1. a) Jehovata manllana o respetana nishpaca ¿imatata ningapaj munan? b) Jehová Diosta juyajcunaca ¿imatata na rurangapaj munapanchi?

JEHOVATA sirvijcunaca tucui shunguhuanmi paitaca juyapanchi. Shina juyashpapash ¿imashpata Jehovataca manllaitapash manllana capanchi? Pitapash ricui na ricui manllana cashcataca na ninajupanchichu. Ashtahuangarin Jehovata manllana nishpaca, paita tucui shunguhuan respetana cashcatami ningapaj munapanchi. Tucui shunguhuan Jehovata respetaimandami paitaca na llaquilla sintichingapaj munapanchi. Ashtahuangarin paihuan alipacha amigocuna cangapami munapanchi (Sal. 111:10; Prov. 8:13). Cai temapimi Jehovata manllanamanda o respetanamanda ashtahuan yachajupashun.

2. Salmo 86:11​mandaca ¿ima ishcai yuyaicunatata yachajupashun?

² (Salmo 86:11, NM liingui) *. Cai shimicunata ricushpami rey Davidca tucui shunguhuan Jehovata respetangapaj munashcata ricupanchi. Chai shimicunata ñucanchicunapash ñucanchi causaipi pactachingapaj imata rurana cashcata yachajupashun. Primero, Jehovapa shutita imacunapilla respetana cashcata yachajupashunchi. Segundo, ñucanchi causaipi Jehovata respetashcata ricuchingapaj imata rurana cashcata ricupashun.

3. Jehová Diospa shutita respetachunga ¿imata Moisestaca ayudarca?

³ Cunanga caipi pensaripashunchi. Horeb urcupi Moisés cashpaca  Jehovataca muscuipishnami paipa ñaupajpi cashcatashna ricurca. Perspicacia para comprender las Escrituras nishca libropica, “Jesús cai alpaman nara shamujpillata Jehovataca ni pipash na uyashcatami Moisesca Jehovataca uyarca” nijunmi. Moisesca Jehová Diospacha cashna nijtami uyarca: “Mandaj Dios, Mandaj Dios ñucami, tucuita ushaj, llaquij, juyaj, na ñapash fiñarij, ninanda llaquij, na llullaj cani. Huaranga huaranga miraicunacaman llaquijmi cani. Nalita rurashcata, na cazushcata, juchata rurashcatapash cungaj Diosmi cani” nishpa (Éx. 33:17-23; 34:5-7). Jehovapa shutita yarishpaca, Moisesca Jehová Dios paiman imata nishcatami siempre yarin carca. Chaimi israelitacunamanga Jehovapa shutica “ninanda alicachina, jatun manllarina shutimi” can nirca (Deut. 28:58).

4. Jehová Diosta ashtahuan respetangapaca ¿imapita pensarina capanchi?

⁴ Jehovapa shutipi pensarinaca pai imashinapacha cashcata yarichunmi ayudanga. Jehová Diosca ¿ima cualidadcunatallata charin? Jehová Diosca poderta, ali yachaita, alita ruraj, juyaj Diosmi can. Jehovapa tucui cualidadcunapi pensarinami, paita ashtahuan respetachun ayudanga (Sal. 77:11-15).

5, 6. a) Jehová shutica ¿imatata ningapaj munan? b) Éxodo 3:13, 14​pi; Isaías 64:8​pi nishca shinaca Jehová Dios paipa munaita pactachingapaca ¿imatalla rurai ushan?

⁵ Jehová shutica ¿imatata ningapaj munan? Ashtaca estudiashcacunaca, Jehová shutica “ima tucuna cashpapash tucunalla cashcatami” ricuchin nishca. Caica ricuchinmi, Jehová Diospa munai pactarichunga nima, nipipash na jarcai ushashcata. Jehová Diosca paipa munai pactarichunga imatapash rurangallami. Shinaca paipa munai pactarichunga ¿imatallata rurai ushan?

⁶ Jehová Diosca paipa munai pactarichunga, pai ima tucuna cashcata, paipa rurashcacunatapashmi utilizaita ushan (Éxodo 3:13, 14, liingui). Jehová Diospa munai imashnapacha pactarishcataca publicaciongunapimi ricuita ushapashcanchi. Chai publicaciongunapi liishpami Jehová Dios imashnapacha cashcata yachajuita ushapanchi. Shinallata Jehová Diosca paipa munaita pactachingapaca paita sirvijcunatapashmi utilizaita ushan (Isaías 64:8, liingui).  Shinami Jehová Diosca paipa munaita pactachin. Paipa nishcataca pactachingapachami. Nipipash na jarcaita ushangachu (Is. 46:10, 11).

7. Jehová Diostaca ¿imacunamandallata alabapanchi?

⁷ Jehová Diospa rurashcacunapi pensarina, paipa munaita pactachichun imashna ñucanchita utilizashcapi pensarinami Jehovata alabachun ayudan. Por ejemplo, Jehová Dios tucui tucuita rurashcapi pensarishpami paita alabaita ushapanchi (Sal. 8:3, 4). Jehová Dios paipa munaita pactachingapaj ñucanchicunata utilizashcata pensarinaca Jehovata ashtahuan respetachunmi ayudan. Jehová Dioshnaca ni pipash na tianllu. Paipa shutica pai imashina cashcata, tucuita ruraj, tucui tucuita pactachij cashcatami ricuchin (Sal. 89:7, 8).

8. Deuteronomio 32:2, 3​pi nishca shinaca, Jehová Diosca paipa shutihuanga ¿imata rurachunda munan?

⁸ Jehová Dios carasha nishca alpacunaman israelitacuna nara yaicujpillatami Jehová Diosca shuj candana letracunata Moisesman escribichirca. Moisesca chai candanataca israelitacunamanmi yachachina carca (Deut. 31:19). Cai shimicunata liishpaca, Jehová Diospa shutita na pacashpa, tucuicuna paipa shutipi candachun munashcatami ricui ushapanchi (Deuteronomio 32:2, 3, liingui). Jehová Diosca paipa shutita tucui gentecuna rijsichunmi munan. Punda tiempopipashmi Moisesca israelitacunaman Jehová Diospa shutita, Jehová Dios imashinapacha cashcata yachachirca. Chai yachachishcacunaca tamia urmashpa jihua verdella cashcashnami paicunapa causaipica carca. Shinami paicunaca shinlli fetapash charirca. Ñucanchicunapash Moisés shinami yachachina capanchi.

9. Jehová Diospa shutita santificangapaca ¿imatata rurai ushapanchi?

⁹ Villachinajushpaca siempremi Diospa shutita gentecunaman yachachingapaca Bibliata utilizana capanchi. Chaipaca publicaciongunahuan, videocunahuan, jw.org nishca paginatapash utilizaita ushapanchi. Shinami Jehovamandaca yachachi ushapanchi. Maimanbash rijushpa, trabajopi o escuelapi cashpaca siempremi Jehovamanda parlangapaj, pai imashina cashcata yachachingapapash esforzarina capanchi. Cai Alpatapash, gentecunatapash Jehová Dios imapa rurashcatami parlana capanchi. Caicunata uyashpami Jehová Dios paicunata juyashcata cuenta japinga. Jehovamanda cabalta yachachishpaca, paipa shutita santificado cashcata, paimanda llullacuna nishcapash na cierto cashcatami ricuchi ushapanchi. Bibliamanda yachajunami tucuilla gentecunata ayudaita ushan (Is. 65:13, 14).

10. Jehovapa mandashcacunata, leycunata yachachishpapash ¿imatata ashtahuan rurana capanchi?

¹⁰ Bibliamanda yachachijushpaca, Jehová Diospa shutita, pai imashinapacha cashcatapashmi yachachina capanchi. Shinami gentecunaca Jehovata rijsinga. Shinaca Jehovata juyachunga ¿paipa mandashcacunata, paipa leycunata o shuj yachachishcacunata yachachinallachu minishtirin? Talvez, na. Huaquin Bibliamanda yachajujcunaca Jehovapa leycunataca alipachami yachaita ushan. Shinapash Jehovata na juyashpaca paipa mandashcacunata paicunapa causaipi pactachitaca na ushangachu. Cunanga Evamanda yaripashunchi. Paica Jehovapa leycunata ali yachashpapash Jehovata tucui shunguhuan juyashcataca na ricuchircachu. Adanbashmi shinallata rurarca (Gén. 3:1-6). Shinaca Jehovapa mandashcacunata, paipa leycunata Bibliamanda yachajujcunaman yachachishpapash, Jehovata juyachunmi yachachina capanchi.

11. Jehovapa mandashcacunata, paipa leycunata yachachishpapash ¿imamandata Jehovata juyachun ayudana capanchi?

¹¹ Jehovapa mandashcacuna, paipa leycunapash ñucanchi causaipa alipacha cashcatami ricuna capanchi (Sal. 119:97, 111, 112). Bibliamanda yachajujcunaca Jehová Dios ñucanchita juyaimanda paipa mandashcacunata, paipa leycunata cushcataca talvez na intindi ushangachu.  Chaimi paicunataca cashna tapuita ushapanchi: “Jehová Diosca ¿imamandata paipa mandashcacunata cazuchun munan? Paipa mandashcacunamandaca ¿imatata quiquinga yachajupangui? ” nishpa. Shina tapushpami Jehovata ali rijsichun, paipa shutita respetachunbash ayudaita ushapanchi. Chaimi Jehovapa mandashcacunata, paipa leycunata ali yachashpapash, Jehovata tucui shunguhuan juyanga (Sal. 119:68). Shina yachajuimandami shinlli feta charishpa tentaciongunatapash aguantaita ushanga (1 Cor. 3:12-15).

12. a) Rey David ishcai shunguta charimandaca ¿imatata rurarca? b) Shina rurashcamandaca ¿imata pasarca?

¹² Rey Davidca Salmo 86:11​pica minishtirishca yuyaicunatapashmi nirca: “Shujlla shunguta charichun ayudahuayari” nishpa. Huatacuna yalijpica Jehovata tucui shunguhuan na sirvi ushashcatami rey Davidca cuenta japirca. Shuj punllaca paipa altibajo huasimandami shuj huarmi armajujta ricurca. Chai huarmica Bat-Sebami carca. Davidpa shunguca ¿imashinata carca? Tucui shunguhuan Jehovata sirvijushcataca ñana ricuchircachu. Jehová Diosca cashna nishpami mandashcarca: “Cambaj cumba runagupaj huarmitapash, ama munanguichu” nishpa. Chaitaca rey Davidca alimi yacharca (Éx. 20:17). Shina yachashca jahuapash Davidca chai huarmita munashpami ñucapa cashcanman yashpa ricujurca. Chaipica David ishcai shungu tucushcatami ricuchirca. Jehovata cazungapaj munashpapash ñana cazuita usharcachu. Rey Davidca tauca huatacunatami Jehovataca tucui shunguhuan sirvishpa causarca. Tiempo yalijpica paipa munaitami rurarca. Shinallata ashtaca nalicunatami rurarca. Shinami Jehovapa shutitapash nalipi quidachirca. Paipa propio familiata, shuj gentecunatapash ninandami llaquichirca (2 Sam. 11:1-5, 14-17; 12:7-12).

13. Rey David cutin Jehová Diosta tucui shunguhuan sirvishcataca ¿imashinata yachapanchi?

¹³ Jehová Diosca chai nali rurashcacunamandaca Davidtaca disciplinarcami. Shina disciplinashca jipami Davidca cutin ali tucurca (2 Sam. 12:13; Sal. 51:2-4, 17). David ishcai shungu tucushcamanda chai llaquicunata, shujcunata llaquichishcataca na cungarcachu. Chaimi Salmo 86:11​pica, ama ishcai shungu tucungapaj Jehovata ayudahuai nishpa mañashcatashna ricupanchi. Jehová Diosca paipa mañashcacunataca uyarcami. Bibliapica ninmi: ‘Davidca, tucui shunguhuanmi Taita Diostaca cazurca’ nishpa (1 Rey. 11:4; 15:3).

14. ¿Ima tapuitata tucuicunallata tapurina capanchi?

¹⁴ Rey Davidpa ejemploca ñucanchicunatapash ama juchacunapi urmachunmi ninanda ayudan. Davidpa nali rurashcacunapi pensarinami  ñucanchicunapash ama chaitallata rurachun ayudan. Ashtaca huatacunata o ashalla tiempota Jehovata ña sirvinajushpapash tucuicunallatami cashna tapurina capanchi: “Ishcai shungu tucuchun Diablo imacunahuanbash pandachingapaj munajujpica ¿imatata rurajuni?”.

15. ¿Imashpata juchacunata rurai ushanchiman?

¹⁵ Telepi, Internetpi o imapash peliculacunata ricujushpa imapash nali imagenguna llujshijpica ¿imatata rurapanchi? Na pornografiachu can nishpami pensari ushanchiman. Chaicunata ricushpa ñucanchicuna ishcai shungu tucuchunmi Diabloca munan (2 Cor. 2:11). Cunanga caipi pensaripashunchi. Shuj racu tronco caspita chijtangapaca shuj filo filo jachatami minishtirin. Chai jachahuanmi troncota asha asha chijtajpi troncoca ishcaipi partirin. Shina cuendami imapash nalicunata telepi o Internetpi ricushpaca, ñucanchicunaca ishcai shungu tucushpa jatun juchacunata rurai ushapanchi. Shinami Jehovatapash tucui shunguhuan ñana sirvita ushapanchiman. Ñucanchi shungu ama ishcai shungu tucuchunmi cuidariana capanchi. Chaipaca Jehovata manllashpa o cazushpa causangapami esforzarina capanchi.

16. Imapash tentaciongunata charishpaca ¿ima tapuicunapita pensarina capanchi?

¹⁶ Diabloca telepi, Internetpi nali imagengunahuan gentecunata juchapi urmachishpapash shuj shuj ruraicunahuanbashmi juchapi urmachin. Chaimi tucuicunallata cashna tapurina capanchi: ¿Chai nali imagenguna yalijpica ricushpa quidanichu? nishpa. Huaquinbica cashnachari pensari ushanchiman: “Chaita ricushcamandallaca na expulsai tucushachu” nishpa. Shina pensarinaca nalipachami can. Chaipa randica cai tapuicunapimi pensarina capanchi: “¿Ñuca nali munaicunatallata utilizashpachu Diabloca ñucata ishcai shungu tucuchun munan? Ñuca nali munaicunata rurashpaca Jehovapa shutimandaca ¿imatata gentecunaca ninga? ¿Jehovaman ashtahuan quimirichunllu cai ruraicunaca ayudahuan?  O ¿Jehovamandachu caruyachihuan?” nishpa. Cai tapuicunapimi siempre pensarina capanchi. Ima tentaciongunata charishpapash, Jehovataca ali yachaita carahuai nishpami tucui shunguhuan mañana capanchi (Sant. 1:5). Shina mañanami ñucanchi shungu ama pandachichun ayudanga. Shinami ñucanchicunapash Jesús nishca cuenda cashna nishun: “Satanás, ñuca ladomanda anchuri” nishpa (Mat. 4:10).

17. Ishcai shunguta charimanda ima pasai ushashcata intindichipai.

¹⁷ Jehovata ishcai shunguhuan sirvitaca na usharinllu. Cunanga futbolta pugllaj shuj equipopi pensaripashunchi. Chai equipomanda huaquingunaca paicunatalla alicachichun, paicunapurapash entrenador imata yachachishcatapash na catingapaj munashcanman. Cutin shujcunaca entrenadortapash na respetashcanman. Shina cashpaca chai equipoca pugllaitapash na pugllaita ushanmanllu. Cutin shuj equipopi paicunapura ali llevarishpaca ganaita ushanmanmi. Shina cuendami ñucanchi shungu ima munashcata, ima pensashcata, imashina sintirishcata Jehovatalla tucui shunguhuan sirvingapaj ocuparishpaca, shuj equipopi paicunapura ali llevarishcashnami caita ushanga. Diabloca ñucanchi ishcai shungu tucushpa Jehovata na cazushpa, shungu munashcata rurachunmi munan. Shinapash Jehovataca tucui shunguhuanmi sirvina capanchi (Mat. 22:36-38). Ñucanchi shunguta Diablo pandachichunga na saquinachu capanchi.

18. Miqueas 4:5​pi nishca shinaca quiquinga ¿imatata ruragripangui?

¹⁸ Ñucanchicunapash rey Davidshnami mañaita ushapanchi: “Canba shutita manllashpa causangapaj shujlla shunguta charichun ayudahuayari” nishpa. Chai mañashcata ñucanchi causaipi pactachingapaj esforzaripashunchi. Cada punllapa imapash decisiongunata agllagrijushpaca Jehovapa shutita manllashcata o respetashcatami ricuchipashun. Shina rurashpami ñucanchicunaca testigo de Jehovacuna cashcatapash ricuchita ushapashun (Prov. 27:11). Chaimi tucui ñucanchicunapash profeta Miqueas nishcashna: “Ñucanchita Mandaj Taita Diostami, causaita causaicaman cazushpa purinajushun” ni ushapashun (Miq. 4:5).