Ñuca cusaca chuscu huauquicunatami charirca. Paimi rucu huauqui carca. 1930 huatacunapimi Harveypa familiaca Australia llactapi Jehovamanda yachajurca. Chai tiempopica llacta enteromi culqui faltalla causanajurca. Harveyca Jehovata juyaimandami 14 huatagutalla charishpa bautizarirca. Paica Jehovata juyaimandami congregacionbi imapash asignaciongunata ruranlla carca. Shuj viajeca Villajun revistata liichun nishpami mañarca. Shina mañajpica na ushashachu nishpami na nishca carca. Chaimi shuj turiguca: “Harvey, Jehovapa organizacionbica, imagutapash rurachun mañashpaca can rurai ushashcata yachashpami mañan” nishcarcami (2 Cor. 3:5).

Ñuca mamitandi, ñuca paya ñañandimi Jehovamandaca Inglaterra llactapi yachajuparcanchi. Callaripica ñuca taitaca Jehovamandaca na yachajungapaj munarcachu. Jipamanmi Jehovamandaca yachajurca. Ñuca taitaca ñuca Testigo tucuchunga na munarcachu. Shina na munajpipashmi 9 huatagutalla charishpa bautizarircani. Chai jipaca Jehovata sirvingapaj munaimandami precursora tucungapaj munarcani. Misionera tucungapapashmi munarcani. Pero ñuca taitaca 21 huatacunata charishpa precursora tucuchunmi munarca. Ñucaca ashtaca huatacunata shuyangapaca na munarcanichu.  Ña 16 huatacunata charishpaca ñuca paya ñañahuan Australia llactapi causangapaj richunmi ñuca taitaca permisota cuhuarca. 18 huatacunata ña charishpami precursora tucurcani.

Australia llactapimi Harveytaca rijsircani. Ishcandillatami misionerocuna cangapaj munan carcanchi. 1951​pimi cazaraparcanchi. Ishcai huatacunata precursorcunashna sirvishca jipami, circuitopi sirvichun ñucanchitaca invitarca. Australia Occidental llactaca jatun jatunmi carca. Chaimi cutin cutin shuj ladocunaman, caru caruta autopi rina tucurcanchi.

1954​pimi Galaad Escuelapa clase 25man ñucanchitaca invitarca. Ñallapachami misionerocunashna sirvigrinajurcanchi. Nueva York llactamanga barcopimi chayarcanchi. Chai Escuelapica Bibliamandaca alipachami yachajurcanchi. Galaad Escuelapica español shimitapashmi yachajuna tucuparcanchi. Pero ñuca cusapaca erre letrata ninaca na fácil carcachu.

Galaad Escuelapi yachachij instructorcunaca, Japón llactapi sirvingapaj munashpaca japonés shimita yachajungapaj anotaripaichi nircami. Ñucanchicunaca Jehovapa organización maipi sirvigrinata nichunmi shuyanajuparcanchi. Chaimi japonés shimita yachajungapaca na anotarircanchi. Chaita yachaj chayashpami Galaad Escuelapi yachachij Albert Schroeder turica cashna nirca: “Chai shimita yachajungapaj pensarichi”. Shina nijpipash ñucanchica na anotarircanchichu. Na anotarijta ricushpami chai turiguca: “Galaad Escuelapi yachachijcunaca, quiquinguna japonés shimita yachajuchunga ñami anotashcanchi” nircami. Ñuca cusapaca japonés shimita yachajunaca facilmi carca.

1955​pimi Japón llactaman chayarcanchi. Chai llactapica 500 publicadorcunallami tiarca. Harveyca 26 huatacunata, cutin ñucaca 24 huatacunatallami charircanchi. Japón llactapi Kobe nishca pushtumanmi cacharca. Chaipica 4 huatacunatami sirvircanchi. Jipaca circuitopi sirvichunmi Nagoya llacta ladollaman cacharca. Chaiman cachajpica ninandami cushijurcanchi. Japón llactapi sirvinataca ninandami gushtan carcanchi. Chaipica juyailla pushtucuna, micunapash alipacha, turiñañacunapash ali alicunami carca. Shinapash cutinmi Jehová Diosta ciertopacha pai maipi sirvichun munashcata ricuchina o na ricuchina oportunidadta charircanchi.

Quimsa huatacunata circuitopi sirvishca jipami, Japón llactamanda sucursalca Taiwán llactapi sirvingapaj nachu ringapaj munanguichi nishpa tapurca. Chaipica ami shimita parlaj gentecunamanmi  villachina carcanchi. Chaimanda huaquin turiñañacunaca congregacionmanda caruyashpa apostatacunami tucushcarca. Chaimi Taiwán llactamanda sucursalca congregaciongunapi ayudachunga japonés shimita parlaj shuj turita minishtinajurca. * Japón llactapica ña yacharishca caimandami, Taiwán llactapi sirvingapaj rinaca na fácil ricurirca. Pero ñuca cusaguca Jehová Dios rurachun mingashcataca siempremi pactachingapaj munarca. Chaimi chai llactaman rircanchi.

Taiwán llactamanga noviembre de 1962​pimi chayarcanchi. Chai huatapica 2 mil 271 publicadorcunami tiarca. Mayoriami ami shimita parlan carca. Pero chino shimitarami yachajuna carcanchi. Pero yachajungapaca shuj librotalla, inglés shimita na parlaj profesoratami charircanchi. Shinapashmi chai shimitaca yachajurcanchi.

Taiwán llactaman chayashca jipallami ñuca cusagutaca sucursalta ricushpa ayudachun mañarca. Chaipi sucursalca na yapa jatun cashcamandami, ñuca cusaguca sucursalpipash ayudashpa, ami shimita parlaj turiñañacunahuan villachingapapash llujshita ushan carca. Huaquinbi huaquinbica superintendente de distritopashmi carca. Chaimi asambleacunapipash discursota cungapaj rin carca. Chai discursocunata japonés shimipi cujpica ami shimita parlaj gentecunaca intindinmanmi carca. Shinapash chai llactamanda gobiernoca religiongunataca chino shimipilla tandanajuicunata charichun nishpami mandashca carca. Chaimi chino shimita nali parlashpapash Harveyca discursotaca chino shimipi cun carca. Pero shuj turigumi ami shimiman traducin carca.

Chai punllacunapica gentecuna ama tandanajuchunmi gobiernoca shuj leyta llujchishca carca. Chaimi Testigocunaca asambleacunata charingapaj shuj permisota llujchina carca. Chai permisota llujchinaca na fácil carcachu. Chai permisotaca policiacunaca na ucha cunllachu carca. Asambleacunata charina semanacaman policiacuna permisota na cushca cajpica, Harveyca comisariaman rishpami cungacaman shuyan carca. Policiacunaca shuj llactamanda gentecunata shuyachinata pinganayachimandami permisotaca cunlla carca. Shinami permisotaca llujchita ushan carca.

Turiñañacunahuan villachingapaj rishpaca casi shuj horasta o ashtahuan horascunatami urcucunata, huaicucunatapash rin carcanchi. Primera vez urcucunapi villachingapaj rishcatami yarini. Chai punllaca cafeta ufiashca jipallami las 5:30 tutamandata shuj busta japishpa huaquin gentecuna causaj puebloman rircanchi. Shinallata shuj huaicuta yalishpami urcucunatapash rina tucurcanchi. Chai urcucuna shayaj shayaj cashcamandami ñucata ñaupashpa rijuj turigupa chaquitalla ricushpa rijurcani.

Chai punllaca ñuca cusaguca shuj turicunahuanmi villachijurca. Cutin ñucaca japonés shimita parlaj pueblopimi villachijurcani. Chaupi punllaca yarjaimandami fuerza illaj sintirijurcani. Ñuca cusahuan tuparijpica chaishuj turicunaca ñami rishcarca. Ñuca cusa villachijujpimi shuj huasi dueñoca shuj revistamanda quimsa lulunguta cushcarca. Harveyca chahua lulunda micunatami yachachihuarca. Na ashta gushtashpapash shugutaca micurcanimi. Pero último lulundaca ñucallatami micuna  tucurcani. Na micushpaca chai urcumanda urai shamuitaca na ushaimanllu carcani.

Tandanajui Huasi ladollapimi shuj superintendente cusahuarmica causarca. Jatun Tandanajui tiana semanapimi paicunapa huasipi ñucanchicunaca quidarcanchi. Chaipimi superintendente turipa huarmiguca ñucanchicuna armachun yacuta segurarca. Ami shimita parlajcunapa costumbrepica limpio canaca minishtirishcapachami carca. Chaimi ñañaguca chiri yacuta, cunuj yacutapash baldecunapi churashpa shuj trasteguhuan patiopi churagrirca. Ñuca cusa ocupado cashcamandami canra primero armagri nihuarca. Tandanajui Huasica chai patio ladollapimi carca. Patiopi yacuta churajta ricushpaca manllarircanimi. Asambleapa tucuita seguranajushcamandami turiñañacunaca canllapi purinajurca. Chaimi nachu pacalla armangapaj imagupash tiapan nishpa tapurcani. Chaimi ñañaguca shuj plasticota cuhuarca. Plasticohuan cashpapash tucuimi ricurijurca. Chaimi mejor huasi huasquipi armangapaj ringapaj munajurcani. Pero shuj millai millai gansocuna tiajtami yarircani. Chaimi, turiñañacunaca ocupadopachami can. Armajujtaca na cuenta japingachu. Na armashpaca ami shimita parlajcunataca nali sintichishachu yarcanimi. Chaimi mejor armarcanilla.

Ami shimita parlaj turiñañacunaca na liita ushaimanda, paicuna parlaj shimipi publicaciongunapash na tiashcamandami Jehovapica na tucui shunguhuan crita ushanajurca. Chaitami ñuca cusaca cuenta japirca. Chai tiempopi ami shimita escribi callarishcamandami paicunapa propio shimipillata liinata yachachi callarircanchi. Shina yachachina shinlli cajpipash tiempohuanga turiñañacunaca paicunapa munaimi yachajushpa catirca. 1960 tucuripimi ami shimipica publicacionguna tiai callarirca. 1968​pica ami shimipillatami Villajun revistapash llujshirca.

Chai llactamanda gobiernoca imapash publicaciongunaca chino shimipilla llujshichunmi munarca. Chaimi ami shimipi Villajun revistataca shuj shuj formatocunapi llujchircanchi. Huaquin quillacunapica chino shimipi, ami shimipipashmi revistacunataca llujchin carcanchi. Shinami gentecunamanga chino shimita yachachijuj cuenda ricurirca. Chai punllamandapachami Jehová Diospa organizacionga ami shimipi parlaj gentecuna Jehovamanda yachajuchun ashtaca publicaciongunata llujchirca (Hech. 10:34, 35).

1960, 1970 huatacunapica ami shimita parlaj huauquipanicunaca Jehovapa mandashcacunataca paicunapa causaipica na pactachinajurcachu. Huaquingunaca Bibliapi mandashcata na cabalta intindimandami huainayashpa, tragota ufiashpa, tabacota chupashpa, drogata fumashpami causanajurca. Chai huauquipanicunata ayudangapami Harveyca ashtaca congregaciongunata visitashpa, Jehová Dios munashcashna causachun yachachishpa ayudarca. Chai llactapimi callari parlashca experienciataca chariparcanchi.

Pero humildecunallami cambiangapaj munarca. Taiwán llactapica 2 mil 450 yali publicadorcunami tiarca. Shinapash 20 huatacuna jipaca, 900 publicadorcunallami quidarca. Chaica shuj llaquimi carca. Jehovapa mandashcacunata na cazushpa causanajujta ricushpaca imashinata Jehová Diosca bendicianga yarcanchimi (2 Cor. 7:1). Tiempohuanga turiñañacunaca Jehová Dios munashcashnami causai callarirca. Chaimi Jehová Diospa bendicionhuanga cunanbica 11 mil yali publicadorcuna tian.

1980​mandami ami shimita parlaj turiñañacunaca tucui shunguhuan Jehovata sirvi callarirca. Chaimi Harveyca chino shimipi villachingapaj ashtahuan tiempota charirca. Huaquin ñañagucunapa cusacuna Testigocuna tucuchunbashmi ayudarca. Shuj ñañagupa cusa primera vez Jehovata mañajta ricushpaca ninandami cushijurca. Ñucapashmi shuj gentecunata Jehovata rijsichun ayudashpaca ninanda cushijushcani. Shinallata ñuca Bibliamanda yachachishca ñañagupa shuj ushigundi, shuj churigundi Taiwán sucursalpi sirvishpacarin ninandami cushijurcani.

Ñuca cusahuanga 59 huatacunatami cazarashca caparcani. Shinapash paica ñami chingariparca. Paica 1 de enero de 2010 huatapimi cáncer ungüihuan huañuparca. Ñuca cusaguca 60 huatacunatami tiempo completopi sirvirca. Paita yarishpaca ninandami llaquinayan. Pero ñuca cusaguta ishcai llactacunapi Jehovata sirvishpa apoyashcamandaca ninandami cushijupani. Chino shimita, japonés shimitapashmi yachajuparcanchi. Harveyca chai shimicunapi escribinatapashmi yachajurca.

Ñuca cusagu huañushca huaquin huatacuna jipaca, Cuerpo Gobernantepi sirvij turicunaca, Australia llactaman tigranami quiquinbaca ashtahuan ali canman nihuarcami. Shina nijpimi: “Taiwán llactamanda na ringapaj munanichu” yarcani. Shinapash ñuca cusaguca Jehová Dios rurachun munashcata siempre pactachina cashcatami yachachihuarca. Chaita yarishpami Australia llactamanga tigrarcani. Tiempohuanga mayorlla caimandami ñucapallata ali cashcata cuenta japircani.

Cunanga Australasia sucursalpimi sirvijupani. Sábado, domingocunataca turiñañagucunahuanmi villachipani. Chino o japonés shimita parlaj turiñañacuna sucursalta visitangapaj shamujpimi paicunataca tucuita rijsichini. Chaita ruranataca ninandami gushtani. Jehová Dios huañushcacunata causachinataca tucui shunguhuanmi shuyajupani. Harveyca Jehová Dios rurachun munashcata siempremi pactachin carca. Chaimi Jehová Dios paita causachinataca segura capani (Juan 5:28, 29).