1927 huatapimi Illinois llactapi nacirircani. Ñuca taitacunaca 5 huahuacunatami charirca. Ñucanchicunaca tucuicunashnallatami Jehovataca tucui shungu sirvingapaj munarcanchi. 1943 huatapimi ñuca panica Galaad Escuelaman rirca. Ñucapa chaishuj huauquipanicunataca Nueva York, Brooklyn Betelpi sirvichunmi invitarca. Ñuca huauquipanicunapa ejemplo y ñuca taitacunapa ejemploca ñucataca ninandami ayudahuashca.

Ñuca taitamamaca, Taita Diosta juyaimandami Bibliata liina costumbreta charirca. Chaimi Taita Diosmanda yachachishpa viñachirca. Shinapash ñuca papitoca Primera Guerra Mundialman rishca jipami religiongunamanda respetotaca ñana charirca. Ñuca mamitaca ñuca papito tigramushcamanda cushilla caimandami: “Pundashna jacu iglesiaman” nishpa nirca. Shina nijpica, ñuca papitoca: “Ñucaca apaita ushanimi, pero ñucaca na yaicushachu” nircami. Ñuca mamitaca: “¿Imamandata shina nipangui?” nircami. Shina nijpica: “Guerrapi cashpaca imashina religionda ñaupaman pushaj sacerdotecuna, macanajungapaj richun bendiciajtami ricurcani” nircami. “Chaimandami Taita Diosca ¿imashinata cai macanajuicunataca apoyangayari? nishpa pensarcani”.

Jipaca ñucanchi huasimanga ishcai testigo de Jehovacunami shamurca. Paicunaca ñuca papitomanga Apocalipsis libromanda parlajuj ishcai librocunatami curca. Chai librocunaca Luz nishca shutimi carca. Cai librocunata ñuca mamita ricushpaca, liishpami callarirca. Jipamanga cai ishcai librocunahuan shuj curso biblicota cujujtami ñuca mamitaca yachaj chayarca. Chai librohuan ashtahuan yachajungapaj munashpami shuj mayorlla panigupaman rirca. Chaipimi paica tapurca: “¿Caipichu cai librocunataca estudianguichi?”. Chaimi paniguca: “Ari, shamupailla” nirca. Chai punllamandapachami ñuca mamitaca ñucata y ñuca huauquipanicunataca chai libromanda yachajuchun pushan carca.

Shuj viajeca tandanajuita pushajuj huauquica Salmo 144:15​ta liishpa ayudahuai nircami. Chai textoca ñuca shungumanmi chayahuarca. Chaipica Jehovata sirvijcunaca ninandami cushijun nin. Shinallata 1 Timoteo 1:11 y Efesios 5:1​ca ninandami animahuarca. Chai textocunapi pensarishpami Taita Diosmanda tucui usharishcaguta rurajushpaca cushijushpa rurana carcani. Y Jehová Diosta rijsina oportunidadta charishcamandapash  agradicini. Cai ishcai yuyaicunatami ñucapa causaipi pactachingapaj ninanda esforzarijushcani.

Ñucanchi causajushca pushtumanda 32 kilómetros carupimi shuj congregación tiarca. Y chai congregacionman rishpami Bibliamandaca ashtahuan yachajushpa catircanchi. Shuj viajeca ñuca panimi shuj comentariota curca. Y paipa comentariota uyashpaca “ñucapash chai comentariotallatami charircani, ¿imashpata maquita na alzarcani?” yarcanimi. Chai punllamandapachami comentariocunata cungapaj preparai callarircani. Shinami espiritualmente ñaupaman catircani. Y 1941 huatapimi bautizarircani.

1942 huatapi Ohio pushtupi shuj asamblea tiashcatami ashtahuanbachaca yarini. Cai asambleataca Estados Unidos llactamanda 50 yali pushtucunapimi mediante teléfono uyachirca. Asamblea ladolla huauquipanicuna quidaita ushachunmi puñuna pushtucunata rurashca carca. Chaipimi ñucapash y ñuca familiapash quidaparcanchi. Chai tiempopica Segunda Guerra Mundialca ashtahuan ashtahuanmi mirashpa catijurca. Y testigo de Jehovacunata catiriashpa llaquichijcunapash ashtahuan ashtahuanmi mirajurca. Chaimandami huauquipanicunata cuidangapaca huauquicunaca paicunapa carrohuan, paicunapa puñunajushca pushtuta muyundi cuidanajurca. Y huauquicunaca imapash uyarijpica carrota pitachishpa bullayanatami parlarishca carca. Shinami tucuilla huauquipanicunallata ayudarita ushana carca. Chaipimi “Jehová Diospa organización alipacha organizado cashcata ricurcani”. Chaimi chai viajeca tranquilo sintirishpa puñuitapash usharcani.

Huaquin huatacuna jipaca chai asambleapi pensarishpaca ñuca mamita, peligro tiajpipash na manllashpa tranquila cashcatami yarircani. Ñuca mamita Jehová Diospi y paipa organizacionbi tucui shungu confiashcata ricuchishpa, ñucaman shuj ali ejemplota saquishcataca nuncapash na cungapashachu.

Chai asambleaman nara rishpallatami ñuca mamitaca precursora regular shina sirvij callarirca. Chaimandami chai asambleapi, tiempo completopi sirvina nishca discursocunataca aliguta uyajurca. Huasiman tigrajushpaca ñuca mamitaca: “Precursora shina sirvishpami catingapaj munani. Shinapash huasipi ruraicunataca na rurai pactashachu” nihuarcami. Chaimi ñuca mamitaca: “¿Nachu quiquinguna ñucata ayudai ushahuanguichi?” nishpa tapurca. Chaimi ñucanchicunaca “ari” nircanchi. Shinaca ñucanchi mamitaca nara desayunashpallata, ñucanchipa cuartota cada uno limpiachunmi mandarca. Y ñucanchi escuelaman rishca jipaca, paica tucuilla huasi limpio, ordenado cachun ricushca jipami predicangapaj rin carca. Ñuca mamita ocupada ocupada cashpapash, ñucanchitaca nunca na descuidarcachu. Escuelamanda tigrajpica ñuca mamitaca siempremi huasipi carca. Ñucanchihuanmi yalin carca. Y ñucanchicunaca clasesmanda tigrashca jipaca, paihuanmi jipamanga predicacionman rin carcanchi. Chaita ricushpami precursorcuna imatalla rurana cashcata intindircani.

16 huatacunata charishpami precursor tucurcani. Chai tiempopica ñuca papitoca nara testigo carcachu. Shuj tutaca ñuca papitomanga: “Esforzarishpapash Bibliamanda estudiangapaj munajcunataca na tarishcanichu” nishpami parlarcani. Chaimi ñuca papitomanga: “¿Nachu ñucahuan Bibliata estudiangapaj munangui?” nishpa tapurcani. Shina nijpica: “Bibliata na estudiangapaca imapash razondaca na charinichu” nishpami “ari, estudiashallami” nirca. Shinami  ñuca papitoca, ñucapa primer estudiante de la Biblia tucurca. Ñuca papitoman Bibliamanda yachachinaca shuj privilegiomi carca.

Ñuca papitohuanga “La verdad os hará libres” nishca librotami estudiai callarircanchi. Ñuca papitota Bibliamanda yachachinaca ñuca Bibliamanda ali yachachij tucuchun ayudajushcatami cuenta japircani. Shuj tutaca ñuca papitoca shuj parrafota liishpa tucuchishca jipami, cashna nihuarca: “Cai libropica caitami yachachijun. Pero cai libropi yachachishcacuna cierto o na cierto cashcataca canga ¿imashinata yachangui?” nishpami tapuhuarca. Shina nijpica chai ratoca na contestai usharcanichu. Chaimandami: “Cunan horasca chaitaca na contestaita ushanichu pero chaishuj estudiopimi chai tapuitaca contestaita ushani” nircani. Y chaishuj estudiopaca, ña investigashca caimandami paipa tapuitaca contestai usharcani. Ñuca papitopa tapuita contestangapaca ishcai versocunatami tarircani. Chai punllamandami ali estudiota cungapaca investiganata yachajui callarircani. Y cai tucui cosascunaca ñucata y ñuca papitota espiritualmente ñaupaman catichunmi ayudarca. Ñuca papitoca Bibliapi yachajushcacunata paipa causaipi pactachishpami 1952 huatapi bautizarirca.

17 huatacunata charishpami huasimanda llujshircani. Chai tiempopimi ñuca pani Jethaca a misionera tucurca y ñuca huauquitaca Betelmanmi invitarca. Paicunapa ejemplota ricushpami ñucapash Jehová Diosta ashtahuan sirvingapaj munarcani. Chaimandami Betelman ringapaj y Escuela de Galaadman ringapaj solicitudcunata jundachircani. Chai decisiondaca Jehová Diospa maquipimi saquircani. Chai solicitudcunata jundachishca jipaca 1946 huatapimi Betelman invitahuarca.

Betelpi cashpa shuj shuj asignaciongunata charishcamandami, shuj shuj cosascunata ruranata yachajurcani. Por ejemplo, librocunata impriminata, contabilidadta ruranata y shuj shuj llactacunaman publicaciongunata cachanatapashmi yachajurcani. Shinallata 75 huatacunata Betelpi cashpami shuj shuj discursocunamanda y Betelpi Tutamanda Bibliata Yachajungapaj programapica ashtahuan ashtahuan yachajushpa cati ushashcani.

1947 huatapimi ñuca huauqui Karl shutica Betelman chayamurca. Ñuca huauquica Bibliamanda ali estudiante y ali yachachijmi carca. Shuj viajeca shuj discursotami cuna carcani. Chai discursota cungapaca ashtaca informaciondami mascashca carcani. Y chai tucui informacionda discursopi explicanaca na facilchu cagrijurca. Chaimandami ñuca huauquitaca cai discursota rurangapaj ayudahuai nishpa mañarcani. Shina nijpimi ñuca huauquica: “Chai discursopa temaca ¿maijanda can?” nishpa tapuhuarca. Chaimi shuj discursopi minishtirishca yuyaicunatalla utilizana cashcata cuenta japircani. Ñuca huauqui shina yachachishcataca nunca na cungashachu.

 Betelpi cushilla sirvishpa catingapaca villachingapami ninanda esforzarina capanchi. Shina rurashpaca shuj shuj experienciacunatami charita ushapanchi. Por ejemplo, shuj punlla ña tutayajujpi villachinapi ima pasashcatami yaripani. La Atalaya y ¡Despertad! revistacunata chasquishca huarmigutami cutin visitangapaj rircanchi. Chayashpaca chai huarmiguhuanga: “Bibliamanda ali villaigucunatami parlangapaj munapanchi” nircanchimi. Chaita uyashpaca chai huarmiguca: “Bibliamanda yachachingapaj shamunajushpaca, shamupaichilla” nircami. Shinami huaquin textocunata liishpa Diospa Reinomanda y cai alpapi shuj ali causaigu tianamanda yachachircanchi. Cai huarmigutaca shamuj punllacunapi ali causaigu tianata yachajushcataca ninandami gushtarca. Chaimandami caya semanapaca paipa amigocunandi estudiangapaj chapanajushca carca. Tiempohuanga cai huarmiguca paipa cusagundimi testigo de Jehová tucurca.

Cazarangapaj munajushpapash 10 huatacunatami shuyana tucurcani. Shuj ali huarmiguta charingapaj munaimandami Jehovapa ayudata mañan carcani. Nara cazarashpallatami: “Ñuca cazarashpaca ñuca huarmiguhuanga ¿imashinata Jehová Diostaca sirvisha?” nishpa pensarin carcani.

1953 huatapimi Mary Aniol shuti paniguta rijsircani. Paica ñuca paniguhuanmi Escuela de Galaadman rishca carca. Paicunaca ishcandimi misionera shina sirvinajurca. Mary paniguca Caribe llactapi misionera shina sirvijushpaca ashtaca gentecunata Bibliamanda yachachi ushashcatami parlahuan carca. Paita ashtahuan rijsishpaca, ishcandillata Jehová Diosta tiempo completopi sirvingapaj munashcatami cuenta japircanchi. Tiempohuanga 1955​pimi cazararcanchi. Ñuca huarmiguca Jehová Dios carashca shuj regalogushnami cashca. Paimandaca ashtacatami yachajushcani. Paica ima asignacionda charishpapash siempremi cushilla can carca. Paica trabajadora, shujcunamanda preocuparij, Taita Diospa Gobiernota siempremi pundapi churaj huarmigumi carca (Mat. 6:33). Superintendente shinami ñuca huarmiguhuanga quimsa huatata sirvircanchi. 1958​pimi Betelpi sirvichun invitarca.

Cazarashcandimi Bibliata ishcandi igual liinata dicidircanchi. Jipaca liishca textocunamanda imata yachajui ushashcata, imashina ñucanchi causaipi pactachi ushashcatami parlarin carcanchi. Ashtaca viajecunatami Mary paniguca Galaad Escuelapi o misionera cuenda ashtaca huatacunata sirvijushpa imata yachajushcatami parlahuan carca. Ñuca huarmiguhuan chashna parlanami ashtahuan ali yuyaita charichun, discursocunapi mejorachun shinallata panigucunata imashina animanata yachajuchun ayudahuarca (Prov. 25:11).

Ñuca juyashca huarmiguca 2013 huatapimi huañuparca. Paraisopica paita ricungapami munapani. Chai punlla chayamungacamanga yachajushpa y Jehová Diospi confiashpami catingapaj munani (Prov. 3:​5, 6). Paraisopi Jehová Diospa sirvijcuna imacunatalla ruranata pensarishpaca, ninandami cushijuni. Chaipica ñucanchita Yachachij Jehová Diosca ashtaca mushuj cosascunatami yachachinga. Shinallata paimanda ashtahuan yachajuna oportunidadtapashmi charishun. Jehová Dios ashtacata yachachishcamanda y ñucata juyashcamandaca ninandami agradicipani.