JEHOVÁ DIOS paipa organizacionda ñaupaman apajushcata, cai ‘tucurimui punllacunapipash’ espiritualmente ali yachachijushcataca alimi yachapanchi (2 Tim. 3:1). Shinapash cada unomi Jehovapa mandashcataca cazuna capanchi. Ñucanchicunaca chaquishca alpapi causashca israelitacunashnami capanchi. Paicunaca trompetacunata uyashpaca uchallami imatapash ruran carca.

Jehová Diosca Moisestaca nircami: “Culqui trompetacunata, ishcaita rurai. Chaicunataca, martillohuan tacashpa rurangui. Chaicunaca, tandanajushca israelcunata cayangapaj, carpacunata shujman apanata villangapajmi canga” nishpa (Núm. 10:2). Sacerdotecuna trompetacunata shuj shujta huacachijpimi, israelitacunaca imata ruranata yachai usharca (Núm. 10:3-8). ‘Trompetacunata huacachinajujpishnami’ cunanbi Jehovata sirvijcunaca imata ruranata yachai ushapanchi. Israelitacunashna ¿imatata ñucanchicunapash rurapanchi? Caicunatami rurapanchi: Jatun tandanajuicunaman rinchi, ancianocunapa escuelapash tian, congregaciongunapi cambiocuna tiajpipash imata ruranatami ali yachapanchi.

Jehová Diosca ‘tucuilla israelitacuna’ tabernáculo carpa yaicuna pungupi tandanajuchunmi mandarca. Chaimi sacerdotecunaca trompetacunata huacachin carca (Núm. 10:3). Trompetacunata huacachijpica, tabernáculo carpa huasimanda muyundipi caj israelitacunami uyan carca. Chai ladollapi cajcunaca ñapashmi chayanlla cashcanga. Cutin carupi caj israelitacunaca na ucha chayanllu cashcanga. Imashina cashcajpipash Jehová Diosca tucuilla israelitacuna tandanajushpa, paipa mandashcacunata uyachunmi munan carca.

Cunanbipash Jehová Diosca ñucanchicunataca jatun tandanajuicunamanmi invitajun. Pero ñucanchicunaca na tabernáculo carpa huasicunapica tandanajupanchichu. Ñucanchicunaca quimsa punlla asambleacunata, shuj shuj tandanajuicunatami charipanchi. Chai tandanajuicunapimi Jehovamandaca ashtahuan yachajupanchi. Mundo enteromanda huauquipanicunami chaitallata yachajupanchi. Chai jatun tandanajuicunamanga huaquin huauquipanicunaca caru carumandami shamun. Shina shamushpapash huauquipanicunahuanga cushillami yalin.

Huaquingunaca na fácil chayanalla pushtucunapimi shuj grupocunapi sirvinajun. Paicunaca mushuj aparatocuna tiashcamandami asambleacunata o shuj shuj jatun tandanajuicunatapash charita ushashca. Por ejemplo, Benín llactamanda Betelta, jatun Betelmanda representante huauqui visitajujpica shuj tandanajuimi tiarca. Chai tandanajuitaca Arlit (Níger) nishca uchilla pueblogupi caj huauquipanicunapashmi ricuita usharca. Arlit nishca uchilla puebloguca Sahara nishca chaquishca alpacunapimi can. Chaipi caj 21 huauquipanicuna, shuj gentecunapashmi chai programataca ricuita  usharca. Paicunaca caru carupi cashpapash, 44 mil 131 huauquipanicunahuan cashcashnami sintirirca. Shuj huauquica nircami: “Ñucanchicunapash cai tandanajuita ricuita ushashcamandaca, tucui shunguhuanmi agradicipanchi. Caita ricushpaca ñucanchitapash juyashcatami ricupashcanchi” nishpa.

Sacerdotecunaca huaquinbica shuj viajetallami trompetacunataca huacachin carca. ¿Imashpata shina ruran carca? ‘Huaranga huaranga israelcunata mandajcuna’ tabernáculo carpa huasiman tandanajuchunmi shina ruran carca (Núm. 10:4). Chaipimi Moisesca israelitacunata imashina ayudana cashcata yachachingapaj cayan carca. Chai tiempopi ñucanchicuna ‘huaranga huaranga israelcunata mandajcuna’ cashca cashpaca, chai tandanajuipi cangapami ninanda esforzarinchiman carca.

Ancianocunaca congregacionmanda huauquipanicunapa dueñoca na canllu. Paicunaca ‘tandanajushca llamagucunata mandashpallaca’ na charinllu (1 Ped. 5:1-3). Ancianocunaca huauquipanicunata ayudangapaj, animangapami ninanda esforzarin. Chaimi ashtahuan yachajungapaca ancianocunaca Escuela del Ministerio del Reino nishcaman invitajpica cushijushpa rin. Shinami congregacionbi huauquipanicunataca ashtahuan ayudaita ushan. Chaimi huauquipanicunaca Jehovamanbash ashtahuan quimirita ushashca. Ñucanchicuna chai escuelaman na rishca cashpapash ancianocunamandami yachajuita ushapanchi.

Huaquinbica sacerdotecunaca trompetataca cutin cutinmi huacachin carca. Chaimi gulpi israelitacuna alzarishpa Jehová Dios nishcashna ri callarin carca (Núm. 10:5, 6). Shina tandanajushca rinajujta ricunaca alipachami carianga. Shina ringapaca tucui israelitacunami esforzarina carianga. Huaquingunapaca chaita ruranaca ashata shinllimi cashcanga. ¿Imamandata shina nipanchi?

Huaquin israelitacunapaca cutin cutin, na yashcapi alzarishpa rinaca na fácil cashcangachu. Bibliapica ninmi: Huaquinbica ‘chishimandapacha tutamandacamanmi fuyuca’ ni maiman na cuyurin carca nishpa. Cutin huaquinbica ‘ishcai punllata, shuj quillata, shuj huatatami’ fuyuca na cuyurin carca (Núm. 9:21, 22). Números capítulo 33​pica, israelitacuna casi 40 pushtucunapi quidashcatami ricuchin.

Israelitacunaca ‘jatun pambata, manllanayai jichushca pambatami’ rinajushcanga. Huaquin israelitacunaca shuj ali pushtupi caimandami chaipi causangapaj munashcanga (Deut. 1:19). Paicunaca talvez shuj ladoman rishpaca sufrishpa causaringa yashpami, chai pushtucunapi quidangapaj munashcanga.

Sacerdotecuna trompetacunata huacachijpica huaquin israelitacunaca uyai na uyaimi segurari callarishcanga. Cutin shujcunaca paicunapa turno na ucha chayamujpimi ashata culiran cashcanga. Judá, Isacar, Zabulón nishcacunami primeroca llujshina carca. Paicunaca indi llujshimuj ladopimi carca (Núm. 2:3-7; 10:5, 6). Paicuna ña rishca jipami, sacerdotecunaca cutin trompetacunata huacachin carca. Shina huacachijpica ura ladoman caj israelitacunami segurarin carca. Shinami tucuilla segurarishpa rin carca.

Jehovapa organizacionbi huaquin cambiocuna tiajpica, chai cambiocunata fácil pactachitaca talvez na usharinllu. Huaquinbica na yashcapi cambiocuna tiajpimi, imata ruranatapash na atinashpa huaquinbica culiranchilla. Shinallata imapashi cai cambiocunataca rurarca yashpami pensari ushanchiman. Cambiocuna tiajpimi pacienciatapash na chari ushanchiman. Chai cambiocunapi cutin yacharingapaca tiempomi minishtirin. Shinaca cambiocuna tiajpica cazunami capanchi. Cazujpica Jehová Diosllatami ñucanchitaca bendicianga.

Moisespa punllacunapica, Jehovallatami ashtaca millón jaricunata, huarmicunata, huahuacunatapash chaquishca alpacunapica cuidarca. Pai na cuidajpica huañunmanmi carca. Cai tucurimui punllacunapipash Jehovallatami cuidashpa, yachachishpa, espiritualmente ali cachunbash ayudajun. Israelitacunaca trompetacunata huacachijta uyashpaca uchallami cazun carca. Shinallatami ñucanchicunapash tucuipi cazuna capanchi.