1, 2. Taitamamacunaca paicunapa huahuacuna imamanda Bibliapi crishcata tapujpica ¿imatata rurana can?

 UCHILLA huahuagucunata charij taitamamacunaca paicunapaj huahuacunaman Jehová Diosmanda yachachingapaca ninandami esforzarin. Chaimandami taitamamacunataca felicitana capanchi (Deut. 6:​6, 7). Huahuacuna viñai callarishpaca Bibliapa yachachishcacunata, Bibliapa consejocunata imamanda cazuna cashcatami tapui callarin.

² Cai tapuicunata rurai callarijpica taitamamacunaca paicunapa huahuacuna Jehová Diospi confianata saquinajun yashpami pensarita ushan. Shinapash huahuacunaca tapuicunata rurashpami Bibliapi ima nijtaca ashtahuan yachajuita ushan (1 Cor. 13:11). Huahuacuna Bibliapa yachachishcacunamanda tapujpica taitamamacunaca Jehová Diosmanda parlana oportunidadtami charin. Chashna rurashpaca Jehovapi confiaita yachajuchunmi ayudaita ushan.

3. Cai temapica ¿imatata yachajupashun?

³ Cai temapica huahuacuna Bibliapa yachachishcacuna cierto cashcata crichun, Bibliapa mandashcacunata cazuna paicunapallata ali cashcata intindichun, shinallata paicunapa crishcacunata shujcunaman parlaita ushachun imashina taitamamacunaca paicunapa huahuacunata ayudai ushashcatami yachajupashun. Shinallata huahuacuna imamanda tapuicunata rurana ali cashcata y taitamamacuna huahuacuna tapuicunata rurajpi imata rurai ushashcatami yachajupashun.

BIBLIAPA YACHACHISHCACUNA CIERTO CASHCATA CRICHUN AYUDAPAI

4. Huahuacuna viñashpaca ¿imapita pensarita ushan?

⁴ Taitamamacuna quiquinguna Taita Diospi crishcamandalla  quiquingunapa huahuacunapash Taita Diospi crina cashcataca na pensanachu capanguichi. Porque quiquingunapashmi Jehová Diosmanda yachajunata y paipi shinlli feta charinata yachajuna caparcanguichi. Huahuacunaca viñashpaca ¿imapita pensarita ushan? “¿Taita Diosca ciertopachachu tian? ¿Bibliapa nishcacunapica confiaita ushanichu?” nishpami pensarita ushan. Bibliapica tucui cristianocunamanmi “aliguta pensarishpa” ‘tucui cosascuna cabal cajta o na cabal cajtaca aligutami ricuna canguichi’ nishpa animan (Rom. 12:1; 1 Tes. 5:21). Shinaca taitamamacuna, quiquingunapa huahuacuna Jehová Diospi confiaita ushachunga ¿imashinata ayudaita ushapanguichi?

5. Quiquingunapa huahuacuna Bibliapa nishcacunapi ashtahuan crichunga ¿imatata ruraita ushapanguichi? (Romanos 12:2).

⁵ Bibliapa yachachishcacuna cierto cashcata crichun ayudapaichi (Romanos 12:2​ta liipangui). Quiquingunapa huahuacuna tapuicunata rurajpica paicunallata chai tapuicunamanda ashtahuan yachajuita ushachunga Índice de las publicaciones Watch Tower y la Guía de estudio para los testigos de Jehová nishca publicaciongunapi informaciongunata mascachunmi ayudaita ushapanguichi. Biblia Taita Diospa shimi cashcata seguro cachunga Guía de estudio para los testigos de Jehová nishca publicacionbimi “La Biblia” nishca temaman yaicushpa “Inspiradas por Dios” nishca partepi yaicushpa ashtahuan informacionda mascachunmi ayudaita ushapanguichi (1 Tes. 2:13). Por ejemplo, Nínive llactamanda ashtahuan informaciondami mascaita ushapanguichi. Pundaca huaquin Bibliamanda ali yachajushcacunaca, cai llactaca nunca na tiarcachu nishpami nin carca. Pero 1850 huatapica Nínive llacta cierto tiashcatami huaquingunaca yachaj chayarca. Chaimi Bibliapa nishcacuna cierto cashcata ricuchin (Sof. 2:​13-15). Shinallata Nínive llactamanda imashina profeciacuna pactarishcata ashtahuan yachangapaj munashpaca, noviembre de 2021 huatapa Villajun revistapi “¿Yachaparcanguichu?” nishca partepimi ricuita ushapanguichi. Shinaca quiquinba huahuacunataca ñucanchi publicaciongunahuan y shuj rijsishca librocunahuan comparashpa yachajuchunmi animaita ushapanguichi. Shinami Bibliapa yachachishcacuna cierto cashcata seguro cachun ayudaita ushanga.

6. Taitamamacunaca huahuacuna Bibliapa yachachishcacuna cierto cashcata cuenta japichunga ¿imashinata ayudaita ushan? Shuj ejemplomanda parlai. (Fotota ricupangui).

⁶ Bibliapa yachachishcacuna cierto cashcata cuenta japichun ayudapaichi. Taitamamacunaca paipa huahuacunaman Jehová Diosmanda parlangapaca ashtaca oportunidadcunatami charin. Shuj museoman rishpa, Betelman rishpa o puringapaj llujshishpaca quiquingunapa huahuacunahuan Jehová Diosmanda parlangapami  aprovechaita ushapanguichi. Por ejemplo taitamamacunaca huahuacuna Bibliapi yachachishcacuna cierto cashcata crichunga videocunata, publicaciongunata utilizashpami ayudaita ushan. Talvez quiquinba huahuacunaca ¿3000 huatacuna huashaman tiashca piedra moabita nishcapi Taita Diospa shutita tiashcataca yachanllu? Chai rumitaca Francia llactapi Museo del Louvre nishcapi o na cashpaca ñucanchi publicaciongunapimi ricuita ushapanchi. Shinallata piedra moabita nishca copiaca, Jatun Betelpa museopipashmi tian. Chai rumipica Moab llactamanda rey, Israel llactapa contra cashcatami ricuchin. Y chaitaca Bibliapipashmi ricuita ushapanchi (2 Rey. 3:​4, 5). Chai cosascuna cierto cashcata ricushpami, huahuacunaca Bibliapa yachachishcacuna cierto cashcata cuenta japinga (2 Crónicas 9:6​ta chimbapurashpa ricupangui).

7, 8. a) Jehová Diospa rurashcacunata ricushpaca ¿imatata yachajuita ushapangui? Shuj ejemplomanda parlapai. (Dibujocunata ricupangui). b) ¿Imata ricushpata huahuacunaca Jehová Dios tucuita rurashcataca seguro canga?

⁷ Jehová Diospa rurashcacunapi pensarichun ayudapai. Jehová Diospi quiquinba huahuacuna ashtahuan confiaita ushachunga quiquinba huahuacunahuan pambacunaman rishpa o puringapaj llujshishpami Jehovapa rurashcacuna imashna cashcata yachachita ushapanguichi. Por ejemplo cientificocunaca Jehová Diospa rurashcacuna imashna rurashca cashcatami investiganajushca. Biofísico Nicola Fameli nishca jarica galaxiacunata, conchacunata, girasolcunata y huaquin plantacunapa hojacunatapash na maipash cachun, alipacha rurashcatami cuenta japishca. a

⁸ Escuelapimi huahuacunaca plantacuna, animalcuna y shuj shuj cosascuna imashina rurashca cashcataca yachajunga. Por ejemplo, yurapa troncocunamandaca ashtaca ramagucunami llujshin. Chaita ricushpami yuracuna alipacha rurashca cashcata cuenta japipanchi. Huahuacunaca plantacuna, animalcuna y shuj shuj cosascunapash alipacha rurashcata ricushpami Jehová Dios tucui cosascunata rurashcata seguro canga (Heb. 3:4). Quiquinba huahuacuna viñashpa catijpica, Taita Diospa mandashcacunata imamanda cazuna importante cashcata intindichunmi ayudaita ushapangui.

BIBLIAPA MANDASHCACUNATA CAZUNA PAICUNAPALLATA ALI CASHCATA INTINDICHUN AYUDAPAICHI

9. ¿Imamandata huahuacunaca Bibliapa mandashcacunataca cazuna canchi nishpa tapuita ushan?

⁹ Bibliapa mandashcacunataca ¿imamandata cazuna canchi? nishpa quiquinba huahuacuna tapujpica paicuna imamanda chashna tapujta intindingapami esforzarina capanguichi. Talvez paicunaca Bibliapa yachachishcacunata na aliguta intindimanda o na cashpaca paipa crishcacunata  shujcunaman imashina intindichita na ushaimandami chashna tapuita ushan. Shinaca quiquinba huahua Bibliapa mandashcacunata ashtahuan valichichunga Cushilla causapashunchi nishca librotami yachajuita ushapanguichi. b

10. Jehová Diospa amigo cachunga ¿imashinata quiquinba huahuacunataca ayudaita ushapanguichi?

¹⁰ Quiquinba huahuacuna Jehová Diospa ali amigo cachun ayudapaichi. Bibliata quiquinba huahuacunahuan estudiajushpaca Cushilla causapashunchi nishca libromanda tapuicunata, comparaciongunata utilizashpami paicuna imata intindishcata cuenta japita ushapanguichi (Prov. 20:5). Por ejemplo, lección 8​pica Jehová Diostaca shuj ali amigohuanmi comparan. Shuj ali amigoca ñucanchicuna imapash ama pasachunmi imata rurana cashcata siempre yarichin. 1 Juan 5:3​ta liishca jipaca Jehová Diostaca ¿imamandata cazuna canchi? nishpami tapuita ushapanguichi. Chaita rurashpaca quiquinba huahuacuna Taita Dios ñucanchita juyaimanda paipa leyta cushcata ricuchunmi ayudaita ushapanguichi (Is. 48:​17, 18).

11. Quiquinba huahuacuna Bibliapa consejocunata ashtahuan valoraita ushachunga ¿imatata ruraita ushapanguichi? (Proverbios 2:​10, 11).

¹¹ Bibliapa mandashcacunata cazuna ñucanchipallata ali cashcata parlapaichi. Bibliata liishpa o texto diariota liishpaca, Bibliapa consejocunata cazuna imashina quiquinba familiata ayudashcata parlapaichi. Por ejemplo ¿quiquinba huahuacunaca trabajadorcuna, honradocuna cana cashcataca alichu intindin? (Heb. 13:18). Shinallata Bibliapa consejocunata catina sano, cushilla cachun imashina ayudajtami cutin cutin yachachita ushapanguichi (Prov. 14:​29, 30). Huahuacunaman Bibliapa consejocunamanda parlajpica, paicunaca Bibliapa consejocunataca ashtahuanmi valoranga (Proverbios 2:​10, 11​ta liipangui).

12. Shuj matrimonioca paipa churi Bibliapa consejocunata pactachina imamanda importante cashcata intindichunga ¿imatata ruran?

¹² Francia llactamanda Steve huauquigu y paipa huarmigu paipa churita ayudangapaj imata rurashcatami parlan. Jehová Dios juyaimanda Bibliapa mandashcacunata churashcata cuenta japichunmi paicunaca paipa churitaca cashna tapuicunata ruran: Jehová Diosca ¿imamandata paipa consejocunata respetachun mañan? Chai consejocunata cushpaca ¿imashinata paica ñucanchita juyashcata ricuchin? Y paipa consejocunata na pactachijpica ¿imata pasanman? nishpami tapuchin. Cashna yuyaicunamanda parlanami Ethan jovengutaca Jehová munashcashna causachun y shuj shinlli feta charichun ayudashca. Steve huauquiguca cashnami nin: “Ñucanchi churigu Ethan gentecunapa consejocunamanda yali Bibliapa consejocuna ashtahuan importante cashcata intindichunmi munapanchi”.

13. ¿Imashinata taitamamacunaca paipa huahuacuna Jehovapa consejocunata pactachichun ayudaita ushan? Shuj ejemplomanda parlapai.

¹³ Bibliapa consejocunata imashina pactachi ushashcata yachachipaichi. Por ejemplo quiquingunapa huahuacunaman escuelapi shuj librota liichun cachajpica paicunaman yachachina oportunidadtami charipanguichi. Profesorcuna liichun cachashca librocunaca huainayanamanda, macanajuicunamanda parlaj librocunami caita ushan. Chaimandami taitamamacunaca chai nali comportamientocuna Jehová Diospa ñaupapi nali cashcata cuenta japichun ayudaita ushan (Prov. 22:​24, 25; 1 Cor. 15:33; Filip. 4:8). Chaita rurajpimi quiquinba huahuacunaca Jehová Diosta cazuna imamanda ali cashcata cuenta japinga. Shinallata profesorcuna o compañerocuna chai libromanda tapujpica paipa crishcacunamanda parlana oportunidadtami charinga.

 PAICUNAPA CRISHCACUNATA SHUJCUNAMAN PARLAITA USHACHUN YACHACHIPAICHI

14. Huaquin jovengunapaca ¿ima temamanda parlanata escuelapica difícil caita ushan?

¹⁴ Huaquin jovengunapaca huaquinbica paipa crishcacunamanda parlanaca dificilmi caita ushan. Escuelapi evolucionmanda parlajpimi huaquin jovengunapaca chai temamanda parlanaca difícil caita ushan. Ashtaca profesorcunaca evolución cierto cashcatami yachachin. ¿Imashinata taitamamacunaca paicunapaj huahuacuna paicunapaj crishcacunata na manllashpa parlaita ushachun ayudaita ushan?

15. Jovenguna paicunapa crishcacunapi confiachunga ¿imata ayudanga?

¹⁵ Bibliamanda yachachishcacunata tucui shunguhuan crichun ayudapaichi. Taita Diospi crinataca quiquinba churicunaca na pinganayachinachu can (2 Tim. 1:8). Huaquin cientificocunapashmi causaica na yangamanda tiai callarishcata yachaj chayashca. Cai alpapi tiashca tucui cosascuna alipacha rurashcata ricushpami, huaquin cientificocunaca cai tucui cosascuna na yangamanda tiai callarishcata cuenta japin. Chaimandami huaquin cientificocunaca evolucionmanda yachachishca cosascunataca na crin. Quiquinba huahuacunataca shuj huauquipanicuna imamanda Taita Dios tucuita rurashcapi crishcata yachajunami, paicunapash paicunapa crishcacunapi tucui shungu confiashpa catichun ayudanga. c

16. Taita Diospi crishcata shujcunapa ñaupapi difindichunga taitamamacunaca ¿imashinata huahuacunataca ayudaita ushan? (1 Pedro 3:15; fotota ricupangui).

¹⁶ Taita Diospi crishcata difindita ushachun yachachipaichi (1 Pedro 3:15​ta liipangui). Jw.org paginapimi “¿Creación o evolución?” nishca yuyaicunamanda quiquinba huahuacunahuan igual yachajuita ushapanguichi. Yachajushca jipaca, Taita Dios tiashcata shujcunaman intindichi ushangapaca, maijan yuyaita ashtahuan ali can nishpami tapuita ushapanguichi. Shinallata caicunamanda parlashpaca, paicunapa compañerocunahuan na fiñanajuna minishtirishca cashcatami huahuacunaman yarichita ushapanguichi. Pipash cai temamanda ashtahuan parlangapaj munajpica quiquinba huahuacunaca jahualla, intindirinalla yuyaicunahuanmi yachachita ushan. Por ejemplo, shuj compañero “Taita Diospica na crinichu, nuncapash na ricushcanichu” nijpica cashna nita ushapangui: “Yacuta llujchina pozota tarishpaca,  chai pozoca yangamanda tiashcatachu pensapanguiman. Seguromi chai pozotaca pipash rurashcanga yashpa pensapanguiman. Shina cuendallatami cai alpapi tucui tiashcacunaca pipash rurashcamanda tian” nita ushapanguiman.

17. Quiquinba huahuacuna Bibliamanda shujcunahuan parlaita ushachunga ¿imashinata animaita ushapangui? Shuj ejemplomanda parlapai.

¹⁷ Bibliamanda shujcunahuan parlaita ushachun yachachipaichi (Rom. 10:10). Bibliamanda shujcunaman parlanaca, imapash shuj instrumentota tocanata yachajuna cuendami can. Callaripica shuj instrumentota tocanata yachajunaca dificilmi caita ushan. Chaimandami callarijpica facillla musicacunata tocashpa callarin. Ña yachajushpami ashtahuan ashtahuan, shuj shuj musicacunata tocaita ushan. Bibliamanda parlanapash shinallatami can. Callaripica jahualla, facillla yuyaicunahuanmi shujcunahuanga parlai callarita ushapanchi. Por ejemplo, shuj joven cristianoca shuj compañeromanga “¿ashtaca ingenierocunaca cai alpapi tiashca cosascunata ricushpa, diseñashcataca yachashcanguichu?” nishpami tapuita ushan. Chashna tapushca jipami “¿Pipashcha rurarca?” nishca partemanda shuj videota ricuchita ushapangui. Chai jipaca, “cientificocuna cai alpapi tucui tiashcacunata ricushpa diseñashcamandami gentecunaca paicunata jatunyachin. Shinapash cai alpapi tucui tiashcacunata ricushpaca ¿pitata jatunyachina canchi?” nishpa tapuita ushapanchi. Cashna yuyaicunahuanmi escuelamanda compañerocuna Taita Diosmanda yachana munaita charichun ayudaita ushan.

SHINLLI FETA CHARICHUN AYUDAPAICHI

18. Quiquinba huahuacuna shinlli feta charishpa catichunga ¿imashinata ayudaita ushapanguichi?

¹⁸ Jehová Diosta na crij gentepuracunapimi causapanchi (2 Ped. 3:3). Chaimandami taitamamacuna quiquingunapa huahuacunaman Bibliamanda yachachishpaca, paicuna Bibliapa mandashcacunamanda ashtahuan investigachun y Taita Diospa consejocunata respetachun yachachita ushapanguichi. Shinallata Jehová Diospa rurashcacuna imashna rurashca cashcata pensarichun, Bibliapi parlashca profeciacuna imashina pactarishcata intindichunmi ayudaita ushapanguichi. Taitamamacunaca Jehová Diosta paicunapa huahuacunahuan mañashca jahuapash siempremi paicunapa huahuacunamandaca mañana capanguichi. Quiquingunapa huahuacuna shinlli feta charichun ayudanajushcamanda Jehová bendicianataca seguromi caita ushapanguichi (2 Crón. 15:7).