1, 2. ¿Imacunamandallata huacaita ushapanchi?

 TUCUICUNALLATAMI cushijuimanda o sufrijuimanda huacapashcanchi. Por ejemplo, ali cosascuna pasashcamanda, shuj huahuagu nacirishcamanda o talvez ashtaca huatacuna jipa ñucanchi juyashca amigocunata ricushcamandami cushijuimanda huacapashcanchi.

² Shinapash huaquinbica sufrijuimanda o llaquilla sintirimandami huacapashcanchi. Por ejemplo, pipash llaquichishcamanda, na jambirinalla unguita charimanda o shuj juyashca familiar huañushcamandami llaquillapacha sintirimanda huacapashcanchi. Llaquicunata charishpaca Jeremías cuendami sintirita ushapanchiman. Jeremiasca Babilonia llactamanda contracuna Jerusalenda tucuchijpimi cashna nirca: ‘Ñuca ñavicunamandaca jatun yacushnami viquica jicharijun. Ashatallapash cushijui na tiajpimi na upallayashpa huacajunilla’ (Lam. 3:​48, 49).

3. Jehová Diosca paipa sirvijcuna sufrijujta ricushpaca ¿imashinata sintirin? (Isaías 63:9).

³ Jehová Diosca ñucanchi llaquilla sintirishcamanda mashna viajecunata huacashcataca alimi yachan. Bibliapica Jehová Dios ñucanchicuna ima llaquicunatalla charijta ali yachajta, shinallata llaquicunahuan cajpi tucui ñucanchi mañaicunata uyajtami yachachin (Sal. 34:15). Pero Jehová Diosca llaquicunata charijta ricushpallaca na quidanllu. Jehová Diosca ñucanchi Taita cashcamanda, ñucanchita juyaimandami paipa sirvijcuna llaquicunamanda huacajujta ricushpaca paipash ninandami  llaquirin. Chaimi Jehová Diosca ayudangapaca listo can (Isaías 63:9​ta liipangui).

4. ¿Picunapa ejemplotata yachajupashun?

⁴ Bibliapica Jehová Diosca paipa sirvijcuna llaquicunamanda huacajpi, imata rurashcatami ricuchin. Por ejemplo Ana, David y Ezequiasca ¿imamandata huacarca? Jehová Diosca paicunata ayudangapaca ¿imatata rurarca? Ñucanchicuna llaquilla sintirijpi, pipash traicionajpi o imata ruranata na atinajpica paicunapa ejemplomi ñucanchitaca ayudaita ushan.

LLAQUILLAPACHA SINTIRIMANDAMI HUACANCHI

5. Ana huarmiguca ¿imamandata llaquilla sintirin carca?

⁵ Ana huarmiguca llaquillapacha sintirimandami huacashpalla yalin carca. Ana huarmigupa cusaca, Peniná huarmihuanbashmi cazarashca carca. Chai huarmica, Ana huarmigutaca na ricunayachishpami nali tratan carca. Shinallata Ana huarmigu shuj huahuatallapash na chari ushajpimi, paipa cusapa chaishuj huarmica paimanda burlarin carca (1 Sam 1:​1, 2). Quiquinga Anapa situacionbi cashpaca ¿imashinata sintiripanguiman? Ana huarmiguca “llaquillapacha cashcamandami, huacashpa, micuitapash na micun carca” (1 Sam 1:​6, 7, 10).

6. Ana huarmiguca ama llaquilla sintiringapaca ¿imatata rurarca?

⁶ Ana huarmiguca ama llaquilla sintiringapaca ¿imatata rurarca? Paica Jehová Diosta adoraj tabernáculo huasimanmi rirca. Ana huarmiguca tabernáculo patiomandami “huacai huacai Jehová Diostaca mañai callarirca”. Paica “ñuca ninanda sufrijujtaca ricupayari” nishpami mañarca (1 Sam 1:10b, 11). Ana huarmiguca Jehová Diosmanga pai imashina sintirishcatami tucuita villarca. Ana huarmigu llaquillapacha sintirimanda huacajujta ricushpaca Jehová Diosca ninandami llaquirishcanga.

7. Ana huarmiguca pai imashina sintirishcata Jehová Diosman villashca jipaca ¿imashinata sintirirca?

⁷ Ana huarmiguca Jehová Diosman pai imashina sintirishcata villashpa, shinallata sumo sacerdote Elí paipa mañaicunata Jehová Dios uyashcata nijpica ¿imashinata sintirirca? Bibliapica: Ana huarmiguca ‘chaimanda rishpami micurca y ñana llaquilla’ sintirirca nin (1 Sam 1:​17, 18). Aunque paipa llaquicuna na tucurijpipash, Ana huarmiguca Jehová Diosman paipa tucui llaquicunata villashcamandami paica tranquila ali sintirirca. Jehová Diosca Ana huarmigupa mañaita uyashpami paita llaquimanda huahuagucunata charichun bendiciarca (1 Sam 1:​19, 20; 2:21).

8, 9. Hebreos 10:​24, 25​pi nishcashnaca ¿imamandata tandanajuicunamanga rina capanchi? (Fotota ricupangui).

⁸ ¿Imatata yachajupanchi? Talvez shuj familiar o shuj amigo huañushcamandami  llaquillapacha sintiripangui. Shina llaquicunahuan caimandami talvez sololla cangapaj munapanguiman. Ana huarmiguca llaquilla sintirishpaca tabernáculo huasimanmi rirca. Y chaipimi Jehová Diosca paita consolarca. Jehová Dios quiquinda consolachun munashpaca, Anapa ejemplota catishpami llaquilla cashpapash o fuerza illaj sintirijushpapash tandanajuicunaman rina capangui (Hebreos 10:​24, 25​ta liipangui). Tandanajuicunapimi Bibliapa animachij textocunata yachajuita ushapanchi. Shinami Jehová Diosca llaquilla pensamientocunata ama charichun ayudaita ushan. Llaquicuna na tucurijpipash, tandanajuicunaman rinami tranquilo sintirichun ayudapanga.

⁹ Tandanajuicunapi huauquipanigucuna ñucanchita consolajpi, juyashcata ricuchijpimi ninanda animaripanchi (1 Tes. 5:​11, 14). Shuj precursor especial huauquiguca paipa huarmigu huañujpi pai imashina sintirishcata parlashpaca cashnami nin: “Ñuca huarmiguta extrañashpami huaquinbica huacashpalla yalini. Pero tandanajuicunaman rinami ñucataca ninanda ayudahuan. Llaquilla cashpapash, tandanajuicunaman rishpa, huauquipanicunapa comentariocunata uyashpa y paicuna ali shimicunahuan ñucata animajpimi tranquilo ali sintirini”. Shinaca tandanajuicunaman rijpimi Jehová Diosca huauquipanicunata utilizashpa ñucanchicunataca animaita ushan.

10. Llaquilla sintirijushpaca ¿imashinata Anapa ejemploca ayudaita ushan?

¹⁰ Ana huarmigu Jehová Diosman paipa tucui llaquicunata villashcashnallatami, quiquinbash 1 Pedro 5:7​pi nishcashnaca quiquinba tucui preocupaciongunataca Jehová Diosman villana capangui. Shina rurashpaca Jehová Diospi confiashcatami ricuchipangui. Shuj paniguca paipa cusata shuacuna huañuchijpi pai imashina sintirishcatami parlan. Paica cashnami nin: “Ñuca cusata huañuchijpica ñucaca llaquillapacha sintirimandami ima horapash nunca na cushilla causaita ushashachu yarcani”. Cai panigutaca ali sintirichunga ¿imata ayudarca? Paica cashnami nin: “Llaquilla sintirijushpaca siempremi Jehová Diosta mañan carcani. Huaquinbica imashina sintirishcata, Jehová Diosman na parlai ushajpipash, paica ñuca imashina sintirishcataca alimi yacharca. Llaquilla sintirijushpa, imata ruranata na atinajushpaca, Jehová Diostami tranquilo sintiringapaj ayudahuai nishpa mañan carcani. Shina mañajpimi Jehová Diosca fuerzata cushpa ayudahuashca”. Imashina sintirishcata Jehová Diosman tucuita villajpica, paica quiquin imashina sintirishcataca ali alimi intindin. Llaquicuna na tucurijpipash, Jehová Diosca tranquilo ali sintirichunmi ayudaita ushan (Sal. 94:19; Filip. 4:​6, 7). Llaquicunata charishca jahua paita sirvingapaj esforzarijpica Jehová Diosca quiquindaca ninandami bendicianga (Heb. 11:6).

TRAICIONAJPIMI LLAQUILLAPACHA SINTIRIMANDA HUACANCHI

11. Davidca shujcuna paita na ricunayachijpica ¿imashinata sintirirca?

¹¹ Davidca ashtaca llaquicunatami chimbapurana tucurca. Ashtaca gentecunami Davidtaca na ricunayachirca. Shinallata paipa familiacuna y amigocunapash paita traicionashpami llaquichingapaj munarca (1 Sam 19:​10, 11; 2 Sam 15:​10-14, 30). Davidca paita catiriashpa llaquichinajujpimi cashna nishpa escribirca: ‘Ninanda huacajushpallatami, ña tucurijuni. Tucui tutami ñuca sirijushca pushtutaca ñuca viquihuan mutiyachijuni’ nishpa (Sal. 6:​6, 7). Shujcuna llaquichishcamandami  Davidca llaquillapacha sintirimanda huacashpa yalin carca.

12. Salmo 56:8​pi nishcashnaca Davidca ¿imatata seguro carca?

¹² Davidca ashtaca llaquicunata charishpapash, Jehová Dios paita juyashcata seguro cashpami “Mandaj Diosca, ñuca huacajujta uyashcami” nishpa escribirca (Sal. 6:8). Shinallata Salmo 56:8​pi shimicunatapashmi escribirca (Chai textota liipangui). Cai textopi yuyaicunaca Jehová Dios ñucanchita juyashcata y ñucanchicuna imashina sintirishcata ali intindijtami yachachin. Davidca mashna viajecunata huacashca cashpapash paipa viquicunata Jehová Dios cara muchilapi tandachishcashna o Jehovapa libropi anotashcashna cashcataca seguromi carca. Shinallata charishca llaquicunamanda imashina sintirishcata Jehová Dios ali yachajtaca Davidca seguromi carca.

13. Pipash traicionajpica ¿imatata yarina capangui? (Fotota ricupangui).

¹³ ¿Imatata yachajupanchi? Por ejemplo ¿pipash quiquinda traicionashcamandachu llaquilla sintiripangui? ¿Quiquinba matrimonio o noviazgo tucurishcamandachu llaquilla sintiripangui? ¿O na cashpaca shuj juyashca familiar o amigo Jehová Diosta sirvinata saquishcamandachu llaquilla sintiripangui? Cunanga shuj huauquiguta paipa huarmi traicionashpa, paita saquishpa rishcata ricupashunchi. Paica cashnami nin: “Ñuca huarmi traicionashcamandaca imapapash na valinshna, llaquilla, culirami sintirircani. Gentecuna ñucanchita jichushpa rijpipash, Jehová Diosca nunca na jichungachu. Jehová Diosca paipa sirvijcunataca siempremi cuidan. Shinaca pipash traicionajpica, Jehová Dios quiquinda nunca na saquinatami yarina capangui” (Sal. 37:28). Shujcuna traicionajpipash Jehová Dios quiquinda juyashcataca, Jehová Diospa importante cashcatami yarina capangui (Rom. 8:​38, 39).

14. Pipash traicionajpi ¿imashinata Salmo 34:18​pi shimicunaca ayudaita ushan?

¹⁴ Quiquinda pipash traicionashca cajpica Salmo 34:18​pi shimicunata yarinami consolanga (Salmo 34:18​ta liipangui). Llaquillapacha sintirijcunataca Jehová Diosca ¿imashinata ayudan? Salmo 34:18​pi nishcashnaca, pipash traicionashcamanda ‘ninanda llaquirishpa causajcunapa ladopimi’ Jehová Diosca can nin. Por ejemplo, shuj taitaca paipa huahuagu huacajpica, ñapashmi ugllangapaj rin. Shina cuendallatami Jehová Diospash ñucanchicuna llaquicunahuan sufrijujta ricushpaca, ñapashmi ayudangapaj listo can. Jehová Diosca cunanbi charishca problemacunata aguantachunmi ayudan (Is. 65:17).

 IMATAPASH NA RURAI USHAIMANDAMI HUACAPANCHI

15. Rey Ezequiasca ¿imamandata ninanda huacarca?

¹⁵ Rey Ezequiasca 39 huatacunata charishpami shuj millai unguita charirca. Ezequiasmanga chai millai unguihuanmi huañuna cangui nishpami profeta Isaiasca villarca (2 Rey. 20:1). Ezequiasca chai nali noticiata yachaj chayashpami ninanda huacai callarirca. Jipaca Jehová Diosta ayudahuai nishpami mañarca (2 Rey. 20:​2, 3).

16. Jehová Dios Ezequiaspa mañaita uyashpaca ¿imatata rurarca?

¹⁶ Jehová Diosca Ezequiaspa mañaita uyashpa y pai huacajta ricushpaca ninandami llaquirirca. Chaimi Isaiasta utilizashpa Ezequiasmanga cashna nirca: ‘Can mañajujtaca uyarcanimi, cambaj viquitapash ricurcanimi. Ricui, candaca chai ungüimandaca’ jambishami. Jehová Diosca Ezequiastaca ashtahuan causachun saquishpa, Jerusalenda asiriocunamanda salvashpami, paita llaquishcataca ricuchirca (2 Rey. 20:​4-6).

17. Na jambirinalla unguita charijpica, Jehová Diosca ¿imashinata ayudan? (Salmo 41:3) (Fotota ricupangui).

¹⁷ ¿Imatata yachajupanchi? Na jambirinalla unguita charishpaca ¿imatata ruraita ushapangui? Imashina sintirishcatami Jehová Diosmanga tucuita villana capangui. Bibliapica Jehová Diosca ‘ninanda llaquij y tucuipi cushichij Taita Diosmi can’ nin. Chaimandami ñucanchicuna llaquicunapi cajpica consolangapaj listo can (2 Cor. 1:​3, 4). Jehová Diosca cunanbi charishca llaquicunataca na tucuchingachu. Pero chai llaquicunata aguantaita ushachun pai ayudanataca seguromi capanchi (Salmo 41:3​ta liipangui). Por ejemplo, Jehová Diosca paipa espíritu santota cushpami, imata ruranata yachachun, tranquilo ali sintirichun ayudan (Prov. 18:14; Filip. 4:13). Shinallata shamuj punllacunapi tucui unguicunata tucuchisha nishpapashmi Jehová Diosca prometin (Is. 33:24).

18. ¿Imata ruranata na atinajujpica, Bibliapa maijan textocunata ayudashca? (“ Llaquilla sintirijpica cai textocunami animan” nishca recuadrota ricupangui).

¹⁸ Ezequiastaca Jehová Diospa nishcacunami ninanda consolarca. Jehová Diosca Bibliata utilizashpami ñucanchicunatapash consolan. Chaimi ñucanchicuna llaquicunahuan cajpi ayudangapaca Bibliapi animachij shimicunata saquishca (Rom. 15:4). África llactamanda shuj paniguca cáncer unguita charimanda imashina sintirishcatami parlan. Paica cashnami nin: “Isaías 26:3​pi shimicunami cáncer unguita charijpica ninanda ayudahuashca. Llaquicunataca na controlai ushashpapash cai versomi Jehová Dios tranquila ali sintirichun, llaquicunata chimbapurai ushachunbash ayudahuashca”. De seguromi  llaquilla cajpi, imata ruranata na atinajujpica, Bibliapa textocuna quiquindapash animashcanga.

19. Llaquicunata aguantashpaca ¿ima bendiciongunatata chasquipashun?

¹⁹ Último punllacunapi causajushcamandaca ashtaca llaquicunatami charipashun. Imashinami yachajupashcanchi, Jehová Diosca Ana, David y Ezequías imashina sintirishcataca alimi intindirca. Shinallatami Jehová Diosca quiquin llaquicunamanda imashina sintirishcataca ali intindin. Chaimandami llaquicunata charishpaca, imashina sintirishcata Jehová Diosmanga tucuita villana capangui. Llaquicunahuan cashpaca, huauquipanicunamandaca na caruyanachu capangui. Y Bibliata liinatapash na saquinachu capangui. Llaquicunata aguantashpa catishpaca, Jehová Dios carasha nishca bendiciongunatami chasquipangui. Ñallami Jehová Diosca cunanbi llaquichishca tucui llaquicunataca tucuchinga (Apoc. 21:4). Paraíso alpagupica ñana llaquicunamandaca huacapashunllu.