Estados Unidos llactapimi huata 1954​pi nacirircani. Católico familiapimi viñarcani. Ñucaca 5 huauquipanicunamandaca cati churimi cani. Católico escuelapi estudiajuimandami misacunapipash curacunata ayudan carcani. Pero Bibliamandaca ashagutallami yacharcani. Tucuita ruraj Dios tiashcata yachashpapash iglesiapa nishcacunapica ñana crinllu carcani.

Primer huatata William Mitchell universidadpi Derechota estudiajujpimi ishcai Testigocuna ñuca huasiman chayamurca. Chai rato tajshajujta ricushpami jipaguman tigramupashun nihuarca. Paicuna tigramujpica ¿imamandata nali gentecunara cushilla causan?, cushilla causangapaca ¿imatata rurana cani? nishpami tapurcani. Chaimi paicunaca La verdad que lleva a vida eterna librota, shinallata Traducción del Nuevo Mundo de las Santas Escrituras verde Bibliata carahuarca. Bibliamanda yachajungapaj munanguichu nijpimi ari nircani. Bibliamandaca ashtacatami yachajurcani. Diospa Reinolla shuj ali  gobierno cana cashcata, Diospa Reino cai Alpata mandana cashcatapashmi yachajurcani. Cunanbi tiashca gobiernocuna gentecunata sufrichishpalla causajujtapashmi yachajurcani.

Huata 1982​pimi Jehová Dios candallami siempre sirvisha nishpa Jehovata mañarcani. Chai huatapillatami “Verdad del Reino” Quimsa Punlla Jatun Tandanajuipi bautizarircani. Caica St. Paul Civic Center estadiopimi carca. Shuj semana jipallami cutin chaimanllata abogado tucungapaj examengunata cungapaj rircani. Ña Octubre quilla callarijujpimi ña abogadomi cangui nishpa villahuarca.

Chai jatun tandanajuipimi Brooklyn llactamanda Betelpi sirvij Mike Richardson huauquita rijsircani. Chai huauquimi oficina de asuntos legales Jatun Betelpi tiashcata villahuarca. Chaita uyashpami Hechos 8:36​pi Etiopía llactamanda runagu imata nishcata yarircani. Chaimi Asuntos Legales oficinapi ayudangapaca ¿imata jarcahuan? nishpa tapurircani. Chai jipallami Betelpi sirvingapaj solicitudta jundachircani.

Ñuca testigo de Jehová tucuchunga ñuca taitacunaca na munarcachu. Ñuca taitaca abogado cachunga imapita Watchtowerpi trabajanaca candaca ayudanga nihuarcami. Chaimi ñuca chaipi ayudajushcamandaca 75 dolarcunatami cugrihuan nircani. Chai tiempopica 75 dolarcunatami betelitacunamanga cun carca.

Shuj juzgadopi chairalla trabajai callarishcamandami na uchalla Betelpi ayudai usharcani. Huata 1984​pimi Brooklyn llactamanda Betelpi ayudai callarircani. Ñucataca Asuntos Legales oficinapi ayudachunmi mañahuarca. Nara Betelman rishpallata tribunalcunapi trabajanami leycunata ali rijsichun ayudahuarca.

Noviembre de 1983​pimi Testigocunaca Stanley teatrota randirca. Chai teatroca Nueva Jersey llactapimi carca. Huauquicunaca chai teatropi cutin michata, yacuta churangapami permisocunata llujchirca. Shinapash chaipi shuj Tandanajui Huasita ruragrinajunchi nishpa autoridadcunaman villajpimi permisocunataca negarca. Chai llactamanda leycunapica negociocuna tiaj pushtucunapi tandanajui huasicunata rurachunga na saquinllu carca. Stanley teatroca negociocuna tiaj pushtupimi carca. Chaimandami autoridadcunaca permisocunataca na curca. Permisocunata na cujpimi huauquicunaca shuj juiciota catirca. Shinapash chai juiciotaca na ganarcachu.

Betelpi ña primera semanata ayudajujpimi Jehovapa organizacionga tribunal federal de  distritoman chai juiciotaca cacharca. Minnesota llactamanda tribunal federal de distritopica 2 huatatami trabajarcani. Chaimandami chai casocunapi imata rurana cashcataca alipacha yacharcani. Ñucanchi lado abogadoca Stanley Teatropi peliculacunata, rockerocunapa conciertocunata rurashcatapashmi villarca. Chaicunata rurashca cashpapash imamandata Taita Diosmanda yachajuchunga shuj tandanajui huasita rurachunga na saquinguichi nishpami tapurca. Chaimi tribunalca Testigocunapa derechocunataca na respetashcachu nishpa Jersey City llactamanda autoridadcunataca permisocunata cuchun mandarca. Shinami Jehová Dios paipa organizacionda ayudajujta cuenta japircani. Jehová Diosca ima pasajpipash paipa munai pactarichunga imatapash ruranllami. Ñucapash imagupillapash ayudashcamandaca ninandami cushijuni.

Ña permisocunata charishcamandami Stanley teatrotaca shuj huata nara tucurijpillata huauquipanicunaca arreglarca. Arreglashca jipami 8 de septiembre de 1985​pica Galaad Escuelapa clase 79​pa graduacionda chaipi shinarca. Chai punllamandami Jersey City jatun tandanajui huasi nishpa chai teatrotaca rijsi callarircanchi. Shuj abogadocunahuan Jehovapa organizacionda ayudashcamandapashmi cushilla sintirircani. Shina ayudanaca shuj ladocunapi trabajanata yalimi cushichihuan. Jehová Diosca ashtacatami bendiciahuashca.

1980 huatacunapica huaquin hospitalcunapi, shuj shuj doctorcunapash Testigocuna yahuar illaj operaringapaj munajpica na respetanllu carca. Ashtahuanbachaca vijsayu panigucunatami problemacunata shinan carca. Juezcunaca llullu huahuagu ama mama illaj quedachunmi Testigo panigucunataca yahuarta churarinami canguichi nishpa obliganajurca.

29 de diciembre de 1988​pica Denise Nicoleau panigumi huahuaguta ungushca jipalla shuj hemorragiata charirca. Chaimi yahuar illaj quedajujta ricushpa doctorca yahuarta churangapaj permisota cuhuai nishpa atichijurca. Shina nijujpipash paniguca na yahuarta churaringapaj munarcachu. Chaimandami doctorcunaca cayandi punlla shuj juezpaman rishpa yahuarta churangapaj munanchi nishpa shuj permisota firmachirca. Doctorcunaca paniguman ni paipa cusamanbash na villashpami firmachingapaj rishcarca.

Viernes 30 de diciembretaca panigupa cusa, paipa familiacunapash yahuarta ama churaichichu ninajujpipash doctorcunaca yahuarta churashcahuanmi yalirca. Chai chishillatami chai doctorcunaca panigupa huaquin familiacunata, ancianocunatapash yahuarta ama churachun doctorcunata jarcashcamanda prezo cacharca.  Cayandi punllaca Nueva York llactapi, shuj llactacunapipash periodicocunapi, radiopi, telepipashmi Testigocunata prezo cachashcata villanajurca.

Lunestaca Milton Mollen shuti juezhuanmi parlarcani. Paica shuj tribunalpimi trabajan carca. Chai hospitalpi imacunalla pasashcatami tucui tucuita chai juezmanga parlarcani. Chaishuj juez shuj juiciota nara rurashpallata permisota firmashcatapashmi villarcani. Chaita uyashpami Milton Mollen juezca cai chishi ñuca oficinata yalingui nihuarca. Chai chishillatami Philip Brumley huauquihuan chai juezpaman rircanchi. Hospitalmanda abogadopashmi chaipi cashcarca. Chaipi parlajushpami ani ani niri callarircanchi. Chaita uyashpami Philip huauquica yapa shinllitami parlajungui nishpa shuj hojapi escribirca. Chaishuj abogadota ama ani ani nijuchunmi shina nihuarca.

Shuj horastashna caishuj abogadohuan ani ani nirinajujta uyashpami Mollen juezca quiquingunatarami cayaca atendisha nirca. Paipa oficinamanda llujshijujpica chai juezca hospitalmanda abogadoca na mishai ushangachu ama preocuparichichu nihuarcami. Chaita uyashpami Jehová Diosmi ñucanchitaca shina ayudajun yarcani. Jehová Diosca ñucanchita utilizashpami paipa munaita pactachijurca.

Chaupi tutacamanmi juiciopi imata ninata prepararinajurcanchi. Chai tribunalca Brooklyn llactamanda Betel ladollapimi carca. Chaimi Oficina de Asuntos Legalespi ayudaj huauquicunaca cumbashpa rirca. Juiciopi chuscu juezcuna ñucanchita uyashca jipaca, doctorcuna llujchishca permisotaca ñana valichircachu. Shinami panigu Nicoleaupa favor chai juicioca llujshirca. Chai juezcunaca panigu Nicoleau illaj shuj juiciota ruranaca paipa derechocunata na respetashcatami ricuchin nircami.

Nueva York llactamanda tribunalca panigu Nicoleau yahuar illaj operarina derechota charishcatami nirca. Estados Unidospica chuscu viajecunatami cashna juiciocunata ganarcanchi. Nicoleau panigupa juiciopi ayudashcamandaca ninandami cushijuni (“ Tribunalcunapi ganashca juiciocuna” nishca recuadrota ricupangui). Betelmanda huaquin abogado huauquicunahuanmi trabajarcani. Paicunahuanga shuj huauqui o shuj pani na testigo cusamanda o na testigo huarmimanda divorciarinajujpi, paicunapa huahuacunata Taita Diosmanda  yachajuchunbash na saquijpimi pihuan quidanata ricushpa juiciocunapi ayudan carcanchi. Shinallata alpacunata randingapapashmi papelcuna legal cashcata ricun carcanchi. Chai alpacunapi huasichingapaj papelcunatapashmi llujchishpa ayudan carcanchi.

Dawn shuti precursora panigutami rijsircani. Paica divorciarishca quimsa huahuayumi carca. Divorciarishca quimsa huahuacunata charishpapash paica Jehovataca tucui shunguhuanmi sirvin carca. 1992​pica Nueva York llactapi “Portadores de Luz” Quimsa Punlla Jatun Tandanajuimanmi rircanchi. Chaipimi canhuan cazarangapaj munani nircani. Shuj huata jipallami cazararcanchi. Cazarashca jipapashmi Betelpi ayudashpa catircani. Ñucapaca Jehovata tucui shunguhuan sirvij huarmiguta charinaca shuj jatun bendicionmi cashca. Proverbios 31:12​pi nishca shinaca ñuca huarmiguca llaquichinapa randica, ñucataca tucui causaipimi alitalla rurashpa ayudahuashca.

Cazarai horasca paipa huahuacunaca 11, 13, 16 huatacunatami charirca. Ali taita cangapaj yashpami shuj shuj publicaciongunata liircani. Huatacuna yalijpica ashtaca llaquicunatami charipashcanchi. Shinapash huahuacunaca propio taitatashna, shuj ali amigotashnami ñucataca ricuhuashca. Paicunapa ali amigocuna huasiman shamujpica cushillami yalin carcanchi.

2013 huatapimi Wisconsin llactaman ñucanchi taitamamacunata cuidangapaj rircanchi. Shuj ladopi causangapaj rishpapash Betelpi ayudashpami catircani. Betelmanda huauquicunaca ayudashpa catichunmi invitahuarca.

Septiembre de 2018​pica parlajushpami ashata ujui callarircani. Chaimandami doctorpaman rircani. Chai doctorca mejor shuj neurólogo doctorpaman ri nishpami cachahuarca. Enero de 2019​pica chai doctorca na jambirinalla ungüitami charingui. Cai ungüica asha ashami canba cuerpotaca ñana cuyurichun saquigrin nihuarcami.

Quimsa punlla jipallami hielopi patinajushpa ali lado maquita quibirircani. Siempremi patinan cashcani. Ñana patinaita ushagrijuimandami llaquilla sintirircani. Chai ungüihuan caimandami parlaitapash, cuyuritapash, micunata langaitapash ñana ushajurcani.

Betelpi abogadoshna ayudashcamandaca ninandami cushijupani. Shinami Jehovapa Reino ñaupaman catichun ayudashcata yachashpa ninanda cushijupani. Ñucaca shuj shuj revistacunapimi abogadocunapa, juezcunapa, doctorcunapa huaquin temacunata escribircani. Shinallata yahuarta ama churarishpa operarina derechota Testigocuna charishcata difindishpami shuj shuj llactacunapi gentecunapa ñaupajpi parlashcani. Imashinami Lucas 17:10​pi nijun, ñucaca imata rurana cashcatallami rurapashcani.