehová Diostami alabanajupashun (Mat. 5:14-16). Caicunata rurashpami Jehová Diospa familiapurapi cangapaj munashcatapash ricuchi ushapashun.

9. Taitamamacunaca ¿imatata rurana can?

⁹ Jehová Diosca gentecuna huahuacunata charichunmi rurashca. Shinallata huahuacunata paimanda yachachichunbashmi Jehová Diosca mandashca. ¿Quiquinga huahuacunata charipanguichu? Shina cashpaca ¿huahuacunamandapashchu Jehovata agradicipangui? Jehová Diosca gentecunamanllami huahuacunata charina bendiciondaca cushca. Angelcuna ashtaca poderta charishpapash, huahuacunata charitaca na ushanllu. Chaimandami quiquinga, quiquinba huahuacunataca Jehová Dios ‘nishcashna consejashpa, yachachishpa viñachina’ capangui (Efes. 6:4, TNM; Deut. 6:5-7; Sal. 127:3). Taitamamacuna huahuacunata ali viñachi ushachunmi Jehová Diosca paipa organizacionbica ashtaca publicaciongunata, videocunata, canciongunata, Internetpi ashtaca informaciongunatapash llujchishca. Caicunahuanmi Jehová Diospash, Jesuspash ñucanchi huahuacunata ninanda juyashcata ricuchishca (Luc. 18:15-17). Jehová Diosca taitamamacuna huahuacunamanda preocuparijta, cuidajtapash ricushpaca ninandami cushijun. Taitamamacuna huahuacunata Jehová Diosmanda yachachishpaca, paicunapash Jehovapa familiapuracuna caita ushachunmi ayudanajun.

10, 11. Jesús huañushcamandaca ¿imatata Jehová Diosca ruraita ushashca?

¹⁰ Jehová Diosca paipa familiapurapi gentecuna cutin cachunmi paipa shujlla Churiguta cai alpaman cachamurca.  Párrafo 4​pica Adán y Evapash, paicunapa huahuacunapash Jehová Diospa familiapurapi ñana cashpa catita ushashcatami ricuparcanchi (Rom. 5:12). Adán y Evaca paicunapa munaimi Jehová Diostaca na cazurca. Chaimandami Jehová Diospa familiapurapi caitaca ñana usharca. Shinapash paipa huahuacunahuanga ¿imata pasarca? Jehová Diosca Adán y Evapa huahuacunata adoptai ushangapami, Jesucristota ñucanchicunamanda huañuchun cachamurca (Juan 3:16; Rom. 5:19). Jesús huañushcamandami Jehová Diosca paita cazuj 144 mil gentecunata paipa huahuacuna cachun adoptashca (Rom. 8:15-17; Apoc. 14:1).

¹¹ Shinallata cunan tiempopica ashtaca millón gentecunapashmi Jehová Diospa munaitaca pactachinajun. Paicunaca Jesús mil huatacunata mandashca jipa, tucuri pruebata mishashca jipami Jehová Diospa familiapuracunapacha caita ushanga (Sal. 25:14; Rom. 8:20, 21). Caita yachaimandami ashtaca millón gentecunaca Jehová Diosta mañajushpaca, “ñucanchi Taitalla” nin (Mat. 6:9). Shinallata huañushca gentecuna causarishpaca, Jehová Diosmanda yachajuna oportunidadtami charinga. Paicunapashmi Jehová Dios mandashcashna causashpaca, Jehovapa familiapurapi caita ushanga.

12. ¿Ima tapuitata yachajugripanchi?

¹² Jehová Diosca gentecunata juyashcataca ashtaca ashtaca cosascunata rurashpami ricuchishca. Ñami ungido huauquipanicunataca paipa propio huahuacuna cachun adoptashca. Shinallata ‘pipash na cuentai ushanalla ashtaca gentecunapashmi’ jipa punllacunapica Jehová Diospa propio huahuacuna tucunga (Apoc. 7:9). Shinapash, ñucanchicuna Jehová Diospa familiapurapi cangapaj munashcataca ¿imashinata ricuchi ushapanchi? Ricupashunchi.

13. Jehová Diospa familiapi cangapaca ¿imatata rurana capanchi? (Marcos 12:30).

¹³ Jehová Diosta tucui shunguhuan sirvishpami paita juyashcata ricuchipanchi (Marcos 12:30​ta liipangui). Jehová Diosca ñucanchimanga ashtaca cosascunatami carashca.  Shinapash tucuimanda yalica paita adorana bendiciondami cushca. Jehovapa mandashcacunata cazushpaca paita juyashcatami ricuchipanchi (1 Juan 5:3). Jesusca Jehovapa mandashcacunatami yachachirca. Por ejemplo Jesusca nircami, ñucapa yachajujcuna tucushpa, bautizarichun gentecunata ayudapaichi nishpa (Mat. 28:19). Y Jesusca tucuicunallata juyarishpa causachunbashmi mandarca (Juan 13:35). Jehová Diosca paipa familiapica paita cazuj gentecunatallami chasquinga (Sal. 15:1, 2).

14. Shujcunata juyashcataca ¿imashinata ricuchi ushapanchi? (Mateo 9:36-38; Romanos 12:10).

¹⁴ Shujcunaman juyaita ricuchipashunchi. Jehová Diosca juyaj Diosmi can (1 Juan 4:8). Jehová Diosca ñucanchicuna paimanda nara yachajujpillatami ñucanchitaca ña juyarca (1 Juan 4:9, 10). Shujcunata juyashpaca Jehová Diospa ejemplota catinajushcatami ricuchinajupanchi (Efes. 5:1). Gentecunata juyashcataca Jehová Diosmanda paicunaman yachachishpami ricuchipanchi (Mateo 9:36-38 liipangui). Shinami shujcunapash jipa punllacunapi Jehovapa familiapurapi cai ushachun ayudanajupanchi. Paicunamanda pipash bautizarijpica juyashpa, respetashpami catina capanchi (1 Juan 4:20, 21). Imagupipash pandarijpica, ama yangata juchachipashunchichu. Shinallata, “imagutapash nali shunguta charimandami shina rurashcanga” nishpapash ama pensapashunchichu. Ashtahuangarin paicunata respetashcata ricuchipashunchi. Y ñucanchimanda imagupipash ashtahuan yali cashcatami pensana capanchi (Romanos 12:10​ta liipangui; Filip. 2:3).

15. ¿Picunatallata llaquishpa, ali tratana capanchi?

¹⁵ Tucuicunata llaquishpa, ali tratapashunchi. Jehová Diospa familiapi para siempre cangapaca, Bibliapi mandashca shinami causana capanchi. Jesusca tucuicunatami llaquishpa, ali tratana canguichi nircami. Cangunapa contracunatapashmi shinallata tratana canguichi nircami (Luc. 6:32-36). Huaquinbica tucuicunata llaquishpa ali tratanaca shinllimi can. Ñucanchita shina pasajujpica, Jesushnami imagutapash aliguta pensarishpa rurangapaj esforzarina capanchi. Jehová Diospa mandashcacunata tucuipi cazungapaj esforzarishpa, Jesuspa ejemplota catingapaj esforzarishpaca, Jehová Diospa familiapi para siempre cangapaj munashcatami ricuchipanchi.

16. Jehová Diospa familiata ama pingaipi saquingapaca ¿imatata rurana capanchi?

¹⁶ Jehová Diospa familiata ama pingaipi saquingapaj esforzaripashunchi. Shuj familiapica jipa huauquipanicunaca mayorcuna imata rurajtami catin. Familiapi mayor huauquipanicuna Bibliapa consejocunata respetashpa paicunapa causaipi pactachijpica, jipacunapashmi shinallata rurangapaj munanga. Shinapash imagutapash nalita rurajpica, chaitallatami paicunapash rurangapaj munanga. Shina cuendami Jehová Diospa familiapipash can. Shuj Jehovata sirvij Bibliapa consejocunata ñana respetashpa, panda yuyaicunata cati callarijpica, chaitallatami shuj huauquipanicunapash rurangapaj munanga. Shina rurashpaca, Jehová Diosta sirvijcunatami pingaipi saquinajun (1 Tes. 4:3-8). Shinaca shujcunapa nali ejemplocunataca ama catipashunchichu. Shinallami Jehová Diosmandaca nunca na caruyashun.

17. Ñucanchipa charishca cosascunamanda, culquimandaca ¿imatata yuyana capanchi? ¿Imamandata shina yuyana capanchi?

¹⁷ Ñucanchipa charishca cosascunapi confianapa randica, Jehová Diospi confiapashunchi. Jehová Diosca paipa Reinotara pundapi churajpi y paipa mandashcacunata respetajpica, imagupash na faltangachu ninmi (Sal. 55:22; Mat. 6:33). Chaimandami ñucanchi charishca cosascuna o culquimi cai mundopica cushilla causachun ayudanga nishpaca na pensanachu capanchi. Ñucanchicunaca Jehová Diosta sirvishpalla tranquilo, cushilla causaiguta chari ushashcatami yachapanchi (Filip. 4:6, 7). Shinallata, “ashtaca cosascunata randingapaj culquiguta charishpapash ¿chai cosascunata randishca jipa cuidangapaj, utilizangapaj tiempoguta charishacha?”  nishpami pensarina capanchi. Shinallata tapuripashunchi: “Ñucapa charishca cosascunataca ¿ninandachu valichini?” nishpa. Jehová Diosca paipa familiapica, paita ali sirvijcuna cachunmi munan. Chaimandami ñucanchi charishca cosascuna paita ali sirvinata jarcachunga na saquina capanchi. Ñucanchicunaca Jesuspa tiempopi shuj charij charij jovenshnaca na cangapaj munapanchichu. Cai jovenga Jesusta catij tucuna oportunidadtami chingachirca. Shinallata Jehová Diosta sirvishpa jipa punllacunaman Jehovapa shuj churi tucuna oportunidadtami chingachirca. Pero cai jovenga ¿imamandata chai oportunidadta chingachirca? Porque cai jovenga paipa charishca culquita, cosascunatami Jehová Diostapash yali juyashcarca (Mar. 10:17-22).

18. Jehová Diospa nishcacunata pactachij gentecunaca ¿ima bendiciongunatata jipa punllacunapica chasquinga?

¹⁸ Jehová Diosta cazuj gentecunaca shuj punllaca Jehová Diosta juyashpa para siempre adorana bendiciondami chasquinga. Jehová Diosca cai alpataca gentecuna causachunmi aligutapacha rurarca. Chaimandami cai alpapi causana esperanzata charij gentecunaca, cai alpata cuidashpa ricuriana bendicionda chasquinga. Jehovapa Reino cai alpata ña mandajujpica cai alpaca callaripi cashcashnami juyaillagu tucunga. Jesusca cai alpata mandai callarishpaca, Adanba y Evapa culpamanda tiashca llaquicunatami tucuita tucuchinga. Shinallata Jehová Diosca ashtaca gentecunatami causachinga. Chai gentecunaca cai alpagu shuj paraíso tucujpi, sano imapash ungui illaj causana oportunidadtami chasquinga (Luc. 23:42, 43). Chai tiempopica Jehová Diosta sirvijcunaca jucha illajmi tucunga. Chaipimi David nishcashnaca “jatun canatapash, alicachi tucunatapash” gentecunaca chasquinga (Sal. 8:5).

19. ¿Imatata yarina capanchi?

¹⁹ Quiquin pipash ‘na cuentai ushanalla ashtaca gentecunapuramanda’ cashpaca shuj alipacha bendiciondami charipangui. Jehová Diosca quiquinda juyaimandami paipa familiapi cachun munan. Shinaca paipa ñaupapi imagutapash alita rurashpa ali ricuringapaj esforzaripangui. Jehová Dios cusha nishca bendiciongunata chasquinatapash yaria causapangui. Jehová Diosta para siempre adorana, alabana bendiciondapash valichishpa ricupangui.