1, 2. a) Ñucanchi huañushca familiataca ¿ima horata ashtahuanbachaca yaripanchi? b) Jesús nara huañushpaca ¿imata rurachunda mandarca?

 ÑUCANCHI juyashca familia o amigocuna huañujpica, siempremi paicunataca yaripanchi. Ashtahuanbachaca paicunapa huañushca punlla yachajpimi chai punllataca ashtahuan yaripanchi.

² Cada huatami ashtaca millón gentecuna Jesús huañushcata yaringapaj tandanajupanchi (1 Ped. 1:8). Jesús huañushcata yaringapaj tandanajushpaca, pai ñucanchita juchamanda, huañuimanda salvangapaj shamushcatami yaripanchi (Mat. 20:28). Jesusca paipa catijcuna paipa huañushca punllata yarichunmi munarca. Chaimandami nara huañushpaca paipa catijcunahuan shuj cenata rurashpa, “Ñucata yarishpa, cashnata rurashpa catinguichilla” nirca (Luc. 22:19).

3. Caipica ¿imatata yachajugripanchi?

³ Jesús huañushcata yaringapaca ashtaca millón gentecunami tandanajupanchi. Cai ashtaca millonmandaca ashacunallami cielopi causana esperanzata charin. Shinapash ashtacacunaca cai Alpapi causana esperanzatami charin. Cai yachajuipica cielopi y cai Alpapi causana esperanzata charishpapash, imacunamandalla Jesús huañushcata yarina tandanajuiman rijtami yachajupashun. Shinallata cai tandanajuiman rina imashina tucuicunatallata ayudajtami ricugripanchi. Shinaca cunanga cielopi causana esperanzata charijcuna imamanda Jesús huañushcata yarina punllapi tandanajujtami ricugripanchi.

4. Jesús huañushcata yarina punllapica ¿imamandata ungidocunaca tandata micushpa vinotapash ufian?

⁴ Cada huatami ungido huauquipanicunaca Jesús huañushcata yarina tandanajuipica tandata micushpa vinotapash ufian. Paicunaca  ¿imamandata tandata micushpa vinotapash ufian? Imamanda caita rurajta yachangapaca Jesús cai alpapi cashpa imata rurashcata yaripashunchi. Paica cai alpapi último tutata cashpaca, pascua fiestata rurashca jipami paipa apostolcunahuanga shuj micuiguta rurarca. Chaitaca la Cena del Señor nishpami rijsin. Jesusca paipa 11 apostolcunamanga tandata micuchun, vinota ufiachunmi curca. Chai viajeca Jesusca ishcai pactocunamandapashmi parlarca. Jesusca mushuj pactomanda y pacto del Reino nishcamandami parlarca (Luc. 22:19, 20, 28-30). * Cai ishcai pactocuna tiashcamandami apostolcunapash y shuj huauquipanicunapash jahua cielopi reycuna, sacerdotecuna shina tucushpa Jesushuan mandana oportunidadta chasquigrinajurca (Apoc. 5:10; 14:1). Shinaca cai alpapi puchushca ungidocunaca cai ishcai pactocunapi beneficiarinajuimandami, paicunaca Jesús huañushca punllata yarina punllapica tandata micushpa, vinotapash ufiaita ushan.

5. Ungidocunaca ¿ima esperanzatata charin?

⁵ Ungidocunaca jahua cielopi causana esperanzapi ashtahuan pensaringapapashmi Jesús huañushcata yarina tandanajuimanga rin. Jehová Diosca ungidocunataca, jahua cielopi na huañushpa causana cuerpohuan causachunmi agllashca. Shinallata paicunaca jahua cieloman rishpaca Jesushuan mandana oportunidadta, Jehová Diospa ñaupapi cana bendiciondapashmi charin (1 Cor. 15:51-53; 1 Juan 3:2). Ungidocunaca jahua cielopi causangapaj invitai tucushca cashcataca alimi yachan. Shinallata paicunaca jahua cielopi causana bendicionda chasquingapaca huañungacaman Jehová Diosta na saquishpa sirvina minishtirishca cashcatapashmi yachan (2 Tim. 4:7, 8). Ungidocunaca Jehová Diospa bendiciongunata chasquinata yarishpami cushilla sintirin (Tito 2:13). Cutin cai Alpapi causana esperanzata charijcunaca ¿imashinata sintirin? (Juan 10:16). ¿Imamandata Jesús huañushcata yaringapaca tandanajun? Huaquin yuyaicunata ricupashunchi.

6. Cai Alpapi causana esperanzata charijcunaca ¿imamandata Jesús huañushcata yarina tandanajuimanga rin?

⁶ Cai Alpapi causana esperanzata charij huauquipanicunaca Jesús huañushcata yarina tandanajuipica ungidocunata cumbangapami rin. Shinapash paicunaca tandataca na micunllu, vinotapash na ufianllu. Cai Alpapi causana esperanzata charijcunataca Jesús huañushcata yarina tandanajuipi cachunga huata 1938​pimi primera vez invitarca. Huata 1938 abril quillapa Torre del vigía revistapica, “cai Alpapi causana esperanzata charij huauquipanicunapash, Jesús huañushcata yarina tandanajuipi canaca minishtirishcapachami can” nijurcami. Shinallata “paicunapashmi ñucanchihuan igual cushijushca caita ushan” nijurcami. Imashinami shuj bodamanga invitadocunaca cushijuimanda rin. Shinallatami Jesús huañushcata yarina tandanajuimanga cai huauquipanicunaca cushijuimanda cumban.

7. Cai Alpapi causana esperanzata charijcunaca ¿imamandata Jesús huañushcata yarina tandanajuipi discursotaca ali ali uyan?

⁷ Cai Alpapi causana esperanzata charij huauquipanicunapashmi Jesús huañushcata yarina tandanajuimanga Jehová Diospa bendiciongunapi pensaringapaj rin. Paicunaca chai tandajuipi discursotaca ali alimi uyan. Chai tandanajuipica Jesús, 144​mil ungidocunahuan cai alpata mil huatacunacaman mandana cashcatami yarin. Jesús, 144​mil ungidocunahuan cai alpata mandajpimi cai alpaguca arreglaringa. Gentecunapash asha ashami jucha illajcuna tucunga. Cai Alpapi causana esperanzata charij, ashtaca millón gentecunapaca Isaías 35:5, 6; 65:21-23 y  Apocalipsis 21:3, 4​pi nishca shimicuna pactarijpica ninan cushijuimi canga. Shinaca cai Alpapi paicunapa juyashca familiacuna cutin causarijpi, paicunahuan cutin canapi pensarishpami paicunaca paicunapa fe shinlliyajpi Jehová Diosta tucui shunguhuan sirvishpa catinata dicidin(Mat. 24:13; Gál. 6:9).

8. Cai Alpapi causana esperanzata charijcunaca ¿Jesús huañushcata yarina tandanajuimanga imamandata ashtahuan rin?

⁸ Cai Alpapi causana esperanzata charijcunaca, ungido huauquipanicunata juyaimanda, paicunata apoyangapaj munaimandami Jesús huañushcata yarina tandanajuimanga rin. Bibliapica ungidocunahuan cai Alpapi causana esperanzata charij huauquipanicunahuan ali llevarina cashcatami ña villashpa saquirca. Huaquin profeciacunata ricupashunchi.

9. Zacarías 8:23​pi nishcashnaca, cai Alpapi causana esperanzata charij huauquipanicunaca ¿imashinata ungido huauquipanicunahuanga llevarin?

⁹ (Zacarías 8:23​ta liipangui). Bibliapica shuj chimbapuraita churashpami, shuj llamagucuna o cai Alpapi causana esperanzata charij huauquipanicuna, ungido huauquipanicunahuan imashina llevarinata ricuchijun. Cai textopica shuj ‘Judá llactamanda runagu’ shinallata ‘canguna’ nishpapash cai alpapi puchushca ungidocunamandallatami parlajun (Rom. 2:28, 29). Cutin, ‘shuj llactacunamanda shuj shuj rimaita rimaj chunga runacunaca’ cai alpapi causana esperanzata charij huauquipanicunatami ricuchijun. Paicunaca Judá llactamanda runagupa churajunapimi shinllita charirin. Shinllita charirin nishpaca ungido huauquicunapa yachachishcacunata cazushpa, Jehová Diosta ali adorangapaj tandanajuj cashcatami ricuchijun. Chaimandami Jesús huañushcata yarina tandanajuipica, cai Alpapi causana esperanzata charijcunaca cushijushpa ungido huauquipanicunataca cumban.

10. Ezequiel 37:15-19, 24, 25​pi nishca profeciacuna pactarichunga Jehová Diosca ¿imatata rurashca?

¹⁰ (Ezequiel 37:15-19, 24, 25​ta liipangui). Jehová Diosca ungido huauquipanicunahuan, cai alpapi causana esperanzata charijcunahuan shujllashna tandanajushpa trabajachun tandachishpami pai parlashca shimicunataca pactachishca. Jehová Diosca ishcai caspicunamandami parlarca. Shuj caspica ‘Judá llactapa’ shujca ‘Efraín llactapa’ nishcami can. Judá llactapa caspi nishcaca, jahua cielopi causana esperanzata charij ungido huauquipanicunatami ricuchijun (Judá aillumandami Israel llactata mandachunga reycunata agllan carca). Cutin Efraín llactapa caspica, cai alpapi causana esperanzata charij huauquipanicunatami ricuchijun. * Jehová Diosca cai ishcai caspicunata tandachishpami shujlla caspitashna rurana carca. Caica ungidocunapash, cai alpapi causana esperanzata charijcunapash tandanajushpa Jesusta rey shina mandachun saquinatami ricuchijurca. Chaimandami Jesús huañushcata yarina tandanajuimanga ungidocunapash cai alpapi causana esperanzata charijcunapash shujllashna tandanajushpa Jesús huañushcata yaringapaca tandanajun (Juan 10:16).

11. Mateo 25:31-36, 40​pi nishcashnaca, shuj llamagucunaca ¿imapita ungido huauquicunataca apoyanajun?

¹¹ (Mateo 25:31-36, 40​ta liipangui). Bibliapi “shuj llamagucuna” nishpaca cai tucurimui punllacunapi Jesusta catishpa alita rurashpa causajcunamandami parlajun. Shinallata paicunaca cai alpapi causana esperanzatapashmi charin. Shuj llamagucunaca tucui shungumi Jesusta catij ungidocunataca ayudan. Jesusta catij ungidocunaca tucui gentecunaman villachina responsabilidadtami charin. Chaitami shuj llamagucunapash cushijushpa apoyan (Mat. 24:14; 28:19, 20).

12, 13. Cai Alpapi causana esperanzata charij huauquipanicunaca ¿imacunapita ungido huauquipanicunataca ashtahuan ayudanajun?

¹² Cada huatami Jesús huañushcata yarina punlla nara chayajpillata shuj llamagucuna o cai  Alpapi causana esperanzata charij huauquipanicunaca, ungido huauquicunataca tucui shunguhuan apoyan. ¿Imashinata paicunaca caitaca ruran? Paicunaca Jesús huañushcata yarina punlla nara chayajpillatami ashtaca gentecunapash Jesús huañushcata yarina punllaman shamuchun invitashpa ayudan. ( ¿Jesús huañushcata yarina punllapaca ñachu cunanmandallata segurarinajupanchi? nishca recuadrota ricupangui). Cada huatami mundo enteromanda testigo de Jehovacunaca, cada congregacionbi Jesús huañushcata yaringapaj seguran. Congregacionbi shuj ungido huauquigu o panigu na tiajpipashmi Jesús huañushcata yaringapaca seguran. Ungido huauquicunataca apoyashpami cai alpapi causana esperanzata charij huauquipanicunaca ninanda cushijun. Paicunaca ungido huauquicunata imagupipash apoyashpaca, Jesusta apoyajuj cuendami sintirin (Mat. 25:37-40).

¹³ Shinaca ¿imamandata cai alpapi causana esperanzata charishpapash o jahua cielopi causana esperanzata charishpapash Jesús huañushcata yarina tandanajuimanga tucuicuna ripanchi?

14. Jehová Diospash, Jesuspash ñucanchita ninanda juyashcataca ¿imashinata ricuchishca?

¹⁴ Jehová Diosta, Jesustapash agradicishcata ricuchingapaj. Jehová Diosca ñucanchita juyashcataca shuj shuj cosascunata rurashpami ricuchishca. Ashtahuanbachaca paipa churi Jesusta ñucanchimanda huañuchun cachamushpami ñucanchita juyashcataca ricuchishca (Juan 3:16). Jesuspash ñucanchita juyashcataca ñucanchimanda huañungapaj dispuesto cashpami ricuchishca (Juan 15:13). Jehová Diospash Jesuspash caicunata rurashcamandaca ñucanchicunaca nuncapash na pagaitaca usharingachu. Shinapash ñucanchicunaca paicunata agradicishcatami ricuchita ushapanchi. Chaitaca ñucanchicuna aliguta causashpami ricuchita ushapanchi (Col. 3:15). Shinaca Jesús huañushcata yarina tandanajuiman rishpami Jehová Diosta, Jesustapash ñucanchita juyashcamanda agradicishcata, ñucanchipash paicunata juyashcata ricuchipanchi.

15. Ungidocunapash, shuj llamagucunapash ¿imamandata agradecido sintirin?

¹⁵ Jesús ñucanchita salvangapaj shamushcata ninanda agradicimanda (Mat. 20:28). Ungido huauquipanicunaca Jesús huañushcamandami, Jesuspi crishpaca jahua cielopi causana esperanzata chasqui ushan. Shinallata Jesusmandami Jehová Diospa ñaupapi ali ricurishpa paipa propio churicunashna tucun (Rom. 5:1; 8:15-17, 23). Cutin cai Alpapi causana esperanzata charijcunapash, Jesús huañushcamandami paipi crishpaca Diospa ñaupapi ali ricurishpa, ‘jatun manllanai’ llaqui punllacunamandapash quishpirita ushanga. Chaimandami paicunaca ninanda agradicishca can (Apoc. 7:13-15). Shinaca cai alpapi causana esperanzata charishpa o jahua cielopi causana esperanzata charishpapash, Jesús huañushcata yarina tandanajuiman tucuicuna tandanajushpaca Jesús huañushcamanda ninanda agradicishcatami ricuchinchi.

16. Jesús huañushca punllata yaringapaca ¿imamandata ashtahuan tandanajupanchi?

¹⁶ Jesusta cazungapaj munaimanda. Maipi causana esperanzata charishpapash, tucuicunallatami Jesús nara huañushpa mandashca shimicunataca pactachingapaj munapanchi. Jesusca shuj cenaguta rurashpaca, “ñucata yarishpaca cashnata rurashpa catinguichilla” nircami (1 Cor. 11:23, 24).

17. Jesús huañushca yarina tandanajuiman rinaca ¿imapata ayudan?

¹⁷ Jehová Dioshuan ashtahuan ali amigo tucuchunmi ayudan (Sant. 4:8). Shinaca imashinami ricupashcanchi, Jesús huañushcata yarina tandanajuiman rinaca Jehová Dios ima bendiciongunatalla cunapi pensarichun, shinallata pai ñucanchita ninanda juyashcata yarichunmi  ayudan (Jer. 29:11; 1 Juan 4:8-10). Jehovapa nishcacuna pactarinapi seguro cana, pai ñucanchita juyashpa catinapi seguro canami, paita tucui shunguhuan juyangapaj paihuan ali amigo tucungapapash ayudan (Rom. 8:38, 39).

18. ¿Jesús ñucanchimanda imata rurashcapi pensarinaca, ñucanchitaca imapata ayudan?

¹⁸ Jesuspa ejemplota catichunmi ayudan (1 Ped. 2:21). Jesús huañushcata yarina punlla nara chayajpillatami, cai alpapi cashpa Jesús imacunatalla rurashcata, pai huañushpa cutin causarishcamanda parlaj textocunata Bibliapi liipanchi. Cutin Jesús huañushcata yarina tandanajuipi cashpaca, shuj discursopimi Jesús ñucanchita ninanda juyashcataca cutin yaripanchi (Efes. 5:2; 1 Juan 3:16). Jesús ñucanchimanda ashtaca cosascunata rurashcata yarinami, paishnallata ñucanchipash Taita Dioshuan shujllashna tucushpa Jesushna alicunata rurashpa causachun ayudan (1 Juan 2:6).

19. ¿Jehová Dios ñucanchita juyashpa catichunga imatata rurana canchi?

¹⁹ Jehová Dios ñucanchita ashtahuan juyachunmi ayudan (Jud. 20, 21). Jehová Diosta tucuipi cazungapaj esforzarijpi, paipa shutiguta alipi quidachingapaj esforzarishpa paita cushichijpica, paica ñucanchitaca tucui shunguhuanmi juyashpa catinga (Prov. 27:11; Mat. 6:9; 1 Juan 5:3). Jesús huañushcata yarina tandanajuiman rinami Jehová Diosta siempre sirvishpa catichun, paihuan ali amigo tucuchunbash ayudanga.

20. ¿Imamandata Jesús huañushcata yarina tandanajuimanga ripanchi?

²⁰ Cai Alpapi causana esperanzata charishpa o jahua cielopi causana esperanzata charishpapash, Jesús huañushcata yarina tandanajuiman rinaca importantepacha cashcatami ricupashcanchi. Cada huatami ashtaca millón gentecuna Jesús huañushcata yaringapaj tandanajupanchi. Y cai tandanajuipica ashtahuanbachaca Jehová Dios ñucanchita ninanda juyashcamanda paipa Churiguta ñucanchimanda huañuchun cachamushcatami yaripanchi. Cai 2022 huatapica Jesús huañushcata yarina punllaca viernes 15 de abrilmi canga. Jehová Diosta, Jesustapash tucui shunguhuan juyashcamandami ñucanchipaca cai tandanajuiman rinaca importantepacha can.