1. Shuj jovenga 1935​pi shuj discursota uyashca jipaca ¿imatata rurarca?

SHUJ jovenga 1926 huatapimi 18 huatacunata charishpa bautizarirca. Chai jovenba taitacunaca testigo de Jehovacunami carca. Shinapash chai tiempopica Testigocunataca Bibliamanda yachajujcuna nishpami rijsin carca. Chai jovenba taitacunaca quimsa churicunata, ishcai ushicunatami charirca. Paicunapa huahuacunataca Jehovamanda yachachishpami viñachirca. Chai jovenga tucuilla Testigocunashnallatami Jesús Huañushcata Yarina tandanajuipica tandata, vinotapash ufian carca. Shinapash 1935​pica “La grande muchedumbre” nishca discursota uyashca jipami chai jovenga tandata, vinotapash ñana ufiashpa catirca. Chai discursotaca huauqui Joseph Rutherfordmi Estados Unidos llactapi curca. Chai discursopica ¿imatata intindichirca?

2. Huauqui Rutherfordca paipa discursopica ¿imatata ali intindichirca?

² Chai discursopimi huauqui Rutherfordca Apocalipsis 7:9​pi parlashca ‘pipash na cuentai ushanalla ashtaca gentecuna’ picuna cashcata intindichirca. Chai huatacamanga na cuentai ushanalla ashtaca gentecunaca jahua cieloman rinatami crin carca. Shinallata Jehovata na tucui shunguhuan sirvimanda jahua cieloman rishpapash ungidocunahuan na igual cana cashcatami crin carca. Huauqui Rutherfordmi na cuentai ushanalla ashtaca gentecunaca jahua cielopi causangapaj na rina cashcata ali intindichirca. Ashtahuanbash paicunaca Jesús parlashca shuj llamagucunami can nircami. Paicunaca Ninan Manllanai Llaqui Punllacunata aguantashpa yalishcamandami cai alpapi para siempre causaita ushanga nircami (Apoc. 7:14). Jesusca: “Na cai corralmanda shuj llamacunatapash charinimi. Paicunatapash  pushamunami cani. Paicunami, ñuca villachijushcata uyashpa cazunajunga. Shina cazujpica, shujlla corralmi tucunga. Shina tucujpimi, paicunataca ñucalla michijusha” nircami (Juan 10:16). Shinaca cai alpa shuj paraíso tucujpi para siempre causana esperanzata charij tucui testigo de Jehovacunami shuj llamagucuna can (Mat. 25:31-33, 46). Cai yuyaita ali intindinami ashtaca testigo de Jehovacunataca ninanda ayudarca. 18 huatacunata charij jovendapashmi ayudarca (Sal. 97:11; Prov. 4:18). *

3, 4. a) Huata 1935​pi jatun tandanajuipica ¿imatata ashtaca huauquipanicunaca cuenta japirca? b) ¿Imamandata chaitaca cuenta japirca?

³ Huauqui Rutherford discursota cujushpaca asambleapi caj tucuilla gentecunatami cashna nishpa tapurca: “¿Pita cai alpapi para siempre causangapaj munapanguichi? Maijan munajcunaca shayaripaichi” nircami. Chai jatun tandanajuipi cashca shuj huauquica shina tapujpimi, 20 mil gentecunamandaca chaupi yali shayarirca nircami. Chaimi huauqui Rutherfordca: “Ricuichi caimi pipash na cuentai ushanalla ashtaca gentecuna can” nirca. Shina nishca jipaca paicunapurami ninanda cushijushpa caparinajurca. Tucuilla shayarishcacunami jahua cielopi causangapaj na rina cashcata, na ungidocuna cashcatapash intindirca. Cayandi punllapaca 840 gentecunami chai jatun tandanajuipica bautizarirca. Paicunamandaca mayoriami shuj llamagucuna carca.

⁴ Chai punllamandami ashtaca ashtaca huauquipanicuna, 18 huatacunata charishca jovenbash Jesús Huañushcata Yarina tandanajuipi tandata micunata, vinota ufianatapash saquirca. Ashtacacunami shuj huauqui nishcashna sintirirca. Chai huauquica: “1935​pimi tandata, vinotapash por última vez ufiarcani. Jehová Dios jahua cielopi causachun na agllashca cashcatami cuenta japircani. Ashtahuanbash cai alpa shuj paraíso tucuchun ayudashpa causana munaitami Jehová Diosca cuhuashca” nircami (Rom. 8:16, 17; 2 Cor. 1:21, 22). Chai punllamandami na cuentai ushanalla ashtaca gentecunaca ashtahuan mirashpa catishca. Paicunaca cai alpapi quidashca ungidocunahuanmi * igual Jehová Diosta sirvinajushca.

5. Tandata micunata, vinota ufianata saquishca huauquipanicunamandaca ¿imatata Jehová Diosca yuyan?

⁵ 1935​pi tandata micunata, vinota ufianata saquishca huauquipanicunamandaca ¿imatata Jehová Diosca yuyan? Shinallata shuj huauqui o shuj panica ungidomi cani yashpa tandata, vinotapash ufiashca. Shinapash tiempohuan na ungido cashcata cuenta japishpaca ¿imatata rurana can? (1 Cor. 11:28). Huaquingunaca cieloman rina cashcata crimandami tandata micun, vinotapash ufian carca. Shinapash cieloman ñana rinata cuenta japishpami paicunaca chaicunataca ñana rurashca. Shinapashmi Jehovata tucui shunguhuan sirvishpa catishca. Chaimandami paicunataca shuj llamagucunapurapi cachun Jehová Diosca chasquishca. Jesús Huañushcata Yarina tandanajuipi tandata na micushpapash o vinota na ufiashpapash Jehová Diosta, Jesustapash agradicimandami cai tandanajuimanga rishpa catin.

6. Jesusca ¿imata rurachunda angelcunataca mandan?

⁶ Ninan Manllanai Llaqui Punllacunaca  ñami chayamujun. Chaimandami Apocalipsis capítulo 7​pi ungidocunamanda, na cuentai ushanalla ashtaca gentecunamandapash imata nijujtaca yachajuna capanchi. Chai capitulopica ninanda llaquichij chuscundi huairacunata jarcachun nishpa angelcunata Jesús mandashcatami ricuchin. Cai angelcunaca, Jehová Dios paita tucui shunguhuan sirvishca ungidocunata sellangacamanmi cai alpata ama llaquichichun chai chuscu huairacunata jarcana can (Apoc. 7:1-4). Ungidocunaca Jehová Diosta tucui shunguhuan sirvishcamandami, jahua cielopica reycuna, sacerdotecuna tucushpa Jesushuan mandanga (Apoc. 20:6). Jehová Diospash, Jesuspash, angelcunapash, 144 mil ungidocuna ña cielopi cajpica ninandami cushijunga.

7. a) Apocalipsis 7:9 y 10​pi nishcashnaca apóstol Juanga ¿picunatata ricurca? b) Paicunaca ¿imatata ruranajurca? (Callari paginapi dibujota ricupangui).

⁷ 144 mil reycunata, sacerdotecunata ricushca jipaca, apóstol Juanga “na cuentai ushanalla ashtaca gentecuna” Armagedón punllapi salvarishcatami ricurca. Cai grupo gentecunaca ashtaca ashtacacunami can. Mashnacunapacha cashcataca na yacharinllu (Apocalipsis 7:9, 10, liingui). Paicunaca “yurajta churajushcami” carca. Chaica cai mundopi nali ruraicunahuan na chapurishpa “ima mapapash illaj” cashcata, Jehová Diosta, Jesustapash tucui shunguhuan sirvishcatami ricuchijun (Sant. 1:27). Paicunaca Jehovamanda, Jesusmandami salvari ushashcanchi nishpami caparinajurca. Shinallata ramos yurata chariria rinajushpami, Jesusta Rey shina chasquishcata ricuchinajurca (Juan 12:12, 13​huan chimbapurashpa ricupangui).

8. Apocalipsis 7:11 y 12​pica ¿imatata jahua cielopi causajcunamandaca nin?

⁸ (Apocalipsis 7:11, 12, liingui). Caita ricushpaca jahua cielopi angelcunaca ¿imashinata sintirirca? Apóstol Juanga na cuentai ushanalla ashtaca gentecunata ricushpa, jahua cielopi tucuicuna ninanda cushijushpa Jehová Diosta alabanajujtami ricurca. Pipash na cuentai ushanalla ashtaca gentecuna Ninan Manllanai Llaqui Punllacunamanda salvarijta ricushpaca Jehovapash, cielopi tucui causajcunapashmi ninanda cushijunga.

9. Apocalipsis 7:13​manda 15​caman nishcashnaca, na cuentai ushanalla ashtaca gentecunaca ¿imatata ruranajun?

⁹ (Apocalipsis 7:13-15, liingui). Apóstol Juanga na cuentai ushanalla ashtaca gentecunaca paicunapa “churajunatapash tajshashpami, Llamapaj yahuarpi yurajyachishca” nircami. Caica paicunapa yuyaicunapi limpio cashcata, Jehová Diospa ñaupapi ali ricurishcatami ricuchijun (Is. 1:18). Paicunaca Jehová Dios candallami sirvisha nishpa mañashca jipami bautizarishca. Shinallata Jesús paicunamanda huañushcataca tucui shungumi crin. Jehová Dioshuanbash ali amigocunami can (Juan 3:36; 1 Ped. 3:21). Chaimandami paicunataca Jehová Diosca “tutapash, punllapash” cai alpapi paita sirvichun saquishca. Chaimi paicunaca cushijushpa Jehová Diosmanda villachishpa, gentecuna Jesuspa catijcuna tucuchun ayudanajun. Paicunaca paicunapa munaicunata huashaman saquishpami Diospa Reinotara pundapi churashca (Mat. 6:33; 24:14; 28:19, 20).

10. a) Na cuentai ushanalla ashtaca gentecunaca ¿imatata seguro can? b) ¿Jehová Diospa maijan shimicuna pactarijtata ricunga?

¹⁰ Na cuentai ushanalla ashtaca gentecunaca Ninan Manllanai Llaqui Punllacuna jipapash, Jehová Dios paicunata cuidashpa catinataca seguromi can. Bibliapica pipash na cuentai ushanalla ashtaca gentecunataca “mandangapaj tiarinapi tiajujmi, paipaj ñaupajpi alichishpa charijunga” nijunmi. Paicunaca caipash pactarichunmi shuyanajun: “Taita Diosmi, paicunapaj ñavimandaca, tucuilla viquita fichanga. Huañuipash, huacaipash,  llaquipash, nanaipash, na ashtahuan tiangachu” nishcata (Apoc. 21:3, 4).

11, 12. a) Apocalipsis 7:16 y 17​pi nishcashnaca, na cuentai ushanalla ashtaca gentecunaca ¿ima bendiciongunatata chasquinga? b) Jesús Huañushcata Yarina tandanajuipica ¿imatata shuj llamagucunaca ruraita ushan?

¹¹ (Apocalipsis 7:16, 17, liingui). Cunangunapica huaquin Jehovata sirvijcunaca micuna faltalla causaimanda, culquipash faltalla causaimanda, macanajuicuna, guerracuna tiashcamandami sufrinajun. Cutin shujcunaca paicunapa crishcacunamandami carcelpi can. Shina cashpapash pipash na cuentai ushanalla ashtaca gentecunaca cai nali mundota tucuchijpimi salvaringa. Chaimi micunapash na faltajlla, Jehová Diosmandapash tranquilo yachajui ushanga. Jehová Dios fiñarishpa Diablopa cai nali mundota tucuchijushpaca, na cuentai ushanalla ashtaca gentecunataca tucuimandami Jehová Diosca cuidanga. Ninan Manllanai Llaqui punllacuna jipaca, Jesusca na huañushpa salvarishcacunataca, ‘causaita caraj yacucunamanmi’ pushanga. Na cuentai ushanalla ashtaca gentecunaca shuj alipacha bendiciondami chasquinga. Ashtaca ashtaca millón gentecunamandaca, paicunallami nimahora na huañuita rijsishpa causanga (Juan 11:26).

¹² Shuj llamagucunaca Jehová Diospash, Jesuspash shuj ali causaiguta carasha nishcamandaca ninandami agradicin. Paicunata Jehová Dios jahua cielopi causachun na agllashpapash, paicunataca ungidocunatashnallatami ninanda juyan. Shuj llamagucunapash, ungidocunapashmi Jesusta, Jehová Diostapash alabaita ushan. Chaitaca Jesús Huañushcata Yarina tandanajuiman rishpami ricuchin.

13, 14. Jesús Huañushcata Yarina tandanajuimanga ¿imashpata rina capanchi?

¹³ Jesús Huañushcata Yarina tandanajuipica mil Testigocunamandaca huaquinbica shugumi tandata micun, vinotapash ufian. Shinaca tauca congregaciongunapica nipipash na tandata micunllu, vinotapash na ufianllu. Cai tandanajuiman rijcunamandaca casi la mayoriami cai alpapi causana esperanzata charin. Shinaca ¿imapata Jesús Huañushcata Yarina tandanajuimanga rin? Caipi yuyapaichi. Shuj amigoca paipa amigo cazarajpica paita juyaimanda, paita apoyangapaj munaimandami rin. Shina cuendami shuj llamagucunaca Jesús Huañushcata Yarina tandanajuiman rishpaca Jesusta, ungidocunatapash apoyangapaj munaimanda, juyaimandapash rin. Shina  rurashpami Jesús huañushcamanda agradicishcata ricuchin. Jesusca cai alpapi gentecuna para siempre causaiguta chari ushachunmi huañurca.

¹⁴ Jesús mandashcata pactachingapapashmi shuj llamagucunaca Jesús Huañushcata Yarina tandanajuimanga rin. Jesusca, pai huañushcata imashina yarina cashcata yachachijushpaca paipa apostolcunataca: “Ñucata yarishpa, cashnata rurashpa catinguichilla” nircami (1 Cor. 11:23-26). Cai alpapi quidashca ungidocuna huañungacamanmi, shuj llamagucunaca Jesús Huañushcata Yarina tandanajuimanga rishpa catinga. Shinallata mundo enteromanda ashtaca gentecunatami cai tandanajuimanga invitashpa catinajunga.

15. ¿Imashinata Cristota, Jehová Diostapash alabaita ushapanchi?

¹⁵ Jesús Huañushcata Yarina tandanajuipica Cristota, Jehová Diostapash candashpa, mañashpami alabaita ushapashun. Cai huataca: “Ñucanchita salvangapaj Jesús huañushcamanda agradicishunchi” nishca discursotami uyapashun. Cai discursota uyashpaca Jehová Diostapash, Jesustapash ninandami agradicipashun. Chaipi tandanajushcacunaca tandata, vinota yalichinajushpaca, Jesuspa yahuarta, cuerpota ricuchijujtami yaripashun. Shinallata, ñucanchicuna para siempre causaita ushachun, Jehová Dios paipa Churita ñucanchimanda huañuchun cai alpaman cachamushcatapashmi yaripashun (Mat. 20:28). Tucui Jehová Diosta, Jesustapash juyajcunami Jesús Huañushcata Yarina tandanajuimanga ripashun.

16. Ungidocunaca shuj llamagucunamandaca ¿imapita igual can?

¹⁶ Jehová Diosca ungidocunata, shuj llamagucunatapashmi igual juyan. Tucuicunami paipaca importante capanchi. Chaimandami Jehová Diosca paipa juyashca Churitaca ungidocunamandapash, shuj llamagucunamandapash huañuchun cachamurca. Shuj llamagucunaca cai alpapi para siempre causanatami shuyanajun. Cutin ungidocunaca jahua cielopi causagrinatami shuyanajun. Shinapash tucuicunallatami Jehová Diosta, Jesustapash igual tucui shunguhuan cazuna capanchi (Sal. 31:23). Jehová Diosca paipa tucui sirvijcunamanmi paipa espíritu santota cushpa ayudajun. Paica na ricujunllu ungidocuna cajta o shuj llamagucunamanda cajtapash.

17. Ungidocunaca ¿imatata ninanda shuyanajun?

¹⁷ Ungidocunaca jahua cielopi causana munaihuanga na nacirinllu. Jehová Diosmi chai munaita charichun paicunataca ayudan. Paicunaca jahua cieloman rinapimi siempre pensarinajun. Jehovatapashmi mañanajun. Jehová Dios carasha nishcata chasquinatami cushijushpa shuyanajun. Cieloman rishpa paicunapa  cuerpo imashinapacha canata na yachashpapash Jehová Dioshuan, Jesushuan, angelcunahuan, shuj ungidocunahuanbash tandanajunatami shuyanajun. Shinallata Diospa Reinopi cangapapashmi shuyanajun (Filip. 3:20, 21; 1 Juan 3:2).

18. Shuj llamagucunaca ¿imatata cushijushpa shuyanajun?

¹⁸ Shuj llamagucunaca shuj gentecunashnallatami cai alpapi causana munaita charin (Ecl. 3:11). Paicunaca cai alpaguta shuj paraíso tucuchun ayudangapami cushijushpa shuyanajun. Shinallata paicunapa huasicunata, huertacunata ruranatami shuyanajun. Paicunapa familiacunahuanbash sano imapash ungüicuna illaj causanatami shuyanajun (Is. 65:21-23). Cai alpapi causangapaj munajcunaca mundo enterota viajangapaj, urcucunata, mar yacucunata, bosquecunata, Jehová Diospa tucui rurashcacunata rijsingapami munan. Chai jahuapash Jehová Diosta cada punlla ashtahuan rijsishpa, paihuan alipacha amigocuna tucunata yachashpami ninanda cushijun.

19. a) Jesús Huañushcata Yarina tandanajuipica ¿imatata rurai ushapanchi? b) Cai huataca ¿ima punllata cai tandanajuitaca charipashun?

¹⁹ Jehová Diosca paipa tucui sirvijcunamanmi shuj alipacha causaiguta cusha nishca (Jer. 29:11). Jehová Diosca gentecuna para siempre causaiguta charichunmi Jesustaca cai alpapi huañuchun cachamurca. Chaimanda agradicishcataca Jesús Huañushcata Yarina tandanajuiman rishpami ricuchi ushapanchi. Cada huatami Jesús Huañushcata Yarina tandanajuitaca charipanchi. Cai tandanajuica Jesusta catijcunapaca importantepachami can. Cai huataca, sábado 27 de marzotami indi huashajushca jipa tandanajupashun. Ashtacacunaca tandanajungapaca imapash jarcaicunataca na charingachu. Cutin shujcunaca, jarcaicunata charishpapashmi tandanajunga. Cutin huaquingunaca carcelpi cashpapashmi cai punllataca yaringa. Shinaca tucui huauquipanicuna Jesús Huañushcata Yarina punllapi tandanajujpica Jehová Diospash, Jesuspash, angelcunapash cushijushpami ricunajunga.