Ñuca taitacunaca 1920 huatacunapimi nara cazarashpallata Bibliamandaca yachajurca. Ñucaca Inglaterra llactapimi huata 1939​pi nacirircani. Ñuca taitacunaca tandanajuicunamanga ñucataca huahuagumandapachami pushahuan carca. Tandanajuicunapica, Escuela del Ministerio Teocraticotaca ninandami gushtan carcani. Ñuca primera vez cushca asignaciondaca caina cushcatashnami yarini. Chai asignaciondaca 6 huatagucunatalla charishpami curcani. Uchillagu caimandami shayaringapaca shuj cajaguta minishtircani. Shinapash asignacionda cungapaj vitsiajushpaca ashtaca mayorlla huauquipanicunata ricushpami manllarishca carcani.

Ñuca taitami imashina villachinata yachachunga shuj tarjetagupi imata ninata escribishpa cuhuarca. Villachi callarishpaca 8 huatagucunatallami charircani. Villachijujpica shuj jari llujshishpaca ñuca tarjetaguta liishpami, “Sea Dios Veraz” nishca librota japishpa quedarca. Chaimandami cushijushpa ñuca taitamanga villangapaj calparcani. Villachinaman, tandanajuicunaman rinataca ninandami gushtan carcani. Chaicunami Jehová Diosta tiempo completopi sirvina munaita charichun ninanda ayudahuarca.

Ñuca taita Atalayacunata japichun anotahuajpimi Bibliamandaca ashtahuan yachajurcani. Huasiman Atalayacuna chayamujpica japishcandimi tucuillata liin carcani. Asha asha viñashpaca Jehová Diospi tucui shunguhuan confiashpami ñuca causaipica paita sirvinata dicidircani.

Huata 1950​pica ñuca taitacunata, ñucatapashmi Nueva York llactapi shuj jatun tandanajuiman invitarca. Cai jatun tandanajuipa temaca, “Aumento de la Teocracia” nishcami carca. Cutin jueves 3 de agostopa programaca “Día del Misionero” nijurcami. Bautizarigrijcunapa discursotaca huauqui Carey Barbermi curca. Cai huauquiguca jipamanga Cuerpo Gobernantepi huauquicunahuanmi sirvi callarirca. Bautizarigrijcunapa discursota ña tucuchigrijushpami  bautizarigrijcunataca ishcai tapuicunata rurarca. Chaimandami ñucaca jatarishpaca: “Ari” nishpa caparircani. 11 huatacunatalla charishpapash shuj alipacha decisionda agllashcatami cuenta japiparcani. Nadanata na yachashcamandami piscinaman yaicunataca manllajurcani. Chaimandami ñuca tioca: “Imapash na pasangachu” nihuarca. Piscina ladocamanmi cumbahuarca. Shinapash ñapashmi bautizahuarca. Cutin shuj huauquiguca piscinamanda llujshichunmi ayudahuarca. Chai punllamandami Jehová Diosca ñucataca ninanda ayudashpa catihuashca.

Colegiota tucuchishpaca precursor tucusha yajurcani. Pero ñucapa profesorcunaca universidadta estudiachunmi ninanda animahuarca. Chaimandami universidadman rircani. Shinapash asha ashami cuenta japircani Jehová Diosta sirvishpandi, universidadta estudiashpandica na catita ushana cashcata. Chaimandami universidadtaca saquinata dicidircani. Ñuca profesorcunaman imamanda universidadta saquigrijushcata ali intindichingapami Jehovata mañarcani. Ñuca profesorcunamanga respetohuanmi imamanda chai huatagutalla universidadta estudiagrijushcata intindichishpa shuj cartapi escribishpa cacharcani. Jehovapi tucui shunguhuan confiashpami precursoradota japishpa Jehová Diosta sirvishpa catircani.

Julio de 1957 huatapimi, Wellingborough llactapi tiempo completopi Jehovata sirvi callarircani. Londres Betelmanda huauquicunatami shuj experienciata charij precursor huauquigu ñucata ayudachun mañarcani. Bert Vaisey shuti huauquigumi ñucataca ninanda ayudahuarca. Villachingapapash ali horariocunata rurachunmi ayudahuarca. Chai congregacionbica 8puracunallami carcanchi. Sucta mayorlla panigucuna, chai huauquigu y ñucapash. Tandanajuicunapa prepararishpa, shinallata chaipi participashpaca Jehová Diospica ashtahuanmi confiai callarircani. Chaimi na manllashpa villachingapapash ayudahuarca.

Soldado tucungapaj na rishcamandami asha tiempotaca carcelpi carcani. Jipamanga Barbara shuti precursora paniguta rijsishpami paihuan cazararcani. Huata 1959​pi cazarashca jipaca maipi sirvichun cachajpipash rishunllami nishca carcanchi. Jipamanga Lancashire nishca pushtupi, Inglaterra llactapi sirvichun cacharca. Chaimi 1961 huatapi Londres Betelmanda huauquicunaca, Escuela del Ministerio del Reinota charichun shuj quillata invitarca. Chai escuelata tucuchishca jipaca superintendente de circuito tucuchunmi nombrahuarca. Shinallata ishcai semanatami Birmingham nishca llactapi experienciata charij shuj superintendente ñucata ashtahuan yachachichun chaipi yalircani. Ñuca huarmigutapashmi ñucahuan chaipi yalichun saquirca. Chai jipami ñucanchipa asignacionda pactachingapaj rircanchi. Ñucanchipa asignacionga Lancashire y Cheshire nishca pushtucunapimi carca.

Agosto de 1962​pica vacacionbi cajpimi shuj cartata sucursalmanda cachamushcarca. Chai cartapica Galaad Escuelaman invitangapaj solicitudta jundachichunmi mañajurca. Jehová Diosta mañashpami chai solicitudta jundachishpa uchalla sucursalman cacharcanchi. Picha quilla jipaca Brooklynman, Nueva York llactamanmi Galaad Escuelapa clase número 38​ta charingapaj rinajurcanchi. Chaipica 10 quillacunatami ashtacata Bibliamanda estudiarcanchi.

Galaad Escuelapica Bibliamanda, Jehovapa organizacionmandallaca na yachajurcanchichu. Ñucanchipa huauquipanicunamandapashmi ashtacata yachajurcanchi. Galaad Escuelapi cashpaca casi ni 25  huatatapash na charircanchichu. Chaimandami chaipi huauquipanicunamandaca ashtacata yachajurcanchi. Galaad Escuelapi ñucata yachachij huauquicunahuan shuj asignacionda cada punlla pactachinaca ñucapaca shuj jatun bendicionmi cashca. Chai escuelapica pimanbash shuj consejota cushpaca Bibliata siempre utilizana cashcatami huauqui Fred Ruskmandaca yachajurcani. Cai escuelapi discursota cuj huauquicunaca Nathan Knorr, Frederick Franz, Karl Kleinmi carca. Paicunamandaca ashtacatami yachajurcanchi. Huauqui Alexander Macmillanba ejemplomandaca humilde canatami ashtahuan yachajurcanchi. Cai huauquiguca huata 1914​manda, huata 1919​caman ashtaca jarcaicuna ricurijpi imashina Jehová Dios paipa llactata ñaupaman pushashcatami shuj discursopi intindichirca.

Galaad Escuelapi casi ña cursota tucuchijujpica huauqui Knorrca: “Cangunataca África llactapi, Burundi nishca pushtumanmi sirvingapaj richun cachagrijun” nishpa villarca. Chaimandami ñucanchicunaca Betelpi bibliotecaman calpashpa Anuario librota mascangapaj rircanchi. Burundi llactapi mashna publicadorcuna tiashcata yachangapami munarcanchi. Shinapash Burundi pushtumandaca Anuario libropica imatapash na villajurcachu. Chaimandami pipash na villachishca pushtupi villachingapaj rigrinajushcata cuenta japircanchi. Na rijsishca pushtupi villachingapaj rigrinajushcamandami ashataca preocupado carcanchi. Shinapash Jehová Diosta mañashpami tranquilo sintirircanchi.

Ñucanchipa mushuj asignacionbica tucuimi diferente carca. Costumbrecunapash shujmi carca. Shinallata francés shimitami yachajuna tucurcanchi. Maipi causana huasitapashmi mascana carcanchi. Ñucanchi asignacionda pactachingapaj chayashca ishcai punlla jipami shuj huauquiguca ñucanchitaca visitarca. Chai huauquiguca Galaad Escuelapi ñucanchihuan igual yachajushcami carca. Harry Arnott shutimi carca. Paipashmi paipa asignacionda pactachingapaca Zambia nishca pushtuman rijurca. Chai huauquigumi ñucanchicuna maipi causanata tarichun ayudarca. Chai huasigupimi Jehovata sirvingapaca causai callarircanchi. Chaipi ña sirvingapaj callarinajujhuanmi chaimanda autoridadcunaca, testigo de Jehovacunata na rijsimandaca chai llactapi quidachunga na saquirca. Chaipi quidangapaj munashpaca permiso de trabajo nishcatarami llujchina carcanchi. Chaimandami chaipi na quidai ushashpa, Uganda llactaman rircanchi.

Shinapash visata na charishcamandaca chai llactaman yaicunataca ashata manllanajurcanchimi. Shinapash Jehová Diospimi tucui shungu confiarcanchi. Chaimi chai llactaman yaicuchunga Canadá llactamanda shuj huauquigu, inmigración pushtupi shuj autoridadta charij jarihuan ñucanchita yaicuchichun  parlashca carca. Chaimandami chai llactapica huaquin quillacunata quedachun saquirca. Chaimi chai llactapi quidangapapash permisocunata llujchita usharcanchi. Shinami Jehová Dios ñucanchita ninanda ayudashcata sintircanchi.

Cai llactapica Jehovamanda ali villaicunata villachinaca ñami callarishca carca. Shinapash cai llactapica 28 testigo de Jehovacunallami tiarca. Chai llactapica inglés shimita parlaj ashtaca gentecunahuanmi tuparircanchi. Shinapash chai llactapica gentecunaca shuj shuj shimitapashmi yacharca. Chaimandami chai llactapi testigo de Jehovacuna mirachun munashpaca chai ashtaca shimicunamanda shuj shimitallapash yachajuna carcanchi. Kampala nishca pushtupi, Luganda nishca shimita gentecuna ashtahuan parlashcamandami chai shimita yachajui callarircanchi. Cai shimitaca ashtaca huatacuna jipami ali ali ña parlai usharcanchi. Cai shimita ali parlanaca villachinapica ninandami ayudarca. Bibliamanda yachajujcunata imapi ayudana cashcatami ashtahuan cuenta japircanchi. Paicunapashmi Bibliamanda imata yuyashcata ashtahuan parlai callarirca.

Chai jipaca chai tucuilla llactapi congregaciongunata visitashpa superintendente viajante shina sirvichunmi invitarca. Na yashcapimi cai bendiciondaca chasquircanchi. Kenia llactamanda sucursalmi ñucanchitaca ayudagrijurca. Paicunapa ayudahuanmi maipilla precursor especialcunata minishtijuj pushtucunata mascai callarircanchi. Ashtaca viajecunatami testigo de Jehovacunata na rijsishpapash chai llactamanda gentecunaca paicunapa huasicunapi mingachishpa, micunaguta carashpa ali ali ñucanchicunataca tratarca.

Jipamanga Kenia llactapica ishcai punllacunatami trenbi Kampala pushtumanda, puerto de Mombasa nishca pushtucaman rircani. Jipamanga barcopimi islas Seychelles nishcaman rircanchi. Chai islacunataca huata 1965​manda, 1972​camanmi ñuca huarmiguhuanga casi seguido visitarcanchi. Chai pushtupica ishcai publicadorcunami tiarca. Chai tiempopica shuj grupo callarishpami jipamanga shuj congregación tucurca. Shinallata Uganda llactapica huauquipanicunata visitangapaca Eritrea, Etiopía y Sudán nishca pushtucunamanbashmi ri usharcani.

Uganda llactapica politicocunapa culpamandami tauca llaquicuna chai llactapica tiarca. Chaimandami ‘Cesarpaj cajpica, Cesarmanllata cuna canguichi’ nishca shimicunata pactachina ali cashcata ricurcani (Mar. 12:17). Shuj viajeca shuj llactamanda shamushpa chaipi causajujcunataca, ladolla tiashca policiacunapa pushtupi paicunapa shutita anotagrichun mandarca. Chaita uyashpaca uchallami anotarigringapaj rircanchi. Anotarishca huaquin punllacuna jipallami Kampala pushtutaca shuj huauqui misionerohuan carropi rinajurcanchi. Chaipimi shuj soldadocuna ñucanchitaca japirca. Paicunaca: “Cai llactata chapangapaj shamushcacuna, contracunami canguichi” nishpa yangamanda juchachirca. Chaimandami comisariaman aparca. Chaipimi ñucanchicunaca: “Misionerocunami capanchi. Pitapash nalitaca na shinanajunchichu. Policía pushtupipash ñami anotarircanchi” nishpa villarcanchi. Shinapash na crishpami ñucanchicuna causanajushca ladolla policía huasiman pushashpa rirca. Chaiman chayajpica chaipi cashca shuj policiami ñucanchitaca antsicarin rijsirca. Chaimi “paicunaca ñami anotarishca” nishpa ñucanchitaca richun saquirca. Chaimi ña tranquilo sintirircanchi.

Chai tiempopica soldadocunahuanga tuparinajurcanchillami. Soldadocunaca ninandami cuidarianajurca. Chai tiempopica puringapaca nalichu carca. Machashca soldadocunahuan tuparinacarin ashtahuan nalimi carca. Jehová Diostaca siempremi mañan carcanchi. Chaimandami soldadocunahuan tuparishpapash yalichun saquijpica tranquilo sintirin carcanchi. Shina catijushpallatami huata 1973​pica shuj llactamanda causangapaj shamushca gentecunataca  Uganda llactamanda llujshichun mandarca. Chaimi chaimandaca llujshina tucurca.

Chaimi cutin shuj asignacionda chasquircanchi. Cai viajeca África llactapi, Costa de Marfil nishca pushtumanmi rircanchi. Cutinmi ashtaca cosascuna diferente carca. Shuj culturatami yachajuna carcanchi. Francés shimita parlashpa, shuj shuj llactamanda misionero huauquicunahuanbashmi causana carcanchi. Shinapash Jehová Dios ayudajpimi chai llactamanda ali shunguta charij gentecunaca Jehovamanda villachijpica ali uyai callarirca. Jehová Diospi confiashpami tucuita rurashpa catinajurcanchi.

Na yashcapimi ñucanchipa causaica cambiarca. Na yashcapimi llaqui noticiacunata chasquircanchi. Ñucapa huarmigu Barbarami cáncer ungüihuan cashcarca. Chai cáncer ungüipa shuj tratamientota catingapami Europa llactaman cutin cutin rinajurcanchi. Shinapash 1983 huatapica ashtahuanmi irquiyashpa catirca. Chaimandami África llactapi asignaciondapash saquina tucurcanchi. Chai asignacionda saquishpaca llaquillapachami sintirircanchi.

Ñuca huarmiguca Londres llactamanda Betelpi cashpami, ashtahuan nali tucushpa huañuparca. Cashna llaquihuan cajpica Betelmanda huauquipanicunami ñucataca ninanda ayudahuarca. Ashtahuangarin shuj cusahuarmica ñuca huarmigu huañushca cajpipash Jehová Diospi tucui shunguhuan confiashpa catichun ayudahuarca. Tiempo yalishca jipaca Betelpi voluntario shina sirvij Ann shuti panigutami rijsircani. Cai paniguca precursora especial shinami pundaca sirvishca carca. Cai paniguca Jehová Diosta tucui shunguhuan juyashcata, Jehová Diospi shinlli feta charishcatapashmi ricuchin carca. 1989 huatapimi cai paniguhuan cazararcani. Chai punllamandapachami Londres llactapa sucursalpi sirvishpa causapanchi.

Huata 1995​manda, 2018 huatacamanmi representante de la Central mundial shina sirvijushcani, chaitaca pundaca superintendente de zona ninmi carca. 60 llactacunata visitana privilegiotami charishcani. Ashtahuangarin shuj llactacunata visitashpaca Jehová Dios paipa tucui sirvijcunata imashina bendiciashcatapashmi ricui usharcani.

Huata 2017​pica shuj shuj llactacunata visitashpa rijushpami Africamanda, Burundi nishca pushtutapash visitangapaj rircani. Ñucapa huarmiguman primera vez Burundi nishca pushtuta rijsichishpaca ninandami cushijurcani. Ashtahuangarin chai llactapi ashtaca testigo de Jehovacuna tiashcata ricushpami ninanda cushijurcani. 1964 huatapica shuj pushtupimi huasin huasin villachin carcani. Cunanga chai pushtupica juyailla Beteltami shayachishca. Chai llactapica 15 mil 500 huauquipanicunami causan.

2018 huatapi maijan llactacunatalla visitana programata chasquishpaca, chai programapi Costa de Marfil llactata visitana cashcata ricushpaca ninandami cushijurcani. Abidjan llactaman chayashpaca huasipi cashcashnami sintirircani. Ña Betelpi cashpaca gentecunata yachachingapaj nishpami paicunapa teléfono numerocunata ricui callarircani. Shina ricujushpami ñuca ladopi causaj shuj rijsishca vecinopa shutita tarircani. Chai shutica Sossoumi carca. Chaimi ñuca yaipica, Abidjan llactapi ñuca sirvijushca tiempo completopi superintendente de Ciudad shina sirvijushca huauquimi can yashpa pensajurcani. Shinapash chai huauquiguca na cashcachu carca. Chai huauquigupa churimi cashcarca.

Jehová Diosca paipa tucui nishcatami pactachishca. Tucui ñuca causaipimi Jehová Diospi tucui shunguhuan confianata yachajushcani. Jehová Diosca ciertopachami shuj ali causaiguta charichun ayudan. Tucui shunguhuanmi paraíso Alpaguta japingacaman Jehovata sirvishpa catingapaj munapanchi (Prov. 4:18).