1959 huatapica, Sudafricamanda sucursalpica shuj prensa rotativa nishca maquinahuan trabajagrinajushcatami villarca. Chaita uyashpami, ñucaca chaipi ayudangapaj voluntario shina ofrecirircani. Chaipi ayudachun ñucata agllashcata yachashpaca ninandami cushijurcani. Chai llactamanda shuj quimsa betelitacunatapashmi agllashcarca. Paicunaca Dennis Leech, Bill McLellan y Ken Nordin huauquicunami carca. Ñucanchicunataca, “ashtaca tiempopami chaipi sirvingapaca rigringuichi” nircami.

Ñuca mamitata cayashpaca, “mamita, Sudafricapi sirvingapami rigrini” nircanimi. Chaita uyashpaca ñuca mamitaca upallami quedarca. Ñuca mamitaca Jehovapi tucui shunguhuan crin paita ninanda juyaj huarmigumi carca. Chaimi pai imatapash na nishcajpipash ñucata apoyajushcata seguro carcani. Ñuca mamitapash, ñuca papitopash ñuca chaiman richunga na jarcarcachu. Shinapash ñuca caru caruman rijujta yachashpami llaquilla sintirirca.

Primeroca, Brooklyn Betelmanmi rircanchi. Chaipica publicaciongunata imprimingapaj, shuj maquinata aliguta manejanata yachajungapami quimsa quillacunata chaipi quidarcanchi. Chai jipaca, Ciudad del Cabo, Sudáfrica nishcamanmi rircanchi. Chaimanga barcopimi rircanchi. Chai punllacunapica 20 huatacunatami charircani. Ña Ciudad del Cabo nishcaman chayashpa tutayajpica shuj trenda japishpami Johannesburgo nishca llactaman rircanchi. Cayandi punllapaca, Karroo shuti pueblotami yalinajushcarcanchi. Chai puebloca ashtaca polvo polvo, cunuj cunuj pueblogumi cashcarca. Cai puebloguta ventanamanda chapashpa ricujpica, chuscundicunallatami manllarishca quidaparcanchi. “Caicunacamanlla shamurcanchi” yashpami parlarinajurcanchi. Huaquin huatacuna jipami cai puebloguman tigrarcanchi. Chaipi gentecunaca ali ali, tranquilo causaj gentecunami cashcarca.

Huaquin huatacunatami ñucaca linotipia shuti maquinata manejashpa trabajarcani. Ñucaca Villajun, Rijcharipaichi revistacunapa lineacuna ali ricurichunmi seguran carcani. Chai sucursalpica Sudáfrica llactamanda idiomapi publicaciongunata imprimishca jahuapash, Africapa tucui continentepami tauca tauca shimicunapi publicaciongunataca imprimin carca. Cai prensa rotativa nishca máquina Sudafricapi ninanda ayudajushcata ricushpaca ninandami cushijuparcanchi.

Jipaca traduccionmanda ricuna cosascunapi, publicaciongunata imprimina, shuj ladocunaman cachana oficinapimi apoyai callarircani. Chaipi trabajajushpaca ocupado, cushillami yalin carcani.

1968 huatapica, Laura Bowen shuti paniguhuanmi cazararcani. Paica Betel ladollapimi causan carca. Paica precursora, Betelpipash Departamento de Traduccionbimi transcribishpa ayudan carca. Chai tiempopica, chairalla cazarashcacunaca Betelpica na sirvishpa quidaita ushanllu carca. Chaimi ñucanchitaca precursor especialcuna  shina sirvichun nombrarca. Ñucaca ashata preocupadomi carcani. Betelpica 10 huatacunatami sirvijushcarcani. Chaipica micunaguta, maipi causanaguta, tucui minishtishcagutami charircani. Chaimi, “precursor especialcunaman cushca culquiguhuanga ¿imashashi pactasha?” yashpa pensarijurcani. Precursor especialescunamanga cada quillami 25 rands culquiguta cun carca (cunanbi ricushpaca 35 dólares culquigumi cashcarca). Shinapash publicaciongunata saquishpa, horasgucunata pactachishpa shinallata revisitacunatapash rurashpami chai culquigutaca japita ushana carcanchi. Ñucanchica chai culquigutaca arriendota pagangapaj, micunaguta randingapaj, pasajegucunapa, shinallata huaquinbica doctorpaman ringapapashmi pactachina carcanchi.

Ñucanchicunataca Durban shuti llactapi shuj uchilla grupogupi sirvichunmi cacharca. Cai uchilla grupoca océano Índico ladollapimi carca. Cai pushtupica India llactamanda shamushca ashtaca ashtaca gentecunami causanajurca. Paicunataca 1875 huatapimi, shuj jatun jatun fabricapi azucarta rurashpa trabajachun a la fuerza Sudáfrica llactamanga pushamushcarca. Shinapash chai tiempopaca paicunaca shuj cosascunapimi trabajanajushcarca. Shinallata paicunapa costumbrecunata, paicuna imasha yanuna costumbrecunatapash na saquishcachu carca. Paicunaca mishqui mishqui, sabroso micunacunatami curry nishcaguhuanbash yanunata yachan carca. Paicunaca inglés shimitami parlan cashcarca. Chaimi ñucanchicunapaca villachinaca fácil tucurca.

Precursor especialcunaca 150 horascunatami cada quilla pactachina carca. Chaimi ñucanchicunaca shuj horarioguta shinashpa cada punlla 6 horascunata villachingapaj quedarcanchi. Ñucanchica revisitagucunata o Bibliamanda yachajujcunataca todavía nara charircanchichu. Chaimi 6 horasgucunata pactachingapaca, chaipi clima cunu cunu, húmedo cajpipash huasin huasin rishpa pactachina carcanchi. Shuj punlla villachijushpaca, ñami huaquin horasgucunata villachishcashun yashpami relojta ricurcani. Relojta ricushpaca, chairami 40 minutogucunalla yalishcarca. Chaita ricushpami ñucaca pensarircani: “¿Imashinashi precursor especialpa horascunataca pactachita ushashun?” nishpa.

Shuj tiempo jipallami shuj ali horariota ña chariparcanchi. Tucui punllacunami villachingapaj llujchishpaca sanducheguta, na cashpaca shuj termogupi café yacuguta o sopaguta apan carcanchi. Ñucanchicuna ña samana horaspica, ñucanchi carrota shayachishpami shuj jatun racu quiru ladopi samangapaj tiarin carcanchi. Chaipi samanajujpica India llactamanda shamushca gentecunapa huahuacunami ñucanchi muyundipi tiarishpa manllarishca ñucanchitaca ricunajun carca. Huaquin punllacuna jipaca, horascuna villachinapi ñapash ñapash yalijtami cuenta japircanchi.

India llactamanda gentecunaman Bibliamanda yachachishpaca ninandami cushijuparcanchi. Paicunaca respetuoso respetuoso, ali ali, mingachinatapash gushtaj, Taita Diostapash juyaj gentecuna cashcatami cuenta japiparcanchi. Ashtacacunami Bibliamanda yachajui callarirca. Paicunaca Jehová Diosmanda, Jesusmanda, Bibliamanda, shamuj punllacunapi paraíso alpagu tianamanda, huañushcacuna causarinamanda yachajunataca ninandami gushtan carca. Shuj huata jipaca, ña 20 estudiocunatami chariparcanchi. Paicunamandaca shuj familiahuanllapashmi cada punlla imapash micunaguta yanushpa micungapaj organizarircanchi. Chai asignacionbica cushijushcapachami caparcanchi.

Chai jipaca shuj mushuj asignaciondami chasquiparcanchi. Océano Índico ladollapi tiashca congregaciongunatami superintendente de circuito shina visitagrinajuparcanchi. Chai congregaciongunata visitangapaca cada semanami shuj shuj familiacunapa huasipi quidan carcanchi. Publicador huauquipanicunata animangapami paicunahuan villachingapaj llujshin carcanchi. Ñucanchicuna mingarishpa quidanajushca huasicunapica, paicunapa familiatashnami tratan carca. Paicunahuan, paicunapa huahuacunahuan, animalgucunahuanbash yalinataca ninandami gushtan carcanchi. Shinami ishcai huatacunata yaliparcanchi. Shinapimi sucursalmanda huauquicunaca: “Betelpi sirvingapami cutin shamuchun munapanchi” nishpa cayarca. Chaita uyashpaca ñucaca: “Caipica, alipachami capanchi huauquicuna” nircani. Shinapash, Jehová Dios maipi sirvichun munashcata yachaimandaca Betelmanmi cutin tigrarcanchi.

Betelpica, Departamento de Serviciopimi trabajai callarircani. Chaipica ashtaca experienciata charij huauquicunahuanmi trabajai ushaparcani. Chai tiempocunapica superintendente de circuito huauquicunaca shuj congregacionda visitashca jipaca, sucursalmanmi shuj informeta cachan carca. Cai informeta cachashca jipami, Departamento de Serviciomanda huauquicunaca cutin shuj cartaguta congregaciongunaman cachan carca. Cai cartacunaca huauquipanicunata animangapaj, shinallata imapash mushuj instrucciongunata cungapami carca. Superintendente de circuito huauquicunaca xhosa shimita y zulú shimita parlaj congregaciongunata visitashca jipaca, informecunataca chai shimicunapimi cachan carca. Chaimi secretario huauquicunaca chai cartacunata inglés shimiman traducingapaj shinllita trabajan carca. Chai jipaca sucursalmanda huauquicuna imata nishcatami ña  cutin inglés shimimanda, África llactapi parlaj idiomacunaman traducin carca. Secretario huauquicunaca alipacha traductorcunami carca. Paicunapa alipacha trabajomandaca ninanda agradicishcami carcani. Paicunapa ayudahuanmi yana huauquipanigucuna ima llaquicunatalla charishcata yachai ushaparcani.

Chai tiempocunapica, África llactapica apartheid nishca Leymi tiarca. Cai leyca, yana gentegucuna shuj pushtupilla causana cashcatami ricuchijurca. Chaimi paicunaca grupo grupo separarishca causana carca. Paicunaca shuj razamanda gentecunahuanga napacha tandanajunachu carca. Chaicunamandami ñucanchi yana huauquipanigucunaca, paicunapa shimicunapilla parlan carca. Shinallata paicunapa shimicunapilla villachin carca. Shinallata congregaciongunapipash yanapuragucunallami tandanajun carca.

Ñucataca siempremi inglesta parlaj gentecunapa territoriomanlla cachan carca. Chaimandami Sudafricamanda yana gentegucunataca na yapa rijsishca carcani. Pero Departamento de Serviciopi sirvi callarishpami yana gentegucunapa costumbrecunata ashtahuan yachajui callarircani. Ñucanchi huauquipanicunaca paicunapa familiacunapi, comunidadcunapi tiashca costumbrecunata, crishcacunatapashmi huashaman saquina tucurca. Chaimandami paicunaca ashtaca jarcaicunata, problemacunata chari callarishca carca. Y chaitami yachaj chayaparcani. Campocunamanga gentecunaca pobre pobremi carca. Huaquingunaca asha estudiashca, huaquingunaca nimata na estudiashcacunami carca. Shinapash Bibliataca ninandami respetan carca.

Testigo de Jehovacunapa crishcacunata shujcunaman tranquilo parlai ushangapaj, guerracunapi, politicacunapi ama ñucanchicunata chapurichun obligachunmi huaquin leycuna llujshichun ayudarcani. Chai tiempopica Testigo jovengunataca escuelacunapi, colegiocunapica paicunapa costumbrecunata na catishcamandami expulsarca. Paicuna na manllashpa Jehová Diospi tucui shunguhuan crijta ricushpaca ninandami animarircani.

Suazilandia (cunanga Esuatini) nishpa rijsishca llactamanda huauquipanicunapashmi shuj jatun llaquita charirca. Chai llactapica Sobhuza II shuti reymi huañushca carca. Chaimi chai llactamanda gentecunataca tucuicunatallata pai huañushcamanda huañushcacunapa costumbrecunata catichun obligarca. Cai costumbreca punda huañushca gentecunata adoranajushcata ricuchingapami carca. Chaimi jaricunaca ajchataca lluchu uma tucungacaman ruturina carca. Cutin huarmicunapash ajchataca siqui siquipimi ruturina carca. Tauca huauquipanicuna chai costumbrecunata na catishcamandami ninanda catiriashpa llaquichinajurca. Paicuna Jehová Diosta shina sirvijta ricunaca shungumanmi chayarca. Paicunamandaca Jehová Diosta na saquishpa sirvinata, pacienciata charinata, Jehovapi tucui shunguhuan confianatami ashtahuan yachajuparcanchi.

Huata 1981​pica cutinmi imprentaman tigraparcani. Chaipica computadoracunata utilizashpa imasha impriminata yachachingapami yaicuparcani. Cai trabajoca alipachami carca. Shinapash publicaciongunata impriminacunaca cambiajurcami. Chaimi imprimingapaj maquinacunata jatuj shuj jarica, fotocomponedora nishca shuj maquinatami publicacionguna imashina quidajta ricuchun nishpa chai maquinataca sin compromiso sucursalman mañachishca carca. Chai fotocomponedora máquina ali cashcata ricushca jipaca, chaipura picha maquinacunatami sucursalca randirca. Cai picha maquinacunata charishpaca 9 linotipia maquinacunataca ñana minishtiparcanchichu. Shinallata imprimingapaj shuj mushuj maquinatapashmi ña churaparcanchi. Cai maquinacunahuanga ashtahuanmi publicaciongunataca imprimi callarircanchi.

Computadoracunaca MEPS nishca programata utilizachunmi ayudarca. Cai programaca publicaciongunata nara imprimishpallata imashina quidanata ricuchunmi ayudan. MEPS nishpaca, Sistema Electrónico de Edición Plurilingüe nisha ninmi. Ñucapash, ñucahuan shamushca quimsa huauquicunapash Canadá llactamanda shamushca punllamandaca, Sudafricapica tecnologiaca ashtacatapachami avanzashca carca (Is. 60:17). Cai tiempopaca tucuicunallatami ña alipacha precursora panigucunahuan cazarashca caparcanchi. Billpash, ñucapash Betelpimi caparcanchi. Ken y Dennisca, Betel ladollapimi paicunapa familiacunahuan causan carca.

Cai Betelpica tauca tauca idiomacunamanmi ashtahuan publicaciongunata traducishpa impriminajuparcanchi. Shinallata shuj sucursalcunamanbashmi cachanajuparcanchi. Shinapash cai Betelca uchillagumi carca. Chaimandami shuj mushuj Betelta minishtinajuparcanchi. Cai mushuj Beteltaca, Johannesburgo llactapimi shayachiparcanchi. Jehovapa ayudahuanmi 1987 huatamandaca cai mushuj Betel huasipi trabajai callariparcanchi. Cai tucui huatacunata Sudáfrica llactapi, Comité de Sucursalpi sirvishcamandaca ninandapachami cushijuparcani. Chaipica, Jehovapa obra imasha mirashpa catijtami ricui ushapashcani.

Huata 2001​pica, chairalla formarishca Comité de Sucursal de Estados Unidospi sirvichunmi invitarca. Chaiman invitanataca yaitallapash na yashcarcanchichu. Ñucanchicunaca Sudáfrica llactapi ñucanchi amigocunata saquishcamanda llaquilla cashpapash, Estados Unidos Betelpi sirvigrinajushcamandami ninanda cushijuparcanchi.

Shinapash ñucanchicunaca ñuca huarmigupa mamitamandami preocuparishca caparcanchi. Paica ña payagumi carca. Chaimandami ñucanchicunapachaca na cuidaita ushanata yachashpa llaquirinajuparcanchi. Shinapash, Laurapa quimsa ñañacunami, “ñucanchicunami mamitataca cuidashun, ama yapata preocuparinguichichu” nircami. Paicunaca: “Ñucanchicunaca tiempo completopi sirvitaca na ushapanchichu. Shinapash quiquinguna tiempo completopi sirvishpa catichunmi mamitataca cuidashpa catishunlla” nirca. Shina nijpica, paicunataca ninandami agradiciparcanchi.

Cutin ñuca mamitataca ñuca huauqui paipa huarmigundimi cuidashpa ayudanajurca. Paicunaca Canadá llactapimi causanajurca. Ñuca mamitaca paicunahuanga ña 20 huatacunatami causajurca. Paica viudami caparca. Ñuca huauquita, ñuca cuñadatapash ñuca mamitata huañungacaman cuidashcamandaca ninandami agradicipani. Ñuca mamitaca, ñucanchicuna Nueva York, Estados Unidosman chayashca jipallami huañurca. Ñucanchicunapaca, ñucanchita apoyaj familiacunata charinaca shuj sumaj bendicionmi capashca. Paicunaca, ñucanchicuna Jehová Diosta sirvishpa catichunga shinlli cajpipashmi mamitacunata cuidashpa ninanda ayudashca.

Estados Unidos Betelpica huaquin huatacunatami, Producción de Publicacionespi trabajaparcani. Shinapash cai asignacionbica ashtaca cambiocunami tiapashca. Chaimandami chairallaca Departamento de Compraspi trabajai callaripashcani. Cai 20 huatacunata cai sucursalpi sirvishcamandaca ninandapachami cushijupanchi. Cai Betelpica, 5 mil betelitacuna, 2 mil voluntario huauquipanicunami sirvinajun.

60 huatacuna huashamanga caipi canataimanga yaitallapash na yarcanichu. Ñuca huarmigu Lauritaca siempremi cai tucui huatacunata apoyajuhuashca. Cushillami causapashcanchi. Jehová Dios ñucanchiman cushca asignaciongunamandapash ninandami agradicipanchi. Shinallata tauca huauquipanicunahuan maquipurarishpa Jehovata sirvishcamandapash ninandapachami cushijupanchi. Ñucanchicunaca mundo enteropi tauca sucursalcunatapashmi visitana bendicionda charipashcanchi. Chaipipashmi tauca amigocunata charipanchi. Cunanga 80 yali huatacunatami charipani. Chaimandami ñuca punda charishca responsabilidadcunataca cunanga joven huauquicuna pactachinajun.

Shuj salmista runaguca: “[Jehová] Dios paicunapaj Taita Dios cajpi causanajuj llactaca, ninandami cushijun” nircami (Sal. 33:12). Cai shimicuna ciertopacha cashcatami ricupashcani. Jehová Diosta ashtaca huauquipanicunahuan sirvi ushashcamandaca ninandami agradicipani.