1. Ashtaca jovengunaca ¿imatata rurashca?

 CADA huatami ashtaca jovenguna bautizarin. ¿Quiquinbashchu chairalla bautizaripashcangui? Shina cajpica congregacionmanda huauquipanicuna y Jehová Diospash quiquinmandaca cushillami sintiripan (Prov. 27:11). Jovenguna, quiquingunaca Taita Diosta ashtahuan rijsingapaca talvez ashtaca huatacunatami Bibliamandaca yachajupashcanguichi. Shina rurashcamandami Biblia Taita Diospa Shimi cashcata seguro cai ushapashcangui. Chaimandami cunanga Taita Diosta rijsipangui y juyaita ushapangui y Jehová Diosta juyaimandami paita sirvinata y bautizarinatapash decidipashcangui. Shina decidishcamandaca nunca na arripintiringuichu.

2. Cai temapica ¿imatata ricugripanchi?

 ² Talvez nara bautizarishpaca ashtaca llaquicunatami chimbapurana tucupashcangui. Pero bautizarishca jipapashmi tiempohuanga shuj shuj llaquicunata chimbapurana tucupangui. Diablomi Jehová Diosta ñana servishpa catichun, paimanda caruyachun imacunatapash ruran (Efes. 4:14). Pero Jehová Diosta na saquishpa y paita servishpa catichunga ¿imata ayudanga? Espiritualmente shinlli cana o ‘ashtahuan alipacha yachajushca’ canami ninanda ayudanga (Heb. 6:1). Cai temapimi espiritualmente shinlli cashpa catingapaj imata rurana cashcata ricugripanchi.

3. Jesusta catijcunaca bautizarishca jipaca ¿imatata rurashpa catina can?

³ Pipash bautizarishpaca Éfeso llactamanda huauquipanicunaman, apóstol Pablo cushca consejotami catina can. Pabloca chai huauquipanicunataca espiritualmente ‘rucu gentecunashnami’  cana canguichi nircami (Efes. 4:13). Chai shimicunata nishpaca apóstol Pabloca paicunataca shinlli feta charingapaj esforzarishpa catichi nijunshnami carca. Apóstol Pabloca espiritualmente ñaupaman catinataca shuj viñajuj huahuaguhuanmi compararca. Shuj huahuaguca paicunapa taitacunataca ninandami cushichin. Shinapash tiempohuanga viñashpa catimandami “huahuashna canataca” saquina can (1 Cor. 13:11). Jehovata sirvijcunahuanbash shinallatami pasan. Bautizarishca jipaca espiritualmente viñanshnami ñaupaman catina can. Espiritualmente ñaupaman catingapaj ima ayudai ushashcata ricupashunchi.

4. Jovenguna Jehová Diosta ashtahuan juyashpa catingapaca ¿imatata rurana capanguichi? (Filipenses 1:9).

⁴ Jehová Diosta ashtahuan juyangapaj esforzaripangui. De seguromi quiquinga Jehová Diosta ninanda juyapangui. Pero Jehová Diosta ashtahuan juyangapami esforzarita ushapangui. Jehovata ashtahuan juyangapaca ¿imatata rurai ushapangui? Apóstol Pablomi Filipenses 1:9​pica imata rurana cashcata ricuchirca (chai textota liipangui). Filipo llactamanda huauquipanicunapa juyai “ashtahuan ashtahuan mirachunmi” apóstol Pabloca Jehová Diosta mañarca. Cai shimicunaca ñucanchicuna Jehová Diosta ashtahuan ashtahuan juyashpa cati ushashcatami ricuchin. Y chaipaca Jehová Diosmanda ‘cabalguta yachajushpa, aligutapacha intindishpami’ catina capanchi. Jehová Diosta ashtahuan rijsishpami paitaca ashtahuan juyanchi, pai imashna cashcatapash yachaj chayanchi, ima cosascunatalla ruranata gushtajtapash yachaj chayapanchi. Chaimandami paitaca siempre cushichingapaj munapanchi. Shinallata paipa voluntadta rurangapami ninanda esforzarinchi.

5, 6. ¿Imata rurashpata Jehová Diosta ashtahuan juyaita ushapanchi?

⁵ Jehová Diosta ashtahuan juyangapaca paipa Churitami rijsina capanchi. Jesusca Jehová Dios imashna cashcataca alipachami ricuchin (Heb. 1:3). Y Jesusta ali rijsingapaca Bibliapi Mateo, Marcos, Lucas y Juan librocunatami estudiaita ushapanchi. ¿Quiquinga tucui punllacuna Bibliata liina costumbretachu charipangui? Chai costumbreta na charishca cashpaca chaita rurangapami esforzarita ushapangui. Jesuspa causaimanda estudiajushpaca Jesús imashna cashcapi pensaripangui. Paica ali alimi carca, huahuacunapashmi paimanga quimirinlla carca (Mar. 10:13-16). Jesús ali ali cashcamandami hasta paipa discipulocunapash con confianza imagutapash nin carca (Mat. 16:22). Jesusca paipa Taitashna caimandami shujcunataca ali ali tratan carca. Jehová Diosca ñucanchicuna paiman quimirichunga saquinllami. Chaimandami Jehová Diosta mañajushpaca imagutapash con confianza nita ushapanchi. Paica ñucanchicunata juyaimandami ñucanchimanda preocuparin (1 Ped. 5:7).

⁶ Jesusca tucui gentecunata llaquishpami tratan carca. Chaimandami apóstol Mateoca: “Gentecunata ricushpaca ninandami Jesusca llaquirin carca. Porque chai gentecunataca chugri chugri, michij illa llamagucunatashnami ricun carca” nircami (Mat. 9:36). Y Jehová Diosca ¿imashinata gentecunataca ricun? Paimanda parlashpami Jesusca: “Uchilla huambragucunashna ñucata catijcunamanda shugullapash chingarichunga, paica na munanllu” nircami (Mat. 18:14). Jehová Dios ñucanchicunata juyajta yachashpaca cushillapachami sintiripanchi. Shinaca Jesusta ashtahuan rijsishpaca Jehová Diostapash ashtahuanmi juyashun.

7. Jehovata ali sirvij huauquipanicunapa amigo canaca ¿imashinata quiquindaca ayudanga?

⁷ Jehová Diosta ashtahuan juyangapaj y quiquinba fe ashtahuan shinlliyashpa catichunga. ¿Imatata rurai ushapangui? Congregacionmanda Jehovata ali sirvij huauquipanicunapa amigomi caita ushapangui. Paicunaca siempremi cushilla can. Jehová Diosta  sirvij callarishcamandapash nunca na arripintirishcachu. Paicunataca paicuna charishca experienciacunamanda parlachun mañapangui. Y imatapash decidina cashpaca paicunapa consejota mañapangui. Bibliapica: “Ali yuyaita cujcuna taucacuna tiajpica, ima llaquipash na japinllu” ninmi (Prov. 11:14).

8. Bibliapi yachachishcacuna cierto cajta na seguro cashpaca ¿imatata rurai ushapangui?

⁸ Bibliapi yachachishcacuna cierto cajta seguro capai.  Párrafo 2pi ricushcashnaca Satanasca jovenguna shinlli feta charichunga na munanllu. Ashtahuangarin Bibliapa yachachishcacunapi quiquin confianata saquichunmi munan. Por ejemplo, ashtahuan jovenyashpaca shuj gentecuna evolucionmanda parlajtami uyapangui. Evolucionbi crijcunaca Jehová Dios tiajtaca na crinllu. Talvez huahuara cashpaca cai yuyaicunapica pensaitapash na pensapashcanguichu. Shinapash escuelapi o colegiopi cajpimi profesorcunaca evolucionmanda yachachi callaringa. Profesorcuna evolucionmanda yachachijpica talvez crinaishnallami uyaringa. Pero paicuna shuj Dios tiajta cringapaj nunca na esforzarishcataca yaipimi charina capangui. Proverbios 18:17​pi nishcatami yarina capangui. Chaipica: “Ali llujshingapaj punda villaj runaca, imatapash cashcatapacha ruraj runashnami ricurin. Ashtahuangarin paita na ricunayachij runa shamushpaca, llullajushcatami ricuchin” ninmi. Cai shimicunamandaca ¿imatata yachajupanchi? Escuelapi imatapash yachachijpica na yangata crinallachu capangui. Taita Diospa Shimi Bibliatami quiquinllata ashtahuan estudiana capangui. Shinallata publicaciongunapipashmi informaciondaca mascaita ushapangui. Bibliamanda nara yachajushpa evolucionbi crin cashca huauquipanicunahuan parlapangui. Paicunataca shuj juyaj Taita Dios tiajta tucui shunguhuan crichunga imata ayudarca nishpa tapupangui. * Cai huauquipanicunahuan parlanami Bibliapi yachachishcacuna imamanda cierto cashcata cuenta japichun ayudanga.

9. Panigu Melissamandaca ¿imatata yachajupanchi?

⁹ Panigu Melissataca Taita Dios tucuita rurashcata seguro cangapaca chai temamanda ashtahuan investiganami ayudarca. * Melissaca ninmi: “Profesorcunaca evoluciondaca ciertopacha cashcatashnami yachachin. Callaripica cai temamanda ashtahuan investigangapaca na  munarcanichu. Porque ashtahuan investigashpaca evolución cierto cashcataimanmi talvez tariringa yarcanimi. Pero Bibliapa yachachishcacunapi seguro cachun Jehová Dios munashcatami yarircani. Chaimandami ¿Existe un Creador que se interese por nosotros? nishca librota liircani, shinallata ¿Es la vida obra de un Creador? y El origen de la vida. Cinco cuestiones dignas de análisis nishca folletocunatapash liishpami ashtahuan investigarcani. Caicunata estudianami ninanda ayudahuarca. Pundallata caicunataca ashtahuan investigana cashcani yarcanimi”.

10, 11. Diablopa tentaciongunapi ama urmachunga ¿imata ayudanga? (1 Tesalonicenses 4:3, 4).

¹⁰ Nali munaicunata mishangapaj esforzaripai. Joven cajpica shuj jarihuan, shuj huarmihuan cana munaicunaca fuertepachami caita ushan. Shinallata shujcunapashmi shuj jarihuan o shuj huarmihuan cachunga atichita ushan. Diabloca quiquin nalicunata rurachunmi munan. Pero chai tentacionbi ama urmachunga ¿imata ayudanga? (1 Tesalonicenses 4:3, 4​ta liipangui). Jehová Diosta mañajushpaca quiquin imashna sintirishcata villapai y fuerzata cuchunbash mañapai (Mat. 6:13). Jehová Diosca ñucanchicunataca na juzganllu más bien ayudangapami munan (Sal. 103:13, 14). Bibliata liinapashmi ayudaita ushan. Panigu Melissaca nali, mapa pensamientocunatami mishana tucurca. Paniguca: “Bibliata cada punlla liinami chai nali pensamientocunata mishachun ninanda ayudahuarca. Bibliata liinami ñuca causai Jehovapa cashcata y paimanda na caruyangapaj munashcatapash yarichun ayudahuarca” ninmi (Sal. 119:9).

¹¹ Imapash problemata charishpaca quiquinba taitaman o mamaman villapangui, na sololla canguichu. Ñucanchita imapash pasajujta shujcunaman parlanaca na fácil canllu. Shinapash shujcunaman villanami ali can. Panigu Melissaca ninmi: “Jehová Diostami ayudahuai nishpa mañarcani chai jipaca ñuca taitamanmi ñuca ima pasajushcata villarcani. Ñuca taitaman ñuca ima pasajushcata villashca jipaca alimi sintirircani. Jehová Diospash ñucamanda cushilla cashcataca alimi yacharcani”.

12. Ali decidi ushangapaca ¿imatata rurana capangui?

¹² Bibliapa consejocunata catipangui. Ashtahuan viñashpaca quiquinllatami imagutapash decidina tucupangui. Pero imatapash decidijushpa ama pandaringapaca ¿imatata rurai ushapangui? (Prov. 22:3). Kari shuti paniguca ali decisiongunata agllai ushangapaj imata rurashcatami nin. Panigu Karica Taita Diosta ali sirvij huauquipanicunaca cada situacionbi caita o chaitami rurana cangui nishpa nijuchunga na minishtin cashcatami cuenta japirca. Panigu Karica ninmi: “Bibliapa nishcacunata cazuna cashcamandallaca na cazuna carcanichu ashtahuangarin Bibliapi ima nishcata aligutami intindina carcani”. Bibliata liijushpaca cashna pensaripai: “Cai textocunaca Jehová Diosmandaca ¿imatata yachachihuan? Cai textocunamandaca ¿maijan consejocunata alita rurachun ayudahuan? Cai consejota pactachishpaca ¿imashinata beneficiarisha?” (Sal. 19:7; Is. 48:17, 18). Bibliata liishpa y Bibliapa consejocunapi pensarishpaca alimi decidita ushapangui. Shina rurashpaca Jehová Diostami cushichingui. Jehová Dios imashna pensajta ashtahuan yachajushpaca imapash situacionbi cashpa imata ruranataca alimi yachapangui. Shinami shinlli feta charishcata ricuchipangui.

13. Ali amigocunata charinaca ¿imashinata quiquindaca ayudaita ushan? (Proverbios 13:20).

¹³ Jehovata juyaj amigocunata mascapangui. Párrafo 7​pica quiquinba amigocunaca quiquinba fe ashtahuan shinlliyachun ayudai ushashcatami ricuparcanchi (Proverbios 13:20​ta liipangui). Sara shuti paniguca Jehová Diostaca ñana cushilla sirvijurcachu. Shinapash ima ayudashcata ricupashunchi. Paniguca ninmi: “Ali amigocunatami tarircani, shuj ñañaguhuanga  cada semanami Villajun revistata estudiangapaj tandanajun carcanchi. Cutin shuj ñañaguca reuniongunapi comentachunmi animahuarca. Paicuna ayudahuashcamandami estudio personalta rurana, Jehová Diosta mañana importantepacha cashcata cuenta japircani. Jehová Diosman ashtahuan quimirishpami cutinllata Jehovataca cushilla sirvi callarircani”.

14. Huauqui Julienga ¿maipita ali amigocunata tari usharca?

¹⁴ Ali amigocunata charingapaca ¿imatata rurai ushapangui? Julien shuti anciano huauqui imata rurashcata ricupashunchi: “Joven cashpaca predicacionbica ali amigocunatami tarircani. Paicunaca cushi cushicunami carca. Paicunaca predicashpa ninanda cushijui ushashcatami yachachihuarca. Chaimi tiempo completopi sirvina metata churarircani. Shinallata ñuca edadta charijcunahuanlla amigo tucushpaca ashtahuan experienciata charij huauquipanicunahuan llevarinata na aprovechajushcatami cuenta japircani. Y jipaman Betelpi sirvi callarishpaca ali amigocunatami tarircani. Chai amigocunami ali diversiongunata agllanata yachajuchun ayudahuarca. Chaita ruranami Jehová Diosman ashtahuan quimirichun ayudahuarca”.

15. Apóstol Pabloca ¿imatata Timoteomanga nirca? (2 Timoteo 2:20-22).

¹⁵ Congregacionmanda shuj huauqui o pani nalicunata rurachun animajujpica ¿imatata rurai ushapangui? Apóstol Pabloca congregacionbi na tucuicuna Jehovata ali sirvinajushcataca alimi yacharca. Chaimandami Timoteotaca Jehovata na ali sirvijcunamandaca caruyanami cangui nirca (2 Timoteo 2:20-22​ta liipangui). Jehovapa amigo cangapaca ninandami esforzarina capanchi. Paipa amigo canaca shuj jatun bendicionmi can. Chaimandami Jehovamanda pipash caruyachichunga nimamanda na saquina capanchi (Sal. 26:4).

16. ¿Ima metacunatata churarita ushapangui?

¹⁶ Ali metacunata churaripai. Quiquinba fe ashtahuan shinlliyachun y Jehovata ashtahuan ali sirvichun ayudaj metacunata churaripangui (Efes. 3:16). Por ejemplo, estudio personalta siempre rurangapaj y Bibliatapash ashtahuan liingapami esforzarita ushapangui (Sal. 1:2, 3). O talvez Jehová Diosta más seguido tucui shungu mañangapami esforzarita ushapangui. Na cashpaca ali diversiongunata agllanata  y tiempota ali utilizanatapashmi yachajuita ushapangui (Efes. 5:15, 16). Jehovata ashtahuan ali sirvingapaj esforzarijujta ricushpaca Jehová Diosca ninandami cushijunga.

17. Shujcunata ayudashpaca ¿imashinashi sintiripangui?

¹⁷ Jovenguna shujcunata ayudashpami Jesusta ali catijcuna cashcata ricuchipanchi. Jesusca: “Imagutapash carashpami, carajpi japishcatapash ashtahuan yalita cushijurin” nircami (Hech. 20:35). Shujcunata ayudangapaj quiquinba tiempota utilizashpaca quiquinllatami cushilla sintiripangui. Shujcunata ayudangapaca ¿imatata rurai ushapangui? Talvez mayorlla huauquipanicunata o ungushca huauquipanicunatami paicuna ima minishtishcagupi ayudaita ushapangui. Na cashpaca celularta o tabletta imashna utilizanatami yachachita ushapangui. Shinallata siervo ministerial cangapapashmi esforzarita ushapangui. Shinami congregacionmanda huauquipanicunataca ashtahuan ayudaita ushapangui (Filip. 2:4). Shinallata na testigo de Jehová gentecunaman Taita Diospa Gobiernomanda ali villaigucunata predicashpapashmi paicunata juyashcataca ricuchi ushapangui (Mat. 9:36, 37). Y ushashpaca Jehovata tiempo completopi sirvina metatapashmi churarita ushapangui.

18. Jehovata tiempo completopi sirvinaca ¿imashinata ayudan?

¹⁸ Jehovata tiempo completopi sirvinami Jehovaman ashtahuan quimirichun ayudan. Por ejemplo precursor tucushpaca Escuela para Evangelizadores del Reinomanmi rita ushapangui. O Betelman o construccionbimi sirvita ushapangui. Kaitlyn shuti joven precursora paniguca cashnami nin: “Bautizarishca jipaca experienciata charij turiñañacunahuan predicanami ñucataca ninanda ayudahuarca. Chai turiñañacunapa ejemplomi Bibliamanda ashtahuan ali yachajuchun shinallata Bibliamandapash ashtahuan ali yachachichun ayudahuarca” ninmi.

19. Jehovata ashtahuan ali sirvingapaj esforzarijpica ¿imashinata Jehová Diosca bendicianga?

¹⁹ Shinlli feta charingapaj y Jehovata ali sirvingapaj esforzarijpica Jehová Diosca quiquindaca ninandami bendicianga. Por ejemplo Jehovata ashtahuan ali sirvingapaj esforzarishpaca quiquinba tiempota, fuerzatapash ali utilizanatami yachajupangui (1 Juan 2:17). Imatapash ali decidinatami yachajupangui. Shina rurashpaca quiquinllatami cushilla, ali causapangui (Prov. 16:3). Y quiquinba ali ejemplota ricushpami huauquipanicunaca ninanda animaringa (1 Tim. 4:12). Ashtahuanbash quiquinllatami Jehovapa ñaupapi ali ricurishcata yachashpa, paipa amigo cai ushashcamandapash tranquilo y cushilla sintiripangui (Prov. 23:15, 16).