1. Adán y Eva Jehová Diosta na cazushca jipaca ¿Jehová Diosca imata rurarca? (Génesis 3:15).

 ADAN y Eva Jehová Diosta na cazushca jipaca paipa miraicunamanga mediante shuj profeciami shuj promesata curca. Chai profeciataca Génesis 3:15​pimi ricuita ushapanchi (chai textota liipangui).

2. Génesis 3:15​pi profeciaca ¿imamandata importante can?

² Cai profeciaca importantepachami can. ¿Imamandata shina nipanchi? Porque Génesis 3:15​pica gentecunata salvangapaj shuj Salvador tiana cashcata y chai Salvador Diablota y Diablopa catijcunata tucuchina cashcatami ricuchijun. Cai profeciaca Bibliapa principal mensajemi can. Chaimandami Bibliapa shuj librocunapipash cai profeciamandallata parlan. * Cai profecía pactarijpica Jehovata tucui sirvijcunami cushilla sintiringa.

3. ¿Cai temapica imatata ricugripanchi?

³ Cai temapica Génesis 3:15 profeciamanda huaquin tapuicunatami ricugripanchi. ¿Cai profeciapica picunamandata parlan? ¿Cai profeciaca imashinata pactarijushca? ¿Cai profeciaca imashinata ñucanchicunataca ayudan?

4. ‘Culebraca’ ¿pita can? ¿Imamandata chaitaca yachapanchi?

⁴ Génesis 3:14, 15​pica shuj ‘culebramanda’ chai culebrapa ‘miraimanda’, shinallata shuj ‘huarmimanda’ chai huarmipa ‘miraimandapashmi’  parlan. Bibliami cai textopi picunamanda parlajushcata ali intindichun ayudan. * ‘Culebra’ nishpaca na shuj ciertopacha culebramanda parlajurcachu. Porque shuj culebramandapacha parlajujpica cai culebraca jardín de Edenbi Jehová ima nishcataca na intindinmanllu carca. Sino poderta charij shuj personamandami parlajurca. Y cai persona pi cashcataca Apocalipsis 12:9​pimi ricuchin. Chaipica cai ‘culebraca Diablo y Satanás’ cashcatami ricuchin y cutin culebrapa miraica ¿pita can?

5. Culebrapa miraicunaca ¿picunata can?

⁵ Bibliapi ‘mirai’ nishpaca Satanasnallata nalicunata pensajta, nalicunata rurajcunatami shina nin. Shinaca culebrapa miraica nali angelcuna y Jehovapa contra tucuj gentecunami can. Por ejemplo Noepa punllacunapi Jehová Diosta na cazushpa cai alpaman shamushca angelcuna. Y Diabloshnallata nalicunata ruraj gentecunami can (Gén. 6:1, 2; Juan 8:44; 1 Juan 5:19; Jud. 6).

6. ¿Imamandata Génesis 3:15​pi parlashca ‘huarmica’ na Eva can?

⁶ Bibliapi ‘huarmi’ nishpaca ¿pimandata parlajun? Talvez ¿Evamandacha parlajun? Na. Porque chai profeciapica huarmipa miraimi culebrapa umataca chugrichinga nijunmi. Y imashinami ricupashcanchi Diablomi cai culebra can. Y Evapa miraica humano imperfectocuna caimandaca Satanasta tucuchitaca na ushanllu. Shinaca Satanasta tucuchishpa saquingapaca ¿imata minishtirin?

7. Génesis 3:15​pi parlashca huarmi pi cashcata yachachunga ¿imashinata Apocalipsis 12:1, 2, 5, 10 textocunaca ayudan?

⁷ Bibliapa último libropimi Génesis 3:15​pi parlashca huarmi pi cashcata ricuchin (Apocalipsis 12:1, 2, 5, 10​ta liipangui). Cai huarmica  na ñucanchishna aichayu tulluyu huarmi canllu. Paica luna jahuapimi shayajun ninmi. Shinallata umapica 12 estrellacunata charij coronatami churajushca can ninmi. Shinallata cai huarmica shuj huahuagutami ungun. Caica Taita Diospa Gobiernomi can. Y Taita Diospa Gobiernoca cielopi cashcamandaca cai huarmipash cielomandallatami cana can. Cai huarmica cielopi Jehová Diospa organizaciondami ricuchijun. Cai organizacionga Diosta tucuipi cazuj angelcunahuanmi formashca can (Gál. 4:26).

8. ¿Huarmipa ashtahuan importante miraica pita can? ¿Ima horata huarmi ashtahuan importante mirai tucurca? (Génesis 22:15-18).

⁸ Bibliapimi huarmipa mirai pi cashcata ricui ushapanchi. Huarmipa miraica Abrahanmanda shamuna cashcatami ricuchin (Génesis 22:15-18​ta liipangui). Cai profeciaca pactarircami porque Jesusmi Abrahanba miraimanda nacirirca (Luc. 3:23, 34). Pero cai miraica Satanasta tucuchishpa saquingapaca ashtahuan podertami charina carca. Chaimandami Jesús 30 huatacunata charijpica Taita Diosca paipa espíritu santohuan Jesusta agllarca. Shinami Taita Diospa Churi tucurca. Shinallata huarmipa ashtahuan importante miraipashmi tucurca (Gál. 3:16). Jesusta causachishca jipaca Taita Diosca ‘paimanga alipi churai tucunata y respetai tucunatapashmi curca’. Shinallata ‘jahua cielopipash y cai alpapipash tucuita ricuriachunmi autoridadta curca’ y cai autoridadhuanmi ‘Diablopa rurashcacunata tucuchi’ ushan (Heb. 2:7; Mat. 28:18; 1 Juan 3:8).

9, 10. a) ¿Huarmipa miraicunaca picunata can y ima horata huarmipa mirai tucun? b) ¿Imatata ricugripanchi?

⁹ Chai huarmica shuj miraitapashmi charin. Cristiano ungidocunaman shuj cartata escribishpami apóstol Pabloca cai mirai pi cashcata nirca. Paica ‘Cristohuan shujllashna cashpaca, Abrahanba huahuacunami capanguichi. Chaimi Taita Dios prometishcashna herenciataca chasquipanguichi’ nircami (Gál. 3:28, 29). Jehová Dios shuj huauquita o shuj panita paipa espíritu santohuan agllajpica cai huauqui o panica cai huarmipa miraimi tucun. Shinaca cai huarmipa miraica tanto Jesucristo y 144 mil ungidocunami can (Apoc. 14:1). Paicunaca imata rurashpapash Jehová Diospa ejemplota catingapami esforzarin.

¹⁰ Caicamanga Génesis 3:15​pi picunamanda parlajushcatami ña ricupashcanchi. Cunanga Jehová paipa nishcacunata pactachingapaj imata rurajushcata ricupashunchi. Shinallata cai profecía ñucanchita cunanbi imashina ayudajushcatami ricugripanchi.

11. Huarmipa miraipa ‘chaqui talondaca’ ¿imashinata chugrichirca?

¹¹ Génesis 3:15​pica culebraca huarmipa miraipa “chaqui talonbimi” chugrichinga ninmi. Caica Satanaspa culpamanda judiocuna y romanocuna Jesusta huañuchijpimi pactarirca (Luc. 23:13, 20-24). Pipash chaqui talonda chugrishpaca cutin ali puri ushangacamanga asha tiempotaca ñana puri ushashpami quidan. Shina cuendallatami Jesushuanbash pasarca. Jesús huañushpaca imata ruraitapash na usharcachu. Paica casi quimsa punllacunatami huañushca carca (Mat. 16:21).

12. ¿Ima horashi culebrapa umataca chugrichishpa saquinga?

¹² Génesis 3:15​pi shimicunaca pactarinapachami carca. Cai profeciapi nishcashnaca Jesusca culebrapa umataca chugrichinami carca. Chaimandami pai huañushpaca na chaipi quidana carca. Chai profecía pactarichunga paipa chaqui talonbi chugrichishcaca ali tucunapachami carca. Jesús quimsa punlla jipa na huañuna cuerpohuan causarijpimi chaqui talonbi chugrichishcaca ña ali tucushca carca. Chaimi  Jehová Dios churashca tiempo ña chayajpica Jesusca Satanastaca umata chugrichishpa shuj derecho tucuchishpa saquinga (Heb. 2:14). Jesusta jahua cielopi gobernaita ayudajcunapashmi Taita Diospa contra culebrapa miraicunata tucuchishpa saquinga (Apoc. 17:14; 20:4, 10). *

13. Cai profecía pactarishcamandaca ¿imashinata beneficiarinchi?

¹³ Cai profecía pactarijushcamandaca Jehová Diosta tucui shunguhuan sirvijcunaca ñami beneficiarinajupanchi. ¿Imashinata beneficiarinajupanchi? Jesús cai alpaman shamushpaca paipa Taita Jehová imashina cashcataca alipachami ricuchirca (Juan 14:9). Chaimandami Jesusca paipa ejemplohuan ñucanchicuna Jehová Diosta rijsichun y tucui shunguhuan juyachunbash ayudashca. Shinallata Jesuspa yachachishcacunamanda y congregaciongunata ñaupaman pushajushcamandapashmi beneficiarinchi. Chaimandami Jehová Dios munashcashna causanajupanchi. Shinami Jehová Diosta cushichinchi. Ashtahuanbash Jesús paipa causaita cushpa huañushcamandapashmi ñucanchicunaca beneficiaripanchi. Porque Jesusca paipa valishca yahuarta cushpami ñucanchicunataca ‘tucui pecadocunamanda perdonai tucuchun’ ayudarca (1 Juan 1:7).

14. Jardín de Edenbi Jehovapa nishcacuna na chai rato pactarina cashcataca ¿imashinata yachapanchi?

¹⁴ Jardín de Edenbi Jehová Dios nishca shimicunaca na chai rato pactarigrijurcachu. Cai profecía pactarichunga huarmimandapash miraicuna tianami carca. Shinallata Satanaspa catijcunapash tandanajushpa huarmipa miraihuan contrarijpimi cai profeciaca pactarina carca. Y chai pasachunga asha tiempo yalinami carca. Caita yachanaca ñucanchicuna cuidadota charichunmi ayudan. Cai mundopi gentecuna Jehová Diosta sirvijcunata na ricunayachina cashcatami yachapanchi. Ashtaca huatacuna jipapash Jesusca paipa discipulocunamanga chaitallatami nirca (Mar. 13:13; Juan 17:14). Cai profeciapa shimicuna ña pactarishcataca seguromi capanchi. Chaitaca cai último 100 huatacunapimi ricupashcanchi ¿imamandata shina nipanchi?

15. a) Cai mundopi gentecunaca ¿imamandata ashtahuan ñucanchicunataca na ricunayachin? b) Satanastaca ¿imamandata na manllana capanchi?

¹⁵ Jesús 1914 huatapi mandai callarishpami Satanastaca jahua cielomandaca cai alpaman shitarca. Chaimandami Satanasca paita tucuchitapacha tucuchina horascamanga cai alpapilla imacunatapash ruraita ushan (Apoc. 12:9, 12). Shinapash Satanasca na tranquilo shuyajunllu. Ashtahuangarin ninanda culirashcami Jehová Diosta sirvijcunata llaquichijun (Apoc. 12:13, 17). Chaimandami cai mundopi gentecunaca Jehová Diosta sirvijcunata na ricunayachin. Shina cajpipash Satanasta y paipa catijcunatapash na manllanachu capanchi. Ashtahuangarin apóstol Pabloshnallatami: “Taita Dios ñucanchi favor cajpica ¿pita ñucanchipa contra shayari ushanga?” ni ushapanchi (Rom. 8:31). Shinaca Génesis 3:15​pi profecía ña pactarishcata ricushpacarin Jehová Diospica tucui shunguhuanmi ashtahuan confiaita ushapanchi.

16-18. Génesis 3:15​pi profeciata intindinaca ¿imashinata huauqui Curtis, panigu Ursula y panigu Jessicataca ayudashca?

¹⁶ Jehová Diosca Génesis 3:15​pi promesahuanmi ima llaquicuna ricurijpipash aguantachun ayudan. Guam llactamanda Curtis huauquiguca: “Huaquinbica ashtaca llaquicunata problemacunatami chimbapurana tucushcani. Shinapash Génesis 3:15​pi nishca profeciapi pensarinami Jehová Diospi tucui shunguhuan  confiashpa catichun ayudahuan” ninmi. Huauquiguca, Jehová Dios cai tucui llaquicunata shuj derecho tucuchishpa saquichun munani ninmi.

¹⁷ Alemania llactamanda panigu Ursulaca Génesis 3:15​pi profeciata alipacha intindingapaca Bibliapa shuj profeciacunatapash intindina cashcatami cuenta japirca. Chaita intindinami Biblia Taita Diospa Shimipacha cashcata crichun ayudahuarca ninmi. Shinallata paniguca cashnami nin: “Gentecuna cushilla causana esperanzata charichun munaimanda Jehová Dios uchalla imatapash rurashcatami yachajurcani. Chaimandami cushillapacha sintirini” ninmi.

¹⁸ Micronesia llactamanda panigu Jessicaca cashnami nin: “Bibliamanda cabalguta yachajushpaca cushillapachami sintirircani. Bibliapica Génesis 3:15​pi profecía pactarijushcatami yachajurcani. Cai profeciata intindinaca Jehová Dios ñucanchicuna llaquicunahuan na causachun munashcata intindichunmi ayudahuan. Cai profeciata intindimandami Jehová Diosta sirvina ciertopacha cushilla causaita cui ushashcata y Jehová Dios jipa punllacunapi shuj cushilla causaiguta cunata seguro cachunbashmi ayudahuan” ninmi.

19. Génesis 3:15​pi profecía pactarinataca ¿imashinata seguro cai ushapanchi?

¹⁹ Imashinami ricunajupashcanchi Génesis 3:15​pi profeciaca ñami pactarijun. Cai profeciapi parlashca huarmipa mirai y culebrapa mirai picuna cashcataca alimi yachapanchi. Jesusca huarmipa principal miraimi can. Y paica chaqui talonbimi chugrishca carca. Shinapash cunanga ñami ali tucushca. Y cunanbica cielopimi shuj Rey can. Shinallata huarmipa mirai completaringapaca ashallami faltan y cai profeciaca ñami casi tucui pactarishca. Shinaca cai profecía tucuilla pactarinataca seguromi caita ushapanchi. Y cai profecía pactarijpimi culebraca umapi chugrichi tucunga. Y Satanás tucuchi tucujpica Jehovata tucui shungu sirvij gentecunaca cushillami causanga. Shinaca cai profecía por completo pactaringacamanga na shaijushpa ñaupaman catipashunchi. Jehová Diospi tucui shunguhuan confiapashunchi. Huarmipa miraimandami “cai pachapi tiaj tucui llactacunaca bendiciai tucunga” (Gén. 22:18).