1. Jehová Diosta mañai ushashcamandaca ¿imashinata sintiripanchi?

 TUCUITA Ruraj Taita Diosca ñucanchicuna paihuan parlai ushachunga paita mañana privilegiotami cushca. Chaimandami maipi cashpapash, ima hora cashpapash o ima idiomapi cashpapash Jehová Diostaca mañaita ushapanchi. Y paihuan parlangapaca na shuj turnotaimanga shuyanachu capanchi. Ñucanchi juyaj Taita Diostaca hospitalpi cashpa o carcelpi cashpapash mañaitaca ushapanchimi. Y pai ñucanchi mañashcacunata uyanataca seguromi cai ushapanchi. Jehová Dioshuan parlana bendicionda charishcamandaca paitaca ninandami agradicipanchi.

2. Jehová Diosta mañana shuj jatun privilegio cashcataca ¿imashinata rey Davidca ricuchirca?

² Davidpaca Jehová Diosta mañanaca, shuj jatun bendicionmi carca. Chaimandami Davidca: “Ñuca mañajuj shimicunaca, inciensota cushnichijpishna cambaj ñaupajman vichai ripachun” nirca (Sal. 141:1, 2). Rey Davidpa tiempopica, sacerdotecuna preparashca inciensota utilizashpami Jehová Diostaca adoran carca. Chai inciensotaca ninan cuidadohuanmi preparan carca (Éx. 30:34, 35). Inciensomanda parlashpaca rey Davidca oracionda ruranamandami parlajurca. Chaimandami Jehová Diosman shuj oracionda ruragrijushpaca imata ninata aliguta pensarishpa mañana cashcata nirca. Ñucanchicunapashmi Jehová Diosta mañajushpaca aliguta pensarishpa mañangapaj munapanchi. Porque ñucanchi mañaicunata uyashpa Jehová Dios cushilla sintirichunmi munapanchi.

3. ¿Imashinata Jehová Diostaca mañana capanchi? ¿Imamandata shina mañana capanchi?

³ Jehová Diosman shuj oracionda rurajushpaca, paitaca respetohuanmi parlana capanchi. Cunanga Isaías, Ezequiel, Daniel y Juanba muscuipishna ricushcacunapi pensaripashunchi. Paicuna  shuj shuj cosascunata ricushca cashpapash chuscundillatami Jehová Dios ashtaca poderta charishcata parlarca. Isaiasca Jehová Diostaca ‘shuj jatun tiarinapi tiajujtami ricurca’ (Is. 6:1-3). Cutin Ezequielca Jehová Diostaca mandangapaj tiarinapi tiajujtami ricurca. Shinallata shuj ‘cuichishna paipaj muyundipipash ninashna muyundi punchapamba cajtami ricurca’ (Ezeq. 1:26-28). Cutin Danielca ‘unai unai huatacunata charij shuj Rucugutami’ ricurca. Pai churajushcaca yura yurami carca y pai mandangapaj tiarinaca, rupajuj ninashnami carca (Dan. 7:9, 10). Juanga Jehová Diostaca pai mandana pushtu ‘muyundipica esmeralda nishca rumigushnalla cuichi’ tiajtami ricurca (Apoc. 4:2-4). Jehová Dios ashtaca poderta charishcata yarinami, Jehová Diosta mañajushpaca respetohuan mañana importantepacha cashcata yarichun ayudan. Shinaca Jehová Diosta mañajushpaca ¿imacunamandallata paihuanga parlaita ushapanchi?

4. Jesús yachachishca oracionmandaca ¿imatata yachajupanchi? (Mateo 6:9, 10).

⁴ (Mateo 6:9, 10​ta liipangui). Jesusca paipa discipulocunamanga, Jehová Dios munashcashna mañanatami yachachirca. Jesusca “cashnami Taita Diostaca mañana canguichi” nishca jipaca, Taita Diostaca quiquinba shutigu santificado cachun nishpa mañana cashcata, quiquinba gobiernopash shamuchun nishpa mañana cashcata y Taita Diospa munaipash cai alpapi pactarichun mañana cashcatami nirca. Oracionda rurajushpa cai cosascunamanda Jehová Diosta mañashpaca, Jehová Diospa voluntad ñucanchipa importante cashcatami ricuchinajunchi.

5. ¿Imamandata ñucanchi minishtishca cosasgucunamanda mañanalla cashcata yachapanchi?

⁵ Oracionda imashna ruranata Jesús yachachijushpaca, ñucanchi minishtishca cosasgucunamandapash Jehová Diosta mañanalla cashcatami yachachirca. Jesusca, Jehová Diostaca cai punllagupash micunaguta carahuai nishpa mañai ushashcata, ñucanchi pecadocunamandapash perdonahuai nishpa mañai ushashcata, shinallata ima tentacionbi urmachunbash ama saquihuanguichu nishpa mañai ushashcata y Diablomanda cuidahuangui nishpapash mañanalla cashcatami Jesusca yachachirca (Mat. 6:11-13). Cai cosascunamanda Jehová Diosta mañashpaca, Jehová Diospa ayudata ñucanchicuna minishtishcata y Jehovapa ñaupapi ali ricuringapaj munashcatami ricuchinajunchi.

6. Jehová Diosta mañajushpaca ¿Jesús yachachishca oracionda repetishpallachu mañana canchi?

 ⁶ Jesusca paipa discipulocunaman Jehová Diosta imashina mañanata yachachijushpaca pai utilizashca shimicunatallata repetishpa mañachunga na yachachijurcachu. Porque paillatapashmi shuj cosasgucunamandapash Jehová Diostaca mañarca (Mat. 26:39, 42; Juan 17:1-26). Ñucanchipashmi imapash preocupacionda charishpaca Jehová Diospa ayudata mañaita ushapanchi. Por ejemplo, ima decisiongunata agllagrijushpapash, Jehová Diostaca ali yachaita carahuai nishpami mañaita ushapanchi (Sal. 119:33, 34). Imapash responsabilidadcunata na pactachi ushashachu yashpaca chai responsabilidadta ali pactachi ushangapami Jehová Diosta mañaita ushapanchi (Prov. 2:6). Taitacunapash paicunapa huahuacunamanda, huahuacunapash paicunapa taitamamacunamandami Jehová Diostaca mañaita ushan. Shinallata tucuicunallatami Bibliamanda estudiantecunamanda, ñucanchi predicashca gentecunamandapash Jehová Diostaca mañaita ushapanchi. Shinapash ayudata mañangapallaca na Jehová Diostaca mañanachu capanchi.

7. Jehová Diosta mañajushpaca ¿imamandata paita alabana capanchi?

⁷ Jehová Diosca ñucanchicuna paita alabachunmi mericin, chaimandami Jehová Diosta mañajushpaca paita alabanataca na cungana capanchi. Salmota escribij runaguca, Jehová Diostaca: “Aligupachami capangui, nalita rurashcatapash cungajmi capangui” nircami. Shinallata: “Ninanda llaquij Taita Diosmi capangui. Na ñapash fiñarij, ninanda llaquij, na llullajpashmi capangui” nircami (Sal. 86:5, 15). Jehová Diostaca ashtaca razongunamandami alabai ushapanchi.

8. Oracionda ruranajushpaca ¿imacunamandallata agradici ushapanchi? (Salmo 104:12-15, 24).

⁸ Jehová Diosta mañajushpaca pai tucui cosascunata cushcamandapashmi agradicingapaj munapanchi. Jehová Diosca ñucanchicunamanga juyailla sisagucunata, ashtaca micuna cosasgucunatapashmi cushca. Shujcunahuan ali amigocuna cai ushachunbashmi saquishca. Cai tucui cosascunataca ñucanchita juyaj Taita Diosca ñucanchicuna cushilla causachun munaimandami cushca (Salmo 104:12-15, 24​ta liipangui). Jehová Diostaca ñucanchicunata paimanda yachajushpa catichun ayudajushcamanda  y jipa punllacunapi ali causaigu tianata crichun ayudashcamandami agradicipanchi.

9. Jehová Diosta agradicinata ama cungangapaca ¿imatata rurai ushapanchi? (1 Tesalonicenses 5:17, 18).

⁹ Jehová Dios ñucanchita ayudashcamanda agradicinataca facilmi cungaita ushapanchi. Ama shina pasachunga ¿imatata rurai ushapanchi? Ñucanchicuna Jehová Diosta imacunatalla mañashcatami shuj cuadernogupi escribita ushapanchi. Y chai escribishcataca Jehová Dios ñucanchi mañaicunata imashna contestashcata cuenta japingapami cutin revisai ushapanchi. Jipaca Jehová Dios imashna ayudashcata ricushpami agradicingapaj mañai ushapanchi (1 Tesalonicenses 5:17, 18​ta liipangui). Shujcuna ñucanchita agradicijpica cushillami sintiripanchi. Shinallatami Jehová Diospash paita agradicijpica cushilla sintirin (Col. 3:15). Jehová Diostaca ¿imamandata ashtahuanbachaca agradicina capanchi?

10. Jehová Diostaca ¿imamandata agradicina capanchi? (1 Pedro 2:21).

¹⁰ (1 Pedro 2:21​ta liipangui). Ñucanchita yachachichun Jesusta cachamushcamandami Jehová Diostaca agradicina capanchi. Jesusmanda yachajushpami Jehová Diosmandapash yachajunchi. Y paipa ñaupapi ali ricuringapaj imata rurana cashcatapash yachajupanchi. Shinallata Jesús ñucanchimanda paipa causaita cushcapi tucui shunguhuan crishpaca, Jehová Diosman ashtahuan quimirishpami paihuan ali amigocuna caita ushapashun (Rom. 5:1).

11. ¿Imamandata Jesuspa shutipi mañanchi?

¹¹ Jehová Diostaca paipa Churi Jesuspa shutipi mañai ushashcamandami agradicipanchi. Jehová Diosca paipa Churi Jesusta utilizashpami ñucanchi mañashcacunataca contestan. Chaimandami Jesusca: “Imata cashpapash ñuca shutipi mañajpica pactachishallami. Churipa rurashcacunamanda Taitata alabachunmi shina rurasha” nirca (Juan 14:13, 14).

12. Jehová Diostaca ¿ima razonmandapashta agradicina capanchi?

¹² Jesús ñucanchimanda huañushcamandami Jehová Diosca ñucanchi juchacunata perdonan. Bibliapica, Jesusmi ñucanchi “sacerdote principal” can ninmi. Shinallata “paica jahua cielopi jatun Taita Dios tiajuj pushtu ali ladopimi tiajun” ninmi (Heb. 8:1). Shinallata “shuj ayudadortami charipanchi. Chai ayudadorca Taita Diospa ladopimi can. Chai ayudadorca Jesucristomi can” ninmi (1 Juan 2:1). Jehová Diosca ñucanchicunamanga shuj sacerdote principaltami cushca. Paica ñucanchicuna imashna cashcataca alimi intindin. “Paimi ñucanchicunamandaca Taita Diosta rogajun” (Rom. 8:34; Heb. 4:15). Jesús ñucanchimanda na huañushca cajpica, ñucanchicunaca Jehová Diostaca na mañai ushanchimanllu. Jehová Dios paipa juyashca Churita ñucanchicunamanda huañuchun cachamushcamandaca, ninan agradecidomi sintiripanchi.

13. ¿Imata rurashpata Jesusca paipa discipulocunata juyashcata ricuchirca?

¹³ Huañungapaj shuj tuta faltajujpimi Jesusca paipa discipulocunamandaca Jehová Diosta mañarca. Paipa discipulocunata Diablomanda cuidachunmi Jehová Diostaca mañarca (Juan 17:15). Jesusca huañugrijushpapashmi paipa discipulocunapi preocuparishcata ricuchirca. Shina rurashpaca paicunata ninanda juyashcatami ricuchirca.

14. Huauquipanicunata juyashcataca ¿imashinata ricuchi ushapanchi?

¹⁴ Ñucanchi minishtishca cosascunatallaca Jehová Diostaca na mañanchichu. Ashtahuangarin Jesús cuendami ñucanchi huauquipanicunamandapash mañanchi. Huauquipanicunamanda mañashpami, Jesús mandashcata pactachishpa caishuj chaishuj juyarishcata  ricuchinchi. Y Jehová Diospashmi ñucanchicuna, ñucanchi huauquipanicunata juyashcataca cuenta japin (Juan 13:34). Ñucanchi huauquipanicunamanda Jehová Diosta mañanaca ninandami ayudan. Bibliapica: “Alita ruraj runagupa mañashcacunaca ashtaca podertami charin” ninmi (Sant. 5:16).

15. ¿Imamandata huauquipanicunamanda mañana capanchi?

¹⁵ Ñucanchi huauquipanicunaca ashtaca llaquicunata charimandami paicunamanda Jehová Diosta mañachun minishtin. Por ejemplo, unguicunamanda, catiriashpa llaquichijpi o guerracuna tiajpi aguantashpa catichunmi Jehová Diosta paicunamanda mañaita ushapanchi. Llaqui apashca huauquipanicunata ayudanajuj huauquipanicunamandapashmi Jehová Diostaca mañaita ushapanchi. Maijanbash huauqui o pani llaqui apajujta yachashpaca paicunapa shutita nishpami Jehová Diostaca mañai ushapangui. Paicunamanda Jehová Diosta mañashpaca, paicunata ciertopacha juyashcatami ricuchinchi.

16. ¿Imamandata ñucanchita ñaupaman pushaj huauquicunamanda mañana capanchi?

¹⁶ Congregacionda ñaupaman pushaj huauqui ancianocunaca, Jehová Diosta paicunamanda mañajpica ninandami agradicin. Apóstol Pablopashmi shinallatami sintirirca. Paica nircami: “Ñuca imata ninata yachachunga ñucamandapash mañapanguichi. Shinami ali villaicunamanda parlajuj Taita Dios pacalla charishca secretotaca na manllashpa villachi ushasha” nircami (Efes. 6:19). Cunanbipashmi ñucanchita ñaupaman pushangapaj ninanda esforzarij huauquicunata charipanchi. Paicunata bendiciachun Jehová Diosta mañashpaca paicunata juyashcatami ricuchipanchi.

17, 18. ¿Ima horata shujcunapa ñaupapi oracionda rurachun mañaita ushan? Oracionda ruragrijushpaca ¿imatata yaipi charina capanchi?

¹⁷ Huaquinbica shujcunapa ñaupapi oracionda rurachunmi ñucanchitaca mañai ushan. Por ejemplo, shuj paniguca Bibliamanda yachachijushpami paita cumbajuj panigutaca shuj oracionda rurachun mañaita ushan. Pero paniguca estudianteta na ali rijsimandami, mejor Bibliamanda yachachishca jipara oracionda ruranata talvez munapanga. Shinami paniguca estudiante imata minishtishcata ricushpa paimandapash Jehová Diosta mañapanga.

 ¹⁸ Predicación grupota llujchingapaj o reunionbi shuj huauquita oracionda rurachun mañajpica ¿imatata yaipi charina can? Cai responsabilidadta charij huauquigucunaca, cada reunión imapa cashcata yaipi cashpami oraciondaca rurana can. Oracionda rurajushpaca huauquipanicunata consejangapaj o imapash villaicunata ningapaca na canllu. Reuniongunapica canticocunata candangapaj oracionda rurangapaca solo cinco minutocunallami tian. Chaimandami tandanajui nara callarijpi mañagrijushpaca na ‘unai unaita mañanachu’ can (Mat. 6:7).

19. Jehová Diospa punlla chayamungacaman preparado cangapaca ¿imata ayudanga?

¹⁹ Jehová Dios juzgana punllaca ñami chayamujun. Chaimandami oracionda ruranataca na saquina capanchi. Oracionda ruranamanda parlashpami, Jesusca: “na puñushpa, chaparianshna causana canguichi. Cai tucui cosascunaca pactarinapachami can” nircami (Luc. 21:36). Jehová Diosta siempre mañashpaca espiritualmente rijcharia y Jehovapa punlla chayamungacamanbash preparadomi capashun.

20. Ñucanchi oracionguna mishquilla incienso cuenda cachunga ¿imashinata ñucanchi oraciongunaca cana can?

²⁰ Cai temapica Jehová Diosta mañana shuj jatun bendición cashcatami yachajupashcanchi. Ñucanchi oraciongunapica Jehovapa voluntad pactarichunmi ashtahuanbacha mañana capanchi. Shinallata Jehová Dios paipa Churita ñucanchicunaman cushcamanda, paipa Gobiernomandapash agradicishpami mañana capanchi. Y ñucanchi huauquipanicunamandapashmi mañana capanchi. Shinallata ñucanchi minishtishca cosasgucunata Jehová Dios carachun, paimanda yachajushpa catichun ayudachunbashmi mañaita ushapanchi. Oracionda ruragrinajushpa imata ninata aliguta pensarishpami, oracionda rurana shuj jatun bendición cashcata ricuchipanchi. Aliguta pensarishpa ñucanchi oraciongunata rurashpaca, Jehová Diospa ñaupapica mishquilla inciensota rupachijuj cuendami canga. Jehová Diosca cushillami sintiringa (Prov. 15:8).