1. Santiagoca ¿imashina familiapita viñarca?

 SANTIAGOCA Jesuspa huauqui caimandami Taita Diosmandaca ali yachajushpa viñarca. * Paipa taita, paipa mama Mariapash Jehová Diostaca tucui shunguhuan juyaimandami Jehová Diosta sirvingapaca tucuipi esforzarirca. Jesuspash chai familiapica ñallami Jehová Dios agllashca Mesías tucugrijurca. Chai familiapi viñanaca Santiagopaca shuj jatun bendicionmi carca.

2. Santiagoca ¿imamandata cushijushca caita usharca?

² Jesusca Santiagopaca shuj alipacha huauquimi carca. Chaimandami Santiagoca cashna huauquita charishcamandaca cushijushca caita usharca (Mat. 13:55). Jesusca ña 12 huatacunata charishpallatami Bibliamandaca ña ali ali yacharca. Chaimandami Jerusalenbi tiajuj ancianocunapash Bibliamanda paihuan parlashpaca manllarishca quidarca (Luc. 2:46, 47). Santiagoca talvezpashmi paipa huauqui Jesushuan carpinteriapi trabajashcanga. Shina cashca cashpaca Jesustaca ali alimi rijsishcanga. Huauqui Nathan Knorrca, “shuj personahuan igual trabajashpaca chai personamandaca ashtahuanmi yachajurin” ninmi. * Santiagoca Jesushuan viñashca caimandaca Jesús ali yachaita chari callarishcata, Taita Diospa ñaupapipash, gentecunapa ñaupapipash ali ricuri callarishcataca cuenta japishcangami (Luc. 2:52). Chaimandami callaripica Santiagomi Jesusta catij tucuna cashcanga yashpa pensanchiman. Shinapash na chai pasarcachu.

3. ¿Santiagoca Jesús villachi callarijpica crircachu?

³ Jesús cai Alpapi cashpa villachijujpica Santiagoca Jesuspi nara crimandami paipa discipuloca nara tucushca carca (Juan 7:3-5). Jesustaca  paipa familiacunaca ‘locomi cangui’ nishpami rimarca. Cai rimador puracunamandaca talvez Santiagopashmi cashcanga (Mar. 3:21). Shinallata Jesús shuj racu caspipi huañuna horaspash Santiago cumbajushcaimanga na ricurinllu. Shinallata paipa mama Mariatallapash cumbashpa rishcataca Bibliapica na nijunllu (Juan 19:25-27).

4. ¿Ima ishcai yuyaicunatata yachajugripanchi?

⁴ Tiempohuanmi Santiagoca Jesuspi feta churashpa Jesuspa discípulo tucurca. Shinallata congregacionbipash ninan respetai tucushcami tucurca. Cai yachajuipica Santiagomanda ishcai yuyaicunatami yachajugripanchi. Callaripica, imamanda humilde cana cashcata. Catijpica, imashina ali yachachijcuna cana cashcatami yachajugripanchi.

5. Jesús huañushpa causarishca jipaca Santiagoca ¿imatata rurarca?

⁵ Santiagoca ¿ima horata Jesuspa discípulo tucurca? Santiagoca Jesús huañushpa causarishca jipami Jesuspa catij tucurca. Jesús causarishpaca callaripica Santiagomanmi ricurirca. Jipamanmi paipa apostolcunamanbash ricurirca. Chai punllamandami paipa causaica cambiarca (1 Cor. 15:7). Chaimandami Jesuspa apostolcuna Jerusalenbi shuj cuartopi Diospa espíritu santota chasquingapaj chaipi tandanajushca cajpica Santiagopash chaipi carca (Hech.1:13, 14). Jipamangarin Santiagoca chai tiempopi tiaj Cuerpo Gobernante huauquicunahuan trabajana privilegiotapashmi chasquirca (Hech. 15:6, 13-22; Gál. 2:9). Huata 62 nara callarijpillatami Santiagoca Diospa espíritu santopa ayudahuan chai tiempopi ungido huauquicunaman shuj cartata escribirca. Cai escribishca shimicunaca cunanbipashmi tucuicunatallata ayudan (Sant. 1:1). Punda tiempopi causashca gentecunamanda estudiashca Josefo shuti jarica, “Santiagotaca shuj sumo sacerdote Anán shuti judiomi huañuchichun ordenda cushca” nircami. Santiagoca Jehová Diostaca huañungacamanmi cai alpapica sirvirca.

6. Chai tiempopi judiocunata ñaupaman pushajcunahuan ricujpica Santiagoca ¿imatata rurarca?

⁶ Santiagoca humildemi carca. Jesús ciertopacha Diospa churi cashcata yachaj chayashpaca Santiagopash, judiocunata ñaupaman pushajcunapash imatata rurarca. Santiagoca Jesús ciertopacha Diospa churi cashcata cuenta japishpaca paipi crishpami paita catij callarirca. Shinapash judiocunata ñaupaman pushajcunaca Diospa churi cashcata cuenta japishpapash Jesustaca na catircachu. Jesús Taita Diospa churi caimanda Diospa ayudahuan Lázaro runaguta causachishcataca ricunallami carca. Jesús Lazarota causachishcata ricushpapashmi judiocunata ñaupaman pushajcunaca Jesuspi na crishpa, Jesusta huañuchingapaj munashpa Lazarotapash huañuchingapaj munarca (Juan 11:53; 12:9-11). Shinallata Jesús  huañushpa causarishcata yachaj chayashpapash shuj gentecuna chaita ama yachachunmi munanajurca (Mat. 28:11-15). Judiocunata ñaupaman pushajcunaca jariyashcacuna caimandami Jesús Mesías cashcataca na cringapaj munarca.

7. ¿Imamandata jariyashca u orgulloso canaca nali can?

⁷ ¿Imatata yachajupanchi? Na orgullosocunachu cana capanchi. Más bien Jehová Dios ñucanchita yachachichun saquipashunchi. Corazonba venapi shuj millai ungüi tiarishpaca asha ashami corazondaca huaglichishpa catinman. Shina cuendami jariyashca canapash can. Jariyashca u orgulloso cashpaca asha ashami Jehovapa mandashcacunataca ñana cazungapaj munashun. Fariseocunahuanga chaimi pasarca. Paicunaca orgullosocuna caimandami Jesuspa ashtaca milagrocunata ricushpapash Jesús Diospa churi cashcata, Diospa espíritu santopa ayudahuan milagrocunata rurajushcataca na crirca (Juan 12:37-40). Paicunaca orgullosocuna caimandami cai alpapi para siempre causana oportunidadta chingachirca (Mat. 23:13, 33). Shinaca Biblia, Taita Diospa espíritu santo ñucanchi causaipi ayudachun saquinaca minishtirishcapachami can. Imapash decisiongunata agllagrijushpapashmi Biblia y Taita Diospa espíritu santo ayudachun saquina capanchi (Sant. 3:17). Santiagoca humilde caimandami Jehová Dios paita yachachichun saquirca. Shinallata humilde caimandami shuj alipacha yachachij tucurca.

8. Ali yachachijcuna tucuchunga ¿imata ñucanchitaca ayudaita ushan?

⁸ Santiagoca chai tiempopi shuj judiocunashnaca na alipacha estudiashcachu carca. Chaimandami chai tiempopi judiocunata ñaupaman pushajcunaca Santiagota, Pedrota, Juandapash imatapash na yachajushca yanga runacunatashna ricurca (Hech. 4:13). Shinapash Santiagoca Taita Diosmandaca alipacha yachachijmi tucurca. Chaitaca cai carta de Santiagopimi ashtahuan ricuita ushapanchi. Santiagoshnallatami ñucanchicunapash tal vez na yapa estudiashcacuna capashun. Shina cashpapash Jehová Diospa espiritupa ayudahuan, Jehová Diospa organizacionba ayudahuanga shuj alipacha yachachijcunami caita ushapanchi. Shinaca Santiagomanda imata yachajui ushashcata ricupashunchi.

9. Santiagoca ¿imashina yachachijta carca?

⁹ Santiagoca shujcunamanga jahualla shimicunata utilizashpami yachachirca. Shina facillla yachachishcamandami gentecunaca ali yachajushpa imata rurana cashcatapash intindirca. Santiagoca shujcuna yangamanda llaquichijpi na risintirishpa  quidanatami yachachirca. Paica: “Ricuichi, llaquita apajcunaca, ninanda cushijushcatami yachanchi. Job shuti runaguca, na ñapash fiñarishpa causashcataca uyashcanguichimi. Chai jipaca, paiman Jatun Dios carashcatapashmi yachanguichi. Jatun Diosca ninanda llaquishpa, juyaj cajtami ricuchijun” nircami (Sant. 5:11). Shinaca ricupaichi, Santiagoca gentecunaman yachachingapaca Diospa shimitami utilizarca. Paica Jobshnallata Diosta na saquishpa sirvishcacunamanga Taita Dios ninanda bendiciana cashcatami ricuchirca. Shinallata caitaca jahualla shimicunata utilizashpami yachachirca. Chaimandami shuj gentecunapash Jehová Diosta alabachun ayudarca.

10. Bibliamanda yachachijushpaca ¿imashinata Santiagopa ejemplota catita ushapanchi?

¹⁰ ¿Imatata yachajupanchi? Imata yachachishpapash jahualla shimicunata utilizashpa Bibliahuan yachachipashunchi. Pitapash Bibliamanda yachachijushpaca ñucanchicuna mashnata yachashcata ricuchingapaca na yachachinachu capanchi. Ashtahuangarin Jehová Dios shuj alipacha yachaj Dios cashcata ricuchingapaj, ñucanchimanda pai ninanda preocuparishcata ricuchingapami yachachina capanchi (Rom. 11:33). Shinaca caita siempre rurai ushangapaca imata yachachishpapash Bibliatami utilizana capanchi. Por ejemplo ñucaca chashnami ruraiman o chaitami ruraiman ninapa randica, Bibliapi Diosta sirvijcunapa causaimandami ricuchina capanchi. Chaicunata ricushpami paicunallata Jehová Dios imata pensajta, imashina sintirijta aliguta intindishpa, Jehová Diospa ñaupapi ali ricuringapaj munashpa, Bibliapi yachajushcacunataca cushijushpa pactachingapaj munanga.

11. a) Santiagopa tiempopica huaquin huauquipanicunaca ¿imashinata comportarinajurca? b) Chaimanda Santiagoca ¿ima consejotata curca? (Sant. 5:13-15).

¹¹ Santiagoca huauquipanicuna imata minishtinajujta ali ricushpami consejarca. Santiagopa cartapica huauquipanicuna imashina comportarinajujta ricushpa Santiago consejashcatami ricuchijun. Huaquin huauquipanicunaca ima consejota cujpipash paicunapa causaipica na ucha pactachinajurcachu (Sant. 1:22). Cutin shujcunaca charijlla huauquipanicunatallami ali tratanajurca (Sant. 2:1-3). Shinallata shujcunaca yangatami imatapash shujcunamanda huashalla rimanajurca (Sant. 3:8-10). Chai tiempopi huauquipanicuna cashna comportarinajujta ricushpapash, Santiagoca caicunaca nunca na cambiangachu nishpaca na pensarcachu. Ashtahuangarin juyaihuan consejashpami, espiritualmente nali cashpaca huauqui ancianocunapa ayudata mascachun animarca (Santiago 5:13-15​ta liipangui).

12. Bibliapa consejocunata pactachichun shuj estudianteta ayudajushpaca ¿imatata na pensana capanchi?

¹² ¿Imatata yachajupanchi? Ñucanchipash Santiagoshnallatami shujcunataca ricuna capanchi. Paica nunca na cambiangachu nishpaca na pensanachu capanchi. Ashtaca Bibliamanda yachajujcunapami Bibliapi yachajushcacunata paicunapa causaipi pactachinaca na facil cashca (Sant. 4:1-4). Talvez tiempohuanmi Bibliapi yachajushcacunataca asha ashami pactachi callaringa. Shinapash imapi mejorana cashcata ricushpaca Santiagoshnallatami na manllashpa imapi mejorana cashcataca clarito nina capanchi. Shinapash yangami consejajuni, na pactachigrinllu yari nishpaca na pensanachu capanchi. Ashtahuangarin Jehová Dios, Bibliapi yachajushcacunata paicuna pactachi ushachun ayudana cashcapimi confiana capanchi (Sant. 4:10).

13. Santiagoca ¿imatata ali yacharca? (Sant. 3:2).

¹³ Santiagoca shujcunamanda yali ashtahuan importantemi cani yashpaca na pensarcachu. Santiagoca Jesuspa lahuauqui cashpapash congregacionbi shuj shuj responsabilidadcunata charishpapash shujcunamanda yali importantemi cani yashpaca na pensarcachu. Ashtahuangarin paica congregacionmanda huauquipanicunataca ‘ñuca juyashca huauquicunami’ can nircami (Sant. 1:16, 19; 2:5). Shinallata paica imapipash na pandarishpa tucuita perfecto ruraj cashcatapash na ricuchircachu. Ashtahuangarin paica tucuicunallatami “imatapash pandata nishpa llaquichinchilla” nishpa parlarca (Santiago 3:2​ta liipangui).

14. ¿Imamandata ñucanchicunapash pandarijlla cashcataca ricuchina capanchi?

 ¹⁴ ¿Imatata yachajupanchi? Tucuicunallata juchayucuna cashcata yaripashunchi. Ñucanchicunaca, Bibliata yachajujcunamandaca yalimi cani nishpaca na pensanachu capanchi. Ñucanchicuna shina pensashpaca Bibliamanda yachajujcunapa ñaupajpica imapipash na pandarijcunashnami ricuriringa. Bibliamanda yachajujcuna ñucanchicunata imapipash na pandarijcunatashna ricushpaca, ñucaca imahorashi paicunashna imapipash na pandarishpa Bibliamandaca pactachita ushasha yashpami pensanga. Shinapash ñucanchicuna humildadta ricuchispa, ñucanchipapash Bibliamanda yachajushcacunata ñucanchi causaipi pactachina shinlli cajpi, Jehová Dios ayudashcata villajpica, paicunapashmi Jehová Diospa ayudahuanmi sirvi ushasha nishpa pensanga.

15. Santiagoca ¿ima ejemplocunata churashpata yachachirca? (Sant. 3: 2-6, 10-12).

¹⁵ Santiagoca ali ejemplocunata churashpami yachachirca. Chaimandami paipa yachachishcacunaca gentecunapa shunguman yacharca. Shinapash Santiago aliguta yachachi ushachunga Jehová Diospa espíritu santomi ayudarca. Ashtahuanbash Jesús gentecunaman imashina yachachishcata yachajunami Santiagotaca ashtahuan ayudashcanga. Santiagopa escribishca cartapica, rijsishca intindirinalla ejemplocunahuan churashpa yachachishcatami ricuchin. Shinallata imata rurana cashcatapash clarito intindichishcatami ricuchin. (Santiago 3:2-6, 10-12​ta liipangui).

16. ¿Imamandata fácil, intindirinalla ejemplocunahuan yachachina capanchi?

¹⁶ ¿Imatata yachajupanchi? Ali ejemplocunata utilizashpa yachachipashunchi. Ali ejemplocunata utilizashpa yachachinaca Bibliamanda yachajujcuna imata yachajushcatapash aliguta pensarichunmi ayudaita ushan. Shinami imata yachajushpapash na cungashpa yaipi charinga. Jesusca gentecunaman yachachinamandaca shuj alipacha ejemplomi carca. Paica gentecunamanga intindirinalla ejemplocunata churashpami yachachirca. Santiagopash Jesuspa chaquita catishpami Jesushnallata yachachi callarirca. Jesuspa ejemplota catishpa Santiago imashina yachachishcamanda shuj yuyaita ricupashunchi. Imamanda cashna yachachina ali cashcatapash yachajupashunchi.

17. Santiago 1:22-25​pi parlashca ejemploca ¿imamandata ali can?

¹⁷ (Santiago 1:22-25​ta liipangui). Santiago parlashca ejemploca alipachami can. Imamanda ali cashcata huaquin yuyaicunapi ricupashunchi. Santiagoca imata yachachingapa munashcataca ali alimi intindichirca. Biblia ñucanchita ayudachun  munashpaca liitallaca na liinachu capanchi. Ashtahuangarin imata liishpapash ñucanchi causaipi pactachingapami esforzarina capanchi. Santiagoca aliguta intindichishpa yachachingapaca gentecuna rijsishca ejemplocunamandami parlan carca. Chaimi paica shuj espejopi ñavita ricurij shuj runamanda parlarca. Cai ejemplohuanga ¿imatata yachachingapaj munarca? Por ejemplo shuj persona paipa ñavita shuj espejopi ricurishpaca imapash cambiana cashcatami cuenta japin. Shinapash espejopi ricurishpata imapipash na cambiashpaca alitachu ruranman. Na. Shina cuendallatami ñucanchicunapash Bibliaguta liishpaca ñucanchi causaipi imapash cambiocunata rurana cashcata cuenta japita ushapanchi. Shinapash imatapash na rurashpaca nalichu canman. Shuj espejopi ricurishpapash nimata na arreglarishpa rijuj cuendallatami canman.

18. Ejemplocunata utilizashpa yachachijushpaca ¿ima quimsa yuyaicunatata yaipi charina capanchi?

¹⁸ Ejemplocunata utilizajushpaca Santiagopa ejemplotami catita ushapanchi. Chaipaca quimsa yuyaicunata ricupashunchi. Callari yuyai, ima ejemplomanda parlashpapash chai yachajujushca temata ashtahuan intindichunmi ejemplocunatapash churana capanchi. Cati yuyai, gentecuna rijsishca ejemplocunata churashpa yachachipashunchi. Quimsapica, maijan temamanda yachachijushpapash chai temapa yuyaicunata clarito intindichunmi ayudana capanchi. Shinapash facillla, intindirinalla ejemplocunamanda parlana ashata difícil ricurijpica, cai Índice de las publicaciones Watch Tower nishcaman yaicushpami, “Ejemplos” nishca pushtupi ricuita ushapangui. Ali ejemplocunata utilizashpa yachachinaca shuj microfonota utilizajuj cuendami can. Microfonohuan imagutapash parlajpica claritomi uyarin. Shina cuendami ali ejemplocunata utilizanapash can. Ali ejemplocunata utilizashpa yachachijpimi importante yuyaicunata yari ushanga. Shinapash gentecunaman yachachijushpaca ñucanchicuna alipacha yachachijcuna cashcata ricuchingapaca na munapanchichu. Ashtahuangarin ashtaca gentecuna Bibliamanda yachajushpa Jehová Diospa organizacionman quimirichunmi munapanchi.

19. Ñucanchi huauquipanigucunata juyashcataca ¿imashinata ricuchi ushapanchi?

¹⁹ Ciertomi can ñucanchicunaca na Santiagoshnachu Jesushuan igual viñana privilegiotaca charipashcanchi. Shinapash mundo enteromanda huauquipanicunahuan shuj familiashna Jehová Diosta sirvina bendiciondami charipanchi. Ñucanchi huauquipanicunata juyashcataca paicunahuan tiempoguta yalishpami ricuchipanchi. Paicunata rijsingapaj, paicunahuan villachingapami tiempoguta llujchina capanchi. Santiagopa ejemplota catijushcataca paishnallata comportarishpa, paishnallata shujcunaman yachachishpami ricuchita ushapanchi. Shina rurashpaca Jehová Diostami alabashun. Shinallata ali shunguta charij gentecunapash Jehová Diosman quimirichunmi ayudashun.