1. Jehová Diosca matrimoniotaca ¿imamandata carashca?

 JEHOVÁ DIOS “cushilla Taita Dios” caimandami ñucanchicunapash cushilla causachunga ashtaca bendiciongunata carashca (1 Tim. 1:11; Sant. 1:17). Por ejemplo, Jehová Diosca matrimoniotaca shuj regalotashnami carashca. Shuj jari y shuj huarmi cazarashpaca juyarishpa, respetarishpa, cuidarishpa causangapami shuj promesata ruran. Chai promesata pactachishpami juyarishpa cushilla causan (Prov. 5:18).

2. Ashtaca matrimoniocunaca ¿imashinata causan?

² Ashtaca matrimoniocunaca paicunapa cazarashca punllapi rurashca promesata na pactachimandami llaquilla causan. Organización Mundial de la Saludmanda shuj informepica, cusacunaca paicunapa huarmigucunataca nali shimicunata nishpa, macashpa, maltratashpa charijtami nin. Huaquin cusacunaca huarmigucunata gentecunapa ñaupapi ali tratashpapash sololla cashpami paicunataca maltratan. Shinallata ashtaca matrimoniocunapica cusacuna pornografiata ricunata yachaimandami matrimoniopica na cushilla causaita ushan.

3. ¿Imamandata cusacunaca paicunapa huarmigucunataca maltratan?

³ Huaquin cusacunaca ¿imamandata paipa huarmigucunata maltratan? Huaquingunaca paipa taita paipa mamata maltratashpa causajta ricushpami viñashca. Chaimanda huarmita maltratana normal cashcata yuyan. Huaquin culturacunapica huarmigucunata maltratashpami “jari cashcataca” ricuchinchi nishpa yuyan. Cutin huaquingunaca ñapash culirashpa na controlarimandami huarmigucunataca maltratan. Shinallata huaquin jaricunaca pornografiata ricuna costumbreta charimandami  huarmigucunataca imapapash na valijtashna ricushpa nali tratan. COVID-19 ungui tiashca tiempopimi cusacunaca paicunapa huarmigucunataca ashtahuan maltratashpa charishca. Shinapash imashna viñashca cashpapash, ima costumbreta charishca cashpapash jaricunaca huarmigucunataca na maltratanachu can.

4. Cusacunaca ¿imamandata cai mundopa yuyaicunata na catina can?

⁴ Ashtaca gentecunaca huarmigucunamandaca panda yuyaicunatami charin. a Chaimi chai nali yuyaicunamandami cristianocunaca cuidarina can. Roma llactapa congregacionhuan ima pasashcata ricupashunchi. Chai congregacionmanda cristianocunamanga apóstol Pabloca: “Cai mundopi gentecunashnaca ñana causanachu canguichi” nircami (Rom. 12:​1, 2). Cai shimicunata nishpaca huaquin huauquipanicuna cai mundopa nali costumbrecunata, nali yuyaicunata na saquishcatami intindichirca. Chaimandami apóstol Pabloca nali pensamientocunata y nali ruraicunata saquina cashcata nirca. Cai consejocunataca cunan tiempopi cusacunapashmi pactachina can. Huaquin cristianocunaca cai mundopa nali yuyaicunata y costumbrecunata catimandami paicunapa huarmigucunataca maltratai callarishca. b Jehová Diosca cusacuna huarmigucunata ¿imashina tratachunda munan? Caita yachangapaca 1 Pedro 3:7pa consejotami yachajugripanchi.

5. 1 Pedro 3:7​pi nishcashnaca ¿imashinata cusaca paipa huarmigutaca tratana can?

⁵ (1 Pedro 3:7​ta liipangui). Bibliapi nishcashnaca cusacunaca huarmigucunataca respetohuanmi tratana can. Cusacunaca paicunapa huarmigucunata juyaihuan aliguta tratashpami respetashcataca ricuchin. Cai temapica, cusacuna huarmigucunata respetota ricuchingapaj imacunatalla rurana cashcatami yachajupashun. Shinallata cusacuna huarmigucunata imashina na tratana cashcatapashmi yachajupashun.

HUARMIGUTA RESPETASHCATA RICUCHINGAPACA ¿IMACUNATALLATA NA RURANA CAN?

6. Jehová Diosca huarmigucunata macashpalla charij cusacunataca ¿imashinata ricun? (Colosenses 3:19).

⁶ Na macanachu can. Jehová Diosca nalita ruraj gentecunataca na ricunayachinllu (Sal. 11:5). Shinaca Jehová Diosca huarmigucunata macashpa maltratashpa charij cusacunataca na ricunayachinllu (Mal. 2:16; Colosenses 3:19​ta liipangui). 1 Pedro 3:7​pi yachachishcashnaca cusa paipa huarmita nali tratashpa causajpica Jehová Diospa ñaupapica nalimi ricurin. Shinallata Jehová Diosca paipa mañaitapash na uyanllu.

7. Efesios 4:​31, 32​pi nishcashnaca ¿imamandata cusaca paipa huarmigutaca nali shimicunahuanga na rimana can? (“Minishtirishca Yuyai” nishcatapash ricupangui).

⁷ Nali shimicunahuanga na rimanachu can. Huaquin cusacunaca paipa huarmigutaca nali shimicunahuan groserota rimashpami llaquichin. Bibliapi nishcashnaca Jehová Diosca culirajcunata, caparishpa rimajcunata y groserota rimajcunatapash c nimamanda na ricunayachinllu ninmi (Efesios 4: 31, 32​ta liipangui). Shinallata Jehová Diosca cusacuna huarmigucunata gentecunapa ñaupapi y sololla cashpa imashna tratajtaca alimi yachan. Cusa paipa huarmiguta nali tratajpica paipa matrimoniota na valichishcatami ricuchin. Shinallata  Jehová Dioshuan ali amigo canatapash na valichishcatami ricuchin (Sant. 1:26).

8. Jehová Diosca pornografiata ricujcunataca ¿imashinata ricun?

⁸ Pornografiataca na ricunachu can. Jehová Diosca pornografiata ricujcunataca nimamanda na ricunayachinllu. Pornografiata ricuj cusacunaca paipa huarmiguta na respetashcata y Jehová Dioshuan ali amigo canatapash na valichishcatami ricuchin. d Jehová Diosca cusacunataca paicunapa ruraicunahuan y pensamientocunahuan paipa huarmiguta respetashcata ricuchichunmi munan. Chaimandami Jesusca “pipash shuj huarmita munashpa ricujushpaca, ñami paipa shungupica chai huarmihuan pecadopi urmashca” nircami (Mat. 5:​28, 29). e

9. Relaciones sexualesta charishpa, mapa millanai ruraicunata rurachun obligajpica huarmigucunaca ¿imashinata sintirin?

⁹ Relaciones sexualesta charishpaca mapa, millanai ruraicunata rurachunga na obliganachu can. Huaquin cusacunaca pornografiata ricunata yachaimandami paicunapa huarmigucunataca relaciones sexualesta charijushpaca mapa, millanai ruraicunata rurachun obligan. Chaimi huarmigucunaca paipa cusa na juyajta, imapapash na valishcata y concienciapipash nali sintirita ushan. Jehová Diosca huarmigucunata shina tratachunga nimamanda na munanllu. Jehová Diosca huarmigucunata juyaihuan, llaquishpa tratachunmi munan. Shinallata paicunapa sentimientocunata y concienciatapash respetachunmi munan (Efes. 5:​28, 29). Huarmigucunata ama maltratangapaj, ama nali shimicunahuan rimangapaj y ama pornografiata ricungapaca cusacunaca ¿imatata rurana can?

NALI RURAICUNATACA ¿IMASHINATA CUSACUNACA SAQUITA USHAN?

10. Jesuspa ejemplomandaca ¿imatata cusacunaca yachajuita ushan?

¹⁰ Nali ruraicunata rurashpa huarmigucunata llaquichijushpaca cusacunaca ¿imatata ruraita ushan? Jesuspa ejemplota catingapami esforzarina can. Jesusca na cazarashca cashpapash paipa discipulocunataca juyaihuan, respetohuanmi tratan carca. Jesusca cusacunapaca shuj alipacha ejemplomi can (Efes. 5:25). Jesús paipa discipulocunata imashina tratashcamanda cusacuna imata yachajui ushashcatami yachajupashun.

11. Jesusca ¿imashinata paipa apostolcunataca tratarca?

¹¹ Jesusca apostolcunataca juyaihuan, respetohuanmi tratan carca. Paicunataca nunca na maltratanllu carca. Shinallata ashtaca autoridadta charishpapash paicunataca imapapash na valijtashnaca nunca na sintichinllu carca. Ashtahuangarin paicunata sirvingapami dispuesto carca (Juan 13:​12-17). Jesusca paipa discipulocunataca: “Ñuca imata yachachishcata catichi. Shinami cangunaca fangalla sintiringuichi. Ñucaca ali ali, humildemi cani” nircami (Mat. 11:​28-30). Shuj ali personaca shujcuna imatapash nishpa culirachijpipash controlarinatami yachan.

12. Jesusca ¿imashinata parlan carca?

¹² Jesusca siempremi shujcunata consolangapaj, ali sintichingapaj imagutapash nishpa parlan carca. Jesusca paipa nishcacunahuanga pitapash nunca nali sintichinllu carca (Luc. 8:​47, 48). Contracuna Jesusta nali shimicunahuan rimajpipash, culirachingapaj munajpipash Jesusca paicunataca ‘na randi rimajurcachu’ (1 Ped. 2:​21-23). Ashtahuangarin huaquinbica imatapash na nishpami upalla quidan carca (Mat. 27:​12-14). Cusacunaca Jesuspa ejemplotami catita ushan.

13. Mateo 19:​4-6​pi nishcashnaca ¿imashinata cusacunaca cai shimicunataca pactachita ushan? (Fotota ricupangui).

 ¹³ Jesusca cusacunamanga paicunapa huarmigutaca na traicionanachu canguichi nishpami mandarca. Chaimi “jarica paipa huarmihuanmi causanga” nirca (Mateo 19:​4-6​ta liipangui). Griego shimipica “paipa huarmihuan causanga” nishpaca “gomahuan ali ali pegashcashna tucunga” nijunmi. Chaimi cazarashcacunaca gomahuan ali ali pegashca cuenda caimanda na separarita ushan. Maijanbash separaringapaj munajushpaca ishcadillatami sufringa. Cusaca paipa huarmiguta juyashpaca pornografiataca na ricungachu shinallata imapash nali ruraicunataca na rurangachu (Sal. 119:37). Job runagushnami cusacunaca shuj huarmicunata ñucapa cashcanman yashpa munaihuan ama ricungapaj esforzarin (Job 31:1).

14. Cusacunaca huarmiguhuan y Jehová Dioshuan ali cangapaca ¿imatata rurana can?

¹⁴ Cusacunaca huarmigucunata macashpa, nali shimicunata nishpa, groserota rimashpa y nali sintichishca cashpaca paipa huarmiguhuan cutin ali tucungapaj y Diospa ñaupapi ali ricuringapami cai cosascunata rurana can. 1) Cusacunaca nalita rurajushcataca reconocinami can. Jehová Diosca tucuitami ricujun (Sal. 44:21; Ecl. 12:14; Heb. 4:13). 2) Cusaca paipa huarmiguta maltratanata saquishpami paipa comportamientotaca cambiana can (Prov. 28:13). 3) Shungumandami huarmiguta y Jehová Diostapash perdonahuai nishpa mañana can (Hech. 3:19). Paipa huarmiguta ama maltratashpa catingapaj y paipa comportamientota cambiangapaj ayudahuai nishpapashmi Jehová Diostaca rogashpa mañana can (Sal. 51:​10-12; 2 Cor. 10:5; Filip. 2:13). 4) Jehová Diosta mañashcashnami nali shimicunata ama ningapaj, nali ruraicunatapash millanayachingapaj esforzarina can (Sal. 97:10). 5) Uchallami ancianocunapa ayudata mascana can (Sant. 5:​14-16). 6) Huarmiguta ama cutin maltratangapaj ima cosascunatalla rurai ushanatapash pensarina can. Pornografiata ricuj cusacunapashmi cai 6 yuyaicunataca catina can. Cambiangapaj esforzarijpica Jehová Diosca bendiciangami (Sal. 37:5). Maltratanata, mapa nali ruraicunata saquishpami huarmigutaca juyashcata, respetashcatapash ricuchin.

 CUSACA ¿IMASHINATA PAIPA HUARMIGUTACA RESPETAITA USHAN?

15. Cusacunaca paicunapa huarmigucunata juyashcataca ¿imashinata ricuchita ushan?

¹⁵ Juyashcata ricuchishpa. Matrimoniopi cushilla causangapaca huaquin cusacunaca huarmigucunataca siempremi juyashcata ricuchin (1 Juan 3:18). Cusacunaca huarmigucunata juyashcataca shuj shuj cosasgucunata rurashpami ricuchita ushan. Por ejemplo, huarmigupa maquimanda japishpa, paita ugllashpami juyashcataca ricuchita ushan. Shinallata “ninandami extrañani” o “¿alillachu cangui?” nishpami shuj mensajegupi escribita ushan. O na cashpaca shuj tarjetaguta rurashpapashmi juyailla shimigucunata escribita ushan. Caicunata rurashpami cusacunaca huarmigucunata respetashcata y matrimoniopi cushilla causangapaj munashcataca ricuchin.

16. Cusacunaca huarmigucunata valorashcataca ¿imashinata ricuchita ushan?

¹⁶ Valorashcata y agradicishcata ricuchishpa. Cusacunaca huarmigucunata imamanda valorashcata nishpa y ali sintichishpami paicunata respetashcataca ricuchin. Por ejemplo, quiquinda apoyashcamandaca siempremi agradicina capangui (Col. 3:15). Cusa paipa huarmiguta valorashcata ricuchijpica huarmiguca paita juyashcata y respetashcatami cuenta japinga (Prov. 31:28).

17. Cusacunaca huarmiguta respetashcataca ¿imashinata ricuchita ushan?

¹⁷ Juyaihuan y respetohuan tratashpa. Cusacunaca huarmigucunata juyashpami Jehová Dios carashca regalotaca valichin (Prov. 18:22; 31:10). Chaimi huarmigucunata valorashcata, cuidashcata, juyashcata y respetashcatapash ricuchin. Huarmiguta respetashpaca relaciones sexualesta charishpaca mapa, nali cosascunata rurachunga na obligangachu. f Cusacunapashmi Jehová Diospa ñaupapi shuj ali concienciata charingapaj esforzarina can (Hech. 24:16).

18. Cusacunaca ¿imata rurashpa catingapajta esforzarina can? (“ Huarmigucunata respetashcata ricuchingapaca cai yuyaicunami ayudaita ushan” nishca recuadrotapash ricupangui).

¹⁸ Cusacuna huarmigucunata respetashcata ricuchingapaj esforzarijtaca Jehová Diosca tucuitami ricujun. Huarmiguta nali sintichinapa randica juyaihuan, respetohuan tratangapaj shinallata valorashcata ricuchingapami esforzarina capanguichi. Huarmiguta respetohuan tratashpaca Jehová Dioshuanmi ali amigo cashpa catipanguichi (Sal. 25:14).