1. ¿Imashinata Jehová Diostaca cushichita ushapanchi?

 SHUJ regalota carajpi ñucanchi juyashca amigo na agradicijpica llaquillami sintiripanchi. Pero ñucanchi amigo chai carashca regalomanda agradicijpica ninandami cushijupanchi. Shina cuendallatami Jehová Diospash paipa Churita cushcamanda ñucanchicuna agradicijpica ninandami cushijun. Jehová Diosca ñucanchita ninanda juyaimandami paipa Churita ñucanchita salvangapaj cachamushca (Juan 3:16; Rom. 5:​7, 8).

2. Cai temapica ¿imatata yachajupashun?

² Jehová y Jesús ñucanchimanda imata rurashcata na valichishpaca Jesús ñucanchita salvangapaj huañushcatami na valichinchiman. Jehová y Jesús ñucanchimanda imata rurashcata siempre agradicingapaca paicuna imata rurashcapi pensaringapami tiempota llujchina capanchi. Cai temapica Jesús ñucanchita salvangapaj huañushcamanda cunanbi y shamuj punllacunapi ima bendiciongunata chari ushashcatami yachajupashun. Shinallata Jehová Dios ñucanchita juyashcamanda agradecido cashcata ricuchingapaj imata rurai ushashcatapashmi yachajupashun.

JESÚS HUAÑUSHCAMANDACA ¿IMA BENDICIONGUNATATA CHARIPANCHI?

3. Jesús ñucanchita salvangapaj huañushcamandaca ¿ima bendiciongunatata charipanchi?

³ Jesús ñucanchita salvangapaj huañushcamandami Jehová Diosca ñucanchi pecadocunata perdonashca. Jehová Diosca  juyaimandami ñucanchi pecadocunataca perdonan. Davidca shuj cancionbica: ‘Jatun Dios, aligupachami capangui, nalita rurashcatapash’ perdonajmi cangui nishpami agradicirca (Sal. 86:5; 103:​3, 10-13).

4. Jehová Diosca Jesuspa causaitaca ¿picunamandata curca? (Lucas 5:32; 1 Timoteo 1:15).

⁴ Huaquingunaca Jehovapa perdondaca na miricinichu nishpami pensarin. Pabloca ‘apóstol nichunllapash na miricipanichu’ nishpapash “Taita Dios ñucata ninanda juyashcamandami apóstol capani” nirca (1 Cor. 15:​9, 10). Ñucanchi pecadocunamanda tucui shunguhuan arripintirijpimi Jehová Diosca ñucanchita juyaimanda perdonan. Jehová Diospa perdondaca na miricinichu nishpa pensajushpaca Jehová Dios paipa Churipa causaita juchayucunamanda cushcatami yarina capangui. Shinallata Jesusca shungumanda arripintirij gentecunamanda huañushcatapashmi yarina capangui (Lucas 5:32; 1 Timoteo 1:15​ta liipangui).

5. Huaquinbica ¿imatata pensaita ushanchiman?

⁵ Huaquinbica ashtaca huatacunata Jehová Diosta sirvijushcamandallami Jehová Diosca ñucanchi juchacunata perdonanga yashpa pensaita ushanchiman. Jehová Diosca paita sirvingapaj imatalla rurashcataca ninandami valichin (Heb. 6:10). Jehová Diosca paipa Churipa causaitaca paita sirvishcamanda ñucanchiman pagangapaca na cushcachu. Paita sirvishcamanda ñucanchi pecadocunata Jehová Dios perdonachun miricinchi yashpaca Jesús ñucanchita salvangapaj huañushcataca na valichinchimanllu (Gálatas 2:21​ta comparashpa ricupangui).

6. Apóstol Pabloca ¿imamandata Jehová Diostaca tucui shungu sirvingapaj esforzarirca?

⁶ Apóstol Pabloca paipa juchacunata perdonachun munaimandallaca na Jehová Diostaca sirvircachu. Ashtahuangarin Jehová Diosta agradicishcata ricuchingapami tucui shungu sirvingapaj esforzarirca (Efes. 3:7). Shinallata ñucanchicunapash Jehová Dios ñucanchita perdonachun munaimandallaca na sirvipanchichu. Ashtahuangarin Jehová Dios paipa Churita cachamushcamanda agradicishcata ricuchingapami paitaca tucui shungu sirvipanchi.

7. Jesús ñucanchita salvangapaj huañushcamandaca ¿ima bendiciondata ashtahuan charipanchi? (Romanos 5:1; Santiago 2:23).

⁷ Jesús ñucanchita salvangapaj huañushcamandami Jehová Dioshuan ali amigo cana bendiciondapash charipanchi. a Imashinami chaishuj temapi ricuparcanchi, juchayucuna caimandami Jehová Diospa amigo caitaca na ushaparcanchi. Shinapash Jesús ñucanchita salvangapaj huañushcamandami “Taita Dioshuanga tranquilo ali causaiguta” charita y paiman quimiritapash ushapanchi (Romanos 5:1; Santiago 2:23​ta liipangui).

8. Jehová Diostaca ¿imamandata agradicina capanchi?

⁸ Jehová Diospa amigo caita ushashcamandami paita mañana bendicionda charipanchi. Jehová Diosca tandanajuicunapi rurashca mañaicunatallaca na uyanllu. Ashtahuangarin cada uno rurashca mañaicunatapashmi uyan. Jehová Diostaca tranquilo ali sintiringapaj munaimandallaca na mañapanchichu. Jehová Dioshuan ali amigo cangapaj munaimandami ashtahuanbachaca mañapanchi (Sal. 65:2; Sant. 4:8; 1 Juan 5:14). Jesús cai alpapi cashpaca Jehová Dioshuan ali amigocuna cashpa catingapaj munaimandami cutin cutin mañan carca (Luc. 5:16). Jehová  Diostaca paita mañachun, paipa amigo cachun saquishcamandami agradicina capanchi.

SHAMUJ PUNLLACUNAPICA ¿IMA BENDICIONGUNATATA CHARIPASHUN?

9. Shamuj punllacunapica Jehovata sirvijcunaca ¿ima bendiciondata charinga?

⁹ Jesús ñucanchita salvangapaj huañushcamandaca ¿ima bendiciondata charipashun? Jehová Diosca shamuj punllacunapica paipa sirvijcunataca para siempre causaita cusha nishpami prometishca. Ashtaca gentecunaca para siempre causaitaca na usharingachu nishpami yuyan. Shinapash Jehová Diosca gentecunataca para siempre causachunmi rurashca. Para siempre causanata crina na fácil cajpipash, Jehová Dios paipa Churita ñucanchita salvachun cachamushcamandami para siempre causana oportunidadta charipanchi (Rom. 8:32).

10. Ungidocuna y cai alpapi causana esperanzata charijcunaca ¿imatata shuyanajun?

¹⁰ Jehová Diosca cunanmandallata paraíso alpagupi causai imashina canata pensarichunmi munan. Ungidocunaca jahua cieloman rishpa Jesushuan cai alpata mandanatami shuyanajun (Apoc. 20:6). Y cai alpapi causana esperanzata charijcunaca llaquicuna illaj para siempre causanatami shuyanajun (Apoc. 21:​3, 4). Cai alpapi causanaca shuj jatun bendicionmi canga. Porque Jehová Diosca gentecunataca cai alpapi causana munaihuanmi rurarca. Shinaca cai alpapi para siempre causashpaca cushillami causapashun.

11, 12. Paraíso alpagupica ¿imacunatallata ruraita ushapashun? (Dibujocunata ricupangui).

¹¹ Paraisopi cashpaca unguicuna illaj, llaquicuna illajmi causapashun. Y huañuimandapash na preocuparinajupashunllu (Is. 25:8; 33:24). Paraíso alpagupi causashpaca quiquin gushtashca cosascunatami yachajuita ushapangui. Por ejemplo, física, química, música y shuj shuj cosascunatapashmi yachajuita ushapangui. Paraíso alpagupica arquitectocunata, albañilcunata, agricultorcunata,  cocinerocunata, jardinerocunata y shuj shuj cosascunata ruranata yachaj gentecunatami minishtiringa (Is. 35:1; 65:21). Para siempre causaita ushashcamandaca ñucanchi gushtashca cosascunata yachajungapami tiempota charipashun.

¹² Huañushcacuna causarijpica paicunataca cushillami chasquipashun (Hech. 24:15). Jehová Diosmanda y paipa tucui rurashcacunamanda ashtahuan yachajuita ushashpaca ninandami cushijupashun (Sal. 104:24; Is. 11:9). Shinallata paraíso alpagupica juchayucuna ñana caimandami Jehová Diostaca ashtahuan cushilla sirvita ushapashun. Cai mundopi “pecadota rurashpa asha tiempotalla cushijunapa randica” paraíso alpagupi ashtaca bendiciongunata charinapimi pensarina capanchi (Heb. 11:25). Nali ruraicunata ruraimandallaca paraíso alpagupi causana oportunidadtaca na chingachipanchimanllu. Jehová Dios Jesusta ñucanchita salvachun cachamushcamandami paraíso alpagupi para siempre causaita ushapashun.

JEHOVÁ DIOSTA AGRADECIDO CASHCATA RICUCHIPASHUNCHI

13. Jehová Dios Jesusta ñucanchita salvangapaj cachamushcamandaca ¿imashinata agradicishcataca ricuchita ushapanchi? (2 Corintios 6:1).

¹³ Jehová Dios Jesusta ñucanchita salvangapaj cachamushcamandaca ¿imashinata agradicishcataca ricuchita ushapanchi? Ñucanchi causaipi Jehová Diosta sirvina ashtahuan importante cashcata ricuchishpami agradecishcataca ricuchipanchi (Mat. 6:33). Jesusca tucuicunamandami huañurca “chaimi gentecunaca ñana paicunapa causana can. Sino, paicunamanda huañushpa causachi tucushca Cristopami causana can” (2 Cor. 5:15). Y Jehová Dios ñucanchita juyaimanda perdonangapaj imacunatalla rurashcata pensarishpaca paita tucui shunguhuan sirvingapami esforzaripashun (2 Corintios 6:1​ta liipangui).

14. Jehová Diospi confiashcata y paipa mandashcacunata cazushcataca ¿imashinata ricuchipanchi?

¹⁴ Jehová Diospi confiashpa y paipa mandashcacunata cazushpami agradicishcataca ricuchipanchi. Por ejemplo, imata estudianata, imapi trabajanata decidigrijushpaca Jehová Diospa consejocunata catishpami paita agradicishcata ricuchipanchi (1 Cor. 10:31; 2 Cor. 5:7). Ñucanchi ruraicunahuan Jehová Diospi confiashcata ricuchishpaca Jehová Dioshuan ashtahuan ali amigocuna cashpami catita ushapashun. Shinallata Jehová Dios paipa promesacunata pactachinataca ashtahuan seguromi capashun (Rom. 5:​3-5; Sant. 2:​21, 22).

15. Conmemoración punllapica ¿imashinata agradicishcataca ricuchipanchi?

¹⁵ Conmemoración tiempopi Jehová Diosta ashtahuan sirvingapaj aprovechashpami Jehová Diosta agradicishcataca ricuchipanchi. Por ejemplo, ashtaca gentecunatami Conmemoracionman richun invitaita ushapanchi (1 Tim. 2:4). Conmemoracionman  gentecunata invitajushpaca jw.org paginapimi ¿Imamandata Jesusca huañurca?, Jesús Huañushcata Yarishunchi nishca videocunata ricuchita ushapanchi. Shinallata anciano huauquicunaca inactivo huauquipanicunata Conmemoracionman invitangapami asegurarina can. Inactivo huauquipanicuna congregacionman cutin tigramujpica Jehovapash, Jesuspash, angelcunapash y ñucanchicunapash ninandami cushijupashun (Luc. 15:​4-7). Conmemoracionbica tucuicunata saludangapaj esforzarina capanchi. Pero ashtahuanbachaca mushuj rishcacunata, inactivo huauquipanicunata saludangapami esforzarina capanchi (Rom. 12:13).

16. Conmemoracionbi ashtahuan predicashpaca ¿imatata ricuchipashun?

¹⁶ Conmemoración tiempopi ashtahuan predicashpaca Jehová y Jesús ñucanchimanda imatalla rurashcata agradicishcatami ricuchipashun (1 Cor. 3:9). Texto diariopi y Tandanajuipi yachajungapaj hojapi Conmemoracionba llujshishca textocunatami liita ushapanchi. Conmemoracionba llujshishca textocunataca ñucanchi estudio personalta rurangapapashmi utilizaita ushapanchi.

17. ¿Imashinata Jehová Diostaca cushichita ushapanchi? (“ ¿Imata rurashpata Jehová Diosta agradicishcataca ricuchipanchi?” nishca recuadrotapash ricupangui).

¹⁷ Quiquinba saludmanda, mayorlla caimanda o shuj situaciongunamanda quiquin munashcashna Jehová Diosta na sirvi ushashpaca na yapata llaquirinachu capangui. Porque Jehová Diosca quiquinba ruraicunataca shujcunapa ruraicunahuanga na comparanllu. Ashtahuangarin Jehová Diosca tucui shungu paita sirvingapaj esforzarijushcatami ricun. Jehová Dios paipa Churita cushcamanda ñucanchicuna agradecido cajpica ninandami cushijun (1 Sam 16:7; Mar. 12:​41-44).

18. ¿Imamandata Jehovata y Jesustapash agradicina capanchi?

¹⁸ Jesús ñucanchita salvangapaj huañushcamandami Jehová Diosca ñucanchicunata perdonashca y paipa amigo cachunbash saquishca. Shinallata para siempre causana esperanzatapashmi cushca. Chaimandami Jehová Diosta agradicishcataca siempre ricuchina capanchi (1 Juan 4:19). Jesusca paipa causaita cushpami ñucanchita juyashcataca ricuchirca. Chaimandami Jesustapash agradicishcataca siempre ricuchina capanchi (Juan 15:13).