1. Bibliamanda imashna yachajui callarishcata parlanaca ¿imashinata ayudan?

 “¿IMASHINATA Bibliamandaca yachajui callariparcangui?”. Shuj huauqui o pani quiquinda ashtahuan rijsingapaj munaimandami shina tapuparianga. Quiquinbashmi talvez chashnallata tapupariangui. Ñucanchi huauquipanicuna Jehová Diosta imashina rijsi callarishcata, paita imashina juyai callarishcata yachanataca ninandami gushtapanchi. Shinallata Bibliamanda yachajuna ñucanchipa imamanda importantepacha cashcata parlanatapash ninandami gushtapanchi (Rom. 1:11). Caicunamanda parlanami testigo de Jehová cana shuj jatun bendición cashcata yarichun ayudan. Shinallata Bibliapa ‘cabal yachachishcacunata pactachishpa’ causangapaj esforzarichunbashmi ayudan. Shinami Jehovapa ñaupapi ali ricurishpa, paita cushichishpa causashun (3 Juan 4).

2. Cai temapica ¿imatata yachajupashun?

² Cai temapica Bibliapa cabal yachachishcacunata imamanda ninanda juyashcatami yachajupashun. Shinallata cai regaloguta ninanda valichishcata imashina ricuchinatapashmi yachajupashun. Cai yuyaimanda yachajunami Jehová Dios ñucanchita paipa organizacionbi cachun ayudashcata ashtahuan valichichun ayudanga (Juan 6:44). Shinallata Bibliamanda shujcunaman yachachina munaita ashtahuan charichunbashmi ayudanga.

3. Bibliapa yachachishcacunataca ¿ima razonmandata ninanda juyapanchi?

³ Bibliapa cabal yachachishcacunataca ashtaca razongunamandami  juyanchi. Primeroca Bibliapa yachachishcacuna Jehovapa yachachishcacuna cashcamandami ninanda juyapanchi. Ñucanchicuna Bibliata yachajushpaca Taita Dios ashtaca poderta charishcata, cielota y cai alpata rurashcatami yachajupashcanchi. Shinallata Taita Diosca ñucanchita shuj juyaj Taitashna cuidan cashcatapashmi yachajupashcanchi (1 Ped. 5:7). Shinallata Taita Diosca ‘llaquij, juyaj, na ñapash fiñarij, ninanda llaquij, na llullajmi’ can (Éx. 34:6). Jehová Diosca tucuita ali ruraj Diosmi can (Is. 61:8). Ñucanchicuna llaquicunahuan sufrijujta ricushpaca Jehová Diosca ninandami llaquirin. Pero ñalla pachami Taita Diosca chai tucui llaquicunata tucuchinga (Jer. 29:11). Chai razongunamandami Jehová Diostaca ninanda juyapanchi.

4, 5. Apóstol Pabloca ¿imamandata esperanzataca shuj ancla gancho jirruhuan compararca?

⁴ Bibliapa cabal yachachishcacunata juyangapaca ¿ima razonbashta tian? Por ejemplo, Bibliapa cabal yachachishcacunaca shamuj punllacunapa alipacha esperanzatami cun. Chaimanda parlashpami Apóstol Pabloca: “Imashinami shuj ancla gancho jirruca barcota shinllita charijun, shinallatami ñucanchi shuyanajushca esperanzapash ñucanchi causaitaca shinllita charijun” nircami (Heb. 6:19). Imashinami shuj ancla gancho jirruca barcota shinlli shayajuchun ayudan, shinallatami esperanzaca ñucanchicuna problemacunata charijpi aguantashpa ñaupaman catichun ayudan.

⁵ Cai ejemplota utilizashpaca, Pabloca jahua cielopi causangapaj rina esperanzata charij ungido huauquipanicunamandami parlajurca. Shinallata, cai alpa shuj paraíso tucujpi para siempre causana esperanzata charij huauquipanicunamandapashmi parlajurca (Juan 3:16). Shinaca para siempre causana esperanzata charinami ñucanchi causaihuan imatapacha ruranata yachachun ayudan.

6, 7. Yvonne panigutaca ¿imashinata Bibliata yachajunaca ayudarca?

⁶ Cunanga Yvonne panigupa experienciata ricupashun. Paica Jehová Diosta na rijsishpami viñarca. Chaimandami paica huañunataca ninanda manllan carca. Paica: “Caya punllaca talvez ñana causaringachu” nishca shimicunata liishcatami yarin carca. Shinallata ninbashmi: “Puñuna horaspashmi ‘Shamuj punllacunapica ¿imashi pasanga? nishpa pensamientomi puñungapapash rin carcani. Shinallata ¿imamandata caipi canchi?’ Huañungapaca na munanichu nishpapashmi pensari carcani” ninmi.

⁷ Yvonne ña joven tucushpami testigo de Jehovacunahuan Bibliamanda yachajui callarirca. Paica: “Cai alpa shuj paraíso tucujpi para siempre causana esperanzapimi cri callarircani” ninmi. ¿Imashinata panigutaca Bibliamanda yachajunaca ayudarca? Paica: “Huañuimanda o shamuj punllacunapica imashi pasanga nishpaca, ñana preocuparinichu” ninmi. Imashinami ña ricuparcanchi, Yvonne panigupaca Bibliamanda yachachishcacunaca ninan valishcami can. Chaimi paniguca Bibliapi yachachishca ali esperanzataca shujcunaman villachinata ninanda gushtan (1 Tim. 4:16).

8, 9. a) Jesús parlashca runaguca ¿imatata rurarca? b) Bibliapa yachachishcacunaca quiquinbaca ¿valishcachu can?

⁸ Bibliapa yachachishcacunapica Taita Diospa Gobiernomanda ali villaigucunapashmi can. Chaimanda parlashpami Jesusca Taita Diospa Gobiernoca shuj valishca oroshnami can nirca. Chaimi Jesusca Mateo 13:44​pica: “Shuj runaguca pambapi pacashca valishca orotami tarirca. Tarishpaca cutinmi pacashpa saquirca. Cushijuimandami tucui imata charishcata jatungapaj rishpa chai pambata randirca. Jahua cielopi Taita Diospa Gobiernoca chai valishca valishca oroshnami can” nircami. Imashinami ricupashcanchi cai runaguca orotaca na mascajurcachu. Pero chai valishca  orota tarishpaca chai orota charingapaj munaimandami pai tucui charishca cosascunata jaturca. Chai oro ninan valishca cajta yachaimandami chai runaguca chashna rurarca.

⁹ Bibliamanda cabalguta yachajushcamandaca ninandami cushijupanchi. Cai mundopi cosascunaca Jehová Diosta sirvinahuan, Jehová Diospa Gobierno mandajujpi para siempre causana esperanzahuanga na igualanllu. Jehová Dioshuan ali amigo canaca tucuita yali valishcami can. Paihuan ali amigo canami ñucanchitaca ninanda cushichin (Col. 1:10).

10, 11. Michaeltaca paipa causaipi cambiocunata rurachunga ¿imata ayudarca?

¹⁰ Ashtacacunami Jehová Diospa ñaupapi ali ricuringapaj munaimanda ashtaca cosascunata saquina tucupashcanchi. Huaquingunaca alipacha estudiashpa shuj titulota japinata y shujcunaca ashtahuan trabajashpa charij tucunatami saquishca. Shinallata huaquingunaca Jehová Diosta rijsimandami paicunapa causaipica ashtaca cambiocunata rurana tucushca. Cunanga Michaelpa ejemplota ricupashun. Pai joven cashpaca karatetami yachajun carca. Paica ninmi: “Karateta yachajungapaj ali saludta charishcamandaca orgullosomi sintirin carcani. Huaquinbica pipash ñucataca na yalihuangachu nishpami pensarin carcani” ninmi. Shinapash Michael Bibliata yachajui callarishpaca Jehová Diosca nalita rurajcunataca na ricunayachin cashcatami yachajurca (Sal. 11:5). Bibliamanda yachachij cusahuarmigumanda parlashpaca, Michaelca ninmi: “Karateta yachajunataca saquinami canguitaca na nihuarcachu. Paicunaca Bibliapi nishcatallami yachachishpa catihuarca”.

¹¹ Michael Jehová Diosmanda ashtahuan yachajushpami Jehová Diostaca ashtahuan juyai callarirca. Jehová Dios paipa sirvijcunata llaquishpa, juyaihuan tratajta yachajunami Michaelpa shunguman chayarca. Tiempohuanga Michaelca shuj importante decisiondami japina tucurca. Paica ninmi: “Karateta yachajunata saquinaca ñucapaca na fácil canachu carca. Pero chai decisionda japishpaca Jehová Diospa ñaupapica ali ricurinataca alimi yacharcani” ninmi. Michaelca Bibliapa yachachishcacunata ninanda valichimandami paipa causaipi cambiocunata rurarca (Sant. 1:25).

12, 13. Panigu Maylitaca Bibliata yachajunaca ¿imashinata ayudarca?

¹² Bibliapa cabal yachachishcacuna importantepacha cashcata ricuchingapami, Bibliapica cai yachachishcacunataca tutapi punchayachij shuj lamparaguhuan comparan (Sal. 119:105; Efes. 5:8). Azerbaiyán llactamanda Mayli paniguca Biblia paipa causaipi ayudashcamandaca ninandami valichin. Paipa taitamamacunaca diferente religiongunatami charirca. Paipa taitaca musulmanmi carca. Y paipa mamaca judiami carca. Chaimi paica nin: “Taita Dios tiajtaca alimi yacharcani. Pero ashtaca cosascunata na intindimandami huaquin cosascunapi pensarin carcani. Por ejemplo, ‘Taita Diosca ¿imamandata gentecunataca rurashca? ¿Imamandata sufrinchi? Y ¿imamandata infiernopi para siempre sufringapaj rina canchi?’ nishpami pensarin carcani. Shinallata gentecunaca ima pasajpipash Taita Diospa voluntadmi can ninmi carca. Chaimandami ‘Taita Diosca ¿gentecunataca muñecotashnachu controlan? Gentecuna sufrinajujpica ¿paica cushijunlla?’ nishpami pensarin carcani” ninmi.

¹³ Maylica pai yachangapaj munashca tapuicunapa respuestacunataca mascashpami catirca. Tiempohuanga Bibliamanda yachajushpami testigo de Jehová tucurca. “Bibliapa yachachishcacunami ñuca causaipi cushilla cachun ayudahuarca. Shinallata Bibliapa yachachishcacuna cabal cashcata yachanami tranquila, ali cachun ayudahuarca” ninmi. Mayli panigushnallatami ñucanchicunapash  Jehová Diostaca adorapanchi. Porque paimi “yana yana tutapishna causanajushcata alipacha michaguman” cayamushca (1 Ped. 2:9).

14. Bibliapa yachachishcacunata ashtahuan juyangapaca ¿imatata rurai ushapanchi? (“ Huaquin comparacionguna” nishca recuadrota ricupangui).

¹⁴ Imashinami ñaja parrafocunapi ricupashcanchi Bibliapa cabal yachachishcacunaca ninan valishcami can. De seguromi quiquinbash shinallata pensapangui. Bibliapa cabal yachachishcacunata ashtahuan juyangapaca imata rurai ushashcapi pensaripashunchi. Shinami cai yachachishcacunata juyashcataca ruraicunahuan ricuchishun.

15. Bibliapa cabal yachachishcacunata juyashcataca ¿imashinata ricuchinchi?

¹⁵ Bibliata y publicaciongunata siempre estudiangapaj esforzarishpami Bibliapa cabal yachachishcacunata juyashcata ricuchinchi. Ashtaca huatacunata testigo cashpapashmi Bibliataca siempre yachajushpa catina capanchi. Punda llujshishca inglés shimipi La Atalaya revistapica cashnami nirca: “Cai mundopica ashtaca panda yachachishcacunami tian. Chaimandami Bibliapa cabal yachachishcacunata tarinaca difícil caita ushan.  Bibliamanda cabalta yachangapaj munashpaca Bibliamanda ashagutalla yachajushpaca na quidanachu capanchi. Ashtahuan yachajushpami catina canchi [...]”. Bibliata estudiangapaca esforzarishpami catina capanchi.

16. ¿Imashina estudianata quiquindaca ayudashca? (Proverbios 2:4-6).

¹⁶ Tucuicunami liinata y estudianataca na ashta gushtapanchi. Pero Jehová Diosca Bibliapa yachachishcacunata ali intindichun munaimandami Bibliapa yachachishcataca ‘ninanda mascanshna mascanguichi’ nishpa animan (Proverbios 2:4-6​ta liipangui). Bibliata yachajungapaj esforzarishpaca ñucanchillatami beneficiaripanchi. Por ejemplo Corey huauquica pai Bibliata liijushpaca cada versocunata asha asha liishpami rin. Paica: “Bibliapa cada notaguta liishpami ashtahuan investigani. […] Chashna estudianami ñucataca ninanda ayudahuashca” ninmi. Imashna estudiashpapash estudiangapaj ninanda esforzarishpami Bibliapa yachachishcacunata ninanda valichishcata ricuchipanchi (Sal. 1:1-3).

17. Ñucanchi causaipica ¿imatata pactachina capanchi? (Santiago 1:25).

¹⁷ Bibliapa yachachishcacuna ñucanchicunata ayudachunga, Bibliaguta liishpallaca na quidanachu capanchi. Ashtahuangarin ñucanchi causaipi Bibliapa cabal yachachishcacunata pactachingapami esforzarina capanchi. Shinami Bibliapa yachachishcacunaca cushilla causachun ayudanga (Santiago 1:25​ta liipangui). Pero Bibliapa cabal yachachishcacunata pactachishpa causajushcataca ¿imashinata yachai ushapanchi? Por ejemplo shuj huauquiguca ñucanchicuna imashna causanajushcapi y imapi mejorana cashcapimi pensarina canchi ninmi. Shinallata Apóstol Pablopashmi: “Mashnata ñaupaman catinajushca cashpapash, chai ñanbillata aliguta purishpa catipashunchi” nirca (Filip. 3:16).

18. ¿Imamandata Bibliapa cabal yachachishcacunata pactachingapaj esforzarina capanchi?

¹⁸ Bibliapa cabal yachachishcacunata ñucanchi causaipi pactachingapaj esforzarishpaca ñucanchillatami ashtacata beneficiaripashun. Shinallata Jehová Diosta y huauquipanicunatapashmi ninanda cushichishun (Prov. 27:11; 3 Juan 4). Shinaca cai razongunamandami Bibliapa yachachishcacunataca ninanda valichina capanchi. Shinallata ñucanchi causaipipash pactachingapami esforzarina capanchi.