1. ¿Imatata tucuicunallata rurapanchi?

 TUCUICUNALLATAMI cada punlla imatapash decidina capanchi. Por ejemplo, imata micunata, ima horas puñungapaj rinataca facilmi decidita ushapanchi. Shinapash ñucanchi saludmanda, ñucanchi familiamanda o Jehová Diosta adoranamanda shuj decisionda japinaca dificilmi caita ushan. Ali decisiongunata japishpaca ñucanchi familiapash, ñucanchillatapash cushillami capashun. Pero ashtahuanbachaca ñucanchi agllashca decisiongunahuanmi Jehová Diosta cushichingapaj munapanchi (Rom. 12:​1, 2).

2. Ali decisiongunata agllachunga ¿imata ayudanga?

² Cai temapica ali decisiongunata agllangapaca quimsa yuyaicunatami yachajupashun: 1) imatapash nara decidishpallata aliguta informarina 2) ñucanchi decisiongunamanda Jehová Dios imata pensajta intindina 3) aliguta pensarishpa decidinatapashmi yachajupashun. Shinallata aliguta pensarishpa ali decisiongunata japita ushangapaj imata ashtahuan rurai ushashcatapashmi yachajupashun (Prov. 2:11).

ALIGUTA INFORMARIPAI

3. Shuj ali decisionda japingapaca ¿imatata rurana capanchi? Shuj ejemplomanda parlapai.

³ Ali decisiongunata japingapaca aligutami informarina capanchi. Por ejemplo caipi pensaripashunchi, shuj personaca  shuj grave unguita charimandami doctorpamanga rin. Shuj ali doctorca pundapica chai persona imashna cashcatami ricunga. Chai jipami ima tratamientota ruranata decidinga. Shinallatami ñucanchicunapash shuj decisionda nara japishpallata aliguta informarina capanchi.

4. Proverbios 18:13​pi nishcashnaca ali decidingapaca ¿imatata rurana capanchi? (Fotocunata ricupangui).

⁴ Imagutapash aliguta decidingapaca, aligutami pensarina capanchi. Por ejemplo, shuj fiestaman invitajpica shuj ali decisionda japingapaca cai tapuicunapi pensarinami ayudanga. “¿Maipi, ima horasta ruranga? ¿Chai fiestamanga mashna personacuna y picunallata ringa? ¿Chai fiestataca pita ricuriajunga? ¿Chai fiestapica imacunatallata ruranga?” Cai tapuicunapi pensarinami ali decisionda japichun ayudanga (Proverbios 18:13​ta liipangui).

5. Quiquinda invitashca fiesta imashina cashcata yachashpaca ¿imatata rurapanguiman?

⁵ Quiquinda invitashca fiesta imashina cashcata yachashpaca chai fiestaman rinata o na rinatami decidina capangui. Por ejemplo, chai fiestaman Jehová Diosta na cazuj gentecuna rinata yachashpa, trago tianata yachashpa, imapash nali cosascuna o pinganayai cosascuna pasanata yachashpaca chai fiestamanga na ripanguimanllu (1 Ped. 4:3). Talvez chai fiestaman rimandami tandanajuiman rita o predicacionman llujshitaca na  ushapanguiman. Shuj ali decisionda japingapaca aligutami pensarina capangui. Pero chai decisiongunamanda Jehová Dios imata pensajtapashmi aliguta yachana capangui (Prov. 2:6).

JEHOVÁ DIOS QUIQUINBA DECISIONGUNAMANDA IMATA PENSAJTAMI YAIPI CHARIPAI

6. Santiago 1:5​pi nishcashnaca ¿imamandata Jehová Diospa ayudataca mañana capanchi?

⁶ Ñucanchi decisiongunamanda Jehová Dios imata yuyajta intindingapaca paipa ayudata mañapashunchi. Jehová Diosca ali yachaitaca ‘na culirashpa, tucui shunguhuanmi caranata yachan’ (Santiago 1:5​ta liipangui). Jehová Diospa ali yachaimi ñucanchi decisionguna Jehovapa ñaupapi ali o nali cashcata cuenta japichun ayudanga.

7. Jehová Dios imata pensajta yachangapaca ¿imatata rurana capanchi? Shuj ejemplomanda parlapai.

⁷ Jehová Diosta mañashca jipaca, pai imashina ayudajta ricungapami pendiente cana capanchi. Por ejemplo, na rijsishca llactapi chingashpaca shuj personapa ayudatami mascapanchiman. Y chai persona ayudangapaj munajpica, paitaca ali alimi uyapanchiman. Shina cuendallatami Jehová Diosta ali yuyaita carahuai nishpa mañashpaca paipa ayudata taringacaman Bibliapi consejocunata mascana capanchi. Párrafo 4 y 5​pi parlashca  ejemplopi cutin pensaripashunchi. Fiestaman nara rishpallatami nali fiestacunamanda y nali cumbacunamanda Bibliapi imata nijta ricuna capanchi. Shinallata Diospa Gobiernotarachu pundapi churagrini o ñucapa munaitarachu pundapi churagrini nishpami pensarina capanchi (Mat. 6:33; Rom. 13:13; 1 Cor. 15:33).

8. Ali informacionda mascangapaca ¿imatata rurana capanchi? (Fotota ricupangui).

⁸ Shuj ali decisionda japingapaca experienciata charij huauquipanicunapa ayudatami minishtipanchi. Shinapash ñucanchillatami informaciongunata mascangapaj esforzarina capanchi. Ali informaciongunata mascangapaca, Bibliamanda ashtahuan ali intindingapaj informacionguna y Cristianocunapa causaipi ayudaj Bibliapa textocuna nishca publicaciongunatami charipanchi. Ñucanchi decisiongunahuanmi Jehová Diostaca siempre cushichingapaj munapanchi.

9. Ñucanchi decisionguna ali cashcata seguro cangapaca ¿imatata rurana capanchi? (Efesios 5:17).

⁹ Ñucanchi decisionguna ali cashcata seguro cangapaca pundapica Jehová Diostami ali rijsina capanchi. Proverbios 9:10​pica “ima juchapash illaj Diosta rijsinaca” ali yuyaitami cun ninmi. Ali yuyaita charingapaca Jehová Diospa cualidadcunatami rijsina capanchi. Shinallata paipa munai maijan cashcata, paipa ñaupapi ima ali o nali cashcatami yachana capanchi. Jehová Diosta ali rijsishpami pai gustashca decisiongunata japita ushapashun (Efesios 5:17​ta liipangui).

10. Familiata, comunidadpa costumbrecunata respetashpapash, ñucanchipaca ¿imata ashtahuan importante can?

¹⁰ Ñucanchi familiacunata o amigocunata cushichingapaj munashpapash ñucanchi decisiongunahuanga Jehová Diostami ashtahuan cushichingapaj munapanchi. Por ejemplo, shuj taitamamacunaca paipa ushi cushilla causachun munaimandallami, shuj cristiano espiritualmente nali cajpipash, ashtaca culquita charishcamandalla paihuan paipa ushi cazarachun munan. Taitamama paipa ushi minishtirishca cosasgucunata charichun munashpapash, cai yuyaicunapimi pensarina can. Por ejemplo, Jehová Diosca cai situacionmandaca ¿imatashi yuyan? ¿Espiritualmente shinlli cachunga paica ayudangacha? Mateo 6:33​pica tucui cristianocunamanmi “Diospa Gobiernotara pundapi churachun” animan. Ñucanchi taitamamacunata o ñucanchi comunidadpa costumbrecunata respetashpapash, ñucanchi decisiongunahuanga Jehová Diostami cushichingapaj munapanchi.

ALIGUTA PENSARISHPA DECIDIPAI

11. Filipenses 1:​9, 10​pi nishcashnaca shuj ali decisionda japichunga ¿imata ayudanga?

¹¹ Bibliapa consejocunata aliguta intindishca jipaca, ima decisión ali cashcata o nali cashcata cuenta japingapaca aligutami pensarina capanchi (Filipenses 1:​9, 10​ta liipangui). Huaquinbica shuj decisionda japinaca facilmi caita ushan. Pero huaquinbica imata ruranata na yachaimandami shuj decisionda japinaca difícil caita ushan. Shinaca difícil situacionbi cashpapash aliguta pensarinami ali decidichun ayudanga.

12, 13. Aliguta pensarinaca ¿imashinata shuj ali trabajota agllachunga ayudanga?

¹² Por ejemplo, shuj trabajota mascajupashcanguiman. Shinapimi ishcai trabajota taripashcanguiman. Chai trabajocuna imashina cashcata, maipi, ima horas cashcata yachashpaca ishcandi trabajollata ali cashcatami cuenta japipanguiman. Shinapash ñucanchi gustashca trabajo cashcamandalla o ashtacata pagagrijushcamandallaca na ñapash chai  trabajocunataca aceptanallachu capanchi. Ashtahuangarin shuj ali decisionda japingapaca shuj cosascunatapashmi yaipi charina capanchi.

¹³ Por ejemplo, ¿maijanda trabajota agllashpapash tandanajuicunaman ringapaj tiempota charishacha? ¿Familiahuan tiempota yalinata y espiritual cosascunata rurangapaca tiempota charishacha? nishpami pensarina capanchi. Cashna tapuicunapi pensarinami Jehová Diosta y familiata pundapi churachun ayudanga. Jehová Dios munashcashna shuj ali decisionda japijpica Jehová Diosllatami bendicianga.

14. Aliguta pensarinaca ¿imashinata shujcunapipash pensarichun ayudan?

¹⁴ Aliguta pensarinaca ñucanchi decisionguna imashina shujcunata afectaita ushashcapi pensarichunmi ayudanga. Shinami ‘shujcunatapash na pandachishun’ (Filip. 1:10).  Ñucanchi vistirinamanda, imashina arreglarinamandapash shujcunapi pensarishpami arreglarina capanchi. Por ejemplo, ñucanchi gustashca ropata churajunaca shujcunapa ñaupapica nalimi ricurita ushanman. Aliguta pensarinaca shujcuna imashina sintirishcata respetachunmi ayudanga. Juyaita charishpaca “shujcunapa” beneficiotapashmi mascapashun (1 Cor. 10:​23, 24, 32; 1 Tim. 2:​9, 10). Ñucanchi decisiongunahuanmi shujcunata juyashcata y respetashcataca ricuchipashun.

15. Shuj importante decisionda japigrijushpaca ¿imatata rurana can?

¹⁵ Shuj importante decisionda japigrijushpaca imatalla ruranatami ali ali ricuna capangui. Jesusca imatapash nara decidishpallata ali ali ricuna canguichi nishpami yachachirca (Luc. 14:28). Shuj decisionda japishca cashpaca chai decidishcata pactachingapaca mashna tiempo, esfuerzo minishtirishcapimi aliguta pensarina capangui. Huaquinbica familiahuan parlanapashmi chai agllashca decisionda apoyachun minishtiringa. Shina rurashpaca quiquinba decisionbi imapash cambiocunata ruraita ushachunmi ayudanga. Familiapa ayudata mañajpi y paicuna imata nijta uyajpica, familiaca chai decisionda apoyangapami dispuesto canga (Prov. 15:22).

SHUJ ALI DECISIONDA AGLLAPAI

16. Shuj ali decisionda japita ushangapaca ¿imacunatallata yaipi charita ushapangui? (“ ¿Imashinata shuj ali decisiondaca japita ushapangui?” nishca recuadrota ricupangui).

¹⁶ Cai temapi yachajushca yuyaicunata pactachishpaca, ali decisiongunatami japipangui. Aliguta informarishpa y Bibliapa consejocunata ricushpami Jehová Diosta cushichij decisiongunata japita ushapangui. Shuj decisionda japishca cashpaca, chai decisionda aliguta pactachita ushangapami Jehová Diospa ayudatami mañaita ushapangui.

17. Shuj ali decisionda japingapaca ¿imapita confiana capanchi?

¹⁷ Talvez quiquinba causaipica ali decisiongunatami japipariangui. Shinaca shuj ali decisionda japingapaca na ñucanchi experienciapica confianachu capanchi. Ashtahuangarin Jehová Diospa ali yachaipimi confiana capanchi. Jehová Dios ali yuyaita cujpimi, ali decisiongunata japita ushapashun (Prov. 2:​1-5). Shinami ñucanchi decisiongunahuan Jehová Diosta cushichipashun (Sal. 23:​2, 3).