1. ¿Imamandata Jehovapa nishcacunapica yaria causana capanchi?

 JEHOVÁ DIOSCA paita cazuj gentecunaca ‘para siempremi causanga’ nishcami (Rom. 6:23). Paipa nishcacunapi yaria causashpaca, Jehová Diostaca ashtahuanmi juyanchi. Jehová Diosca ñucanchita ninanda juyaimandami, ñucanchicuna para siempre causachun munan.

2. Para siempre causana bendicionda chasquinata yachanaca ¿imashinata ayudan?

² Para siempre causana bendicionda chasquinata yachanami, llaquicunata, problemacunata charishpapash aguantashpa catichun ayudan. Jehová Diosta sirvijushcamanda shujcuna ñucanchita huañuchishunmi nijpipash, Jehová Diosta sirvinataca na saquishunllu. Jehová Diosta tucuipi cazushpa huañujpica, Jehová Dios ñucanchicunata causachishpa para siempre causana oportunidadta cunataca alimi yachapanchi (Juan 5:28, 29; 1 Cor. 15:55-58; Heb. 2:15). ¿Imamandata para siempre causai ushanata seguro capanchi? Huaquin rasongunata ricupashunchi.

3. Para siempre causachun Jehová Dios ayudai ushashcataca ¿imamandata seguro capanchi? (Salmo 102:12, 24, 27).

³ Jehová Diosca causaita cuj y para siempre causaj Diosmi can. Chaimandami ñucanchicunapash para siempre causachun ayudai ushashcata yachapanchi (Sal. 36:9). Jehová Dios siempre causashcata y para siempre causashpa catinata ricuchij huaquin textocunata ricupashunchi. Salmo 90:2​pica: Imapash nara tiajpillatami “canga ña tiashcangui. Na tucurina causaita causaicamambash, canmi Taita Dios cangui” ninmi. Salmo 102​pipashmi casi chai shimicunatallata nin (Salmo 102:12, 24, 27​ta liipangui). Profeta Habacucpashmi, Jehová Diosmanda parlashpaca, cashna nirca: ‘Mandaj Dioslla, ñuca Taita Dioslla, jucha illaj ñuca Dioslla. Canga, ¿nachu imapash nara tiajpillata ña causarcangui? Shina cashcamanda canga napacha huañunguichu’ nircami (Hab. 1:12, TNM).

4. Jehová Dios siempre tiashcata na ali intindi ushashpapash ¿imamandata na preocuparina capanchi?

 ⁴ Jehová Dios siempre tiashcata intindinaca ashata shinllimi caita ushan (Is. 40:28). Diosmanda parlashpami Elihú runaguca cashna nirca: “Pai causashca huatacunatapash, napacha cuentai ushanallachu” nircami (Job 36:26). Imapash cosascuna imashna funcionajta na intindimandallaca, chai cosascunaca na tianllu nitaca na ushapanchichu. Por ejemplo, na tucuicunachu micha imashna funcionajtaca intindipanchi. Shinapash micha tiajtaca cripanchimi. Shina cuendami gentecunaca Jehová Dios siempre tiashcata y siempre tiashpa catinataca na ashta ali intindi ushapashun. Pero na ali intindimandallaca, Taita Diosca na siempre tiashcachu nitaca na ushapanchichu. Shinaca Bibliapica Taita Dios imashna cashcatami parlan y ñucanchicunaca na tucuita intindinchichu. Shinapash, Bibliapi Taita Diosmanda parlashcacunaca ciertopachami can (Rom. 11:33-36). Jehová Diosca cai mundota, indita y estrellacunatapash nara rurashpallata ñami tiarca. Bibliapica: “Diosmi, paipaj ninan ushaihuan cai pachataca rurarca” ninmi. Shinallata: “Jahua pachatapash telata mandanshna churarca” (Jer. 51:15; Hech. 17:24). Para siempre causai ushanata seguro cangapaca, shuj rasondapash ricupashunchi.

5. Adán y Eva Jehovata cazushca cashpaca ¿imata pasanman carca?

⁵ Jehová Diosca cai alpapi tiaj cosascunata rurashpaca solo gentecunatallami para siempre causai ushachun rurarca. Pero Jehová Diosca Adán runataca: “Alita, nalita yachaita cuj yurapi fucushcataca ama micunguichu. Ima punlla cashpapash, chai yuramanda micushpaca huañunguipachami” nishpami advirtirca (Gén. 2:17). Adán y Eva, Jehovapa mandashcata cazushca cashpaca, na huañunmanllu carca. Ashtahuanbash Diosca Adán y Evamanga “causaita cujuj yuramanda” micuchunmi saquinman carca. Shinami paicunaca para siempre causana cashcata cuenta japinman carca (Gén. 3:22). b

6, 7. a) ¿Imamandata para siempre causangapaj rurai tucushcata yachapanchi? b) Ña para siempre causajushpaca ¿imatata rurangapaj munapanguiman? (Fotocunata ricupangui).

⁶ Huaquin cientificocunaca gentecunapa cerebro, tucui causaipi yachajushca cosascunatapash yali yachajushpa cati ushashcatami nishca. 2010 huatapi, Estados Unidospi llujshishca cientificocunapa shuj revistapica  cashnami nijurca, gentecunapa cerebroca ashtaca millón cosascunatami yachajuita ushan. Más o menos 300 huatacunapi yachajuna cosascunatami yachajuita ushan nishcami. Pero ñucanchi cerebroca ashtahuanmi yachajushpa catita ushan. Cientificocunapa cai investigaciongunami, Jehová Dios gentecunata ashtaca cosascunata yachajuchun rurashcata ricuchin. Y ñucanchicunaca 70, 80 huatacunapi yachajushcatapash yalitami yachajushpa cati ushapanchi (Sal. 90:10).

⁷ Jehová Diosca tucui gentecunatami para siempre causana munaihuan rurashca. Chaimandami Bibliapica: Diosca gentecunapa “shungupica, causaita causachunmi churarca” ninmi (Ecl. 3:11). Taita Diosllata ñucanchita para siempre causachun rurashcamandami huañuica ñucanchipaca shuj contra can (1 Cor. 15:26). Por ejemplo, caipi pensaripashunchi: Shuj unguihuan cashpaca, doctorpaman rinchi y ima medicamentocunata ufiana cashpaca, uchallami ufianchi. Ama huañungapaj munaimandami tucui usharishcata ruranchi. Y pipash huañujpica, ninandami llaquirinchi (Juan 11:32, 33). Jehová Diosca gentecuna para siempre causachunmi rurashca. Chaimandami gentecunaca para siempre causana munaita charin. ¿Imamandata para siempre causaita ushanata seguro cai ushapanchi? Jehová Diosca paipa ruraicunahuanmi, paipa munai na cambiashcata ricuchishca. Jehová Dios imacunatalla rurashcata y imacunata rurajujta ricupashunchi.

8. Isaías 55:11​pica ¿imatata Jehová Diosmandaca yachachin?

⁸ Adán y Eva na cazushcamandami tucui gentecuna huañunchi. Shinapash Jehová Diosca gentecuna para siempre causachunmi munan (Isaías 55:11​ta liipangui). ¿Imamandata  Jehová Diosca paita cazuj gentecuna para siempre causachun munashcata yachapanchi? Jehová Dios rurashcacunapimi paipa munai na cambiashcataca cuenta japi ushapanchi.

9. Jehová Diosca ¿imatata prometishca? (Daniel 12:2, 13).

⁹ Jehová Diosca huañushca gentecunata causachishpa, para siempre causana oportunidadta cusha nishcami (Hech. 24:15; Tito 1:1, 2). Job runagupash Jehová Diosca huañushcacunata causachingapaj ninanda munajtaca seguromi carca (Job 14:14, 15). Shinallata profeta Danielpash huañushcacuna causarishpa, para siempre causana oportunidadta charinataca alimi yacharca (Sal. 37:29; Daniel 12:2, 13​ta liipangui). Jesuspa tiempopi causaj judío gentecunapash Jehová Dios paita sirvijcunaman “para siempre causaita” carai ushashcataca alimi yacharca (Luc. 10:25; 18:18). Jesusca Jehovapa cai promesamandaca ashtaca viajecunatami parlarca y paitallatapashmi Jehová Diosca causachirca (Mat. 19:29; 22:31, 32; Luc. 18:30; Juan 11:25).

10. Jehová huañushcacunata causachishcamandaca ¿imatata yachajupanchi? (Dibujota ricupangui).

¹⁰ Jehová Diosca causaita cuj Diosmi can. Shinallata huañushcacunata causachingapaj podertapashmi charin. Jehová Diosca Elías runagumanga Sarepta llactamanda shuj viuda huarmigupa churita causachichunmi poderta curca (1 Rey. 17:21-23). Shuj tiempo jipaca, profeta Eliseoca Jehová Diospa ayudahuanmi, Sunem llactamanda shuj huarmigupa churita causachirca (2 Rey. 4:18-20, 34-37). Cashna ejemplocunami huañushca gentecunata causachingapaj Jehová Dios poderta charishcata ricuchin. Y Jesús cai alpapi cashpaca huañushcacunata causachingapaj Jehová Dios poderta cushcatami ricuchirca (Juan 11:23-25, 43, 44). Cunanbica Jesusca jahua cielopimi can. Y paimanga Jehová Diosca ‘jahua cielopipash y cai alpapipash tucuita ricuriachunmi autoridadta’ cushca. Chaimandami Jehovapa promesacunata pactachishpa “gulpi huañushcacunata” causachinga. Shinami para siempre causana bendicionda chasquinga (Mat. 28:18; Juan 5:25-29).

11. ¿Imamandata para siempre causana oportunidadta charipanchi?

¹¹ Jehová Diosca ¿imamandata paipa juyashca Churi sufrishpa huañuchun saquirca? Chaimanda parlashpami, Jesusca cashna nirca: “Taita Diosca cai mundopi gentecunata ninanda juyashpami, paipa único Churiguta cachamurca. Paipa Churipi crishcata ricuchijcunaca ama shujllapash tucuchi tucuchun, sino para siempre causachunmi paipa Churitaca cachamurca” nishpa (Juan 3:16). Jehová Dios paipa Churita ñucanchimanda huañuchun cachamushcamandami, para siempre causana oportunidadta charipanchi (Mat. 20:28). Taita Diospa munai maijan cashcata ricuchingapami apóstol Pabloca cashna nirca: “Imashinami shujlla runamanda huañuica tiai callarirca, shinallata shujlla runamandami huañushcacunapash causaringa. Porque imashinami Adanmandaca tucuicuna huañunajun, shinallatami Cristomandaca tucuicuna causachi tucunga” (1 Cor. 15:21, 22).

12. Jehová Diospa voluntad cai alpapi pactarichunga paica ¿imatata ruranga?

¹² Jesusca paipa discipulocunamanga, Taita Diospa Gobierno ucha shamuchun y paipa voluntadpash ucha pactarichun nishpa mañachunmi yachachirca (Mat. 6:9, 10). Jehová Diosca tucui gentecuna cai alpapi para siempre causachunmi munan. Paipa voluntadta pactachingapaca Jehová Diosca Jesustami paipa Gobiernopi mandachun churarca. Shinallata 144 mil ungidocunatapashmi Jesushuan igual mandachun tandachijushca (Apoc. 5:9, 10).

13. Jehová Diosca cunanbica ¿imatata rurajun? Y ñucanchicunaca ¿imatata rurana capanchi?

 ¹³ Cunan punllacunapica Jehová Diosca “na cuentai ushanalla ashtaca ashtaca gentecunatami” tandachijun. Paicunatami paipa Gobierno ña mandajujpi causachun yachachijun (Apoc. 7:9, 10; Sant. 2:8). Cai mundopi gentecunaca randimanda na ricunayachirimanda, guerracuna tiashcamandami shujllashna tandanajushpa causaitaca na ushan. Shinapash Jehová Dios tandachishca gentecunaca cai nali cosascunata ama rurangapami esforzarin. Paicunapa ruraicunahuanmi tucuicunallata tranquilo, ali causangapaj munashcata ricuchin (Miq. 4:3). Shinallata guerracunapi participanapa randica, shuj gentecuna “ciertopacha ali causaiguta” charichunmi Taita Diosmanda y paipa voluntadmandapash yachachishpa ayudanajun (1 Tim. 6:19). Jehovata sirvijcunaca paipa Gobiernota apoyaimandami, familiacuna jarcajpi causan, o culqui faltajlla causan. Shinapash Jehová Diosmi paicuna minishtirishcaguta charichunga ayudan (Mat. 6:25, 30-33; Luc. 18:29, 30). Cai cosascunami Taita Diospa Gobierno ciertopacha tiashcata y mediante cai Gobierno Jehovapa voluntad pactarina cashcata ricuchin.

14, 15. Jehová Diosca huañuita tucuchisha nishcataca ¿imashinata pactachinga?

¹⁴ Jesusca ñami Taita Diospa Gobiernopica mandajun. Paimi Jehová Diospa tucui promesacunata pactachinga (2 Cor. 1:20). Paica 1914 huatamandallatami paipa contracunataca mishashpa shamujushca (Sal. 110:1, 2). Ñallami  Jesuspash y 144 mil ungidocunapash tucui nali gentecunata tucuchishpa saquinga (Apoc. 6:2).

¹⁵ Jesús Mil huatacunata mandajushpaca, huañushcacunatami causachinga. Y Diosta cazuj tucuilla gentecunataca perfectocuna cachunmi ayudanga. Mil huatacuna jipaca Jehovata cazuj gentecunamanga Jehová Diosca cai alpatami cunga. Chaipimi cai gentecunaca “causaita causanajunga” (Sal. 37:10, 11, 29). Shinallata “ñucanchipa último contraca tucuchi tucungami. Chai contraca huañuimi can” (1 Cor. 15:26). Caicuna pactarijta ricushpaca, ninandami cushijushun.

16. ¿Imamandapachata Jehová Diostaca cazuna capanchi?

¹⁶ Imashinami ña yachajupashcanchi, Bibliapica para siempre causana oportunidadta charishcatami yachachin. Cai esperanzata charinami cai último shinlli punllacunapi aguantashpa ñaupaman catichun ayudan. Jehovapa ñaupapi, Jesuspa ñaupapi ali ricuringapaj munashpaca paicunataca tucuipi cazungapami esforzarina capanchi. Ñucanchi causaita salvangapaj munaimandallaca chaitaca na ruranachu capanchi. Ashtahuanbacha paicunata tucui shunguhuan juyaimandami shina rurana capanchi (2 Cor. 5:14, 15). Paicunata tucui shunguhuan juyanami, paicunapa ejemplota catishpa shujcunaman cai esperanzamanda villachichun ayudanga (Rom. 10:13-15). Ali villaigucunata gentecunaman villachingapaj esforzarijpica Jehová Diosca ñucanchipa ali amigo cangapami munanga (Heb. 13:16).

17. Para siempre causana oportunidadta chasquingapaca ¿imatata cada uno rurana capanchi? (Mateo 7:13, 14).

¹⁷ Ñucanchica ¿para siempre causaita ushanchichu? Jehová Diosca para siempre causana oportunidadtami carajun. Cai esperanzata ñucanchi chasquingapaca, paipa mandashcacunatami tucuipi cazungapaj esforzarina capanchi (Mateo 7:13, 14​ta liipangui). Para siempre causai callarishpaca ¿imashinashi causashun? Chaitaca cati temapimi yachajupashun.