1. Jehová Diosca paipa sirvijcunapa mañashcacunataca ¿imashinata contestan?

 JEHOVÁ DIOSCA anciano, siervo ministerial, precursorcuna, publicadorcuna, jovenguna, mayorllagucuna cajpipashmi shuj huauquipanicunapa mañaicunata contestangapaca utilizaita ushan. Shuj huauqui o pani Jehová Diospa ayudata mañajpica Jehová Diosca ancianocunata cashpa o shuj huauquipanicunata cashpapash utilizashpami chai huauqui o panitaca ‘ninanda cushichita’ ushan (Col. 4:11). Huauquipanicunata ayudashpa Jehová Diosta sirvinaca shuj jatun bendicionmi can. Huauquipanicunataca ñucanchi causajuj llactapi shuj ungui ninanda mirajpi, llaqui apajujpi o catiriashpa llaquichi tucujpimi ayudaita ushapanchi.

2. Huaquinbica ¿imamandata huauquipanicunata ayudanaca difícil caita ushan?

² Shuj ungui ninanda mirajpica huauquipanicunata ayudanaca ashtahuan dificilmi caita ushan. Por ejemplo, cai unguicuna ashtahuan mirashcamandami huauquipanicunata visitaitapash o ayudata minishtinajuj huauquipanicunata micungapaj invitaitapash na ushapanchi. Y shujcunata ayudangapaj munashpapash ñucanchi propio familiapillatami llaquicunaca tian. Shina pasajushpapash huauquipanicunataca ayudangapami munapanchi. Y ayudangapaj ninanda esforzarijujta ricuimandami Jehová Diosca ninanda cushijun (Prov. 3:27; 19:17). Huauquipanicunata ayudangapaca ¿imatata rurai ushapanchi?

3. Panigu Desipa congregacionbi sirvij ancianocunamandaca ¿imatata yachajuita ushapanchi? (Jeremías 23:4).

³ Ancianocunaca ¿imashinata ayudaita ushan? Si quiquin congregacionmanda anciano cashpaca huauquipanicunata ali rijsingapami esforzarina capangui (Jeremías 23:4​ta liipangui). Chaishuj temapi  parlashca panigu Desica ninmi: “Ñuca grupomanda anciano turigucunaca tanto ñucahuan y chaishuj turiñañagucunahuanbash predicana costumbretami charin carca. Y shuj cosascunatapashmi ñucanchicunahuanga ruranlla carca”. b Anciano huauquicuna huauquipanicunata ali ali rijsimandami COVID-19 ungui callarijpica panigu Desitaca ayudaita usharca. Cai unguimandaca panigupa huaquin familiarcunami huañurca.

4. Huauqui ancianocunaca ¿imamandata panigu Desitaca ayudai usharca? Caimandaca huauqui ancianocunaca ¿imatata yachajuita ushan?

⁴ Panigu Desica: “Ancianocunaca ñuca amigocunami carca. Chaimi ñuca imashna sintirishcataca con confianza parlai usharcani” ninmi. Huauqui ancianocunaca ¿imatata yachajuita ushan? Huauqui ancianocunaca nara imapash pasajpillatami huauquipanicunata ali ali rijsishpa paicunapa ali amigocuna cana can. Ñucanchi causajuj llactapi shuj ungui tiashcamanda huauquipanicunata huasipi na visitai ushashpaca paicunahuan imashapash comunicaringapami esforzarina can. Panigu Desica ninmi: “Huaquinbica huaquin ancianocunami chai punllallata ñucata cayashpa, mensajecunatapash cachamun carca. Turi ancianocuna cachamushca textocunataca ñami rijsircani. Shinapash chai textocunaca shungumanmi chayahuan carca”.

5. Ancianocunaca ¿imashinata huauquipanicuna imata minishtinajujtaca yachai ushan? ¿Imashinata ayudaita ushan?

⁵ Huauqui ancianocunaca huauquipanicuna imaguta minishtinajujta yachangapaca ali yuyashpami tapunalla can (Prov. 20:5). Ancianocunaca huauquipanicunataca cashnami tapuita ushan: ¿Micunata, medicinacunata, shuj minishtirishca cosascunatapash charipanguichichu? ¿Trabajoguta charipanguichu? O ¿arriendopa culquigu pactajunllu? O ¿gobiernopa ayudata mañangapaj papelcunata ruranapi ayudachunllu minishtipanguichi? nishpami tapuita ushan. Panigu Desitaca huaquin huauquipanicunami minishtirishca cosascunata cushpa ayudarca. Shinallata huauqui ancianocuna Bibliahuan animajpi, paniguta juyashcata ricuchijpimi panigu Desica ashtahuan animarishca sintirirca. Paniguca ninmi: “Turi ancianocunaca ñucahuanmi Jehová Diostaca mañan carca. Paicuna imatapacha nishcataca na yarinichu, pero ñuca imashna sintirishcatami yarini. Jehová Dios ñucatapacha ‘Na canlla canguichu’ nijujtashnami sintircani” ninmi (Is. 41:10, 13).

6. ¿Imashinata huauquipanicunahuan randimanda ayudarita ushapanchi? (Fotota ricupangui).

⁶ Huauquipanicunaca ¿imashinata ayudaita ushan? Huauquipanicuna ayudata minishtinajujpica anciano huauquicunami ayudangapaca siempre dispuesto can. Pero Jehová Diosca tucuicunatallatami huauquipanicunata ayudachun  y animachunbash mañan (Gál. 6:10). Shuj huauqui o pani ungushca cajpica ashalla cosasgucunata rurashpapashmi paicunataca animaita ushapanchi. Por ejemplo huahuacunaca shuj tarjetaguta o shuj dibujoguta rurashpami huauquipanicunaman caraita ushan. O jovengunaca huauquipanicunata ayudangapaj comprasgucunata rurashpa o shuj cosascunata ayudangapami dispuesto caita ushan. Shujcunacarin ungushca huauquipanicunata ayudangapami micunaguta saquingapaj rita ushan. Pero unguicuna mirashcamanda tucuicunallata afectai tucushca cashpaca tucuicunallatami animachunga minishtipanchi. Chaimandami Salón del Reinopi cashpa o internetpi huauquipanicunahuan conectarishca cashpapash reunión jipaca paicunahuan parlagapaj ashtahuan esforzarita ushapanchi. Ancianocunapashmi paicunata animachunga minishtin. Ancianocunaca shuj ungui ninanda mirajpica huauquipanicunata ayudashpaca ashtahuanmi ocuparin. Chaimandami huaquin huauquipanicunaca paicunata agradicingapaj tarjetagucunata ruran. Bibliapica “caishuj chaishuj animarishpa, ayudarishpa catina capanguichi” ninmi. Cai consejota pactachishpaca alitami ruranajupanchi (1 Tes. 5:11).

7. Llaquicuna ricurijpica ¿imata pasaita ushan?

⁷ Llaquicuna ricurijpica ñucanchi causaica ñapashmi cambiaita ushan. Talvez charishca cosascuna o huasi illapashmi quidaita ushanchi. Ñucanchi familiacunapashmi huañuita ushan. Ñucanchi huauquipanicunapashmi cashna llaquicunata charita ushan. Paicunataca ¿imashinata ayudaita ushapanchi?

8. Llaquicuna nara tiajpillata ¿imatata ancianocuna y taitamamacunapash rurana can?

⁸ Ancianocunaca ¿imashinata ayudaita ushan? Anciano huauquicunaca imapash llaquicuna tiajpi huauquipanicuna imata ruranata yachachunmi ayudana capanguichi. Shinallata huauquipanicuna quiquingunahuan imashina comunicarinata yachachunbash ayudapanguichi. Chaishuj temapi parlashca panigu Margaretca ninmi: “Shuj discursopi congregacionba minishtirishcacunamanda parlajushpami anciano turicunaca ñucanchi causajushca pushtupica incendiocunaca tianrami. Ñucanchi causashca pushtupi ashtahuan peligroso tucujpi autoridadcuna uchallami llujshina canguichi nijpica uchallami cazuna canguichi nishpami yachachirca”. Chai discursota uyashcamanda cinco semanacuna jipallami panigu causajushca pushtupica shuj incendio tiarca. Pero chai discursopi nishcata ña uyashca caimandami paniguca imata ruranataca ña yacharca. Taitamamacunapashmi llaquicuna ricurijpi cada uno imata rurana cashcata yachachun adoración en familiapi parlarina can. Shina rurashpaca na musparishpa imata ruranataca alimi yachapanguichi.

9. Imapash llaquicuna nara pasajpillata y llaquicuna pasashca jipapash ¿imatata ancianocunaca rurana can?

⁹ Quiquin superintendente de grupo cashpaca nara imapash llaquicuna pasajpillatami huauquipanicunapa datocunataca charina capangui. Shuj listaguta rurashpami tucuilla datocunataca actualizashcalla charina capangui. Shina rurashpaca imapash llaquicuna tiajpica huauquipanicunata cayashpami imata minishtijushcataca tapuita ushapangui. Y cai informaciondami coordinador del cuerpo de ancianos huauquiman cuita ushapangui. Shinami cai huauquica superintendente de circuito huauquiman cai informacionda cuita ushanga. Tucuicunallata randimanda ayudarishpami huauquipanicunataca ayudaita ushashun. Por ejemplo incendio jipaca Margaret panigupa superintendente de circuito huauquica 36 horascunatapash na puñushpami shuj ladocunaman rishca 450 huauquipanicunata ayudangapaj shuj anciano huauquicunahuan trabajarca (2 Cor. 11:27). Huauqui ancianocuna shina rurashcamandami huauquipanicunataca ayudaita usharca.

10. Huauqui ancianocunaca ¿imamandata huauquipanicunata ayudashpa catina can? (Juan 21:15).

¹⁰ Huauqui ancianocunaca huauquipanicunata Bibliahuan animana responsabilidadta y ama yapata preocuparichun huauquipanicunata ayudana  responsabilidadtami charin (1 Ped. 5:2). Imapash llaquicuna tiajpica huauqui ancianocunaca huauquipanicuna ali cajta, ropaguta, micunaguta charijta y minishtirishca cosasgucunata charijtami asegurarina can. Llaqui apashca huauquipanicunaca talvez ashtaca quillacunatami animachun, ayudachun minishtinga (Juan 21:15​ta liipangui). Comité de Sucursalpi sirvij huauqui Haroldca llaqui apashca huauquipanicuna imashna sintirishcata parlashpaca cashnami nin: “Llaqui pasashca jipaca huauquipanicunaca tiempohuanmi cutinllata tranquilo sintirita ushan. Aunque huauquipanicuna normalmente causai callarishpapash llaquicuna pasajpi shuj familiar huañushcata, imapash cosasgucunata chingachishcata o chai llaquicunata charishcataca cutin cutinmi yarishpa causan. Chai cosascunata yarimandami huauquipanicuna llaquilla sintirita ushan. Shina sintirishpapash Jehová Diospi na crishcamandaca na canllu. Shina sintirinaca normalmi can”.

11. Huauquipanicunaca ¿imashina ayudachunda minishtin?

¹¹ “Huacanajujcunahuanga huacapaichi” nishca consejotami huauqui ancianocunaca catina can (Rom. 12:15). Llaqui apashca huauquipanicunaca Jehová Diospash, huauquipanicunapash paicunata juyajta yarichichunmi minishtin. Ancianocunaca huauquipanicuna paicunapa familiacunahuan Jehová Diosta mañachun, Bibliata estudiachun, reuniongunaman richun, predicashpapash catichunmi ayudaita ushan. Shinallata taitamamacunataca paicunapa huahuacunata ima llaqui japijpipash Jehová Diospa amigo cashpa cati ushashcata y Jehová Dios paicunata nunca na saquinata yarichichunmi ayudaita ushan. Shinallata taitacunaca paicunapa huahuacunamanga mundo enteromanda huauquipanicuna paicunata ayudangapaj dispuesto cashcatami yarichina can (1 Ped. 2:17).

12. Llaqui apashca huauquipanicunataca ¿imashinata huauquipanicunaca ayudaita ushan? (Fotota ricupangui).

¹² Huauquipanicunaca imashinata ayudaita ushan? Quiquin causajushca ladollapi imapash llaquicuna pasajpica imashina ayudai ushashcatami huauqui ancianocunataca tapuita ushapangui. Talvez quiquinga llaqui apashca huauquipanicunata o paicunata ayudaj huauquipanicunatami quiquinba huasipica mingachita ushapangui. Shinallata alimentocunata o shuj minishtirishca cosasgucunata huauquipanicunaman entregashpapashmi ayudaita ushapangui. Pero cai llaquicuna caru llactacunapi pasashca cajpica ¿imashinata ayudaita ushapangui? Chaipaca Jehová Diostami mañaita ushapangui. Shinallata contribucionguta cushpapashmi ayudaita ushapangui (2 Cor. 1:8-11; 8:2-5). Llaqui apashca llactacunapi ayudangapaj rita ushashpaca huauqui ancianocunatami imashina ayudai ushashcata tapuna capangui. Y ayudangapaj richun quiquinda invitashpaca  imashina ali ayudanata yachachunga huauquicunallatami quiquindaca yachachinga.

13. ¿Jehová Diosta ama sirvichun jarcaicuna tiaj pushtupica huauquipanicunaca ima llaquicunahuanda causan?

¹³ Catiriashpa llaquichi tucushca huauquipanicunapa causaica huaquinbica ashtahuan shinllimi can. Paicunaca Jehová Diosta sirvingapaj jarcaicunata charishca jahuapash, culqui illa causaimanda, unguicunamanda, familiarcuna huañushcamandami llaquilla causan. Cai jarcaicuna tiashcamandami huauqui ancianocunaca na facillla imagutapash ruraita ushan o huauquipanicunatapash na fácil animaita ushan. Chaishuj temapi parlashca Andréi huauquita ima pasashcata ricupashunchi. Huauquigupa grupomanda shuj panigumi culqui faltalla causajurca y jipaca shuj accidentetapashmi charirca. Chaimi paniguca tauca viajecunata operarirca, trabajaitapash na usharcachu. Pero gobierno churashca jarcaicuna tiajpi y pandemia tiajpipash huauquicunaca cai paniguta ayudangapaca ninandami esforzarirca. Jehová Diospash cai panigumandaca pendientemi carca.

14. Huauqui ancianocunaca ¿imashinata Jehová Diospi confiashcataca ricuchin?

¹⁴ Ancianocunaca ¿imashinata ayudaita ushan? Huauqui Andreica Jehová Diosta mañashpami pai usharishcaguta rurangapaj esforzarirca. Y Jehová Diosca ¿imashinata huauquigupa oraciondaca contestarca? Jehová Diosca shuj huauquipanicunata utilizashpami cai panigutaca ayudarca. Cai huauquipanicuna ashtahuan cosasgucunata rurai ushaimandami panigutaca doctorman apashpa ayudarca. Cutin shujcunaca culquiguta carashpami ayudarca. Huauquipanicuna randimanda ayudarishcamanda y jarcaicuna tiajpipash ayudangapaj esforzarishcamandami Jehová Diosca paicunataca bendiciarca (Heb. 13:16). Jehová Diospa obrata prohibishcamanda huauquipanicunata ayudana difícil cajpica huauqui ancianocunaca shuj huauquipanicunapa ayudata mañanallami capanguichi (Jer. 36:5, 6). Ashtahuanbachaca Jehovapa ayudatami mañana capanguichi. Paimi huauquipanicunata ayudachunga quiquingunata ayudanga.

15. Catiriashpa llaquichijpipash huauquipanicunahuan shujllashna cangapaca ¿imatata rurana capanchi?

¹⁵ Huauquipanicunaca ¿imashinata ayudaita ushan? Ñucanchicunata catiriashpa llaquichijpica talvez huaquin huauquipanicunahuanllami tandanajuna tucushun. Chaimandami cunanmandallata ñucanchi huauquipanicunahuan ali llevarinaca minishtirishcapacha can. Huauquipanicunaca na ñucanchipa contracunachu can. Diablomi ñucanchipa contra can. Huauquipanicuna pandarijpica paicunata perdonapashunchi. O imapash problemacunata charishpaca uchalla arreglangapaj esforzaripashunchi (Prov. 19:11; Efes. 4:26).  Huauquipanicunahuan randimanda ayudaringapaj esforzaripashunchi (Tito 3:14). Huauqui Andreipa grupomanda huauquipanicunaca randimanda ayudarimandami tucuicuna shuj familiashna caita usharca (Sal. 133:1).

16. Colosenses 4:3, 18​pi nishcashnaca catiriashpa llaquichi tucushca huauquipanicunataca ¿imashinata ayudai ushapanchi?

¹⁶ Gobiernocuna jarcajpipash ashtaca ashtaca huauquipanicunami Jehová Diostaca sirvishpa catishca. Huaquin huauquipanicunaca Jehová Diosta sirvimandami prezo churai tucushca. Cai huauquipanicunamanda y paicunapa familiacunamandapash Jehová Diosta mañapashunchi. Cai huauquipanicunataca shuj huauquipanicunami animashpa, minishtirishca cosasgucunata carashpa juiciocunapipash ninanda ayudashca. Cai huauquipanicunamandapash Jehová Diostaca mañapashunchi (Colosenses 4:3, 18​ta liipangui). c Ñucanchi mañaicunahuanga huauquipanicunataca ciertopachami ayudapashun (2 Tes. 3:1, 2; 1 Tim. 2:1, 2).

17. Catiriashpa llaquichijpi imata ruranata yachangapaca ¿imashinata cunanmandallata prepararita ushapanchi?

¹⁷ Catiriashpa llaquichijpi imata ruranata yachangapaca cunanmandallatami quiquinba familiahuanga prepararita ushapanguichi (Hech. 14:22). Llaquicuna tianga nishpaca na yapata preocuparinachu capanguichi. Chaipa randica Jehová Diospi ashtahuan confiangapami esforzarina capanguichi. Quiquingunapa huahuacunapash shinallata rurachunmi ayudana capanguichi. Preocupado sintirijushpaca Jehová Diosmanmi imashna sintirishcata villana capanguichi (Sal. 62:7, 8). Shinallata Jehová Diospi imamanda confiai ushashcatapashmi familiahuanga parlana capanguichi. d Llaquicuna nara tiajpillata huahuacunaman imata ruranata yachachinaca importantemi can. Shinami huahuacunaca ima pasajpipash Jehová Diospi confiashpa na manllashpa, tranquilo caita ushanga.

18. Shamuj punllacunapica ¿imashinata causashun?

¹⁸ Taita Dios carashca tranquilo ali canami ama manllachun ayudan (Filip. 4:6, 7). Taita Diospa tranquilo ali canata charimandami ñucanchi causajuj llactapi unguicuna mirajpi, llaquicuna tiajpi o catiriashpa llaquichijujpipash na yapata preocuparinchi. Jehová Diosca huauquipanicunata cuidangapaca ancianocunatami utilizan. Shinallata huauquipanicuna randimanda ayudarichunbashmi mandan. Taita Diospa tranquilo ali canata charimandami jipa punllacunapi ashtahuan llaquicuna ricurijpipash ‘ninan manllanai llaqui tiempo’ chayamujpipash aguantashpa cati ushashun (Mat. 24:21). Ninan manllanai llaqui tiempocuna chayamujpica tranquilo canaca minishtirishcapachami canga. Shinallata shujcunatapashmi tranquilo cachun ayudana tucupashun. Pero chai tiempocuna yalishca jipaca ñana llaquicunahuanga causashunllu. Ashtahuangarin Jehová munashcashnami tucuicunallata para siempre tranquilo ali causai ushashun (Is. 26:3, 4).