Ñuca papito y ñuca mamitaca catolicocunami carca. Shinapash Taita Diospa shutita Bibliapi rijsishpami paicunaca testigo de Jehovacuna tucurca. Ñuca papitoca Jesuspa imagengunata rurashpami trabajan carca. Shinapash testigo de Jehová tucushpami imagengunata ruranataca saquirca. Carpintero caimandami ñuca papitoca ñucanchi causanajuj huasi primer pisotaca Salón del Reino cachun arreglarca. Chai Salón del Reinomi Filipinas, San Juan del Monte llactapica primer Salón del Reino carca.

Ñucaca 1952 huatapimi nacirircani. Chuscu huauquicunata y quimsa panicunatami charipani. Ñuca papito y ñuca mamitaca tucui ñucanchicunamanmi Jehová Diosmandaca yachachirca. Ñuca papitoca uchillagumandapachami cada punllacuna Bibliata liichun animahuan carca. Huaquin publicaciongunata utilizashpami yachachihuan carca. Huaquinbica ñuca papito y ñuca mamitaca superintendentecunata y betelitacunatami huasimanga invitan carca. Experienciacunata parlashpami paicunaca ñucanchita animan carca. Chaimi Jehová Diosta ashtahuan sirvina munaita chariparcanchi.

Ñuca taitamamacunaca shinlli fetami charirca. Ñuca mamitaca ungushca caimandami huata 1971​pi huañuparca. Ñuca papitohuanga precursor regularcuna tucurcanchi. Ñuca ña 20 huatacunata charijpimi ñuca papitoca año 1973​pi huañuparca. Ñuca mamita y papito huañujpica solollami sintirircani. Pero huañushcacuna causarina esperanzami ñucataca emocionalmente y espiritualmente shinlli cachun ninanda ayudahuarca (Heb. 6:19). Ñuca taita huañushca jipallami ñucataca precursor especial cachun nombrahuarca. Chaimi Coron islapi sirvingapaj rircani.

21 añosta charishpami Coron islapi sirvi callarircani. Ciudadpi causashcamandami Coron islapi causanaca difícil cahuarca. Porque chai islapica michapash, alcantarilladopash, carrocunapash, motocunapash na tiarcachu. Huauquipanicuna tiajpipash villachingapaj shuj precursor cumbataca na charircanichu. Chaimandami predicangapaca sololla rin carcani. Primer quillaca ñuca familiata, ñuca amigocunata extrañaimandami llaquilla sintirin carcani. Cada tutami huacai huacai estrellacunataca ricujun carcani. Ñuca  asignacionda saquishpami ñuca huasiman tigrangapaj munan carcani.

Sololla sintirishpaca, imashina sintirishcatami Jehovamanga tucuita parlan carcani. Bibliapi y publicaciongunapi liishcata yuyarishpami animarin carcani. Salmo 19:14​ta yarishpami Jehová Dios imatalla rurashcata, imashina cashcata pensarijun carcani. Shina pensarijushpami Jehová Diosca ñucapa ‘jatun Rumishna, ñucata quishpichij’ Taita Dios cashcata cuenta japircani. La Atalaya revistapi “Usted nunca está solo” a nijuj temami ñucataca ninanda ayudahuarca. Cutin cutinmi chai revistataca liijun carcani. Sololla caimandaca, Jehová Diosta mañangapaj, estudiangapaj, estudiashcapi pensaringapami tiempotaca aprovechan carcani.

Coron islaman chayashca jipallami anciano cachun nombrahuarca. Chai islapica ñucalla Testigo caimandami, Escuela del Ministerio Teocraticota, Reunión de Serviciota, Estudio de Libro de Congregacionda y Estudio de La Atalayatapash ñucalla dirigin carcani. Shinallata, cada semanami discurso publicotapash cun carcani. Ashtaca cosascunata ruranata charimandami, sololla sintiringapaca ni tiempotapash na charircani.

Coron islapi predicanaca alipachami carca. Tiempohuanga ñuca estudiantecunaca bautizarircami. Pero chaipi predicanapash huaquinbica shinllimi carca. Por ejemplo, maipi pacarinata na yachashpapashmi, territorioman chayangapaca chaupi punllata purishpa chayan carcani. Ñuca congregacionhuanga tauca islacunapimi villachin carcanchi. Chai islacunaman chayangapaca lanchapimi rin carcanchi. Huaquinbica tamiamanda o huairamandami lanchapi rinaca peligroso carca. Ñucaca nadaitapash na ushanllu carcani. Pero Jehová Diosca siempremi cuidahuarca y ayudahuarca. Chai asignacionga shinlli cashpapash shamuj asignaciongunapica ninandami ayudahuarca.

1978 huatapica, Australia llactapi Papúa Nueva Guinea llactamanmi cachahuarca. Papúa Nueva Guinea llactaca urcucunalla llacta y casi España llacta tantoshnami can. Chai llactapica más o menos 3 millón gentecunami tiarca y más de 800 yali idiomacunatami parlan carca. Pero casi tucuilla gentecunami tok pisin idiomata parlan carca.

Primeroca Port Moresby llactapi inglés congregacionmanmi cachahuarca. Pero chai congregacionbica na unaita pararcanichu. Porque tok pisin idiomata parlaj congregacionmanmi rircani. Chaiman rishpaca, chai idiomatami yachajui callarircani. Yachajushca palabracunataca predicacionbimi utilizai callarircani. Chaimi chai idiomataca ñapash yachajui usharcani. Asha tiempopillami tok pisin idiomapi discursocunata cui callarircani. Casi huatata Papúa Nueva Guinea llactapi cajpimi superintendente de circuito cachun nombrahuarca. Chaimi tok pisin idiomata parlaj congregaciongunata visitai callarircani.

Congregacionguna carupi cajpimi, tauca asamblea de circuitocunata organizaimandaca viajashpalla yalin carcani. Chairalla chayashpaca, Papúa Nueva Guinea llactata, chaipi idiomata, costumbrecunatapash na yacharcanichu. Chaimandami sololla sintirin carcani. Chai llactaca urcucunalla jundami carca. Chaimi congregaciongunata chaquilla visitagrinaca shinlli carca. Cada semanami avionbi rin carcani. Huaquinbica rucu rucu avionbimi ñucalla rijun carcani. Avionbi rinataca lanchapi rinatashnami manllan carcani.

 Chai tiempopica huaquin gentecunallami telefonotaca charin carca. Chaimi congregaciongunahuan en contacto cangapaca cartacunata escribin carcani. Pero huaquinbica, ñucarami cartacunataca mishashpa chayan carcani. Chaimi huauquipanicunapa huasiman chayangapaca, gentecunata tapui tapui chayan carcani. Chayajpica huauquipanicunaca cushijushpami chasquihuan carca. Chaimi huauquipanicunata visitangapaj rishcamandaca ninanda cushijun carcani. Chai punllacunapi Jehová Dios siempre ayudajushcata ricushpami, Jehová Diostaca ashtahuan juyarcani.

Bougainville islaman chayajpi primera reunionbica, shuj matrimoniomi ñucapamanga cushilla quimirirca. Paicunaca “ñucanchitaca yaringuichu” nishpami tapuhuarca. Chaimi “ari cangunataca yarinimi” nircani. Port Moresby llactaman chayashpami paicunamanga shuj tiempoguta Bibliamanda yachachijurcani. Paicunaman yachachishpa catichunga shuj huauquimanmi mingarcani. Paicunahuan cutin tuparijpica paicuna ña bautizarishca cashcata yachashpami cushijurcani. Papúa Nueva Guinea llactapi quimsa huatacunata cashpaca shuj shuj bendiciongunatapashmi charipashcani.

Año 1978​pimi Coron llactamandaca rircani. Pero chai llactapica, shuj juyailla, cushilla, trabajadora panigutami rijsircani. Paica Adel shutimi carca. Adelca paillagumi ishcai huahuacunata viñachishpa paipa mamitapash cuidajurca. Chai jahuapashmi precursora regular carca. Paipa huahuacunaca Samuel y Shirley shuticunami carca. Año 1981​pimi Adelhuan cazarangapaca Filipinas llactaman tigrarcani. Ishcandimi precursor regularcuna carcanchi. Ñucanchi familiatapashmi cuidanajurcanchi.

Aunque shuj familiata ña charijpipash, año 1983​pica precursor especial cachunmi nombrahuarca. Chaimi Palawan provinciapi Linapacan islaman cachahuarca. Chai islaca carupipachami carca, ni shuj Testigopash na tiarcachu. Shina cajpipashmi ñucanchicunaca tucuilla chaipi sirvingapaj rircanchi. Ña más o menos shuj huatata chaipi cajpimi, Adelpa mamitaca huañurca. Ñucanchica ninandami llaquirircanchi. Pero predicacionbi, estudiocunapi ocuparishpami chai llaquitaca aguantai ushaparcanchi. Chai islapica ashtaca gentecunami Bibliata estudiashpa progresai callarirca. Chaimi tandanajuicunapa shuj Salón del Reinota minishtinajuimandaca shuj uchilla salonguta ruraparcanchi. Solo quimsa huatacuna jipallami, 110 personacuna Conmemoracionmanga shamurca. Chai tucui gentecuna shamujta ricushpaca, cushijushcapachami caparcanchi. Ashtaca gentecunaca ñucanchi chai islamanda rishca jipallami bautizarirca.

Huata 1986​pica, Culion shuti islamanmi cachahuarca. Chai islaman chayashcamanda asha tiempo jipallami Adeltapash precursora especial cachun nombrarca. Chai islapica, lepra unguita charij ashtaca gentecunami tiarca. Lepra unguimandami paicunapa cuerpoca llaquinai carca. Chaimi paicunaman predicanataca manllan carcanchi. Pero chai islapi causaj publicadorcunaca,  chai gentecunaca ñami lepra unguipa tratamientota chasquishca, leprahuanga na contagiaringuichichu nishpami animarca. Chaimi seguro sintirishpa, lepra unguita charij gentecunamanga cushijushpa predican carcanchi. Shuj panigupa huasipi reunionguna tiajpimi huaquingunaca chaiman ri callarirca. Leprata charij gentecunaca ni Taita Diospash, ni gentecunapash na ricunayachinllu yashpami pensan carca. Pero Bibliapi nishcashna shamuj punllacunapi sano canata yachajushpaca, cushillami sintirin carca (Luc. 5:​12, 13).

Ñucanchi huahuacuna Culion islapi yacharichunga, Coron islamanda ishcai joven panigucunatami invitarcanchi. Shinami ñucanchi huahuacunaca ali amigocunata charirca. Paicunaca huahuacunamanmi Taita Diosmanda yachachin carca. Cutin ñucanchicunaca, chai huahuacunapa taitamamacunamanmi Bibliamandaca yachachin carcanchi. Shuj tiempoca 11 familiacunamanmi yachachinajurcanchi. Ashtaca gentecuna progresai callarijpimi shuj mushuj congregación formarirca.

Callaripica ñucallami chai pushtupica anciano carcani. Culion islapica 8 publicadorcunami tiarca. Cutin Marily pueblopica 9 publicadorcunami tiarca. Chaimi sucursalmanda huauquicunaca, paicuna reuniongunata cada semana charichunga, chai pushtucunapi reuniongunata rurachun cachahuarca. Marily puebloman chayangapaca, quimsa horastami lanchapi rin carcanchi. Reunión tucurishca jipaca, tucuillami caruta purishpa Halsey shuti pueblopi gentecunaman Bibliata yachachingapaj rin carcanchi.

Tiempohuanga Marily y Halsey pueblopi ashtaca gentecuna bautizarijpimi, cada pueblopi shuj Salón del Reinota rurarcanchi. Chai pueblomanda gentecunapash y huauquipanicunapashmi Salón del Reinota rurachunga materialcunata churarca. Marily pueblopi salonga 200 gentecunapami carca. Y chai salondaca asambleacunapapash utilizanallami carca.

Ñucanchi huahuacuna ña jatunyajpimi año 1993​pica Filipinas circuitopi sirvi callarircanchi. Año 2000​pica Escuela de Entrenamiento Ministerialpi instructor cachunmi shuj capacitacionda cungapaj invitahuarca. Chai responsabilidadtaca na pactachi ushashachu yarcanimi. Shinapash Adelca, chai responsabilidadta pactachi ushachunga Jehová Diosllatami ayudanga nishpami animahuajurca (Filip. 4:13). Adel chaita nishpaca  ciertotami nijurca. Porque paica ungushca cashpapash Jehovapa ayudahuanmi paipa asignaciondaca pactachishpa catijurca.

Huata 2006​pica ñuca huarmigu párkinson unguita charishcata yachaj chayashpaca ninandami llaquirircanchi. Chaimi ñuca huarmigutaca asignacionda saquishunlla nircani. Pero paica “shuj doctortalla mascapai. Jehová Diospa ayudahuanga ñucanchi asignaciondaca pactachi ushashunmi” nihuarcami. 6 añostami Adelca na quejarishpalla Jehová Diostaca sirvijurca. Ñana puri ushashpaca silla de ruedaspi rishpami predican carca. Ñana parlai ushashpapash, shuj o ishcai palabragucunatalla nishpami reuniongunapica comentan carca. Ashtaca huauquipanicunami ñuca huarmigu aguantajushcamandaca cartacunata, mensajecunata escribin carca. Ñuca huarmiguca 2013​pimi huañuparca. Paihuanga 30 añostami Jehová Diostaca igual sirviparcanchi. Paica ñucapa juyashca cumbagumi carca. Pai huañujpica cutinmi sololla sintirircani.

Ñuca huarmigu munashcashnami ñuca asignaciondaca pactachishpa catircani. Ocupado yalimandami na yapa sololla sintirin carcani. 2014​manda 2017​camanmi ñucanchi obrata prohibishca llactacunapica tagalo shimita parlaj congregaciongunata visitajurcani. Chai jipaca tagalo shimita parlaj congregaciongunatami Taiwán, Estados Unidos y Canadá llactacunapi visitajurcani. Cutin huata 2019​pica India y Tailandia llactacunapimi inglés shimipi Escuela para Evangelizadores del Reino tiarca. Chaipimi instructor carcani. Jehová Diosta sirvishpa ashtahuan ocupado yalishpaca ashtahuan cushillami sintirini.

Maipi sirvishpapash ñuca huauquipanicunataca ninandami juyashcani. Chaimi shuj congregacionman rina tucujpica difícil cashca. Pero chai ratocunapica Jehová Diospi tucui shunguhuan confianatami yachajushcani. Jehová Diospa ayudataca cutin cutinmi ricupashcani. Chaimi ima cambiocuna tiajpipash Jehová Dios ayudanataca tucui shungu confiapani. Cunanga Filipinas llactapimi precursor especial shina sirvijupani. Ñucapa mushuj congregacionbica contentomi sintiripani. Paicunami ñucapa familia can, ninandami cuidahuan. Samuel y Shirleypash paicunapa mamapa ejemplota catishpa Jehovata sirvinajushcamandaca cushijushcami capani (3 Juan 4).

Ñuca juyashpa huarmigu llaquinaita sufrishpa huañujta ricunaca dificilmi capashca. Shinallata ñuca causaipica ashtaca cambiocunata y shuj shuj pruebacunatapashmi charipashcani. Pero Jehová Diosca, tucui horas ñucapa “ladopi” cashcatami cuenta japishcani (Hech. 17:27). Masqui gentecuna na tiashca pushtucunapi cajpipash Jehová Diosca paipa sirvijcunataca siempremi ayudan (Is. 59:1). Jehová Dios ñucapa shuj jatun Rumishna cashcamandaca ninandami agradicipani. Paica siempremi ñucahuan cashca. Nunca na sololla capashcanichu.