Paulca ninmi: “Ñuca primoca ñucahuanmi culirai callarirca. Chaimi ñucaca paita cungamanda japishpa macai callarircani. Paitaca huañuchingapapachami munarcani” nishpa.

Marcoca ninmi: “Ñuca huasipica imamandapashmi jaicata culiranlla carcani. Culirashca caimandami mueblecunata, huahuacunapa juguetecunata, shuj cosascunatapash tucuchita tucuchinlla carcani” nishpa.

Talvez ñucanchicunaca paicunashnapachaca na caringachu. Shinapash huaquinbica jaicata culiraimandami na controlarita ushanchi. ¿Imamandata shina capanchi? Adanmandami ñucanchicunaca juchayu naciripashcanchi (Rom. 5:12). Chaimi huaquingunaca Paulshna, Marcoshna paicunapa caractertaca na controlai ushan. Cutin huaquingunaca manllanayachinata o imapapash na sirvij cuenda sintirinatami saquingapaj esforzarin. Cutin shujcunaca huainayana munaita, yapa tragota ufianata, drogacunata fumanata saquingapami ninanda esforzarin.

Pipash nali pensamientocunata, nali munaicunata, nali ruraicunata na controlashpaca paillatami llaquipi urmanga. Ama shina pasachunga ¿imatata rurana capanchi? Jarcarinatami yachajuna capanchi. Chaipaca cai tapuicunamanda yachajupashunchi: Primero, Jarcarina nishpaca ¿imatata ningapaj munan? Segundo, jarcarinaca ¿imamandata minishtirishcapacha can? Tercero, jarcarichunga ¿imata ayudanga? (Gál. 5:22, 23, NM ). Shinallata na jarcari ushajushpa imata rurana cashcatapashmi yachajupashun.

Jarcarinata yachajcunaca paicunapa munaicunataca na ruranllu. Chaipa randica imatapash nishpa o rurashpami Jehovapa ñaupajpipash ali cangapaj munan.

Jesusca paipa ruraicunahuanmi jarcarinataca alipacha ricuchirca. Bibliapica ninmi: “Ima llaquipash japishpaca alimi canman nijpipash, paica chashnallataca na tigrachircachu. Llaquichi tucujushpapash, paica ñucapash llaquichishami nishpaca na tigrachircachu. Ashtahuangarin imatapash cashcatapacha ruraj Diosmanmi, tucuita mingarca” nishpa (1 Ped. 2:23). Jesusca racu caspipi ña huañunalla cashpapash, paimanda burlarinajujpipash jarcarircami (Mat. 27:39-44, NM ). Shinallata fariseocuna ‘juchachingapaj munashpa, paicunapuralla parlarinajujpipash’ Jesusca jarcarircami (Mat. 22:15-22). Tauca judiocuna rumicunahuan pigashpa huañuchingapaj munajujpica, Jesusca ‘Diospa huasimandaca llujshishpami rirca’ (Juan 8:57-59).

¿Jesuspa ejemplota catita ushapanchichu? Ari, ushapanchimi. Shinapash juchayucuna caimandami Jesushnapacha caitaca na ushapanchi. Apóstol Pedroca nircami: “Cristopash chashnallatami, ñucanchimanda llaquita apashpa huañurca. Ñucanchipash paishnalla llaquita apashpa paita catichunmi, chashna huañurca” nishpa (1 Ped. 2:21). Masqui juchayucuna cashpapash Jesuspa ejemplota catingapami esforzarina capanchi. Paipa ejemplota catinaca ¿imamandata minishtirishcapacha can?

Jarcarinaca Jehovapa ñaupajpi ali cachunmi ayudan. Tauca huatacunata Jehovata ali sirvinajushpapash derepenteca na jarcarita ushaimandami Jehovahuanga ñana amigocuna caita ushapanchiman.

Cunanga Moisesmanda yachajupashunchi. Paica ‘tucui cai pachapi causaj jaricunamandaca, yali ali shungutami charirca’ (Núm. 12:3). Paica ashtaca ashtaca huatacunatami israelitacuna quejarinajujpipash aguantashpa causarca. Pero shuj punllaca israelitacuna cutin cutin quejarinajujpimi culirashpa cashna nirca: ‘Na cazuj gentecuna, cunanga uyaichi ¿Cai jaca rumimandachu yacuta llujchina canchi?’ nishpa (Núm. 20:2-11).

Moisesca israelitacuna culirachijpica na jarcari usharcachu. Yacuta llujchishpaca Jehovata alabanapa randica pai llujchishcatashna ricuchirca (Sal. 106:32, 33). Chaimi Jehová Diosca pai carasha nishca alpaguman yaicuchunbash na saquirca (Núm. 20:12). Na jarcari ushashcataca Moisesca huañungacamanmi yarishpa causajurianga (Deut. 3:23-27).

¿Imatata yachajupanchi? Tauca huatacunata Jehovata sirvinajushpapash, pipash ñucanchita nali tratajpi, culirachijpipash respetohuanmi tratana capanchi (Efes. 4:32; Col. 3:12). Huaquinbica ña mayorllagu caimandami pacienciataca na charipanchi. Moiseshnami ñucanchicunapash tauca huatacunata Jehovata sirvinajuita ushapanchi. Shinapash na jarcari ushaimandami Jehovapa ñaupajpica ñana ali ricurita ushapanchiman. Shinaca jarcarichunga ¿imata ayudanga?

Jehovata paipa espíritu santota mañapashunchi. ¿Imamandata espíritu santota mañana capanchi? Jarcarinata yachajungapami Jehovataca paipa espirituta mañana capanchi. Mañajpica Jehová Diosca carangallami (Luc. 11:13). Jehovapa espiritumi chai cualidadta charichunbash ayudanga (Filip. 4:13). Shinallata juyaita charichun, shuj cualidadcunata charichunbashmi ayudanga. Shujcunata juyashpami jarcaritapash ushapashun (1 Cor. 13:5).

Jarcarinata yachajungapaj esforzaripashunchi. Nali yuyaicunata, nali munaicunata charishpaca Internetpi, telepi imapash nali ruraicunataca na ricujunachu capanchi (Efes. 5:3, 4). Shinallata imatapash nalicunata rurachijlla cosascunamandapash caruyanami capanchi (Prov. 22:3; 1 Cor. 6:12). Por ejemplo, shuj huauqui o shuj pani nali yuyaicunata, nali munaicunata mishangapaj esforzarijushcanman. Chaicunata mishangapaj  munashpaca nali yuyaicunamanda, nali munaicunamanda parlaj peliculacunata, librocunataca na ricunachu can.

Cai consejocunata cazunaca talvez dificilmi ricurin. Pero Jehovallatami cai consejocunata cazushpa jarcari ushachunbash ayudanga (2 Ped. 1:5-8). Ñucanchi nali yuyaicunata, nali parlocunata, nali ruraicunatapash ama rurachunmi Jehová Diosca fuerzata cushpa ayudanga. Callari parrafocunapi parlashca Paulpash, Marcopashmi paicunapa caractertaca controlai usharca. Cunanga shuj huauquimanda yachajupashunchi. Pai manejajushpaca apurado rijuimandami shuj carropi rijcunatapash culirashpa imacunatapash ninlla carca. Pai cambiangapaca ¿imatata rurarca? Paica ninmi: “Cada punllami Jehovataca tucui shunguhuan mañan carcani. Jarcarinamanda parlaj temacunata liini, huaquin textocunatapash de memoria yachajurcani. Tauca huatacunatami cada punlla ama ñapash culirangapaj ninanda esforzarijushcani. Chaimi cunanbica maimanbash rigrijushpaca ama apurado rijungapaj alihoralla llujshini” nishpa.

Huaquinbica na jarcari ushaimandami Jehovataca pingaimanda ñana mañangapapash munapanchi. Shinapash na jarcari ushajuj horaspachami Jehovataca uchalla mañana capanchi. Jehovataca perdonahuai, ayudahuai nishpami mañana capanchi. Ñucanchillatapash ama chaipillata urmangapami esforzarina capanchi (Sal. 51:9-11). Shina esforzarijujta ricushpaca Jehová Diosca ñucanchi mañaicunata uyashpami ayudanga (Sal. 102:17). Apóstol Juanga cashna nishpami yarichirca: “Jesucristopaj yahuarca, ñucanchipaj juchacunataca tucuillata maillan” o perdonan (1 Juan 1:7; 2:1; Sal. 86:5). Jehová Diosca shujcunataca perdonanami canguichi ninmi. Shinallatami ñucanchitapash Jehová Diosca perdonanga (Mat. 18:21, 22; Col. 3:13, NM ).

Israelitacunahuan Moisés jaicata culirajpica Jehová Diosca paihuanga ninandami culirarca. Shinapash Moisestaca perdonarcami. Bibliapica Moisesmanda parlashpaca: Paishnaca “ima horapash na tiarcachu” ninmi (Deut. 34:10; Heb. 11:24-28). Jehová Diosca pai carasha nishca alpacunaman Moisés yaicuchunga na saquircachu. Shinapash paraíso Alpagupi para siempre causachunmi Moisestaca causachinga. Ñucanchicunapash paraíso Alpagupi para siempre causangapaj munashpaca, jarcarinatami yachajunapacha capanchi (1 Cor. 9:25).