1, 2. Isaías 65:16, 17​pi shimicunaca ¿imashinata aguantashpa catichun ayudan?

HUATA 2017​pica quimsa punlla jatun tandanajuipa temaca “Aguantashpa Catipashunchi” nishcami carca. Cai asambleapica, imashina llaquicunata aguantashpa catinatami yachajuparcanchi. Cunanga ña chuscu huatacunami yalishca. Shinapash, chai tandanajuipi yachajushcashnami aguantashpa catinajupashcanchi.

² Cunangunapica ¿ima llaquicunatata charipashcanchi? Talvez huaquingunaca shuj familiar o shuj amigo huañushcamandami llaquilla capanchi. Shinallata talvezpashmi shuj na jambirinalla unguihuan capanchi. O rucullagu caimanda o terremotocuna, acapanacuna tiashcamanda o gentecuna yapata nali cosascunata ruranajushcamanda o ñucanchi gobiernocuna catiriashpa llaquichinajushcamanda o cai pandemia ungui COVID-19 tiashcamandapashmi llaquilla capanchi. Tucuicunallatami cai tucui llaquicuna tucurichun shuyanajupanchi. Cai llaquicuna tucurijpica chai llaquicunataca nunca más na yarishunllu (Isaías 65:16, 17​ta liipangui).

3. ¿Imatata cunanmandallata rurana capanchi? ¿Imamandata chaita rurana capanchi?

³ Cai mundopica ashtaca ashtaca llaquicunami tian. Jipa punllacunapipash ashtahuan llaquicunata charishunrami (Mat. 24:21). Shina cashpapash aguantashpa catingapami fuerzarina capanchi. ¿Imamandata chaita rurana capanchi? Jesusca nircami: “Tucurimuicaman, llaquicunata apajcunallami quishpichi tucunga” nishpa (Mat. 24:13). Aguantashpa catichunga shuj huauquipanicunapash llaquicunata aguantanajushcata yachanami ayudanga.

4. ¿Imamandata tucuicunata yalica Jehová Diosmi llaquicunata aguantana tucushca nipanchi?

⁴ Jehová Diosmi tucuicunamandaca llaquicunataca ashtahuan aguantashca. Caicunata na yachashca cashpaca caipi pensaripashunchi. Cai mundopica ashtaca llaquicuna, problemacunami tian, chaica Diablo mandajushcamandami shina can. Jehová Diosca cai mundopi llaquicunata, problemacunata cunanllata tucuchita ushashpapash,  paica shuj punllapi tucuchingapami shuyajun (Rom. 9:22). Chai punlla chayangacamanga paipashmi aguantashpa catijun. Cunanga maijan cosascunata Jehová Dios aguantana tucushcata ricupashunchi.

5. a) Diospa shutihuanga ¿imata pasashca? b) Chaita yachashpaca ¿imashinata sintiripangui?

⁵ Paipa shutita na respetohuan tratajta. Jehová Diosca paipa shutita juyaimandami tucuicuna respetachun munan (Is. 42:8). * Shinapash 6 mil huatacunatami gentecunaca Diospa shutitaca na respetashca (Sal. 74:10, 18, 23). Callaripica Diablomi jardín de Edenbica Diospa shutita na respetashcata ricuchirca (Diablo nishpaca “llullashpa juchachij” nisha ninmi). Diabloca Adán y Evamanga Taita Diosca canguna cushilla causachunga na munanllu nishpami Taita Diostaca juchachirca (Gén. 3:1-5). Chai punllamandapachami gentecunaca Jehová Diosca gentecuna cushilla causachunga na munanllu nishpa rimai callarishca. Jesusca siempremi paipa Taitapa shutita respetachun munarca. Chaimi paipa discipulocunamanga Diosta mañanata yachachijushpaca cashna nirca: “Jahua pachapi tiajuj ñucanchi Taitalla, cambaj jucha illaj shutiguca, alicachi tucushca cachun” nishpa (Mat. 6:9).

6. ¿Imata cuenta japichunda Jehová Diosca ashtaca tiempo yalichun saquishca?

⁶ Mandana derechota na charinllu nishcata. Jehová Diosllami cai alpatapash cielotapash mandana derechota charin. Jehová Dioshnaca pipash na tianllu (Apoc. 4:11). Shinapash Diabloca angelcunaman, gentecunamanga Taita Diosca mandana derechotaca na charinllu nishpa pensachunmi llullashca. Jehová Dioslla mandana derechota charishcata ricuchingapaca ashtaca tiempomi minishtirishca. Jehová Diosca ali yachaj caimandami gentecuna paicunapurallata mandarishpa causachun saquishca. ¿Imamandata saquishca? Paica, gentecuna Diospa ayudata na mascashpaca paicunapurallata mandarita na ushashcata cuenta japichunmi shina saquishca (Jer. 10:23). Jehová Dios pacienciata charishcamandami shuj punllaca gentecunaca Jehová Dioslla shuj ali gobierno cashcata, pailla cai alpapi shuj tranquilo ali causaiguta cui ushashcata cuenta japinga.

7. a) ¿Picunata Jehová Diospa contra tucushca? b) Paicunataca jipa punllacunapica Jehová Diosca ¿imatata ruragrin?

⁷ Angelcunapash gentecunapash paipa contra tucujta. Angelcunata gentecunatapash Jehová Diosca jucha illajcunatami rurarca. Shinapash Satanasmi Adán y Evataca Jehovapa contra tucuchun llullacunata nishpa umachirca (Satanás nishpaca “contra” nisha ninmi). Ashtaca angelcuna shuj gentecunapashmi Jehová Diospa contracuna tucurca (Jud. 6). Jipacunamanga israelitacunapashmi Jehová Diospa llacta cashpapash Jehová Diosta adoranapa randica yanga dioscunatara adorai callarirca (Is. 63:8, 10). Chaicunamandami Jehová Diosca traicionai tucushca sintirirca. Shinapash paipa tucui contracunataca shuj punllaca tucuchingami. Chai punllacamanmi aguantashpa catinga. Paita tucui shunguhuan sirvijcunaca chai punllapica ninandami cushijupashun.

8, 9. Jehová Diosmandaca ¿ima llullacunatata yachachishca? Chaicunata uyashpaca ¿imatata rurana capanchi?

⁸ Diablopa llullacunata. Jobtaca Satanasca yangamandami juchachirca. Paica Taita Diosmanga, Jobca candaca paita cuidajushcamandallami sirvijun nircami. Shina nishpaca tucui Jehovata sirvijcunatami juchachijurca (Job 1:8-11; 2:3-5). Cunan punllacunacamanmi Diabloca Jehovata sirvijcunataca shina nishpa juchachijun (Apoc. 12:10). Jehová Diosta juyaimanda sirvishpa, llaquicunata aguantashpami Diablopa nishcacuna llulla cashcata ricuchipanchi. Chaimi Jehová Diosca Job runaguta imashina bendiciashcashnallata ñucanchicunatapash bendicianga (Sant. 5:11).

⁹ Satanasca Jehová Diosmanda llullacunata ningapaca cai mundopi panda religiongunatami utilizan. Chaimi panda religiongunaca cai mundopi llaquicunataca Taita Diosmi cachamujun nishpa gentecunamanga yachachin. Shuj huahuagu huañujpica, ‘Taita Diosmi cielopi shuj angelguta  minishtishcanga, chaimi quiquinba huahuagutaca apashcanga’ nishpami crichin. Shina nishpaca Jehová Diosmandaca nalicunatapachami ninajun. Shinapash Testigocunaca imacunamandapacha llaquicuna tiashcataca alimi yachapanchi. Chaimi shuj na jambirinalla unguihuan cashpa o shuj familia o shuj amigo huañujpica Taita Diostaca na culpapanchi. Ashtahuangarin chai llaquicunataca Taita Dios shuj punlla tucuchinatami cripanchi. Chaimi Jehová Dios shuj juyaj Dios cashcataca tucuicunaman villana capanchi. Shinami Jehová Diosca, Satanás llullaj cashcata ricuchi ushanga (Prov. 27:11).

10. Salmo 22:23, 24​pica ¿imatata Jehová Diosmandaca yachajupanchi?

¹⁰ Paita sirvijcuna llaquicunahuan, problemacunahuan cajta. Jehová Diosca llaquij, juyaj Diosmi can. Chaimi ñucanchicunata catiriashpa llaquichijpi, shuj na jambirinalla unguihuan cajpi, ñucanchicuna juchayujcuna caimanda pandarijpipash ninanda llaquirin (Salmo 22:23, 24​ta liipangui). Jehová Diosca ñucanchicuna imashinapacha sintirijtaca alimi yachan. Chaimi ñucanchipa sufrimientocunataca tucuchingapaj munan. Y tucuchingami (Éxodo 3:7, 8; Isaías 63:9​huan chimbapurashpa ricupangui). Shuj punllaca, “Taita Diosmi paicunapa ñavimandaca tucuilla viquita fichanga. Huañuipash, huacaipash, llaquipash, nanaipash na ashtahuan tiangachu” nishca shimicunami pactaringa (Apoc. 21:4).

11. Jehová Diosca paita sirvishpa huañushcacunata yarishpaca ¿imashinata sintirin?

¹¹ Paipa ali amigocunapa huañuita. Jehová Diosca paita sirvishpa huañushcacunataca cutinmi ricungapaj munan (Job 14:15). Jehová Diosca seguromi paita sirvishpa huañushca Abrahán runagutaca ricunayachijunga (Sant. 2:23). Shinallata Moisestapashmi ricunayachijunga. Bibliapica Jehová Diosca, Moiseshuanga ‘ñavi ñavimi parlan cashca’ nijunmi (Éx. 33:11). Davidpa, shuj salmista jaricunapa cantashcatapashmi Jehová Diosca cutin uyanayachijunga (Sal. 104:33). Jehová Diosca paipa sirvijcuna huañushca cajpipash, paica paicunataca na cungashcachu (Is. 49:15). Paica cada uno imashina cashcatami yarin, paipa ñaupapica tucuicunami causanajuj cuendallata can (Luc. 20:38). Shuj punllaca paipa tucui sirvijcunatami causachinga.  Paicuna causarishpa cutin Jehová Diosta mañajpi, paita adorajpica Jehová Diosca ninandami cushijunga. Jehová Dios shuj punlla huañushcacunata causachinata yachanaca ñucanchicunatapashmi ninanda cushichin.

12. Cai tucurimui punllacunapica Jehová Diosca ¿imamandata ashtahuan llaquirishca?

¹² Nali gentecuna ali gentecunata llaquichijta. Satanás, Adán y Eva jardín de Edenbi Jehová Diosta na cazushca punllamandami cai alpapi causaica shinlli tucushca. Cai alpapi cutin shuj ali causaigu tiangacaman ashtahuan llaquicuna mirana cashcataca Jehová Diosca alimi yacharca. Jehová Diosca cai mundopi nali ruraicunataca nimamanda na ricunayachinllu. Paica siempremi taita illaj, mama illaj huahuacunamanda, cusa illaj huarmigucunamandapash ninanda preocuparishca (Zac. 7:9, 10). Ashtahuanbachaca paipa sirvijcunata contracuna catiriashpa llaquichijpi, carcelcunaman churajta ricushpami ninanda llaquirishca. Chaimandami Jehová Dioshnallata llaquicunata aguantajcunaca Jehová Dios paicunata juyashcataca seguro cana can.

13. Gentecuna ¿imashina causajtata Jehová Diosca ricujun? Chashna gentecunahuanga shuj punllaca ¿imata pasagrin?

¹³ Paipa mandashcacunata na pactachishpa causaj gentecunata. Gentecunaca Taita Diosman rijchajmi rurashca canchi. Shinapash Satanasca ñucanchicuna imapash nalicunata rurachunmi munan. Bibliapica Noepa punllacunapica ‘cai pachapi causaj runacuna ashtaca jatun nalicunata ruranajujta’ Jehová Dios ricushpaca “ninandapacha llaquirishpami, paipaj shungupipash nanachinshna llaquirirca” nijunmi (Gén. 6:5, 6, 11). Chai punllacunamandapachami cai mundopi gentecunaca ashtahuan huaglishpa catishca. Diabloca shuj jarihuan shuj huarmihuan nara cazarashpallata igual causachun, jaripura huarmipura cusahuarmishna causachunmi munan. Chaita gentecuna rurajpica cushijushcami ricujun (Efes. 4:18, 19). Ashtahuanbachaca Jehová Diosta sirvijcuna cashna juchacunapi urmajpimi ninanda cushijun. Shinapash Jehová Diosca shuj punllaca Diablo munashcashna causaj gentecunata tucuchishpami, chai nali ruraicunata nimamanda nalicachishcataca ricuchinga.

14. Gentecunaca cai alpahuan, animalgucunahuanga ¿imatata rurashca?

¹⁴ Pai rurashca alpata huaglichijtapashmi aguantana tucushca. ‘Runaca paipa llaquipajllata chaishuj runata llaquichishca’ jahuapash cai alpata, animalgucunatapash Jehová Dios munashcashnaca na cuidashcachu (Ecl. 8:9; Gén. 1:28). Huaquin cientificocunaca, gentecuna cai alpata na cuidajpica shamuj huatacunapica, shuj millón shuj shuj laya o diferente animalgucunami huañuita ushan nircami. Chaimandami huaquingunaca ninanda preocuparishca can. Cutin ñucanchicunaca “cai pachata tucuchijcunata” Jehová Dios ñalla tucuchinata yachashpami tranquilo sintiripanchi (Apoc. 11:18; Is. 35:1).

15, 16. Ñucanchicunaca ¿imamandata cai mundopi llaquicunataca aguantashpa catina capanchi? Intindichipai.

¹⁵ Ashtaca ashtaca huatacunapi Jehová Dios ima llaquicunatalla aguantana tucushcapi pensaripashunchi (“ Jehová Diosca caicunatami aguantana tucushca” nishca recuadrota ricupangui). Jehová Diosca cai mundopi nali cosascunata ñapash tucuchita ushashpapashmi pacienciata charishca. Pai ashtaca huatacunata aguantashcamandami ñucanchicunapash beneficiarita ushapashcanchi. Chaipaca shuj huahuaguta ñalla charigrijuj taitacunapi pensaripashunchi. Doctorca cai taitacunamanga, “cangunapa huahuaguca ungushcami nacirigrin, nacirishpapash na ashtaca tiempota causajgrinllu huañungami” nishcanman. Shina nijpipashmi taitacunaca huahuagu nacirijpica cuidana shinlli cajpipash juyaimandaca pacienciahuan cuidai callarinman.

¹⁶ Chai taitacunashnallatami Jehová Diospash ñucanchicuna Adán y Evapa huahuacuna caimanda juchayujcuna nacirishcata aguantana tucushca. Shinapashmi Jehová Diosca ninanda juyaimandaca cuidashpa catin (1 Juan 4:19). Por ejemplo jahua parrafopi parlashca taitacunahuan ricujpica Jehová Diosca diferentemi can. Jahua parrafopi parlashca taitacunaca, huahuagu huañujuj nacirijpipash imatapash na rurai usharcachu. En cambio Jehová Diosca tucui poderta charimandami paipa huahuacunapa  juchata anchuchishpa, shuj ali causaiguta cuita ushan. Jehová Diosca cai mundopi llaquicunata tucuchingapaca ñami shuj punllata agllashca charin (Mat. 24:36). Shinaca Jehová Dios ñucanchita juyaimanda shuj punlla cai mundopi llaquicunata tucuchinata yachashpaca ¿nachu Jehová Dioshnallata llaquicunata aguantashpa catina capanchi?

17. Hebreos 12:2, 3​pi nishcashnaca llaquicunata aguantashpa catichunga ¿imata ayudaita ushan?

¹⁷ Jehová Diosca tucuita yalimi ashtaca cosascunata aguantashca. Jesuspashmi chaitallata rurarca. Cai alpapi cashpaca ñucanchimandami ani ani rimajpi, llaquinaita macajpi, racu caspipi huañuna cashpapash aguantarca (Hebreos 12:2 *, 3​ta liipangui). Jesustaca Jehová Diospa ejemplomi aguantashpa catichun ayudarca, ñucanchicunatapash paipa ejemplollatami ayudaita ushan.

18. 2 Pedro 3:9​pi nishcashnaca Jehová Dios pacienciata charishcamandaca ¿imata pasashca?

¹⁸ (2 Pedro 3:9​ta liipangui). * Jehová Diosca cai mundopi llaquicunata ima horas, ima punlla tucuchina ali cashcataca alimi yachan. Jehová Dios pacienciata charishcamandami cunan punllacunapica ashtaca millón gentecuna paimanda yachajushpa paita alabai ushashca. Tucui Jehovamanda yachajushcacunaca paicuna nacirishpa, Jehová Diosmanda yachajushpa, paita sirvi callaringacaman pacienciata charishcamandami Jehovataca ninanda agradicin. Ashtaca millón gentecunataca ultimocaman aguantashcamandami Jehová Diosca ninanda bendicianga. Chai punllami Jehová Dios aguantana decisionda agllashpaca alitapachami rurashca nipashun.

19. ¿Imatata tucuicuna rurana capanchi? Shina rurashpaca ¿ima bendiciongunatata chasquipashun?

¹⁹ Llaquicunata aguantashpa catichunga Jehová Diospa ejemplomi ñucanchitaca ayudan. Jehová Diosca Satanaspa culpa cai mundopi ashtaca llaquicuna tiajpipashmi, paica “cushi” Dios caimandaca aguantashpa catishca (1 Tim. 1:11, TNM ). Ñucanchicunapashmi ashtaca llaquicunata charishpapash aguantashpa catita ushapanchi. Shinami Jehová Dios paipa shutiguta santificangacaman o alipi churachingacaman, pailla mandana derechota charishcata ricuchingacaman y shinallata Jehová Dios tucui llaquicunata tucuchingacamanga cushilla aguantashpa catita ushapashun. Llaquicunahuan cashpaca, Jehová Diospash ashtaca huatacunata llaquicunata aguantashpa catijushcatami yarina capanchi. Shinami ñucanchicunapash: Llaquicuna ricurijpipash aguantashpa catij “runaca, ninandami cushijun. [Llaquicunata aguantashpaca, TNM ] causaita causagrinata ricuchij coronatami japigringa. Chaitaca paita juyajcunamanllami Taita Diosca carashapacha nijushca” shimicuna pactarijta ricupashun (Sant. 1:12).