1, 2. a) ¿Imamandata huaquingunapaca autoridadta charijcunapi confianaca shinlli ricurin? b) ¿Caipica imatata yachajugripanchi?

 CUNAN punllacunapica autoridadta charij gentecunapi confianaca huaquingunapaca shinllimi ricurin. Leycuna tiajpipash autoridadta charij gentecunaca pobre gentecunapa favor tucunapa randica rico gentecunatallami ayudashca. Chaimandami paicunapi confianaca shinlli ricurishca. Chaimandami Bibliapipash: “Runaca, paipaj llaquipajllata caishuj runata llaquichishpa charina punllami chayan” nijun (Ecl. 8:9). Shinallata iglesiacunata ñaupaman pushajcuna nalicunata rurashpa causanajushcata ricushpami gentecunaca Diospi confianatapash saquishca. Bibliamanda yachachijushpaca Jehová Diospi confiai ushachun y paipa organizacionbi confiai ushachunbashmi ayudana capanchi.

² Jehová Diospi y paipa organizacionbi confianataca na Bibliamanda yachajujcunallaca yachajunachu can. Ashtahuangarin mashna huatacunata Jehovata sirvinajushpapash tucuicunallatami Jehovapi confianataca yachajuna capanchi. Jehová Dios tucuita ali ruraj Dios cashcataca siempremi confiashpa catina capanchi. Huaquinbica imapash situacionguna ricurijpimi Jehová Diospi tucui shungu confiashcata o na confiashcataca ricuchina tucun. Cai yachajuipica Bibliata liishpa na tucuita intindishpapash Jehovapi confiashpa catina cashcata, shinallata Jehovapa organizacionbi imapash instrucciongunata cujpi Jehová Diospi confiashpa catina cashcata, ashtahuanbash na yashcapi imapash llaquicuna ricurijpi Jehovapi confiashpa catina cashcatami yachajupashun.

3. ¿Bibliata liijushpa imacunatashi talvez tapuripanchiman?

 ³ Bibliata liijushpaca talvez Jehová Diosca ¿imamandashi huaquin gentecunataca juchata rurajpica perdonarca, cutin shujcunataca na perdonarca? ¿o imashpashi Jehová Diosca chai decisiondaca japirca? nishpami pensarinchiman. Por ejemplo Números libropica shuj runataca sábado punllapi yamdajushcamanda Jehová Dios huañuchichun mandashcata  ricuchin. Cutin segundo de Samuel libropica Rey David shuj cazada huarmihuan juchapi urmashca cajpipash y chai huarmipa cusatapash huañuchichun cachashca cajpipash Jehová Dios paita perdonashcatami ricuchin (Núm. 15:32, 35; 2 Sam. 12:9, 13). Cashna pasashcacunata liishpami huaquinbica ¿Jehová Diosca imamandashi Davidtaca cashna juchacunata rurajpipash perdonarca? ¿Cutin chaishuj runataca imamandashi na perdonarca? nishpa pensaita ushanchiman. Shinapash Bibliata liijushpaca cai quimsa yuyaicunata yaipi charipashunchi.

4. Génesis 18:20, 21 y Deuteronomio 10:17 textocunaca ¿imashinata Jehová Diospa decisiongunapi confiachun ayudan?

⁴ Bibliapica na siemprechu imapash pasashca cosascunamandaca tucui tucuita villan. Por ejemplo David paipa pandarishcacunamandaca tucui shungu arripintirishcataca alimi yachanchi (Sal. 51:2-4). Shinapash Números libropi parlashca yamdata japij runamandaca pai imashnapacha cashcata o chai nalita rurashcamanda arripintirishcata o Diospa mandashcata mashna viajecunalla cazushcata o na cazushcatapash na yachapanchichu. Aunque Bibliapi chai runamanda na tucui tucuita nijujpipash Jehová Dios ‘alitalla ruraj Dios’ cashcataca seguromi capanchi (Deut. 32:4). Gentecunami casi siempre shuj gentecunapa nishcacunata uyashpa catimanda pandarinchi. Pero Jehová Diosca nunca na pipash imatapash nishcamandalla o ñavita ricushpallaca juzganllu. Paica tucuita ali ali ricushpami imatapash ruran (Génesis 18:20, 21; Deuteronomio 10:17​ta liipangui). Shinaca Jehová Diosmanda y paipa mandashcacunamanda ashtahuan yachajushpaca, Jehová Diospa agllashca decisiongunapi ashtahuanmi confiapashun. Shinapash Bibliata liijushpa imapash tapuicuna umaman shamujpi chai tapuicunapa respuestata chai rato na charishpapash, ñucanchicunaca Jehová Dios “tucuipi justo Dios” cashcatami yarina capanchi (Sal. 145:17, TNM).

5. Juchayucuna caimandaca ¿imacunapita pandarinchilla? (“ Ñucanchicunaca juchayucuna caimandami Jehová Dios alita rurajpipash nalita rurashcatashna ricupanchi” nishca recuadrota ricupangui).

⁵ Ñucanchicunaca juchayucuna caimandami Jehová Dios alita rurajpipash nalita rurashcatashna ricupanchi. Jehová Dios ñucanchitaca paiman rijchajta rurashcamandami ñucanchicunapash nali cosascunataca nalicachipanchi (Gén. 1:26). Shinapash juchayucuna caimandami huaquinbica imatapash alimi yachanchi yashpa pitapash yangata imatapash nishpa pandarinchilla. Por ejemplo Bibliapi Jonás runaguta yaripashunchi. Paica Jehová Dios Nínive llactapi gentecunata perdonanata decidishcamandami ninanda culirarca (Jon. 3:10–4:1). Shinapash Nínive llactapi gentecunata Jehová Dios perdonanata decidishcamandami 120.000 gentecuna salvarirca. Shinaca Jehová Dios Nínive llactapi gentecunata perdonanata decidishpaca alitami rurarca. Jonasmi pandarijurca.

6. Jehová Diosca ¿imamandata paipa decisiongunamanda ñucanchiman explicana obligaciondaca na charin?

 ⁶ Jehová Diosca imata decidishpapash imamanda shina decidishcata explicana obligaciondaca na charinllu. Punda tiempocunapica Jehová Diosca imata decidishpapash paipa sirvijcuna chai decisiongunamanda imata yuyashcata parlachun saquircallami (Gén. 18:25; Jon. 4:2, 3). Huaquinbicarin imamanda shina decidishcatapashmi paipa sirvijcunamanga intindichin carca (Jon. 4:10, 11). Shinapash Jehová Diosca tucuita ruraj Dios caimandami imapash decisionda japishpaca chai decisionga alichu o nachu ali capan nishpa pitapash tapujunataca na minishtin. Paica tucuita ali yachaimandami imata rurangapapash ñucanchipa aprobaciondaca na minishtin (Is. 40:13, 14; 55:9).

7. ¿Huaquinbica imamandata ñaupaman pushaj huauquicunapi confianaca shinlli ricurita ushan?

⁷ Jehová Dios tucuita ali ruraj Dios cashcataca seguromi capanchi. Shinapash Jehová Dios nombrashca huauquicunapi confianami huaquinbica shinlli caita ushan. Chaimandami huaquinbica Jehová Dios nombrashca huauquicunaca ¿ciertopachachu Taita Dios nishcashna tucuita ruranajun? o ¿paicuna munashcashnachu imatapash ruranajun? nishpa talvez pensarijuringa. Israelitacunapa tiempopipashmi huaquin gentecunaca Moisespica na confiashcanga. Por ejemplo  párrafo 3​pi parlashca runaca sábado punllapi yamdata japishcamandami huañuchi tucurca. Chaimandami cai huañushca runagupa familiacunaca talvez ¿Jehová Dios huañuchi nishcamandacha huañuchirca? o ¿Moisespa munaicha huañuchirca? nishpa pensashcanga. Shinallata párrafo 3​pi parlashca Urías runagupa familiacunapash talvez rey Davidtaca ¿imamandashi na castigarca? Rey cashcamanda, charij cashcamandami na castigai tucushcanga nishpami talvez pensarianga. Shinaca Jehová Diospi confiani nijushpapash Jehová Dios ñaupaman pushachun agllashca huauquicunapi na confiashpaca, Jehová Diospi na confiashcashnallatami can. Jehová Diosca cai alpapica pitapash confiaimandami autoridadtaca cushca.

8. ¿Hechos 16:4, 5​pi nishcahuan ricujpica cunan tiempopica Jehová Diospa organizacionga imapita igual can?

⁸ Jehová Diosca paipa organizacionda ñaupaman pushangapaca aliguta cazushpa aliguta yuyashpa sirvij esclavotami utilizajun (Mat. 24:45). Paicunaca cuerpo gobernantepi sirvij huauquicunami can. Cuerpo gobernantemanda huauquicunaca Jesusta punda catijcuna rurashcashnallatami ruranajun. Paicunami Jehová Diospa organizacionda ali ricuriashpa ñaupaman pushaj anciano huauquicunamanbash instrucciongunata cunajun (Hechos 16:4, 5​ta liipangui). Cutin anciano huauquicunaca cuerpo gobernantemanda huauquicuna cushca instrucciongunata tucui huauquipanicunallata pactachichunmi ayudanajun. Jehová Diospi confiashcataca Jehová Diospa organización cushca instrucciongunata cazushpa, ancianocunatapash cazushpami ricuchita ushapanchi.

9. ¿Imamandata huaquinbica ancianocunata cazunaca shinlli ricurita ushanman?

⁹ Huaquinbica anciano huauquicuna ima decisionda japijpipash chai decisiongunata apoyanaca shinllimi caita ushan. Por ejemplo chairalla yalishca huatacunapica Salón del Reinota aliguta utilizana munaihuanmi anciano huauquicunaca, huaquin congregaciongunapica huauquipanicunata shuj congregaciongunapi tandanajuchun arreglocunata rurashca. Ñucanchicunata shina cambiocunata rurachun mañajpica ñucanchi familiacunata, amigocunata saquishpa shuj congregacionman cambiarinaca shinllimi ricurinman. Anciano huauquicunamanga huauquipanicuna maijan congregacionman rinata Jehová Diospacha na nishcamandami anciano huauquicunapa nishcata cazunaca shinlli huaquinbica ricurita ushan. Shinapash Jehová Diosca anciano huauquicuna shuj ali decisionda agllanapimi confian. Chaimandami Jehová Dios paicunapi confiajpica ñucanchipash ancianocunapica confiaita ushapanchi. *

10. Hebreos 13:17​pi nishcashnaca ¿imamandata anciano huauquicunapa decisiongunataca apoyana capanchi?

 ¹⁰ Ñucanchi ricuipi nalishnalla cajpipash ¿imamandata anciano huauquicunapa decisionda apoyanaca ali can? Anciano huauquicunapa decisionda apoyashpaca tucuicunallata tandanajushpa ali llevarichunmi ayudan (Efes. 4:2, 3). Congregacionbica tucuicunallata humilde cashpa ancianocunapa decisiongunata apoyajpimi congregacionbica tucui ali llujshin (Hebreos 13:17​ta liipangui). Shinaca anciano huauquicunapa decisionda apoyashpaca Jehová Diospi confiashcatami ricuchinajupanchi. Anciano huauquicunataca Jehová Diosmi congregaciongunata cuidachun churarca (Hech. 20:28).

11. Anciano huauquicunapi ashtahuan confiangapaca ¿imata ñucanchitaca ayudaita ushan?

¹¹ Anciano huauquicunaca ima decisionda japingapapash siempremi Jehová Diospa espíritu santota mañanajun. Anciano huauquicuna imata rurana cashpapash Jehová Diosta siempre mañajta yarinami paicunapi ashtahuan confiachun ayudaita ushan. Paicunaca ima decisionda japingapapash siempremi Bibliapi yachachishcashna imatapash rurangapaj esforzarin. Shinallata Jehová Diospa organizacionbi cushca instrucciongunatapashmi paicunaca ali catinajun. Anciano huauquicunaca Jehová Diospa ñaupapi ali ricuringapaj congregacionbi huauquipanicunatapash aliguta cuidashpa ricungapami esforzarin. Anciano huauquicunaca paicuna imashna congregacionbi huauquipanicunata cuidashcamanda Jehová Diospa ñaupapi responsable cashcataca alimi yachan (1 Ped. 5:2, 3). Cai mundopica gentecunaca shuj shuj llacta cashcamanda, shuj shuj religionda charishcamanda, shuj shuj política partecuna caimandami paipuraca na ali llevari ushan. Shinapash Jehová Diosta sirvijcunaca Jehová Diosta ali adoraimandami shujllashna tandanajushca capanchi. Y Jehová Diospa ñaupapi alita ruranajushcamandami cashna bendicionda charipanchi.

12. ¿Imashinata anciano huauquicunaca shuj persona juchata rurashca jipa ciertopacha arripintirishcata o na arripintirishcata ali ricuita ushan?

¹² Jehová Diosca anciano huauquicunamanga congregacionbica shuj jatun responsabilidadtami cushca. Ancianocunaca congregacionbica huauquipanicuna shuj limpio causaita charichunmi ayudashpa ricurianajun. Chaimandami congregacionbi pipash shuj jatun juchata rurajpica anciano huauquicunaca congregacionmanda expulsanata o na expulsanata ricuna responsabilidadtami charin. Shinallata juchata rurashcamanda arrepintirijpipash ciertopacha arripintirishcata yachangapami ali ali investigana can. Juchata rurashcamanda arripintirishcami cani nijpipash ancianocunaca ¿ciertopachachu chai juchataca ricuitapacha na ricunayachijun? ¿Cutinga chai juchataca na ruranatapachachu pensajun? O nali cumbacunahuan tandanajuimanda juchapi urmashca cashpaca ¿chai nali cumbacunahuan ama llevarishpa catingapaj dispuestochu can? nishpami ali ali ricuna can. Shinaca anciano huauquicunaca shuj ali decisionda japingapaca, Jehová Diosta mañashpami Bibliapi consejocunatapash catingapaj esforzarin. Juchata rurashca persona imashina sintirijujtapashmi ali ali intindingapaj esforzarin. Shinaca cai situacionda ali ali investigashparami congregacionmanda expulsanata o na expulsana decisiondapash ancianocunaca japita ushan. Shinapash huaquinbica ancianocunaca juchata rurashca personataca expulsanatami decidin (1 Cor. 5:11-13).

13. Familiamanda pitapash expulsajpi o shuj ali amigota expulsajpica huaquinbica ¿imatata pensai ushanchiman?

¹³ Congregacionbi anciano huauquicunapi confiashcata o na confiashcataca ¿imashinata ricuchita ushapanchi? Por ejemplo congregacionmanda shuj huauquita o shuj panita expulsashcata uyashpaca talvez na imatapash nipashunllu. Shinapash ñucanchi familiamanda pitapash expulsajpi o ñucanchipa ali amigota expulsashcata uyashpaca talvez anciano huauquicunapa decisionhuanga na de acuerdo cashunllu. Chaimandami huaquinbica ¿chai personataca ciertopachacha expulsana carca? o ¿anciano huauquicunaca Jehová Dios mandashcashnacha juzgarca? nishpaimanmi pensai ushapanchi. Shinaca shina pasajushpaca ¿imata anciano huauquicunapa decisiongunapi confiachunga ayudanga?

14. Shuj familiarta o shuj amigota congregacionmanda expulsajpica ¿imatata yaipi charina capanchi?

 ¹⁴ Pensaripashun, expulsana arregloca congregación nali ruraicunamanda limpio cachun, shinallata juchata ruradorpash nalicunamanda arrepintirishpa Jehová Diosman tigrachunmi ayudaita ushan. Jatun juchata ruradorta congregacionmanda na expulsajpica congregacionbi huauquipanicunatami nali ruraicunahuan pandachita ushan (Gál. 5:9). Shinallata juchata ruradorta na expulsashpaca pai nalita rurajushcataca na cuenta japingachu. Ashtahuangarin paipa causaipi nali ruraicunata saquishpa, Jehová Diospa ñaupapi ali cangapapash na imatapash rurangachu (Ecl. 8:11). Juchata rurajpi expulsana decisionda anciano huauquicuna japishpaca ali ali ricushpa decidijtami seguro cana capanchi. Anciano huauquicunaca punda tiempo israelitacunapa juezcunashnami can. Paicunaca na yanga runapa randi juzganajushcata, ashtahuangarin Mandaj Diospa randi juzganajushcatami yarina can (2 Crón. 19:6, 7).

15. Jehovapa instrucciongunapica ¿imamandata cunan punllacunapillata ashtahuanbachaca confiana minishtirishca can?

¹⁵ Cai mundopi nali cosascunaca ñallapachami tucuringa. Chaimandami cunanmandallata Jehová Dios tucuita aliguta rurajujta tucui shunguhuan confiana capanchi. Porque ninan manllanai llaqui punllacuna chayamujpica Jehová Diosca ñaupaman pushaj huauquicunata utilizashpami seguramente ñucanchimanga instrucciongunataca cunga. Y chai instrucciongunaca ñucanchipa ricuipica talvez chai tiempopica nalishnallami ricurita ushanga. Pero chai horascunapica ¿cai instrucciongunaca ciertopachachu Jehovamanda shamun? O huauquicunapa munaillacha cai decisiongunataca japishca nishpa pensajuna tiempoca na cangachu. Shinaca chai punllacuna chayamujpi Jehová Diospi y paipa organizacionbi confiai ushangapaca, cunan punllacunapillatami Jehová Diospa organizacionbi cushca instrucciongunata ñucanchicuna imashina chasquinajushcapi pensarina capanchi. Cashna pensarinami ñucanchitaca jipa punllacunapipash ayudanga. Shinaca cunan punllacunapillata Jehová Dios ñaupaman pushaj huauquicunaman cushca instrucciongunapi confiana, cazunami ninan manllanai llaqui punllacuna chayamujpipash instrucciongunataca confiashpa, cazushpa catipashun (Luc. 16:10).

16. ¿Imahorata Jehová Diospi confiashcata ashtahuanbachaca ricuchina canga?

¹⁶ Caipipashmi pensarina capanchi: Jehová Dios paita na cazujcunata tucuchina punlla chayajpica ñucanchicunaca imashinashi ricushun nishpa. Cunangunapica Taita Diospa tucuchina punllacuna nara chayamujpillata ashtaca Jehovata na rijsij gentecuna, ñucanchi familiacunapash Jehovamanda rijsishpa, paita sirvina oportunidadta charijtami yachapanchi. Shinapash Armagedón punlla chayamujpica Jehová Diosca Jesusta utilizashpami paita na cazuj gentecunahuan imata ruranata ricunga (Mat. 25:31-33; 2 Tes. 1:7-9). Chai punllacunapica picunalla salvarina cashcata o na salvarina cashcataca ñucanchicunaca na decidishunllu. Jehová Diosllami chaitaca  decidinga (Mat. 25:34, 41, 46). Shinaca paita na cazuj gentecunahuan Jehová Dios imata ruranata decidijpipash ¿Jehová Diospi confiashpa catipashunllu? o ¿Jehová Diosca nalitami rurashca nishpaimanllu pensapashun? Shinaca jipa punllacunapi Jehová Diospi tucui shunguhuan confiashpa cati ushangapaca cunanmandallatami Jehová Diospi ashtahuan confiangapaj esforzarina capanchi.

17. ¿Jehová Diospa decisiongunamandaca cai alpapi causaica imashinata canga?

¹⁷ Paraíso alpagupi ña causajushpa y chaipi Jehová Diospa decisionguna tucui ali cashcata ricushpaca ¿imashinashi sintiripashun? Chai tiempopica panda religionguna, ashtaca culquitalla charingapaj munaj negociocunapash ñana tiangachu. Shinallata cai alpamanda gobiernocunapash gentecunataca ñana llaquichishpa catingachu. Unguicunapash, huañuipash payayana, rucuyanapash ñana tiangachu. Ashtahuanbash Satanasta y paipa demoniocunatapashmi 1.000 huatacunacaman vichashpa saquinga. Satanaspa culpamanda cai alpapi tiashca tucui nali cosascunami tucuritapacha tucuringa (Apoc. 20:2, 3). Chai punllacunapica Jehová Dios tucuita aliguta rurashcata ricushpaca ninandami cushijupashun. Paipi confiashcamandapash nunca na arrepintiripashunllu.

18. Números 11:4-6 y 21:5​mandaca ¿imatata yachajui ushapanchi?

¹⁸ Paraíso alpagupi ña causajushpapash Jehová Diospi confiashcata o na confiashcata ricuchinaca minishtiringa. Por ejemplo israelitacunahuan ima pasashcata ricupashunchi. Paicunaca Egiptopica esclavo shinami causarca. Shinapash Jehová Diosmi paicunataca Egiptomanda llujchishpa salvarca. Egiptomanda paicunata salvashca jipallami paicunaca Egiptopi cashpa imacunatalla micushcata yarishpa Jehová Dios carashca maná micunagumanda quejari callarirca (Números 11:4-6; 21:5​ta liipangui). Ñucanchicunapashchu ninan manllanai llaqui punllacuna yalishca jipaca ¿israelitacunashnallata comportarita ushapanchiman? Na yachapanchichu. Por ejemplo cai mundo entero shuj juyailla paraíso alpagu tucuchunga callaripica talvez ashtaca tiempotami shinllita trabajashpa arreglana tucunga. Y chai pasajpica ñucanchicunaca ¿imashinashi comportarishun? Chai tiempopi Jehová Dios ñucanchiman imaguta carajpipash ¿quejarinajushunlla? O ¿imatata rurashun? Shinaca cunan punllacunapillata Jehová Dios imaguta carajpipash agradecido cashpaca jipa punllacunapipashmi Jehová Dios imaguta carajpipash agradicishcata ricuchishun.

19. Cai temapica ¿imacunatallata yachajupashcanchi?

¹⁹ Jehová Diosca imaguta rurashpapash siempremi ali ricushpa ruran. Chaimandami Jehová Dios imata cashpapash siempre alita ruraj Dios cashcapi confiana capanchi. Shinallata Jehová Dios ñaupaman pushachun nombrashca huauquicunapipashmi confiana capanchi. Ñucanchiman instrucciongunata cungapaca cai huauquicunatami Jehová Diosca utilizajun. Ñucanchica profeta Isaiasman Jehová Dios nishca shimicunatami siempre yaipi charina capanchi. Chaipica: “Ñucata yariajlla causashpa casilla shuyashpami, shinlli tucunguichi” nijunmi (Is. 30:15).