ISRAELITACUNAPA tiempomandapachami Jehovata sirvijcunaca paita adorangapaca siempre culquiguta cushpa apoyan cashca. Shinapash Jesuspa tiempopica judiocunaca ashtaca impuestocunata pagana cashcamandami, paicunapa causaica ashtahuan shinlli tucurca.

Cada jari judiomi ña 20 huatacunamanda vichaimanga Diospa tabernáculo carpa huasiguta o jipamanga templo huasiguta apoyangapaca medio siclo o 2 dracma culquita cuna carca. Jesuspa tiempopica chai culquigutaca templo huasita arreglangapaj, animalcunata Taita Diosman cushpa rupachingapapashmi utilizan carca. Chai templo huasitaca Herodesmi rurashca carca. Huaquin judiocunaca apóstol Pedrotaca, Jesusca templo huasipi impuestota paganamandaca ¿imatata yuyan? nishpami tapurca. Jesuspa ricuipica impuestota paganaca na malochu carca. Chaimi Jesusca, Pedrotaca shuj monedaguta mascachun cachashpa impuestotaca pagachun mandarca (Mat. 17:24-27).

Chai tiempocunapica judiocunaca diezmotapashmi pagana carca. Paicunapa tucui cozechacunamanda, trabajashpa ganashca culquigumandapashmi diezmotaca cuna carca (Lev. 27:30-32; Núm. 18:26-28). Judiocunata ñaupaman pushajcunaca paicunapa tucui cozechacunamanda diezmota pagachunga obligaitami obligan carca. ‘Mentamanda, cominomanda’, eneldomandapashmi pagana carca. Jesusca escribacunata, fariseocunataca impuestocunata cobrashcamandaca na rimarcachu. Ashtahuangarin, diezmota cobrangapaj Diospa leycunata nali utilizanajushcamandami rimarca (Mat. 23:23).

Shinallata chai tiempopica judiocunataca Roma llactamanda gentecunami mandanajurca. Chaimandami paicunamanbash shuj impuestocunata paganara carca. Por ejemplo, shuj alpata charishpaca culquihuan o chai alpamandallata llujshishca granocunahuanmi impuestocunataca pagana carca. Chai impuestocunataca más o menos 20 o 25 por cientotami cobranajurca. Ashtahuanbash judiocunaca cada unomandapashmi shuj impuestotaca pagana carca. Chaimandami fariseocunaca Jesustaca: Cai impuestocunata paganaca ‘¿alichu can o nachu ali can?’ nishpa tapurca. Shina nijpimi Jesusca: “Cesarpaj cajpica, Cesarmanllatami cuna canguichi. Ashtahuangarin Taita Diospaj cajtaca, Taita Diosmanmi cuna canguichi” nirca. Cai shimicunahuanmi Jesusca imata pensashcata ricuchirca (Mat. 22:15-22).

Mercanciata shuj llactamanda, shuj llactaman cachangapapashmi impuestocunataca cobran carca. Cai impuestocunataca barco chayana pushtucunapi, shuj llactamanda shuj llactaman yaicuna entradacunapi, salidacunapi, chacacunapi o mercadocunapipashmi cobran carca.

Romanocuna mandajuj tiempopica judiocunaca ashtaca impuestocunatami pagana carca. Chaimi paicunapa causaica yapa shinlli carca. Jesús cai alpapi cajpica Roma llactataca Tiberiomi mandajurca. Chai punllacunapica Tácito shuti historiadorca impuestocunata cobranajushcamanda parlashpaca nircami: “Siria llactamanda, Judea llactamanda gentecunaca impuestocunata yapata cobranajujpimi, impuestocunata bajachun ninanda mañanajun carca” nishpa.

Impuestota cobrajcuna nali gentecuna cashcamandami judiocunaca ashtahuanbachaca sufrin carca. Impuestota cobrana trabajotaca maijan culquita charijcunallami chai trabajotaca charin carca. Impuestotallaca na cobranllu carca. Paicunapashmi aprovecharishpa imacunamandapash ashtahuan cobran carca. Impuestocunata cobrajcunaca shujcunata contratashpapashmi huasin huasin cobrangapaj richun cachan carian. Huasin huasin ridorcunapash paicunapa beneficiopapashmi ashtahuan cobran carca. Jesuspa tiempopi Zaqueo shuti jaripashmi impuestocunata cobrashpa trabajan carca. Paipashmi huasin huasin rishpa cobrachun trabajadorcunata charirca (Luc. 19:1, 2). Chaimi judiocunaca impuestocunata cobrajcunataca nimamanda na ricunayachin carca.