Ñucaca 19 de mayo de 1940​pimi, Líbano llactapi nacirircani. Huaquin huatacuna jipaca, Trípoli shuti llactamanmi causangapaj rircanchi. Ñuca taitacunaca testigo de Jehovacunami carca. Chaimi ñuca quimsa panicunahuan ñuca shuj huauquihuanga cushilla viñarcani. Gulpicunamandaca ñucami último carcani. Ñuca taitacunapaca culquita charinapa randica Bibliata yachajuna, tandanajuicunaman rina, shuj gentecunata Bibliamanda yachachishpa ayudanami ashtahuanbachaca importante carca.

Ñucanchi congregacionbica huaquin ungido huauquipanicunami tiarca. Shuj huauquiguca Michel Aboud shutimi carca. Paimi estudio de librota yachachinataca ñaupaman pushan carca. Paica Bibliataca, Nueva York llactapimi yachajushca carca. Chaimi 1921​pica Líbano llactaman yachachingapaj shamushca carca. Cai huauquigu Galaad Escuelamanda graduarishca ishcai panigucunata respetohuan tratashpa ayudashcatami yarini. Paicunaca Anne y Gwen Beavor shutimi carca. Cai panigucunaca ñucanchi familiahuanga ali ali amigocunami tucurca. Chai punllamandaca tauca huatacuna jipami Estados Unidos llactapica, Anne shuti paniguhuan tuparircani. Paita cutin ricushpaca ninandami cushijurcani. Cutin asha tiempo jipami, Gwen shuti paniguhuan tuparircani. Paica Wilfred Gooch shuti huauquiguhuan cazarashcatami ricurcani. Paicunaca Londres sucursalpimi causanajushca carca.

Huahua cajpica Líbano llactapica ashalla Testigocunami tiarca. Ashalla Testigocuna tiashpapashmi Bibliamandaca gentecunamanga yachachin carcanchi. Shuj religionda ñaupaman pushajcuna villachinata jarcajpipashmi villachishpa catircanchi. Cunangamanmi chai llactapi ima pasashcataca ali ali yarini.

Shuj punllaca Sana shuti ñuca panihuanmi shuj jatun edificiopi villachinajurcanchi. Shina villachinajujpimi shuj sacerdoteca chayamurca. Chai sacerdote chaiman chayachunga pipashmi cayashca yarirca. Chai sacerdoteca culirashpami ñucanchita ninanda rimai callarishpa, ñuca panitaca gradaspi shayajujpi tangaj saquirca. Chaimi antsicarin pichari policiata uchalla cayashcarca. Chaimi policía shamushpaca ñuca pani gradasta urmashcamanda imashina cashcata ricunajurca. Chai sacerdoteta policiacuna apashpaca chai sacerdote shuj armahuan cashcatami yachaj chayarca. Chaimi chaita ricushpaca policiacunata mandaj jefeca: “Canga ¿imata cangui? ¿Iglesiata ñaupaman pushajchu cangui? ¿O pandillerocunata ñaupaman pushajchu cangui?” nishpa tapurca.

Shinallata shuj punllaca congregacionmanda huauquipanicunahuanga shuj busta alquilashpami shuj carulla puebloman villachingapaj rircanchi. Tranquilo villachinajujpimi chai pueblomanda sacerdoteca ñucanchicuna chaipi villachinajujta yachaj chayashcarca. Chaimi ñucanchita japishpa macachun gentecunataca tandachishca carca. Chai gentecuna shamushpaca rumicunahuanmi pigai callarirca. Ñuca taitatacarin chugrichircami. Ñuca taitapa ñavi yahuarsapa cashcatami yarini. Chaimi ñuca taita busman tigrajpi tucuicunallata preocupado rinajushcata yarini. Ñuca mama, ñuca taitapa ñavita limpiachijushpa imata nishcataca nunca na cungashachu. Paica: “Jehová Dioslla, perdonapai. Chai gentecunaca imata ruranajushcatapash na atinanllu” nircami.

Cutin shuj viajeca ñucanchi familiata visitangapami rircanchi. Ñuca abuelopa huasiman chayajpica shuj obispomi chaipi cashcarca. Chai obispoca ñuca taitacuna Testigocuna cashcataca alimi yacharca. Chaimi ñuca 6 huatagucunatalla charijta ricushpapash: “Canga ¿imashpata na bautizarishcangui?” nishpa tapuhuarca. Chaimi: “Bautizaringapaca Bibliatarami ali yachajuna cani. Jehová Diospipash tucui shungumi crina cani” nircani. Chai obispoca shina nishpa tigrachijpica, nalicachishpami ñuca abuelomanga: “Canba nietoca ñucataca na respetahuanllu” nirca.

Cashna huaquin cosascunami ñucanchitaca Líbano llactapica pasashca. Shinapash chai llactamanda gentecunaca cushi cushi gentecuna, mingachinatapash gushtaj gentecunami can. Chaimi casi siempre gentecunahuanga Bibliamandaca ali parlai usharcanchi. Y tauca gentecunamanmi Bibliamandaca yachachinajurcanchi.

Ñuca escuelapi cashca tiempopimi Líbano llactamanga, Venezuelamanda shuj huauquigu shamurca. Chai huauquiguca ñucanchi congregacionba tandanajuicunamanmi shamun carca. Chaipimi ñucapa Wafa shuti shuj panita rijsishpa paihuanga de novios tucurca. Ñuca pani chai huauquiguhuan cazarashpaca Venezuelamanmi causangapaj rirca. Ñuca panica Venezuelamandami ñuca taitacunamanga escribimun carca. Paica ñuca taitacunamanga: “Shamuichi,  visitahuaichi. Ricunayanmi” nishpami escribin carca. Shina nijujpillatami ñuca taitacunaca paita visitanata dicidirca.

Venezuelamanga 1953​pimi chayarcanchi. Chaiman chayashpaca, Caracas nishca ciudadpimi causangapaj rircanchi. Chaipica, gobiernopa mandana huasi ladollapimi causanajurcanchi. Chaimi presidente paipa choferhuan carropi yalijujtaca huaquinbica ricun cariani. Chaita ricushpaca jovenlla caimandaca cushijushpami ricujun cariani. Shinapash ñuca taitacunapaca chaipi causanaca shinllimi ricurirca. Paicunaca shuj shimita, shuj culturata, shuj micunacunata micunatami yachajuna tucurca. Chai llactamanda climapipashmi yacharina tucurca. Paicuna chai llactapi ña yacharinajujpimi shuj llaqui ñucanchitaca pasarca.

Ñuca taitaca ali cashca jahuami nali sintirirca. Chaimandami, “¿imashpata shina can?” yashpa pensarcanchi. Ñuca taitataca nunca na imapash ungui japishcachu carca. Sano sanomi can carca. Pero doctorcunaca ñuca taita cáncer de páncreas nishcata charishcatami villarca. Chaimandami operachircanchi. Shinapash operashcamanda shuj semanahuanmi huañurca.

Ñuca taita huañujpica ninandami llaquirircanchi. Chai horasca ñucaca 13 huatagucunatallami charircani. Cungashcapi shina pasajpica ninandami nali sintirinajurcanchi. Tucui chaipi tucurishcashnami sintirinajurcanchi. Ñuca mamitapami ashtahuan shinlli ricurirca. Shinapash Jehovata sirvishpa ñaupaman catina cashcatami cuenta japircanchi. Jehová Diospa ayudahuanmi ñaupaman cati usharcanchi. Caracaspica 16 huatacunata charishpami colegiota tucuchircani. Colegiota tucuchishpaca, “ñuca familiata mantinishpa ayudangapami, trabajanami cani” yarcani.

Chai tiempopica ñucapa shuj pani Sana shutica, Rubén Araujo shuti huauquiguhuanmi cazararca. Cai huauquiguca Galaad Escuelamanda graduarishpami Venezuelamanllata tigramushca carca. Paicuna cazarashpaca Nueva York llactamanmi causangapaj rirca. Ñuca familiaca, ñuca universidadta estudiashpa catichunmi munarca. Chaimi Estados Unidospi estudiangapaj rishpaca, ñuca pani Sanahuan paipa cusandi causangapaj rircani. Paicunahuan causashpami, paicuna imashina Jehová Diosta sirvijta ricushpa ñucapash Jehová Diosta sirvina munaita charircani. Ñucanchicuna rij Brooklyn Spanish congregacionbica ashtaca huauquicunami Jehovataca tucui shunguhuan sirvinajurca. Chai huauquicunamanda ishcaica alipacha amigocunami tucurca. Paicunaca Milton Henschel y Frederick Franz shuticunami carca. Paicunaca Brooklyn Betelpimi sirvinajurca.

Shuj huatata universidadpi ña estudiashpa tucuchigrijushpami, “ñuca causaihuanga ¿imatata rurajuni?” yashpa pensari callarircani. La Atalaya revistacunapica Jehovata ashtahuan sirvinamanda temacunatami liishca carcani. Ñucapa congregacionmanda precursorcuna, betelitacuna cushilla Jehová Diosta sirvinajujtami ricun cariani. Ñucapashmi paicunashnallata cushilla cangapaj munarcani. Shinapash nara bautizarishcachu carcani. Chaimi Jehová Diosta sirvingapaca bautizarina cashcata cuenta japircani. Chaimi, 30 de marzo de 1957​pica bautizarircani.

Bautizarishca jipaca Jehová Diosta ashtahuan sirvingapami, precursor cangapaj munarcani. Shinapash precursor tucungapaca na fácil cagrijurcachu. Chaimandami, “universidadman rishpandi  ¿imashinata precursor caita ushaiman?” yashpa pensarijurcani. Ñucaca Venezuelapi ñuca mamaman, ñuca huauquipanicunamanga, “universidadta saquigrinimi” nishpami villashpa cartata escribishpa cacharcani. “Venezuelaman tigrashpaca precursor cangapaj munanimi” nishpapashmi escribishpa cacharcani.

Junio de 1957​pimi Venezuelamanga tigrarcani. Huasiman chayashpaca ñuca familia culqui faltajlla causajushcatami cuenta japircani. Chaimi, “paicunata ayudangapaca ¿imatata rurasha?” yashpa pensari callarircani. Bancopimi shuj trabajo llujshirca. Pero ñucaca precursor cangapami munarcani. Precursor cangapaj munaimandami Venezuelamanga cutin tigrashca carcani. Chaimi tucui punllacuna trabajashpandi precursor tucurcani. Trabajashpandi precursor tucushpaca ocupado ocupadomi yalin carcani. Pero chai tiempopica cushillami yalircani.

Shinallata ñucapa huarmigu Sylviata rijsishpapashmi ninanda cushijurcani. Paica tucui shungumi Jehová Diostaca sirvijurca. Paica Alemania llactamandami, paipa taitacunahuan Venezuela llactapi causangapaj shamushcarca. Paita rijsishcamanda shuj tiempo jipami cazararcanchi. Chai jipaca shuj churita, shuj ushigutami charircanchi. Churigutaca Michel (Mike), shinallata ushigutaca Samiratami shutichircanchi. Ñuca mamitata cuidai ushangapapashmi ñucanchihuan causachun pusharcanchi. Ñuca familiata cuidangapami, precursor canataca saquircani. Pero Jehová Diostaca tucui shungumi sirvishpa catircani. Vacaciongunata charishpami, ñuca huarmindi precursorado auxiliarta japingapaj siempre esforzarin carcanchi.

Callari parrafopi parlashca yuyaicunapi pensarijuj horasca ñuca huahuacunaca escuelapirami carca. Chai tiempopica alimi causanajurcanchi. Bancomanda gentecunapash respetohuanmi ricuhuan carian. Shina cajpipashmi gentecunaca, “Jehová Diosta sirvij jarimi can” nishpa ricuchun munarcani. Chaimi ñuca huarmiguhuan parlarishpa cashna pensarcanchi: “Trabajota saquijpica liquidaciondaca cuhuangami” yashpa. “Imapash dibita na paganata charimandami, chai culquiguta na yapata gashtashpaca huaquin tiempota causangapaj pactangami” yarcanchi. Chaimandami trabajota saquinata dicidircani.

Trabajota saquinata dicidinaca na facilchu carca. Shinapash chai trabajota saquichunmi ñuca huarmigu, ñuca mamapash apoyahuarca. Cutin precursor tucugrijushcamandami cushijushcapacha carcani. Shinapimi shuj noticiata cutin charircani.

Shuj punllaca ñucanchi doctorca ñuca huarmigu vijsayu cashcatami villarca. Shuj churigutapash charinataca na pensajushcarcanichu. Shinapash cushijushcami carcanchi. Shina cashpapash precursor  shina sirvingapaj pensajurcanirami. “¿Ushashachu, imashi?” yajurcanimi. Shinapash ñuca churigu nacirinataca cushijushpami shuyai callarircanchi.

Shinapash precursor shina sirvinataca pensashpa catircanchirami. Chaimi abril de 1985​pi ñuca churigu Gabriel nacirishca jipaca, bancopi renunciashpa, junio de 1985​pica cutin precursor regular tucurcani. Huaquin huatacuna jipaca chai llactamanda Comité de Sucursalpimi sirvi callarircani. Venezuelamanda Betelca, ñuca causajushcamandaca 80 kilometroscuna carupimi carca. Chaimi semanapica ishcai o quimsa viajeta viajana carcani.

Venezuela llactamanda Betelca, La Victoria nishca pushtupimi carca. Chaimi, Betel ladollapi cangapaca La Victoriapi causangapaj rircanchi. Chaipi causangapaj rinaca ñuca familiapaca shuj jatun cambiomi carca. Shinapash ñuca familia apoyashcamandaca ninandami agradicipani. Paicunaca ñucanchitaca ninandami ayudarca. Baha shuti ñuca panica, “ñucanchi mamitataca cuidashunllami” nircami. Ñucanchi churi Mikeca ñami cazarashca carca. Pero ñucanchi ushigu Samira, Gabrielpash ñucanchihuanmi causanajurca. Chaimandami ñucanchihuan causangapaj ringapaca, Caracaspi amigocunata saquina tucurca. Ñuca huarmigupash shuj jatun ciudadmanda llujshishpami chaipi yacharina tucurca. Shinallata shuj uchilla huasigupimi causana tucurcanchi. Shinaca, La Victoria pushtuman causangapaj ringapaca ashtaca cambiocunatami rurana tucurcanchi.

La Victoriapi causanajujpica ñucanchi churigu Gabrielca cazararcami. Shinallata ñucanchi ushigu Samirapash shuj ladomanmi causangapaj rirca. 2007 huatapica ñucatapash, ñuca huarmigutapash Betelpi sirvichunmi invitarca. Chai punllamanda, cunangamanga cushijushpami Betelpi sirvinajupashcanchi. Ñucanchi rucu churigu Mikeca congregacionbica anciano shinami sirvijun. Shinallata paipa huarmigu Monicandimi precursorcuna can. Cutin Gabrielca Italia llactapimi anciano shina, Ambra shuti paipa huarmigundi sirvinajun. Cutin ñucanchi ushigu Samiraca precursorami capan. Shinallata Betelpipashmi huasimandallata ayudajun.

Ñuca causaipica ashtaca decisiongunatami japina tucupashcani. Shinapash chaicunata dicidishcamandaca na arripintiripanichu. Cai tucui huatacunapi Jehová Diosta sirvi ushashcamandaca ninandami agradicipani. Shinallata Jehovapa amigocuna cana minishtirishcapacha cashcatapashmi cuenta japipashcani. Ñucanchi causaipi imata dicidina tucujpipash, Jehová Diosmi tucuicunamanllata ‘casilla, ali causaitaca caramunga. Chashna aliguta causanataca, pipash na yachai ushanallami’ can (Filip. 4:6, 7). Ñuca, ñuca huarmigupash Betelpi sirvinajushcamandaca ninandapachami cushijupanchi. Ñucanchi causaipi Jehová Diosta siempre pundapi churashcamanda ali decisiongunata japishcataca seguromi capanchi.