1. a) ¿Imamandata huaquinbica ñucanchitaca consejaita ushanman? b) ¿Imamandata consejocunata uyanaca minishtirishcapacha can?

 TUCUICUNALLATAMI huaquinbica shuj consejota minishtipanchi. Huaquinbica ñucanchillatami pipash ñucanchita consejachun mañapanchi. Cutin huaquinbica shuj huauquigumi ñucanchicuna ‘imatapash nalita ruragrijujta’ ricushpa ñucanchimanda preocuparishpa ñucanchitaca aconsejaita ushan (Gál. 6:1). O na cashpaca ima nalitapash rurashpa pandarishca jipami ñucanchitaca consejaita ushan. Shinaca imamanda consejajpipash consejocunataca uyanami capanchi. Consejocunaca ñucanchipa alipallatami can. Ñucanchi causaitapashmi salvaita ushan (Prov. 6:23).

2. ¿Proverbios 12:15​pi nishcashnaca imamandata consejocunata uyanaca minishtirishca can?

² Cai temapa callari textopica: ‘Alipacha yachajushcacuna yachachishca shimicunataca rinllita mañachishpa uyangui’ nijunmi (Prov. 22:17). Ñucanchicunaca na siempre tucuita ali yachapanchi. Siempremi shuj personaca shujcunamanda ashtahuan imagutapash yali yachaita ushan (Proverbios 12:15​ta liipangui). Shinaca consejocunata uyashpami humildecuna cashcata, shujcunapa ayudata ñucanchicuna minishtishcatapash ricuchi ushapanchi. Jehová Diosca, “Ali yuyaita pipash na cujpica, yuyaicunaca llaquimi tucun. Ashtahuangarin ali yuyaita taucacuna cujpimi” imapash ali llujshin nircami (Prov. 15:22). Cai shimicunataca Jehová Diosca rey Salomonmanmi escribichirca.

3. ¿Consejocunaca ima maneracunapillata caita ushan?

³ Consejocunaca de diferente manerami caita ushan. Huaquinbica Bibliata liijujpi o publicaciongunata liijujpimi ñucanchicuna imapi mejorana cashcata cuenta japichun ayudaita ushan (Heb. 4:12). Cutin huaquinbica shuj anciano huauquigu, o Jehovata ali sirvij huauquigumi ñucanchicuna imapi mejorana cashcata ricushpa consejaita  ushan. Shinaca pipash ñucanchita Bibliapi nishcashna consejashpaca ñucanchita ninanda juyashcatami ricuchin. Chaimandami pipash ñucanchita consejajpica agradicina capanchi. Paicunapa consejashcacunata cazushpami paicunata agradicishcataca ricuchita ushapanchi.

4. ¿Eclesiastés 7:9​pi nishcashnaca pipash consejajpica imatata na yuyana capanchi?

⁴ Ciertota parlashpaca huaquinbica pipash ñucanchita consejajpi chasquinami ashtahuan shinlli can. Huaquinbica nalipashmi sintiripanchi. ¿Imamandata shina pasan? Juchayucunami canchi ninaca facilmi can. Shinapash pipash ñucanchita caipimi nali cangui o caitami nalita rurashcangui nijpimi chaicunata uyanaca ñucanchipaca shinlli ricurin (Eclesiastés 7:9​ta liipangui). Huaquinbica pipash ñucanchita consejajpica, paica ñucataca na shinachu rimana cahuarca nishpami culiraita ushapanchiman. O na cashpaca paica “¿ñucataca ima nishpata consejahuanyari? ¿Ima derechotata charishca? Paipashmi pandarinlla, shinachu ñucataca consejajun” nishpapashmi pensaita ushapanchiman. O na cashpaca uyaita uyai tucushpami shujcunamanbash parlashpa paicuna ñucanchi pensashcashna nichun shuyapanchiman.

5. ¿Caipica imatata yachajugripanchi?

⁵ Cai yachajuipica Bibliamanda huaquin gentecunapa ejemplocunatami ricupashun. Bibliapica huaquinguna consejocunata chasquishcata, cutin shujcunaca consejocunata na chasquishcatami parlan. Shinallata consejocunata chasquichun ima ayudanata y consejocunata chasquina ñucanchita imashina ayudajtapashmi ricugripanchi.

6. ¿Rehoboam shuti reymandaca imatata yachajui ushapanchi?

⁶ Rey Rehoboamba ejemplota ricupashunchi. Pai rey tucujpica Israel llactamanda gentecunaca punda paipa taita Salomonba cushca leycunata bajachunmi mañarca. Imata ruranata yachangapaca callarijpica rey Rehoboamga Israel llactamanda ancianocunatami tapurca. Shina tapujpica paicunaca gentecunapa mañashcata rurailla nishpami consejarca. Gentecunapa mañashcata rurajpica, gentecunaca siempremi candaca apoyanga nishpami consejarca (1 Rey. 12:3-7). Shinapash rey Rehoboamga chai consejotaca nalicachishpami uyarca. Chaimandami paica paihuan igual viñashca jaricunata consejota mañangapaj rirca. Cai jaricunaca talvez 40 huatacuna yalitaimanmi charishcanga. Chaimandami paicunaca talvez asha experienciata charishcanga (2 Crón. 12:13). Shinapash chai viajeca chai jaricunaca Rehoboammanga shuj nali consejotami curca. Gentecunataca ashtahuan shinllimi tratana cangui nishpami consejarca (1 Rey. 12:8-11). Cai consejocunata chasquishpaca ¿rey Rehoboamga imatata rurarca? Paica maijan consejota catina ali cashcata yachai ushangapaca Jehová Diostami mañanalla carca. Shinapash chaitaca na rurashpami paipa yuyaipi gushtashca consejota catirca. Cashna rurashcamandaca llactapi causaj gentecuna, reypashmi llaqui aparca. Ñucanchicunapashmi shuj na gushtashca consejota chasquita ushapanchi. Shinapash Bibliapi nishcashna consejajpica uyanami capanchi.

7. Uziasmandaca ¿imatata yachajui ushapanchi?

⁷ Rey Uziaspashmi paita consejajpica na uyarca. Rey Uziasca Jehovapa templo huasipimi inciensota rupachingapaj munarca. Shinapash chaitaca sacerdotecunallami rurana carca. Sacerdotecunaca Uziastaca: “Uzías, Mandaj Diosman inciensota cushnichinaca, na can ruranachu. Ashtahuangarin Aaronbaj mirai curacunallami, chaita cushnichingapaj shicanyachishca cashcamanda, caita rurai ushan” ninajurcami. Shina nijpica paica ninanda fiñarishpami paicuna consejashcataca na uyarca. Paica, ‘ñucami rey cani. Imatapash rurashallami’ yashpa pensaimandami cashna consejajpica na uyashcanga. Shinapash Jehová Diospa ñaupapica rey caimandallaca na imatapash ruraita ushanallachu carca. Shinaca jariyashca tucuimandami chai consejotaca na uyarca. Humilde cashpaca consejota uyashpami templomandaca uchalla llujshinman  carca. Shina rurajpica Jehová Diosca perdonanmanmi carca. Shinapash jariyashca tucushpa na uyashcamandami paitaca lepra unguihuan llaquichirca. Cai lepra unguitaca ‘huañungacamanbash na jambiri usharcachu’ (2 Crón. 26:16-21). Shinaca Uziasmandaca ¿imatata yachajui ushapanchi? Ima autoridadta charishpapash Jehová Diospa consejocunata na cazushpaca paipa ñaupapi nali ricuri ushashcatami yachajupashcanchi.

8. ¿Jobta consejajpica paica imashinata chashquirca?

⁸ Bibliapica consejocunata uyashcamanda Jehová Dios bendiciashca ejemplocunatami ricui ushapanchi. Jobpa ejemplomanda yachajupashunchi. Jobca Jehová Diospa ñaupapi ali ricuringapaj munashpapash juchayu caimandami pandarirca. Jobca ashtaca llaquicunata apajuimandami nali cosascunata nishpa pandarirca. Chaimandami Jehovapa consejota, Elihupa consejota chasquina tucurca. Shinaca Jobca, Elihú, Jehová Diospash consejajpica ¿imatata rurarca? Jobca ñucaca na intindishpa yangatami parlashcani. Ima nalita rurashcamanda llaquirishpami “ñutu alpapi, uchufapi tiarini” nijurcami. Cashna nishpami Jehová Diospa, Elihupa consejota uyashcata ricuchirca. Shinaca Job humildadta ricuchishpa, consejota uyashcamandami Jehová Diosca paitaca ninanda bendiciarca (Job 42:3-6, 12-17).

9. a) Jehová Moisesta consejajpica ¿Moisesca imatata rurarca? b) ¿Paica imamandata ñucanchipaca shuj alipacha ejemplo can?

⁹ Moisespash consejocunata uyashpa cazushcamandaca shuj alipacha ejemplomi can. Shuj viajeca Moisesca culiramandami shuj milagrota rurashpapash Jehová Diostaca na alabarca. Cashna pandarishcamandami Taita Dios carasha nishca alpagumanga ñana yaicui usharca (Núm. 20:1-13). Moisés chai pandarishcata yarishpa cutin llaquirijujpimi Jehová Diosca, ‘ña upallai. Chaitaca ama ashtahuan parlahuaichu’ nirca (Deut. 3:23-27). Shina nishca jipa llaquiyashpa, culirashpa quidanapa randica Jehovapa nishcatami uyarca. Chaimandami Jehová Diosca Moisestaca Israel llactata ñaupaman pushachun saquirca (Deut. 4:1). Jobpash Moisespash ñucanchicunapaca shuj alipacha ejemplocunami can. Jobca pai pandarishcataca na negarishpami pandarishcataca aceptarca. Moisespash Jehová Diosta uyashpami Jehová carasha nishca llactaguman ñana yaicui ushana cashpapash, Jehová Diostaca tucui shunguhuan sirvishpa catirca.

10. a) Proverbios 4:10-13​pi nishcashnaca ¿consejocunata chasquinaca ñucanchitaca imapata ayudan? b) Huaquin huauquipanicunaca consejota cujpica ¿imashinata chasquishca?

¹⁰ Ñucanchicunapash Jobpa, Moisespa ejemplocunata catishpaca alimi imatapash rurapashun (Proverbios 4:10-13​ta liipangui). Ashtaca huauquipanicunami cashna ejemplocunata catishca. Emmanuel * huauquigumanda ricupashunchi: Paica República Democrática del Congopimi causan. Cai huauquiguca ashtaca viajecunatami consejocunataca chasquishca. Paica “Congregacionmanda huaquin huauquicunami ñuca Jehová Diosmanda caruyagrijujta ricushpaca ayudahuarca. Paicunapa consejocunata uyaimandami ashtaca problemacunamanda jarcari ushashcani” ninmi. Shinallata Canadá llactamanda Megan shuti precursora paniguca ninmi: “Ñucapaca consejocunaca na siempre ñuca munashcashna cashcachu. Pero consejocunata uyanaca minishtirishcami cahuashca” nin. Shinallata Croacia llactamanda Marko shuti huauquiguca ninmi: “Congregacionbi shuj privilegiota chingachijpi huauquigucuna consejashcata uyanami ñucataca cutin Jehová Diosta ali sirvichun ayudahuarca nishpa.

11. ¿Huauqui Karl Kleinga imatata cuenta japirca?

¹¹ Huauqui Karl Kleinbashmi consejocunata uyashcamandaca beneficiarirca. Paica Cuerpo Gobernantepi sirvij huauquigumi carca. Paipa causaimanda parlashcapica huauqui Joseph Rutherfordhuan alipacha amigocuna cashcatami nin. Shuj punllaca huauqui Rutherfordmi paimanga  shuj consejota cushcarca. Paica callaripica chai consejotaca nali chasquishcatami parlan. Paica ninmi: “Cutin shuj punlla huauqui Rutherford ñucahuan tuparishpaca paica cushillami ñucataca ‘¿Imanallata cangui?’ nishpa saludahuarca. Shinapash ñucaca ashata risintirishca caimandami paitaca apenas saludarcani. Chaipimi huauquiguca: ‘Cuidado Diablopa trampapira urmanguiman’ nihuarca. Chaimi ñucaca pingai tucushpa, ‘na huauquigu imapash na pasanga’ nircani. Shinapash huauqui Rutherfordca, ñuca risintirishpa catishcata ricuimandami cutinllata nihuarca: ‘Karl cuidado, Diablopa trampapira urmanguiman’ nishpa. Huauquiguca ciertotami nijurca. Pipash ñucanchita consejashcamanda risintirishpa quidashpaca Diablopa trampacunapimi urmaita ushapanchi” * (Efes. 4:25-27). Huauquiguca Karl Kleinga huauqui Rutherfordpa consejota chasquishpami ali amigocuna cashpa catirca.

12. ¿Humilde canaca ñucanchitaca imapata ayudaita ushan? (Salmo 141:5).

¹² Humildadta charina. Humildecuna cashpami pipash ñucanchita consejajpica chasquishun. Humildecuna cashpami ñucanchicuna juchayu cashcata pandarijlla cashcatapash cuenta japishun. Imashinami ricuparcanchi Jobpashmi llaquicunahuan cashpaca pandacunata yuyarca. Shinapash pandacunata yuyajushcamanda consejajpica humilde caimandami, Elihú paimanda yali ashtahuan joven cajpipash paipa consejotaca chasquirca (Job 32:6, 7). Jehová Diosca Job humilde cashcamandaca ninandami bendiciarca. Humildecuna canaca ñucanchitaca ninandami ayudaita ushan. Huaquinbica pipash consejachunga na minishtinchichu yashpami pensaita ushapanchi. Shinapash humildecuna cashpami tucui consejocunata chasquipashun. Ñucanchimanda yalilla jovenllacuna consejajpipashmi chasquipashun. Canadá llactamanda shuj anciano huauquiguca ninmi: “Ñucanchicunaca ñucanchipa pandarishcacunataca shujcunashnaca na ricupanchichu. Chaimandami ñaupaman catingapaj munashpaca shujcuna consejachun minishtipanchi” nin. Tucuicunallatami Jehová Diospa espíritu santopa cualidadcunata charinata minishtipanchi (Salmo 141:5​ta liipangui).

13. ¿Consejocunataca imashinata ricuna capanchi?

¹³ Jehová Diosca ñucanchita juyaimandami consejan. Paica ñucanchicuna ali causachunmi munan (Prov. 4:20-22). Jehová Diosca ñucanchita juyaimandami Bibliahuan, publicaciongunahuan, huaquinbica Jehová Diosta tucui shungu sirvij huauquicunata utilizashpa consejan. Hebreos 12:9, 10​pica, ‘Diosca, ñucanchipallata ali cachunmi’ ñucanchitaca consejajun nijunmi.

14. Pipash consejajpica ¿imapita pensarina capanchi?

¹⁴ Imashina consejashcapi pensarinapa randica, imapi ñucanchita chai consejocuna ayudajtami ricuna capanchi. Huaquinbica pipash ñucanchitaca ñucanchi munashcashnaca na consejangachu. Pero pipash consejajushpaca facil consejocunata  chashquina shimicunahuanmi consejangapaj esforzarina can (Gál. 6:1). * Shinapash ñucanchicuna cutin consejota chasquinajushpaca imata ñucanchiman consejashcapimi pensarina capanchi. Aunque ñucanchi munashcashna na consejajpipash cashna tapuripashunchi: Ñuca munashcashna na consejajpipash ¿imamandata consejahuajun? ¿Cai consejo ñucataca imapita ayudaita ushahuan? nishpa. Shinaca pipash consejajpi chai consejocunata ñucanchicuna aprovechangapaj esforzaripashunchi (Prov. 15:31).

15. ¿Imamandata consejocunata mañanaca ali can?

¹⁵ Bibliapica consejocunata mañachunmi animan. Traducción del Nuevo Mundo Bibliapi Proverbios 13:10​pica, “ali yachaitaca consejota mañajcunallami charin” nijunmi. Pipash consejota nara cujpillata consejota mañajcunaca ashtahuanmi espiritualmente ñaupaman catin. Shinaca consejocunata mañanata yachajupashunchi.

16. ¿Imacunapillata ñucanchicunaca consejotaca mañaita ushapanchi?

¹⁶ ¿Ima cosascunapillata shuj huauquita o shuj panitaca consejota mañaita ushapanchi? Ricupashunchi. 1) Shuj paniguca shuj experienciata charij panigutami Bibliamanda estudiota cungapaj cumbachun invitan. Estudio jipaca paniguca imapi pai mejorana cashcatami tapun. 2) Cutin shuj soltera paniguca pantalongunata randigrijushpami experienciata charij paniguta maijan pantalonda randinashi ali canman nishpa tapun. 3) Cutin shuj huauquiguca primera vez congregacionbi discursota cugrijushpami experienciata charij huauquigutaca discursota cujujpica aliguta uyashpa, chai jipaca imapi mejoranatapash nihuangui nishpa mañan. Tauca huatacunata ña Jehovata sirvinajushpapash shina consejocunata mañanaca alimi canman.

17. Consejocunamanda beneficiaringapaca ¿imatata rurana capanchi?

¹⁷ Seguramente imahora cashpapash tucuicunallatami imapash consejotaca chasquiripanga. Huaquinbica Bibliapi, publicaciongunapimi consejocunataca taripanchi. Cutin huaquinbica shuj huauquigu o shuj panigumi ñucanchita consejaita ushan. Shinaca pipash consejajpi imashina consejashcapi pensarinapa randica, imapi ñucanchita ayudajta pensarishpami chai consejota pactachingapaj esforzarina capanchi. Shinami humildecuna cashcata ricuchi ushapashun. Ñucanchicunaca na tucuita yachashpa naciripanchichu. Shinapash consejocunata uyashpa, chasquishpaca Bibliapi nishcashnami ñucanchicunaca ali yachajushcacuna tucupashun (Prov. 19:20).