1. Jehová Diosca ¿imamandata ñucanchitaca nipihuan na comparashpa ricun?

JEHOVÁ DIOSCA animalcunata, plantacunata, gentecunatapash rurashpaca na maijandapash shujhuan igual igualtaca rurarcachu. Jehová Diospa ñaupapica cada unomi especial capanchi. Shinallata Jehová Diosca na ñucanchitaca pihuanbash comparanllu. Jehová Diosca ñucanchicuna imashina cashcata, ñucanchi shungu imashina cajta ricushpami ñucanchitaca juyan (1 Sam. 16:​7). Jehová Diosca ñucanchicuna imata ali rurai ushashcata o na ashta ali rurai ushashcatapash alimi yachan. Ñucanchicuna imashina viñashca cashcatapash yachanmi. Chaimi ñucanchicuna imata rurai ushashcatalla rurachun mañan. Ñucanchicunaca, Jehová Diospa ejemplota catishpami Jehová Dios imashina ñucanchita ricushca shinallata ricurina capanchi. Shinami ñucanchicunaca “aliguta yarishpa” rurajushcata ricuchipashun. Shinallata shujcunata yali o menos cashcatapash na pensaripashunllu (Rom. 12:​3).

2. Shujcunahuan compararinajunaca ¿imashpata nali can?

² Ñucanchicunaca shuj huauquipanicunamandaca ashtacatami yachajui ushapanchi. Por ejemplo, shuj huauqui o shuj panica villachingapaca alipachami canga (Heb. 13:7). Shuj huauquipanicunapa ejemplota catinami ñucanchitaca ali yachachijcuna cachun ayudanga (Filip. 3:17). Shinapash shuj huauquipanicunapa ejemplota ricunaca paicunamanda yachajuchunmi ayudana can. Ñucanchicuna paicunata yali o peor cashcata ricurijuchunga na canllu. Ñucanchicuna shuj huauquipanicunahuan compararinajushpaca, ñucanchillatami envidiosocuna tucuita ushanchi o nimapapash na sirvinichu yashpapashmi desanimarita ushapanchi. Caina semanaca shuj huauquita o shuj panita yalimi cani yashpa pensanaca congregaciondallata llaquichi ushashcatami ricuparcanchi. Shina cashpaca Jehová Dioshuan amigo caitapash ñana ushapashunllu. Chaimi, Jehová Diosca ñucanchitaca cashna nin: “Alitachu rurajuni, nalitachu rurajuni nishpa, cangunallata tucuicuna yaringuichi.  Shina yarishpami, na shujhuan chimbapurashpa, canguna imashna causashcatalla yarishpa, cushijuna canguichi” nin (Gál. 6:4).

3. ¿Imacunamandallata cushilla sintiri ushapanchi?

³ Jehová Diosca paita ashtahuan sirvingapaj ñucanchicuna imaguta rurashcacunahuan cushijuchunmi munan. Por ejemplo, bautizarishca cashpaca Jehová Diosta juyashcamanda, ñucanchi munai chai decisionda japishcamanda, chai metaguta pactachishcamandaca cushijunami capanchi. Bautizarishca punllamanda imacunapi mejorashcapi pensaripashun. Cunanbica Bibliagutapash ashtahuan cushijushpami yachajunajupashun. Shinallata, ashtahuan tucui shunguhuanmi Jehová Diostaca talvez ña mañanajupashun (Sal. 141:2). Shinallata villachinajushpapash ashtahuanmi gentegucunahuanga parlai ushapashun. Ñucanchi publicaciongunatapash, videocunatapash ashtahuan aligumi utilizanajupashun. Jehovapa ayudahuanga ñucanchi cusahuarmi causaigupipashmi shuj ali cusagu, shuj ali huarmigu o ali taitacunapash capashun. Caigucunapi mejorashpa catita ushashcamandami ñucanchicunaca ninanda cushilla sintiri ushapanchi.

4. Cunanga ¿imatata yachajupashun?

⁴ Ñucanchicunaca shuj huauquipanicuna Jehová Diosta sirvi ushashcamanda cushijushpa catichun shujcunahuanbash ama compararijuchunmi ayudaita ushapanchi. Cunanga taitamamacuna paicunapa huahuacuna ama shujcunahuan compararijuchun imashina ayudai ushashcata, cusahuarmicuna randimanda imashina ayudarishpa cati ushashcata, anciano huauquicuna, congregacionbi tucui huauquipanicunapash imashina shuj huauquipanicunata ayudai ushashcatami yachajupashun. Tucuripica, Jehová Diosta sirvishpa cati ushangapaj imacunatalla rurai ushashcamandami Bibliapa huaquin textocunamanda yachajupashun.

5. Efesios 6:4​pi nishcashnaca taitamamacunaca ¿imatata na rurana can?

⁵ Taitamamacunaca huahuacunata charishpaca na paicunapa shuj huahuacunahuanga comparajunachu can. Shinallata na usharina cosascunatapash rurachunga na mandanachu can. Caicunata rurashpaca huahuacunatami nalitapacha sintichita ushanga (Efesios 6:4​ta liipangui). * Sandra * shuti paniguca ninmi: “Escuelamanda ñuca profesorcunaca shuj compañerocunamanda ashtahuan ali calificaciongunata llujchichunmi munan carca. Chai jahuapash ñuca mamitaca, ñucapa profesor, ñucapa na Testigo taitapash Testigocuna ali cajta ricuchunmi ali estudiante, tucuipi ali notacunata llujchichun munan carca. Shinapash chaitaca na rurai usharcanichu.  Chaimi ashtaca tiempota ña escuelata tucuchishca cashpapash, Jehová Diosta sirvingapaj imaguta rurashpapash, Jehová Diosca chaigucunahuanga na cushijungachu yashpa pensarini” nin.

6. Salmo 131:1, 2​pi shimicunamandaca ¿imatata taitamamacunaca yachajuita ushan?

⁶ Taitamamacunaca Salmo 131:1, 2​pi shimicunatami pactachina can (chai textota liipangui). Rey Davidca nircami: “Jatumbi canatapash na mascashpa purishcanichu. Ñucapaj imapash yapa ali canataca, na mascashcanichu” nishpa. Rey Davidca humilde cashcamandami shungu ucupipash tranquilo sintirirca. Taitamamacunaca rey Davidshnallatami paicunallatapash, paicunapa huahuacunahuanbash humildecuna cana can. Huahuacunatapash, “tucuita alipachami rurana cangui” nishpapash na exigijunachu can. Shinallata taitamamacunaca huahuacuna imata alipacha rurai ushashcata, imata na alipacha rurai ushashcatapash yaipimi charina can. Shinami huahuacunaca paicunallata ali sintiringa. Marina shuti paniguca ninmi: “Ñuca mamitaca ñucapa quimsa turiñañacunahuan o shuj huahuacunahuanbash nunca na comparahuanllu carca. Ñuca mamitaca tucuicunallata shuj shujcuna cashcata, shinapash Jehová Diospa ñaupapica tucuicunapacha valishca cashcatami yachachihuarca. Ñuca mamita shina yachachishcamandami ñucaca pihuanbash na compararipashcani” nin.

7, 8. Cusacunaca ¿imashinata huarmiguta juyashcata, respetashcata ricuchita ushan?

⁷ Jesusta catij cusacunaca paicunapa huarmigutaca juyaihuan, respetohuanmi tratana can (1 Ped. 3:​7). Cusacunaca ¿imashinata caitaca pactachita ushanman? Cusacunaca huarmigutaca ninanda valishcata shinami ricuna can. Shinallata huarmigutaca na ushanalla cosascunata rurachunga na mañanachu can. Shuj huarmicunahuanbash na comparanachu can. Huarmiguta shuj huarmicunahuan comparanaca ¿imamandata nali can? Panigu Rosata ima pasashcata ricupashun. Panigu Rosapa cusaca na Testigochu can. Paica panigutaca siempremi shuj huarmicunahuan comparan. Paipa cusaca shinllita rimashpami Rositataca imapapash na valijta shina sintichin. Shinallata paitaca pipash na juyangachu yashpa pensachunbashmi sintichishca. Panigu Rositaca: “Ñucataca Jehová Dios juyashcata, ñucata valichishpa ricushcata pipash yarichihuachunmi minishtipani” ninmi. Cutin, Jesusta catij cusacunaca paicunapa huarmigutaca ali tratashpami paicunapa matrimoniotaca cuidajushcata ricuchin. Shina rurashpami Jehová Dioshuanbash ali amigocuna cangapaj munashcata ricuchin. *

⁸ Ali cusagucunaca paicunapa huarmigutaca juyaihuan, respetohuanmi tratan. Shinallata imagutapash ali rurajpica, alitami rurarcangui nishpapashmi felicitan (Prov. 31:28). Caina semanaca Katerina shuti panigumandami yachajuparcanchi. Paitaca paipa cusagumi pai valishcapacha cashcata intindichun ayudashca. Katerina huahuagu cajpica, paipa mamitaca paipa amigacunahuan comparashpami Katerinataca nalipacha sintichin carca. Chaimi Katerinaca paillatapash shujcunahuan compararishpa nalipacha sintirin carca. Jehová Diosmanda yachajushca jipapashmi shinallata sintirin carca. Ama shina sintirichunga paipa cusagumi ninanda ayudashca. Panigu Katerinaca ninmi: “Ñuca cusaguca ninandami juyahuan. Imagutapash ali rurajpica felicitahuanmi. Shinallata ñucamandapashmi Jehová Diosta mañan. Jehová Dios imashina cashcata, juyaj cashcatami cutin cutin yarichihuan. Shinami ama ñuca imapapash na sirvinshna sintirijuchun ninanda ayudahuan” nin.

9, 10. Shujcunahuan compararinata yachaj panigutaca ¿imashinata ancianocunaca ayudarca?

⁹ Shujcunahuan compararij huauquipanigucunataca ¿imashinata congregacionbi ancianocunaca ayudaita ushan? Andrea shuti panigupa experienciata ricupashun. Andrea panigu huahuagu cajpica pai imagutapash aliguta rurajpipash, paitaca “alitami rurashcangui” nishpaca nunca na felicitanllu cashca nin. Cai paniguca ninmi: “Ñucaca shujcunahuan imagumandapash facillla parlaitaca na ushanllu carcani. Shuj huahuagucunahuan ricushpaca, chai huahuagucunami  ashtahuan mejor can yashpami ricun cariani. Siempremi shujcunahuan compararishpa ricurin cashcani” nin. Ña testigo de Jehová cashca jipapashmi, cai paniguca shujcunahuan compararishpa catishca. Chaimi congregacionbipash imagupipash na ayudaj shina sintirishca. Pero cunanga precursora regularmi can. Panigu Andreataca ¿imata ayudarca?

¹⁰ Panigu Andreataca paipa congregacionmanda anciano huauquicunami ayudarca. Ancianocunami pai shujcunapa ali ejemplo cashcamandapash felicitarca. Andrea paniguca ninmi: “Huaquin viajecunatami anciano turigucunaca shuj ñañagucunata ayudachun, animachunbash mañahuashca. Chaicunata rurashpami ñucaca congregacionbi ayudajushcata sintishcani. Turigucunaca shuj ñañagucunata ayudashcamandami ñucataca felicitahuashca. 1 Tesalonicenses 1:2, 3​pi shimicunatapashmi liihuashca. Chai textota liijpica ninandami cushijuparcani. Anciano turigucuna ayudashcamandami ñucaca Jehovapa organizacionbi imagutallapash rurajushcata sintipashcani” nin.

11. Isaías 57:15​pi nishcashnaca, ‘llaquilla causajcunataca’ ¿imashinata ayudaita ushapanchi?

¹¹ (Isaías 57:15​ta liipangui). Jehová Diosca ‘llaquilla causajcunamandami’ ninanda preocuparin. Shinaca, congregacionbica na solo huauqui ancianocunallachu huauquipanicunataca ayudaita ushan. Tucuicunallatami paicunataca ayudaita ushapanchi. Chaimandami huauquipanicunata ayudangapaca, paicunapi preocuparishcata ricuchina capanchi. Shinallata, Jehová Dios paicunata ninanda juyashcatapashmi ricuchina capanchi (Prov. 19:​17). Chashnallata huauquipanicunata ayudangapaca, humilde cashpami ayudashun. Imagutapash aliguta rurai ushashpapash na ñucanchicunalla alipi quidangapaj o shujcuna ñucanchita envidiashpa ricuchunga na imatapash ruranachu capanchi. Chaipa randica shujcunata animangapaj, ayudangapami imagutapash rurana capanchi (1 Ped. 4:10, 11).

12. Humilde gentecunaca ¿imamandata Jesushuan canataca ninanda gushtan carca? (Callari paginapi dibujota ricupangui).

¹² Jesús paipa discipulocunata imashina tratashcata yachajunami ñucanchitaca shujcunatapash ali tratachun ayudanga. Jesusca, Diospa churi cashpapash, “na ñapash fiñarij, jariyanata na yarij shunguta” charijmi carca (Mat. 11:28-30). Jesús gentecunaman yachachijushpaca pai inteligente cashcamanda o ashtaca cosascunata yachashcamandaca na jariyajurcachu. Chaipa randica, gentecunaman yachachijushpaca jahualla, intindirinalla shimigucunapimi imagutapash intindichin carca. Shinami humilde gentegucunaca, Jesuspa yachachishcacunata uyashpaca shungucaman alicachishpa uyan carca (Luc. 10:​21). Jesusca, judiocunata ñaupaman pushaj gentecunahuan ricushpaca, shujpachami carca. Jesusca tucui gentecunatami Jehová Diospa ñaupapi paicuna valishcapacha cashcata sintichin carca (Juan 6:​37). Jesusca tucui gentecunatami respetohuan, juyaihuan siempre tratarca.

13. ¿Imamandata Jesusca paipa discipulocunataca juyaihuan, aligutami tratarca nipanchi?

¹³ Jesusca paipa discipulocunataca juyaihuan, aligutami tratarca. Jesusca cada uno imagucunatalla rurai ushashcataca alimi yacharca. Shinallata, na tucuicunallata shujcunashna imatapash igual ali pactachi ushanatapash yaipimi charirca. Chaimandami cada uno imasha esforzarijujta ricushpa ninanda valichin carca. Chaitaca talento culquigumanda parlashca chimbapuraipimi alipacha ricuita ushapanchi. Chai chimbapuraipica shuj amo paipa esclavocunapi confiashcatami ricupanchi. Quimsandi esclavocunamandaca cada esclavomanmi pai usharishcaguta ricushpa mingarca. Ishcai esclavocunaca alimi chai mingashcataca pactachirca. Chai ishcandi esclavocunamandaca, shuj esclavoca ashtahuan yalitami culquitaca tandachirca. Shinapash chai ishcandi esclavocunatallatami paipa amoca: “Aliguta pactachij, aliguta ruraj runagumi cashcangui” nishpa felicitarca (Mat. 25:14-23).

14. Ñucanchicunaca ¿imashinata Jesuspa ejemplota catita ushapanchi?

¹⁴ Jesusca ñucanchicunatapashmi juyaihuan, aliguta tratan. Jesusca ñucanchicuna imagutalla rurai ushashcataca alimi yachan. Chaimi paica ñucanchi rurai ushashcaguta rurajta ricushpaca ninanda cushijun. Ñucanchicunaca ¿imashinata Jesuspa ejemplota catita ushapanchi? Ñucanchicunaca shuj huauquita o shuj panita shujcunahuan comparashpa nali sintichingapaca na munapanchichu. Chaimi pai  imaguta rurashcataca valichina capanchi. Shinallata imaguta rurajpipash felicitanami capanchi.

15, 16. Shuj panigutaca Jehová Diosta sirvingapaj pactachi ushanalla metacunata churarinaca ¿imashinata ayudarca?

¹⁵ Jehová Diosta ashtahuan sirvingapaj imacunatapash rurasha nishpa pensarinaca, ñucanchicunallata cushilla, ali sintirichunmi ayudan. Shinapash ñucanchi causaipi pactachi ushanalla ruraigucunami cana can. Denoca ñucanchillatami na pactachi ushashpaca desanimaripashun (Luc. 14:​28). Cunanga, Midori shuti precursora panigumanda yachajupashunchi.

¹⁶ Panigu Midoripa taitaca na Testigochu can. Midori uchillagu cajpica, paipa taitaca Midoripa turiñañacunahuan, escuelamanda compañerocunahuanbashmi comparashpa shinllita Midoritaca riman carca. Paica ninmi: “Ñucata paicunahuan comparajpica, imapapash na sirvinshnami sintirin carcani” nin. Shinapash huatacuna yalishca jipaca, panigu Midorica paimandallata cushilla, alimi sintirishca. Paica ninmi: “Cada punlla Bibliata liinami ñucataca, ñucallata cushilla, tranquila, ali sintirichun ayudahuashca. Shinallata Jehová Dios ñucata juyashcatapash segura cachunbashmi ayudahuashca” nin. Shinallata panigu Midorica pai pactachi ushanalla metacunata churarishpami Jehová Diostaca, “chai metacunata pactachingapaj ayudahuangui” nishpa mañarca. Chai metacunata pactachi ushaimandami Midori paniguca ninanda cushijushca, ali sintirin.

17. Jesusta catijcunaca ¿imashinata yuyaipipash ‘mushujtalla yarishpa causaita’ ushapanchi? Chaita rurashpaca ¿imashinata causapashun?

¹⁷ Ñucanchicuna imashina sintirijushcata, imata yuyashcata cambiangapaca tiempomi minishtirin. Chaimandallatami Jehová Diosca: “Cangunapaj yuyaipica, mushujtalla yarishpami causana canguichi” nin (Efes. 4:23, 24). Cambiachunga, Jehová Diosta mañariana, Bibliata liina, liishcapi yuyanami ashtacata ayudanga. Caicunata ruranataca na saquinachu capanchi. Jehovatami “chaicunata pactachishpa  catingapaj ushaiguta carahuangui” nishpa mañana capanchi. Paipa espíritu santomi ñucanchitaca ama shujcunahuan compararijuchun ayudanga. Shinallata Jehová Diosllatami ñucanchicuna jariyashcacuna o envidiosocunaiman tucujujpica, uchalla cambiachunbash ayudanga.

18. Quiquindaca ¿imashinata 2 Crónicas 6:29, 30​pi shimicunaca ayudan?

¹⁸ (2 Crónicas 6:29, 30​ta liipangui). Jehová Diosca ñucanchicuna imashina cashcata, imashina sintirijushcatapash alipachami yachan. Shinallata ñucanchicuna canllamanda gentecunashna ama cangapaj, ñucanchicuna pandarishcacunapilla ama yapata culparijuchunbash luchajushcataca Jehová Diosca alimi yachan. Cada punlla mejorashpa catingapaj esforzarijujta ricushpaca, Jehová Diosca ñucanchicunataca ashtahuan ashtahuanmi juyashpa catin.

19. Ñucanchita juyashcata intindichunga, Jehová Diosca ¿imahuanda chimbapurarin?

¹⁹ Jehová Dios ñucanchicunata ninanda juyashcata intindichunga Jehová Diosca shuj mamahuanmi chimbapurarin (Is. 49:15). Rachel shuti paniguca ninmi: “Ñuca ushigu Stephanieca nara tiempo cajpillatami nacirirca. Uchillagu uchillagupachami caparca. Primer quillapica shuj incubadorapimi yalirca. Shinapash antsicarin doctorca tucui punllacuna ñuca visitashpa, marcashpa charichunmi saquihuan carca. Chai ratocunami ashtahuan ñuca ushigutaca ninanda juyai callariparcani. Cunanga ña 6 huatagutami charipan. Shuj huahuacunahuan ricushpaca ashtahuan uchillagumi capan. Shinapash pai causashpa catingapaj ninanda luchashcamandami paitaca ninanda juyapani. Cushillapachami paihuanga capani” nin. Ñucanchicunapash Jehová Diosta tucui shunguhuan sirvishpa catingapaj esforzarijta ricushpaca, Jehová Diospashmi ñucanchimandaca ninanda cushijun, ashtahuan juyashpa catin. ¿Nachu chaita yachanaca ñucanchitaca ninanda cushichipan?

20. ¿Imamandata tucuicunallata cushijuita ushapanchi?

²⁰ Jehová Diospa organizacionbica cada unomi importante, minishtirishca capanchi. Jehová Diosca cada unotami ninanda juyan. Jehová Diosca paipa organizacionmanga shujcunata yali mejor cashcamandaimanga na apamurcachu. Sino porque ñucanchicuna humilde shunguta charijta ricushpami paipa organizacionmanga apamurca (Sal. 25:​9). Ñucanchicuna Jehová Diosta sirvingapaj ninanda esforzarijta ricushpaca, Jehová Diosca ninandami cushijun. Ñucanchicuna ima llaquicunata charishpapash aguantashpa catijpi, Jehová Diostalla sirvishpa catijpica ‘tucui shunguhuan aliguta catinajushcatami’ ricuchipanchi (Luc. 8:​15). Shinaca tucui shunguhuan Jehová Diosta sirvishpa catingapaj esforzaripashunchi. Chaita rurashpaca ñucanchicunamandallatami cushijushun.