1. Cunan punllacunapi gentecunaca ¿imashinata can?

 CUNAN punllacunapica ashtaca gentecunaca paicunapillami pensarin. Por ejemplo, huaquingunaca paicunapilla pensarimanda y paicunata jatunyachichun munaimandallami imata rurashcataca redes socialescunapi churan. Pero huaquingunaca Taita Diosta alabangapami esforzarin. Cai temapica, Jehová Diosta alabana imata ningapaj munashcata imamanda paita alabana cashcata shinallata imashina Jehová Dios miricishcashna alabai ushashcatami yachajupashun. Ashtahuanbash imashina Jehová Diosllata paipa shutita jatunyachina cashcatapashmi yachajupashun.

JEHOVÁ DIOSTA ALABANACA ¿IMATATA NINGAPAJ MUNAN?

2. Jehová Diosca ¿imashinata paipa podertaca Sinaí urcupi ricuchirca? (Callari paginapa ).

² Bibliapica Jehová Dios, ninan poderta charishcatami yachachin. Jehová Diosca israelitacuna Egiptomanda llujshishca jipami pai ninan poderta charishcataca ricuchirca. Por ejemplo, ashtaca ashtaca israelitacunaca Jehová Dios imata ningapaj munashcata uyangapami Sinaí urcuman rirca. Chaipimi Jehová Diosca pai ninan poderta charishcataca ricuchirca. Urcupi shayanajujpimi, shinllitapacha culun nishpa rayocuna uyarirca. Urcu jahuapipash shuj yana yana fuyumi ricurirca. Shinallata shuj cacho shinllitapacha huacajujpashmi uyarirca (Éx. 19:​16-18; 24:17; Sal. 68:8). Sinaí urcupi Jehová Diospa ninan poderta ricushpami israelitacunaca ninanda manllarishcanga.

3. Jehová Diosta alabangapaca ¿imatata ruraita ushapanchi?

 ³ Tucuicunami Jehová Diostaca alabaita ushapanchi. Por ejemplo, Jehová Diospa podermanda, paipa cualidadcunamanda gentecunaman parlashpami paitaca alabaita ushapanchi. Shinallata Jehová Dios ñucanchita imagutapash rurachun ayudashcamandami paitaca alabaita ushapanchi (Is. 26:12). Davidca tucui israelitacunapa ñaupapimi Jehová Diostaca alabarca. Chaimi paica: “Mandaj Dioslla, tucuita yali juyaillapacha canapash, ushaita charinapash, punchapamba canapash, tucuita mishanapash, alicachi tucunapash cambajmi. Jahua pachapi tucui imalla tiajpash, cai pachapi imalla tiajpash cambajmi” nirca. David mañashca jipami israelitacunaca ‘tucuilla tandanajushpa, Mandaj Taita Diostaca’ alabanajurca (1 Crón. 29:​11, 20).

4. Jesusca ¿imashinata Jehová Diostaca alabarca?

⁴ Jesús cai alpapi cashpaca ashtaca viajecunatami Jehová Diostaca alabarca. Por ejemplo, Jesusca paipa rurashca milagrocunataca Jehová Diospa ushaihuanlla rurai ushashcatami siempre nin carca (Mar. 5:​18-20). Shinallata Jesusca paipa parlocunahuan y gentecunata juyaihuan tratashpapashmi Jehová Diostaca alaban carca. Jesusca 18 huatacunata shuj demonio llaquichishcamanda curcullagu causajuj huarmiguhuanmi sinagogapica tuparirca. Jesusca chai huarmiguta ninanda sufrijujta ricushpami: ‘Ñami chai unguimandaca ali tucushcangui’ nirca. Jesús chai huarmiguta tacarijpimi paica recto shayarita usharca. Chaimi chai huarmiguca ‘Taita Diostaca alabai callarirca’ (Luc. 13:​10-13). Chai huarmiguca ali tucushcamandami Jehová Diosta alabai callarirca. Ñucanchicunapashmi chai huarmigushnallata Jehová Diosta alabangapaca ashtaca razongunata charipanchi.

¿IMAMANDATA JEHOVÁ DIOSTACA ALABANA CAPANCHI?

5. ¿Imamandata Jehová Diostaca respetana capanchi?

⁵ Jehová Diosta respetaimandami alabapanchi. Jehová Dios ninan poderta charishcamandami respetapanchi (Sal. 96:​4-7). Jehová Diospa rurashcacunaca ali yachaita charijtami ricuchin. Shinallata ñucanchimanga causaita y tucui minishtirishca cosascunatami carashca (Apoc. 4:11). Tucui shunguhuan ayudaj Diosmi can y paipa nishcacunatapash siempremi pactachin (Apoc. 15:4; Jos. 23:14). Chaimandami profeta Jeremiasca cashna nirca: “Tucui llactacunapi causanajuj alipacha yachajushca purapipash, tucui jatun mandaj purapipash, canshnalla jatun Diosca na tianllu” (Jer. 10:​6, 7). Jehová Dios imashina Dios cashcata yachaimandami paita respetana y juyana razonda charipanchi.

6. ¿Imamandata Jehová Diosta juyapanchi?

⁶ Jehová Diosta tucui shungu juyaimandami alabapanchi. Por ejemplo Jehová Dios juyaj, llaquij Diosmi can (Sal. 103:13; Is. 49:15). Ñucanchicuna llaquicunahuan cajta ricushpaca Jehová Diospash ninandami llaquirin (Zac. 2:8). Jehová Diosca paiman quimirichun y paipa ali amigo tucuchunmi ayudan (Sal. 25:14; Hech. 17:27). Shinallata Jehová Diosca humilde caimandami: “Jahua pachatapash, cai pachatapash urai ricujun. Paimi, imagutapash na charijtaca, ñutu alpamanda jatarichin” (Sal. 113:​6, 7). Chaimandami Jehová Diostaca alabapanchi (Sal. 86:12).

7. Jehová Diosta alabangapaca ¿ima oportunidadtata charipanchi?

⁷ Tucui gentecuna Jehová Diosta rijsichun munaimandami paita alabapanchi. Diabloca Jehová Diosmandaca ashtaca llullacunatami nishca. Chaimandami gentecunaca Taita Diosmandaca panda yuyaicunata charin (2 Cor. 4:4). Diabloca Jehová Diosmi  tucui nali cosascunamandaca culpata charin nishpami gentecunamanga crichishca. Diablopa nishcacuna llulla cashcata yachaimandami ñucanchicunaca gentecunaman Jehová Dios imashina cashcata yachachina oportunidadta charipanchi (Is. 43:10). Cati parrafocunapica Jehová Diosta imashina alabanata yachai ushangapami Salmo 96​pi yuyaicunata yachajupashun.

¿IMASHINATA JEHOVÁ DIOS MIRICISHCASHNA ALABAITA USHAPANCHI?

8. Salmo 96:​1-3​pi nishcashnaca ¿imata rurashpata Jehová Diostaca alabapanchi?

⁸ (Salmo 96:​1-3​ta liipangui). Jehová Diosmanda shujcunaman yachachishpami alabaita ushapanchi. Cai versocunapica Jehová Diosta candachun, paipa shutita alabachun y gentecunaman Jehová Diosmanda villachichunmi paipa sirvijcunataca animan. Shina rurashpami Jehová Diosta alabapanchi. Punda tiempopi Diosta sirvijcunaca Jehová Diospa shutita difindingapaj y Jehová Dios paicunamanda imata rurashcata parlangapami tucui oportunidadta aprovechana carca (Dan. 3:​16-18; Hech. 4:29). Paicunamandaca ¿imatata yachajuita ushapanchi?

9, 10. Angelina panigumanda ¿imatata yachajupanchi? (Fotota ricupangui).

⁹ Estados Unidos llactamanda Angelina a shuti paniguhuan ima pasashcata yachajupashun. Paipa trabajopica tucui mushuj trabajadorcunatami paicunata ashtahuan rijsingapaj shuj reunionman invitarca. Chai reunionbimi na manllashpa Jehová Diosmanda parlana oportunidadta charirca. Paniguca testigo de Jehová cashcata parlangapami munarca. Shinapash shuj compañeroca testigo de Jehovacunamandami nali parlai callarirca. Angelina paniguca cashnami nin: “Ñuca compañerota uyashpaca ninandami manllarircani. Shinapash Jehová Diosmanda llullacunata nichunga na saquishachu nishpami pensarircani”.

¹⁰ Angelina paniguca nara parlashpallatami Jehová Diosta mañarca. Mañashca jipaca paniguca respetohuanmi cashna nirca: “Ñucaca testigo de Jehovami cani”. Shina nijpimi paipa compañeroca culirarca. Shinapash paniguca Jehová Diosta sirvimanda imacunatalla rurashcatami huaquin fotocunapi ricuchirca. Jipaca na manllashpami paipa crishcacunataca  difindirca (1 Ped. 3:15). Panigu parlanata tucuchijpica paipa compañeroca ña tranquilo caimandami testigo de Jehová cashpa cushilla yalishcata yarirca. Angelina paniguca: “Jehová Diospa shutita difindinaca shuj jatun cushijuimi can” ninmi. Shujcuna Diosmanda nali parlajpica ñucanchicunapashmi Jehová Diospa shutita difindina y alabana privilegiota charipanchi.

11. Salmo 96:8​pi nishcataca ¿imashinata Diospa sirvijcunaca pactachinajushca?

¹¹ (Salmo 96:8​ta liipangui). Ñucanchi charishca cosascunahuanmi Jehová Diostaca alabaita ushapanchi. Jehová Diosta sirvijcunaca siempremi charishca cosascunahuan Jehová Diostaca alabashca (Prov. 3:9). Por ejemplo, israelitacunaca templota huasichingapaj y huasichishca jipa chai templota cuidangapaca paicuna charishca cosascunahuanmi ayudarca (2 Rey. 12:​4, 5; 1 Crón. 29:​3-9). Jesuspa huaquin discipulocunaca ‘paicunapa charishca cosasgucunahuanmi’ Jesusta y apostolcunatapash ayudan carca (Luc. 8:​1-3). Punda tiempopi cristianocunaca paicuna charishca cosascunahuanmi shuj llactapi causaj huauquipanicunataca ayudan carca (Hech. 11:​27-29). Cunan punllacunapipashmi ñucanchi contribuciongunahuan Jehová Diosta alabaita ushapanchi.

12. Ñucanchi contribuciongunahuanga ¿imashinata Jehová Diosta alabaita ushapanchi? (Fotota ricupangui)

¹² Ñucanchi contribuciongunahuan Jehová Diosta imashina alabaita ushashcata ricupashunchi. 2020 huatapica Zimbabue llactapimi ashtaca gentecunaca yacu illaj quidarca. Chaimandami paicunaca yarjaimanda huañuna peligropi carca. Shina pasanajushpapash Prisca shuti paniguca predicacionman llujshinataca na saquircachu. Chaimi paipa vecinocunaca paitaca: “Canga tarpushpa trabajanapa randica yangami purijungui, yarjaimandami huañungui” nishpa burlarin carca. Paniguca paipa vecinocunataca: “Jehová Diosca paipa sirvijcunataca nunca na saquishcachu” nishpami tigrachirca. Asha tiempo jipaca huauquipanicunapa contribuciongunamandami paniguca minishtirishca cosascunata chari usharca. Chaita ricushpami huaquin vecinocunaca manllarishca quidarca. Chaimi paicunaca: “Diosca candaca nunca na saquishcachu. Canba Diosmandami ashtahuan yachajungapaj munapanchi” nirca.  Y paipa 7 vecinocunami tandanajuicunaman ri callarirca.

13. Salmo 96:9​pi nishcashnaca ¿imashinata Jehová Diostaca alabaita ushapanchi?

¹³ (Salmo 96:9​ta liipangui). Ñucanchi causaihuanmi Jehová Diostaca alabaita ushapanchi. Tabernáculo y templo huasipi sirvingapaca sacerdotecunaca limpiomi cana carca (Éx. 40:​30-32). Ñucanchi causaipi limpio causaita charingapaj esforzarishpapash, Jehová Diospa ñaupapi limpio causaita charingapami ashtahuan esforzarina capanchi (Sal. 24:​3, 4; 1 Ped. 1:​15, 16). Tucuicunallatami “punda causaita y punda ruraicunataca” ladoman saquina capanchi. Ashtahuangarin ‘Taita Dios carashca mushuj causaitami ropata churajunshna churajungapaj’ esforzarina capanchi. Punda causaita y punda ruraicunata saquina nishpaca ñucanchi nali ruraicunata y mapa causaita saquina cashcatami ricuchin. Jehová Dioshna ali cualidadcunata charingapaj y pai munashcashna causangapami esforzarina capanchi (Col. 3:​9, 10). Jehová Diospa ayudahuanmi huainayashpa causaj gentecunapash y millai millai gentecunapash cambiaita ushashca.

14. Jack huauquigumandaca ¿imatata yachajupanchi? (Fotota ricupangui).

¹⁴ Cunanga Jack shuti huauquigumanda yachajupashun. Paica millai millai, peligrosomi carca. Chaimi gentecunaca paitaca Demonio nishpa rijsin carca. Shuj shuj nali cosascunata rurashcamandami huañungapaj sentenciashca carca. Huañungapaj sentenciashca punlla nara chayajpillatami Bibliata yachajui callarirca. Paipa causaipi nali cosascunata rurashca cashpapash, cambiocunata rurashpami tiempohuanga bautizarirca. Carcelmanda guardiacunaca Jack ashtaca cambiocunata paipa causaipi rurashcata ricushpami, huañungapaj sentenciashca punlla chayajpica, ninanda llaquirishpa huacanajurca. Carcelmanda shuj sargentoca Jack huauquimanda parlashpaca cashnami nirca: “Pundaca, Jack shuti jariguca shuj presocunahuan ricujpica millai millaimi carca. Pero ashtaca cambiocunata rurashcamandami ali persona can”. Jack huauquigu huañushca jipami, huauquicunaca carcelpi tandanajuicunata rurangapaj cutin tigrarca. Shinapash chai tandanajuipica shuj mushuj preso rishcatami ricurca. Chai preso jariguca Jack huauquigu ashtaca cambiocunata  rurashcata ricushpami, paipash Jehová Diosta adorangapaj, imata rurana cashcata yachangapaj munarca. Shinaca ñucanchi causaipi ruraicunahuanmi Jehová Diostaca alabaita ushapanchi (1 Ped. 2:12).

¿IMASHINATA JEHOVÁ DIOSCA PAIPA SHUTITACA JATUNYACHINGA?

15. Jehová Diosca paipa shutita jatunyachingapaca ¿imatata ñalla ruranga? (Salmo 96:​10-13).

¹⁵ (Salmo 96:​10-13​ta liipangui). Salmo 96:13​pica Jehová Dios ali juzgan cashcatami yachachin. Panda religiongunaca Jehová Diospa shutitami mapayachishca. Chaimi Jehová Diosca ñalla panda religiongunata tucuchishpa paipa shutitaca jatunyachinga (Apoc. 17:​5, 16; 19:​1, 2). Panda religionguna tucurijta ricushpami, gentecunaca talvez Jehová Diosta adoranata decidinga. Armagedonbimi Jehová Diosca Satanasta, paita na ricunayachij gentecunata y paipa shutita mapayachijcunataca tucuillata tucuchinga. Pero paita cazujcunata y paipa shutita alabajcunatami Jehová Diosca salvanga (Mar. 8:38; 2 Tes. 1:​6-10). Mil huatacunata Jesús mandashca jipami Jehová Diosca paipa shutita santificanga (Apoc. 20:​7-10). Chai tiempopica ‘mama cuchaca yacuhuan junda, cashcashnallatami cai pachaca Mandaj Dios punchapamba cajta rijsishca yuyaihuan junda canga’ (Hab. 2:14).

16. ¿Imata rurashpata catingapaj munapanchi? (Dibujota ricupangui).

¹⁶ Tucui gentecuna Jehová Diospa shutita alabajpica, shuj jatun cushijuimi canga. Jehová Dios paipa shutita jatunyachingacamanga ñucanchi ruraicunahuanmi paita alabashpa catingapaj esforzarina capanchi. Jehová Diosta alabana shuj jatun privilegio cashcamandami Cuerpo Gobernantemanda huauquicunaca 2025 huatapa textotaca Salmo 96:8​ta agllashca. Chaipica: “Diospa shutitaca alabaichi” nijunmi.