1. Davidtaca ¿imata pasajurca?

 DAVIDCA rey Saúl paita huañuchingapaj mascajujta yachashpami paica pacajushpa rirca. Shuj viajeca imagutapash micungapaj na charimandami Davidca, Nob shuti puebloman chayarca. Chaipi cashpaca picha tandagucunatalla carachunmi mañarca (1 Sam. 21:1, 3). Chai jipaca Davidpash, paipa soldadocunapash shuj jatun cuevapi pacajungapami rirca (1 Sam. 22:1). Davidca ¿imamandata shina pacajushpa purijurca?

2. Rey Saulca ¿imatata rurangapaj munajurca? (1 Samuel 23:16, 17).

² Davidca ashtaca macanajuicunata mishashcamandami paica rijsishcapacha tucurca. Chaita ricushpami Saulca Davidtaca ninanda envidiai callarirca. Jehová Diosca rey Saúl paita na cazushcamandami Saulpa randi Israel llactata mandachunga Davidta agllarca. Rey Saulca chaitaca alimi yacharca (1 Samuel 23:16, 17​ta liipangui). Shinapash Saúl Israel llactata mandashpa catijushcamandami paitaca ashtaca ashtaca soldadocuna apoyanajurca. Chaimandami Davidtaca huañuchingapaj munanajurca. David paipa causai peligropi cashcata ricushpaca pacajushpami rirca. Rey Saulca ¿Jehovapa decisionguna ama pactarichun jarcai ushashami yuyajurcachu? (Is. 55:11). Bibliapica caimandaca na imatapash nijunllu. Shinapash Saulca Diospa agllashca decisionda na cazushpaca nalitami rurajurca. Taita Diostaca nunca na imapipash mishai ushashunllu.

3. Davidca llaquicunahuan cashpapash ¿imatata rurarca?

³ Davidca humildemi carca. Israel llactapa rey tucuchunga Jehová Diosmi paitaca agllarca. Na paipa munaica rey tucurcachu (1 Sam. 16:1, 12, 13). Chaimi Saulca Davidta ninanda odiaimanda huañuchingapapacha munarca. David cashna llaquicunahuan cashpaca Jehová Diostaca nunca na culparcachu. Shinallata micungapaj  ashagutalla charishpapash, ama huañuchichun cuevacunapi pacajuna tucujpipash Davidca chaicunamandaca na quejarijurcachu. Chaipa randica cuevapi pacajushpa purijushca horasmi “Jehová Diosta mascajcunapaca ima alipash na faltangachu” nishca shimicunataca escribishca yarin. Chai shimicunatami cai huatapa textopica taripanchi (Sal. 34:10, TNM).

4. a) ¿Maijan tapuicunatata yachajugripanchi? b) Cai tapuicunata yachajunaca ¿imamandata minishtirishcapacha can?

⁴ Cunan punllacunapica ashtaca testigo de Jehovacunami micunagu faltalla o imapash cosasgucuna faltalla causanajun.  * Ashtahuanbachaca cai pandemia ungüi tiashcamandami shina pasashca. Shinapash ‘ninan manllanai llaqui punllacuna’ chayamujushcamandami ñucanchi causaica ashtahuan sinlli tucushpa catinga (Mat. 24:21). Shinaca cai cosascuna pasana cashcata yachaimanda chuscu tapuicunata ricupashunchi. Tapui 1: Davidtaca ‘ima alipash na faltarcachu’ nishpaca ¿imamandata parlajurca? Tapui 2: ¿Imamandata ñucanchi causaipi charishca cosasgucunahuanlla contento causana capanchi? Tapui 3: Jehová Dios cuidanataca ¿imamandata seguro cana capanchi? Tapui 4: Jipa punllacunapi llaquicuna shamujpi aguantashpa catingapaca ¿imatata cunanmandallata rurana capanchi?

5, 6. Rey Davidca Jehovata mascajcunapaca “ima alipash na faltangachu” nircami. Shinaca cai shimicunata ashtahuan intindichunga ¿imashinata Salmo capítulo 23:1-6​pi nishca shimicunaca ayudan?

⁵ Jehová Diosta mascajcunapaca “ima alipash na faltangachu” nishpaca rey Davidca ¿imamandata parlajurca? Davidpa nishca shimicunata ashtahuan intindingapaca Salmo 23​ta liishpami ashtahuan intindi ushapashun (Salmo 23:1-6​ta liipangui). Chaipica rey Davidca, “Mandaj Diosmi ñucata michij”. Ñucataca imapash na faltahuangachu nircami. Cai capitulopica Jehová Dios paita michij cashcamanda rey Davidpa ima cosascuna ashtahuanbacha importante cashcatami ricuchijun. Rey Davidca, Jehová Diosca alitalla rurana ñanbimi pushahuan nircami. Jehová Dios rey Davidta tucuipi cuidajushcatami ricuchirca. Davidca “llullulla jihua pushtucunapimi, ñucataca [Jehová Diosca] samachihuanga”  nircami. Shinapash cai shimicunahuanga imapash llaquicuna illaj, problemacuna illaj causana cashcataca na nijurcachu. Ashtahuangarin, “can ñucahuan cajpimi, huañui japinalla llandu pugru pambata rijushpapash, ima nalitapash na manllasha” nirca.

⁶ Shinaca rey Davidca “ima alipash na faltangachu” nishpaca ¿imamandata parlajushca? Rey David “ima alipash na faltangachu” nishpaca Jehová Dios paita cuidajushcamandami parlajurca. Rey Davidca cosascunata charishcamandallaca na cushilla carcachu. Ashtahuangarin Jehová Dios paita tucuipi cuidajushcamandami cushilla carca. Paipaca Jehová Diospa ñaupapi ali ricurina paipa bendicionda chasquinami ashtahuanbachaca importante carca.

7. Lucas 21:20-24​pi nishcashnaca callari Jesusta catijcunaca ¿imatata yachajuna tucurca?

⁷ Davidpa nishca shimicunaca ashtaca cosascunata charinamanda ama yapata preocuparichunmi ayudan. Ciertomi can, ñucanchi causaipi imapash cosasgucunata o culquita charinaca na jucha canllu. Shinapash cai cosascunatara ñucanchi causaipi ashtahuan importante cashcata ama ricungapami cuidarina capanchi. Chaitallatami callari Jesusta catijcunapash ali intindina tucurca (Lucas 21:20-24​ta liipangui). Jesusca callari Jesusta catijcunataca, “Jerusalendaca, ashtaca soldadocunami chaupipi churanga” nishcarcami. Shinaca Jesuspa nishca shimicuna pactarijpica judiocunaca urcucunaman rishpami paicunaca salvarina carca. Shinapash salvaringapaca paicunapa charishca ashtaca cosascunatami saquina carca. Huaquin huatacuna huashaman llujshishca shuj Atalayapica, “judiocunaca huasicunata, alpacunata, tucui charishca cosascunata saquishpami chai pushtumandaca llujshirca. Jehová paicunata cuidanapi confiashpami Jehová Diosta sirvinatara pundapi churashpa tucui na minishtirishca cosascunataca saquishpa rirca” nijurcami.

8. Callari Jesusta catijcunamandaca ¿imatata yachajui ushapanchi?

⁸ Callari Jesusta catijcunamandaca ¿imatata yachajui ushapanchi? Chai Atalayapica caitapashmi nijurca: “Shamuj punllacunapica ñucanchi charishca cosascuna o culquipash ñucanchipa mashnapacha importante cashcatami ricuchina tucunga. Chaipimi salvaringapaj munashcata o ñucanchipa cosascuna ashtahuan importante cashcata ricuchina tucushun. Chai tiempopica tal vez tucui ñucanchi charishca cosascunata saquinami ricuringa. Shinapash callari Jesusta catijcunashnallatami chai punllacuna chayamujpi, imata dicidingapapash cunanmandallata preparado cana capanchi” nijurcami. *

9. ¿Apóstol Pablo callari Jesusta catijcunaman cushca consejoca ñucanchitaca imapata animan?

⁹ Callari Jesusta catijcunapaca huasicunata, alpacunata o tucui charishca cosascunata saquishpa shuj pushtuman causangapaj rinaca shinllimi cashcanga. Paicunaman Jehová Dios tucui minishtirishca cosasgucunata cunapimi ashtahuan confiana tucushcanga. Shinapash apóstol Pabloca, romano soldadocuna Jerusalenda llaquichingapaj picha huatacuna faltajpillatami callari Jesusta catijcunamanga huaquin consejocunata curca. Paica: “Shinamandami imata cashpapash charijyanata munashcamandalla na rurana canguichi. Cunan imaguta charishpapash, chaihuanlla cushijushpa causanguichi. Diosca cashnami nirca: ‘Candaca na jichushachu, na saquishachu’ nircami. Shinamandami cushijushpa cashna ni ushanchi: ‘Ñucata ayudajca, Jatun Diosmi. Shina cashcamandaca, gentecuna imata ruranatapash, na manllashachu’ ni ushanchimi” nircami (Heb. 13:5, 6). Shinaca romano soldadocuna Jerusalenda atacai callarijpica, callari Jesusta catijcunaca ¿imatata rurarca? Huaquingunaca apóstol Pablopa consejotaca uyarcami. ¿Paicunahuanga imata pasarca? Paicunaca shuj ladocunaman rishpapash seguromi ashtahuan jahualla causai ushashcanga. Paicunaca Jehová Dios paicunata tucuipi cuidanatami confiashcanga. Cunan punllacunapipashmi apóstol Pablopa consejocunaca, ñucanchi Jehová Diospi tucui shunguhuan confiachun ayudaita ushan.

10. Apóstol Pabloca ¿imatata yachachishpa saquirca?

¹⁰ Apóstol Pabloca Timoteotapashmi casi cashnallata consejarca. Chai consejocunaca, cunanbipashmi ñucanchitaca ayudaita ushan. Paica: “Shina cashcamandaca micunaguta, churajunaguta charishpallata, cushijushpa causashunchi” nircami (1 Tim. 6:8). Apóstol Pabloca cai shimicunahuanga ¿imatata ningapaj munarca? Apóstol Pabloca shuj mishqui micunaguta micuna, shuj huasiguta maipash causangapaj charina o minishtirishca ropaguta charina nali cashcataca na nijurcachu. Ashtahuangarin apóstol Pabloca, imaguta charishpapash chai cosascunahuanlla contento causana cashcatami nijurca (Filip. 4:12). Shinaca apóstol Pabloca ashtahuanbachaca Jehová Dioshuan ali amigo cana ashtahuan importante cashcatami ningapaj munajurca (Hab. 3:17, 18).

11. ¿Moisesca israelitacunamanga imatata nirca? ¿Chaimandaca imatata yachajui ushapanchi?

¹¹ Huaquinbica ñucanchicunaca shuj shuj cosascunatami minishtinchi yashpami preocuparinchi. Shinapash Jehová Diospa ñaupajpica na shina caita ushanllu. 40 huatacunata desiertopi cajpi, Moisés israelitacunaman imata nishcata ricupashunchi. Moisesca cangunataca “Mandaj Taita Diosca, canguna imata rurajpipash, ninandami bendiciamurca. Cai jichushca jatun pambapi canguna purinajujtapash paillata yachanmi. Cangunata Mandaj Taita Diosca, cai chuscu chunga huatata cangunahuan cajpimi cangunaca, imapash na illajpi causarcanguichi” nircami (Deut. 2:7). Israelitacuna 40 huatacunata desiertopi cajpica Jehová Diosca maná micunaguta cushpami alimentarca. Shinallata paicunapa ropapash ama tucurichunmi cuidariarca (Deut. 8:3, 4). Huaquin israelitacunaca cashna cosascunapi Jehová Dios  cuidashcamandaca talvezpashmi na agradicishcanga. Shinapash Moisesca israelitacunamanga cangunataca imapash na faltashcachu nishpami yarichirca. Shinaca Jehová Diosca ñucanchicunaca imapash charishca cosasgucunahuanlla contento cajpi, ñucanchita bendiciashcamanda valichishpa agradicijpica, Jehová Diosca ninandami cushijunga.

12. David Jehová Diospi tucui shunguhuan confiashcataca ¿imashinata yachapanchi?

¹² Davidca Jehová Dios paipa sirvijcunamanda preocuparishpa, paipa sirvijcunata cuidajtaca seguromi carca. Salmo 34​ta escribijuj horasca paipa causaica peligropimi carca. Shinapash paica shuj shinlli feta charishcamandami Jehová Diospa ángel paita cuidajushcatashna sintirca (Sal. 34:7). Davidca Jehová Diospa angeltaca shuj soldadohuanmi chimbapurarca. Contracuna paita ama imatapash rurachun shuj soldado paipa ladopi shayarishpa cuidajujtashnami sintirca. Rey Davidca alipacha macanajunata yachajmi carca. Shinallata Jehová Diospash paitaca rey tucuchunmi ayudasha nishca carca. Davidca alipacha macanajunata yachashpapash paipa fuerzahuanlla contracunata mishashallami nishpaca na pensarcachu (1 Sam. 16:13; 24:12). Ashtahuangarin Davidca Jehová Diospash y paipa angelpashmi ñucataca ayudahuanga yashpa pensarca. Cunan punllacunapica Jehová Dios shuj milagrota rurashpa, ama imapash llaquicuna japichun cuidana cashcataca na pensapanchichu. Shinapash Jehová Diosta sirvijcunata, pai nunca na saquishpa ayudana cashcataca seguromi capanchi.

13. a) Ashtaca tandanajushca llactacunaca ¿imamandata ñucanchitaca llaquichishunllami yashpa pensanga? b) Shinapash ñucanchicunaca ¿imamandata na manllapashun? (Callari dibujota ricupangui).

¹³ Ñallami ñucanchicunaca Jehová Diospi tucui shunguhuan crishcata o na crishcata ricuchina punlla chayamunga. Gog de Magog o ashtaca tandanajushca llactacuna ñucanchita llaquichij callarijpica, ñucanchitaca tucuchitapachami tucuchinga yashpami pensaita ushapanchi. Shinapash chai tiempopimi Jehová Dios ñucanchita salvai ushashcapi confiana minishtirishcapacha ricuringa. Cai ashtaca tandanajushca llactacunapa ñaupajpica, ñucanchicunaca imatapash na rurai ushanshnami ricurinajushun (Ezeq. 38:10-12). Cai ashtaca tandanajushca llactacunaca, testigo de Jehovacunaca macanajunatapash na yachan, armacunatapash na charishcamandaca paicunataca fácil tucuchishunllami yashpami pensanga. Paicunaca feta na charishcamandami jahua cielopi ashtaca millón angelcuna ñucanchita difindingapaj listo shayanajujtaca ricuitapash na ushanga. Chaimandami Jesús paipa angelcunandi ñucanchita difindi callarijpica manllarishca quedanga (Apoc. 19:11, 14, 15).

14. Shamuj punllacunapi llaquicunata aguantangapaca ¿imatata cunanmandallata ruraita ushapanchi?

¹⁴ Shamuj punllacunapi llaquicunata aguantangapaca ¿imatata cunanmandallata ruraita ushapanchi? Callaripica ñucanchi charishca cosascunata, culquitapash na yapata juyanachu capanchi. Llaqui punllacuna chayamujpica ima charishca cosascunatapash tucuitami saquina tucunga. Chaimandami imata charishpapash, chai charishca cosasgucunahuanlla contento causana capanchi. Shinallata Jehová Dioshuan ali amigo cashcamandami ashtahuanbachaca contento cana capanchi. Jehová Diosmanda ashtahuan yachajushpami paipi ashtahuan feta charipashun. Shinami ashtaca tandajushca llactacuna ñucanchita llaquichijpica Jehová Dios ñucanchita salvanataca seguro capashun.

15. Davidca ¿imamandata Jehová Dios paita nunca na saquinataca seguro carca?

¹⁵ Davidca llaquicunahuan cashpaca ñaupaman catingapaca ¿imatata rurarca? ¿Paitaca imata ashtahuan ayudarca? Paica, “Mandaj Dios ali cajtaca, ricushpa yachaichiyari. Paitalla yariashpa causaj runaca, ninandami cushijun” nircami (Sal. 34:8). David cai shimicunata nishpaca Jehová Diospi tucui shunguhuan confiashcata, imata minishtishpapash  paipa ayudata mascashcata, shina rurashcamanda Jehová Dios paita nunca na saquishcatami ricuchijurca. David joven cashpaca shuj jatun Goliat shuti runahuanmi macanajungapaj shayarirca. Chaipica, “Cunanga, Mandaj Diosmi candaca ñuca maquipi churanga” nircami (1 Sam. 17:46). Jipamanga Davidca rey Saultami sirvishpa causajurca. Shinapash rey Saúl Davidta envidiaimandami ashtaca viajecunata huañuchingapaj munarca. Shinapimi Jehová Diosca Davidta siempre cuidarca (1 Sam. 18:12). Davidca Jehová Dios pai joven cajpi cuidashcamandami, rucuyajpipash paita cuidashpa catinataca seguro carca. Shinaca Jehová Dios cunan punllacunapi ñucanchita imashina cuidajushcata ricunami, jipa punllacunapipash Jehová Dios ñucanchita cuidashpa catinata seguro cachun ayudanga.

16. Jehová Diospi confiashcataca ¿imashinata ricuchipanchi?

¹⁶ Cunan punllacunapillata ñucanchicuna Jehová Dios ayudachun saquishpaca, jipa punllacunapipashmi Jehová Dios ñucanchita ayudanataca seguro capashun. Por ejemplo trabajopi permisota mañangapaca Jehová Diospi shinlli feta charinami minishtirin. Huaquinbica ñucanchipa trabajomanda jefetami asambleacunaman ringapaj, tucui tandanajuicunaman ringapaj, villachingapaj shuj ali horariota trabajopica mañana ricurishca. Shinapash ñucanchi munashcashna trabajopi permisota na cushpa, más bien trabajomanda despiditara despidijpica ¿Jehová Dios ñucanchita cuidanapi, ñucanchi minishtirishca cosasgucunata cunapica tucui shunguhuanllu cripanchi? (Heb. 13:5). Tiempo completopi sirvinajushca ashtaca huauquipanicunami Jehová Dios paicunata siempre cuidashcata, nunca na saquishcata ricushca. Shinaca Jehová Diosca paita sirvijcunataca nunca na saquingachu.

17. a) Huata 2022​paca ¿maijan textota can? b) ¿Imamandata cai textoca alipacha can?

¹⁷ Jehová Diosca ñucanchitaca siempremi cuidanga. Chaimandami jipa punllacunapi ima llaquicuna ricurinamandapash na yapata preocuparina capanchi. Ñucanchi causaipi Jehová Diostara primero churajpica paica ñucanchitaca nunca na saquingachu. Llaqui punllacuna nara chayamujpillata Jehová Diospi tucui shunguhuan confiangapaj, pai ñucanchita nunca na saquina cashcata yaipi charichunmi Cuerpo Gobernantemanda huauquicunaca huata 2022​paca Salmo 34:10​ta agllashca. Chaipica, “Jehová Diosta mascajcunapaca ima alipash na faltangachu” nijunmi.