1. Jehovata sirvijcunaca ¿imamandata huaquinbica sololla sintirishca?

CASI tucuicunami huaquinbica sololla sintiripashcanchi. Shinapash huaquingunapaca cashna sintirinaca asha ratogupallami can. Cutin shujcunaca siempremi shina sintirin. Huaquingunaca ashtaca gentecunahuan cashpapashmi sololla sintirishca. Shuj huauquipanicunaca shuj congregacionman chairalla yalishca cashcamandami sololla sintirishca. Cutin shujcunaca shuj tandanajushca familiapi causashcamanda shuj ladoman causangapaj rishpami sololla sintirin. Cutin huaquingunaca shuj familiar huañushcamandami sololla, llaquilla sintirin. Ashtahuanbachaca chairalla bautizarishca huauquipanicunami sololla sintirita ushan. Paicunaca paicunapa familiarcuna, punda nara Testigo cajpi charishca amigocuna Testigo tucushcamanda nalicachishpa rimashcamandami sololla sintirita ushan.

2. Caipica ¿imatata yachajugripanchi?

² Jehová Diosca ñucanchicunataca alipachami intindin. Chaimi sololla sintirijujpica ñucanchicunataca ayudangapaj munan. Caipica sololla sintirijpi Jehová Dios imashina ayudajta, ñucanchicuna sololla sintirijushpa imata rurana cashcata, shinallata congregacionmanda huauquipanicuna ama sololla sintirichun imashina ayudana cashcatami yachajupashun.

3. Profeta Eliasmanda preocuparishcataca ¿imashinata Jehová Diosca ricuchirca?

³ Jehová Diosca paipa tucui sirvijcuna cushilla, ali sintirichunmi munan. Chaimandami paita mañajcunata ayudangapaca ladopi can. Ñucanchicuna desanimarishca cajtapashmi ali yachan (Sal. 145:18, 19). Profeta Elías llaquilla sintirijujpi Jehová Dios paita ayudangapaj imata rurashcata ricupashunchi. Profeta Elías causajushca tiempopica israelitacunaca Jehová Diostaca na ali sirvinajurcachu. Jehovata na sirvijcunaca Jehová Diosta ali sirvijcunataca catiriashpami llaquichinajurca. Profeta Eliastapashmi huañuchingapaj  munanajurca (1 Rey. 19:1, 2). Caicunamandami profeta Eliasca, ñucallami Jehová Diosta sirvingapaca quidashcani yashpa llaquilla sintirijurca (1 Rey. 19:10). Shina sintirijujta ricushpami Jehová Diosca shuj angelta cachashpa Eliastaca ayudarca. Cai angelca, Jehová Dios Eliasta juyashcata, shinallata shuj israelitacunapash Jehová Diosta sirvishpa catinajushcata yachachunmi ayudarca (1 Rey. 19:5, 18).

4. Marcos 10:29, 30​pi nishcashnaca Jehová Diosca familiacuna saquijpi ñucanchimanda preocuparishcataca ¿imashinata ricuchishca?

⁴ Jehová Diosca paita sirvingapaj shuj shuj cosascunata rurashpa esforzarishcataca alimi yachan. Huaquinbica paita sirvinajushcamandami ñucanchi familiarcuna, amigocunapash ñucanchitaca ñana apoyangapaj munashca. Shuj viajeca apóstol Pedroca Jesustaca: “Ricui, ñucanchica imaguta charishcatapash tucuita saquishpami, candaca catinajunchi. Shina catishcamandaca, ¿imagutashi charishun? nishpami tapurca” (Mat. 19:27). Shina nijpica Jesusca juyaihuanmi paipa discipulocunataca, ñucata catijushcamandaca cangunapa propio familiacuna, amigocuna saquijpipash congregacionbica ashtaca familiatami charigringuichi nirca (Marcos 10:29, 30​ta liipangui). Jehová Diosca paipa sirvijcunataca ayudashami nishcami (Sal. 9:10). Shinaca ama sololla sintiringapaj Jehová Diospa ayudata imashina chasquina cashcata yachajupashunchi.

5. ¿Imamandata Jehová Dios ñucanchita ayudajushcapi pensarinaca ali can?

⁵ Jehová Dios ñucanchita imashina ayudajujta pensarina (Sal. 55:22). Caipi pensarinami ama sololla sintirichun ayudanga. Carol * shuti shuj soltera paniguca paipa familiapica pailla testigo de Jehová cashcamandaca cashnami nin: “Ñucataca ama solalla sintirichunga Jehová ñucata imashina ayudajushcapi pensarinami, llaquicunahuan cajpica ayudahuashca. Chaimi Jehová Dios ñucata siempre cuidashpa catinataca segura capani” nin.

6. Sololla o solalla sintirijujpica 1 Pedro 5:9, 10​pi shimicunaca ¿imashinata ayudaita ushan?

⁶ Sololla o solalla sintirij huauquipanicunata imashina Jehová Dios ayudajushcapi pensarina (1 Pedro 5:9, 10​ta liipangui). Hiroshi shuti huauquiguca ashtaca huatacunatami paipa familiapica pailla Testigo cashca. Paica ninmi: “Congregacionbi huauquipanicuna llaquicunata, problemacunata charishpapash Jehová Diosta sirvishpa catinajujta ricunami, na Testigo  familiata charishpapash Jehovata sirvishpa catichun ayudahuashca” nin.

7. Jehová Diosta mañanaca ¿imashinata quiquindaca ayudashca?

⁷ Jehovata mañariana, Bibliata liina, tandanajuicunaman rina. Ñucanchicuna imashina sintirijushcataca cabalgutami Jehová Diosmanga parlanalla capanchi (1 Ped. 5:7). Massiel shuti joven panigutaca paipa familiaca Jehovata sirvingapaj decidishcamandami contrashpa ricui callarirca. Paica ninmi: “Ama solalla sintirichunga Jehová Diosta tucui shunguhuan mañanami ayudahuarca. Jehová Diosca ñucapaca shuj propio taitashnami cashca. Paimanga punllapica tauca viajecunatami ñuca imashina sintirijushcata, imata pensashcatapash parlapani” nin.

8. Bibliata liina, liishcapi pensarinaca ¿imashinata quiquindaca ayudashca?

⁸ Jehová Dios ñucanchita juyashcata yarichunga Bibliata cada punlla liina, liishcapi pensarinapashmi minishtirishcapacha can. Panigu Biancataca paipa familiaca Testigo cashcamandami nalicachishpa riman. Paica ninmi: “Aguantachunga Jehovata sirvijcunapa causaimanda Bibliapi liina, publicaciongunapi shuj turiñañacunapa experienciacunatapash liina, chai liishcacunapi pensarinami ñucataca ninanda ayudahuashca” nin. Huaquin huauquipanicunaca paicunata animachij textocunatami de memoria yachajun. Por ejemplo, Salmo 27:10​ta, Isaías 41:10​tami yachajun. Cutin shujcunaca reuniongunapami ali prepararin o Bibliapa grabashca audiocunatami uyan. Huauquipanicunaca caicunata rurana ama sololla sintirichun ayudajtami ricushca.

9. Tandanajuicunaman na faltashpa rinaca ¿imashinata quiquindaca ayudashca?

⁹ Tandanajuicunaman na faltashpa ringapami esforzarina capanchi. Shina rurashpaca ñucanchillatami animarishun y ñucanchi huauquipanicunatapashmi ashtahuan rijsipashun (Heb. 10:24, 25). Párrafo 7​pi parlashca panigu Massielca ninmi: “Turiñañagucunahuan parlana ñucapa shinlli cajpipash, tucui reuniongunaman rishpa shuj comentariotallapash cungapami esforzarishcani. Chaimi ama solalla sintirichun ayudahuashca” nin.

10. ¿Imamandata Jehová Diosta tucui shunguhuan sirvij huauquipanicunapa amigo tucuna capanchi?

¹⁰ Jehová Diosta tucui shunguhuan sirvij huauquipanicunahuan amigo tucuna. Ñucanchicunaca shuj shuj edadta charijcunahuan, shuj shuj culturamanda huauquipanicunahuanmi llevarita ushapanchi. Bibliapica, “[mayorllacunami] ali yachaita charin” ninmi (Job 12:12). Shina cajpipash mayorllacunapashmi jovengunamandaca ashtacata yachajuita ushan. Jonatanga Davidpaca mayormi carca. Shina cashpapashmi paicunaca alipacha amigocuna tucurca (1 Sam. 18:1). Llaquicunata charishpaca Davidpash, Jonatanbash ishcandillatami Jehová Diosta sirvishpa catingapaca ayudarirca (1 Sam. 23:16-18). Panigu Irinaca paipa familiapica paillami Testigo can. Chaimi paica: “Ñucanchi turiñañagucunaca ñucanchipa  propio taitashna, propio turishnami tucun” nin. “Shinallata paicunataca Jehová Diosmi ñucanchi propio familiashnallata ñucanchicuna minishtirijushca horaspi ayudachun utilizaita ushan” nin.

11. ¿Imashinata ali amigocunata charita ushapanchi?

¹¹ Huaquin huauquipanicunapaca shujcunahuan amigo tucunaca na facilchu can. Ashtahuanbachaca shujcunahuan parlana na fácil caj huauquipanicunapami shinlli can. Ratna shuti panigupaca shujcunahuan parlanaca shinllimi can. Paitaca Testigo tucushcamandami paipa familiaca contrarca. Paica: “Ñucaca congregacionmanda turiñañagucunapa ayudata minishtishcatami cuenta japircani” ninmi. Huaquinbica ñucanchicuna imashina sintirishcata shujcunaman villanaca na facilchu can. Shinapash ñucanchicuna imashina sintirishcata shujcunaman villanami paicunahuan ali amigocuna tucuchun ayudaita ushan. Amigocunaca ñucanchita ayudangapaj, animangapaca listomi can. Shinapash paicunaca ñucanchicuna imashina sintirijushcata na yachashpaca na ayudai ushangachu.

12. Ali amigocunata charingapaca ¿imatata rurai ushapanchi?

¹² Predicacionman shuj huauquipanicunahuan llujshinami ashtahuan amigocunata charichunga ayudaita ushan. Párrafo 5​pi parlashca Carol paniguca: “Villachinaman llujshishpa, Jehová Diosmanda shuj shuj cosascunata rurashpami ashtaca amigocunata taripashcani. Ñucata ayudangapaj, animangapaca paicunatami Jehová Diosca utilizashca” ninmi. Shinaca Jehová Diosta tucui shunguhuan sirvinajuj huauquipanicunapa amigocuna tucungapaj esforzaripashunchi. Cai huauquipanicunatami llaquilla o sololla sintirijujpica Jehová Diosca ñucanchita ayudachun utilizan (Prov. 17:17).

13. Congregacionbica ¿imatata tucuicuna rurana capanchi?

¹³ Tucuicunami congregacionbica juyaita ricuchingapaj, tucuicunahuan ali llevaringapaj esforzarina capanchi. Shina rurajpica pipash na sololla sintiringachu (Juan 13:35). Ñucanchipa nishcacuna o ruraicunami shujcunata ali o nali sintichita ushan. Shuj paniguca: “Bibliamanda yachajui callarijpica, congregacionmanda turiñañacunami ñucapa propio familiashna tucurca. Paicunapa ayudahuanmi testigo de Jehová tucui usharcani” ninmi. Huaquinbi shuj huauquigu o shuj panigu paipa familiamanda pailla Testigo cajpica, paicunata ayudangapaj ama sololla sintirichun o solalla sintirichunga ¿imatata rurai ushapanchi?

14. ¿Imashinata congregacionman chairalla shamushcacunapa ali amigocuna tucuita ushapanchi?

¹⁴ Ñucanchira huauquipanicunapa amigocuna tucupashunchi. Congregacionman chairalla shamushca huauquipanicunata, Bibliamanda yachajujcunata, chairalla bautizarishcacunatapash juyaihuan chasquipashunchi (Rom. 15:7). Paicunataca saludaitallaca na saludangapaj munapanchichu. Paicunahuanga ali amigocuna tucungapami munapanchi. Chaipaca ciertopachami paicunamanda preocuparishcata ricuchina capanchi. Llaquicunata, problemacunata charijpipash intindingapami esforzarina capanchi. Shinapash paicunapa causaipica na yapata satirinachu capanchi. Huaquin huauquipanicunapaca paicuna imashina sintirishcata shujcunaman villanaca shinllimi can. Chaimi paicunapa causaimanda yapata ama tapuchijungapaj cuidadota charina capanchi. Imaguta tapuchishpapash ali yuyashpami tapuchina capanchi. Imaguta villajpipash juyaihuan, pacienciahuanmi uyana capanchi. Por ejemplo, “Jehová Diosmandaca ¿imashinata yachajui callariparcangui?” nishpami tapuita ushapanchi.

15. Tucui shunguhuan Jehová Diosta sirvij huauquipanicunaca ¿imashinata shuj huauquipanicunataca ayudaita ushan?

¹⁵ Jehová Diosta tucui shunguhuan sirvij huauquipanicuna, ashtahuanbachaca anciano huauquicunami congregacionmanda huauquipanicunamanda preocuparishpaca, paicuna Jehová  Diosta tucui shunguhuan sirvishpa catichun ayudan. Melissa panigutaca paipa mamaca huahuamandami Bibliamanda yachachishpa viñachirca. Paica ninmi: “Ñuca imagumandapash parlangapaj munajpica siempremi turigucunaca taitashna ayudangapaj tiempoguta llujchirca. Shina turigucuna tiashcamandaca Jehová Diostaca ninandami agradicipani” ninmi. Cunanga huauqui Mauriciomanda yachajupashunchi. Paica, paita Bibliamanda yachachij inactivo tucujpimi, pipash jichushcashna sintirirca. “Ñucataca ñaupaman catingapaca huauqui ancianocunami ayudahuarca. Paicunami ñucahuan parlangapaj siempre tiempoguta llujchin carca. Shinallata predicacionmanbashmi cumbahuan carca” ninmi. “Paicunapa estudio personalpi imata yachajushcatami villahuan carca. Shinallata ñucahuanbashmi pugllangapaj llujshin carca” nin. Cunanga panigu Melissa, huauquigu Mauriciopash tiempo completopimi Jehová Diostaca sirvinajun.

16, 17. Shuj huauquipanicunataca ¿imata rurashpata ayudaita ushapanchiman?

¹⁶ Ayudangapaj munashcataca ruraicunahuan ricuchipashunchi (Gál. 6:10). Paipa familiamanda carupi causaj Leo shuti shuj misionero huauquiguca ninmi: “Huaquinbica minishtirishca horaspi imagupipash ayudanallami minishtirin” ninmi. “Shuj punllaca ñuca carrohuan chocarishcatami yarini. Chaimandami huasiman chayashpaca manllarishca carcani. Shinapimi congregacionmanda shuj cusahuarmica paicunapa huasipi micuchun invitahuarca. Paicunapa huasipi imaguta micushcataca na yarinichu. Shinapash paicuna ñucata juyaihuan tratashcamanda tranquilo sintirishcataca nunca na cungashachu” ninmi.

¹⁷ Tucuicunami asambleacunapi huauquipanicunahuan parlashpaca cushilla sintiripanchi. Shinapash ñaja parlashca Carol panigu ima nijta ricupashunchi: “Asambleacunapi canaca ñucapaca shinllimi cashca. Ashtaca huauquipanicuna chaipi cajpipash, paicuna familiacunahuan cajta ricushpaca ñucaca solallami sintirini” nin. Cutin shuj huauquipanicunapaca, paicunapa cusa o huarmi huañushca jipami shuj asambleaman rinaca shinlli can. ¿Talvez cashna llaqui apashca huauquipanicunata rijsipanchichu? Cashna huauquipanicunata rijsishpaca ñucanchi familiahuan tiempoguta yalichun invitapashunchi.

18. Shuj huauquipanicunata juyashcataca ¿imashinata 2 Corintios 6:11-13​pi nishcashnaca ricuchi ushapanchi?

¹⁸ Ñucanchi huauquipanicunahuan tiempoguta yalipashunchi. Imagutapash ruragrijushpaca ñucanchi huauquipanicunatapashmi  invitanalla capanchi. Ashtahuanbachaca sololla sintirijcunatami invitaita ushapanchi. Paicunataca ‘ciertopacha juyashcatami’ ricuchina capanchi (2 Corintios 6:11-13​ta liipangui). * Párrafo 15​pi parlashca Melissa paniguca ninmi: “Huaquin turiñañagucunaca paicunapa huasiman o maimanbash puringapami ñucanchitaca invitan carca. Chaitaca ninandami gushtan carcani” nin. Ñucanchipashmi congregacionmanda shuj huauquita o shuj panigutaca ñucanchihuan tiempota yalichun huasiguman invitaita ushapanchi.

19. ¿Ima punllacunata ashtahuanbachaca ñucanchi huauquipanicunata cumbana capanchi?

¹⁹ Huaquinbica shuj punllacunami ashtahuanbachaca huauquipanicunaca paicunahuan tiempoguta yalichun minishtin. Por ejemplo, na Testigo familiata charij huauquipanicunaca paicunapa familiacuna yanga fiestacunata rurajuj horasmi paicunahuan cachun minishtin. Cutin shujcunaca shuj familia huañushca huata pactajpimi llaquilla sintirin. Chai ratocunami paicunaca paicunahuan cachun minishtin. Paicunahuan tiempoguta yalishpaca paicunamanda preocuparishcatami ricuchipanchi (Filip. 2:20).

20. Sololla o solalla sintirijujpica ¿imashinata Mateo 12:48-50​pi shimicunaca ayudaita ushan?

²⁰ Shuj huauqui o shuj panica ashtaca cosascunamandami talvez sololla o solalla sintirita ushanga. Shinapash ñucanchicuna imashina sintirijushcata Jehová Dios yachajtaca seguromi caita ushapanchi. Ñucanchita animangapaca Jehová Diosca ñucanchi huauquipanicunatami utilizan (Mateo 12:48-50​ta liipangui). Ñucanchi huauquipanicunata Jehová Dios cushcamanda agradicishcata ricuchingapaca, tucui huauquipanicunata animangapaj, ayudangapaj esforzarishpami Jehová Diosta agradicishcataca ricuchipanchi. Talvez huaquin ratocunaca solollami sintiripashun. Shinapash Jehová Dios ñucanchihuan siempre cashcataca nunca na cunganachu capanchi. Paica ñucanchita ayudangapaca tucui horasmi listo can.