1. Eclesiastés 7:20​pica Rey Salomonga ¿imatata nirca?

 REY SALOMONGA: Cai mundopica ima pandatapash na “ruraj, alitalla ruraj ima horapash juchata na ruraj runaca, shujllapash napacha tianllu” nircami (Ecl. 7:20). Rey Salomonba nishca shimicunaca ciertopachami can. Tucuicunami siempre imapipash pandarinchi (1 Juan 1:8). Chaimandami tucui gentecunallata Jehová Dios perdonachun, shujcunapash ñucanchita perdonachun minishtipanchi.

 2. Ñucanchipa amigo ñucanchita perdonajpica ¿imashinata sintiripanchi?

² ¿Nachu huaquinbica ñucanchi amigota imatapash nishpa nali sintichipashcanchi? Casi tucuicunatallatami shina pasashca. Shinapash paicunahuan ali cashpa catingapaca shungumandami perdonahuai nishpa mañana tucupashcanchi. Perdonahuai nijpi ñucanchi amigo perdonajpica ¿imashinata sintiripanchi? Pai perdonajpica seguromi ninanda cushijushpa tranquilo sintiripanchi.

 3. Cai yachajuipica ¿imatata ricugripanchi?

³ Tucuicunallatami Jehová Diospa ali amigo cangapaj munapanchi. Shinapash siempremi imatapash nishpa o imatapash rurashpa Jehová Diostaca na ali sintichipanchi. Shinaca cai yachajuipimi imamanda Jehová Dios perdonangapaj munajta seguro cai ushashcata, imashpa Jehová Diospa perdonga diferentepacha cashcata y Jehová Dios picunata perdonan cashcatami ricugripanchi.

 4. Jehová Dios perdonangapaj dispuesto cajtaca ¿imamandata seguro caita ushapanchi?

⁴ Bibliapica Jehová Dios perdonangapaj dispuesto cashcatami ricuchin. Por ejemplo, Jehová Diosca Moisesmanga, Sinaí  urcupi cajpimi shuj angelta utilizashpa Jehová ima laya Dios cashcataca ricuchirca. Moisesmanga: “¡Mandaj Dios, Mandaj Dios ñucami, tucuita ushaj, llaquij, juyaj, na ñapash fiñarij, ninanda llaquij, na llullaj cani! Huaranga huaranga miraicunacaman llaquijmi cani. Nalita rurashcata, na cazushcata, juchata rurashcatapash cungaj Diosmi cani” nircami (Éx. 34:6, 7). Jehová Diosca llaquij juyaj Diosmi can. Paica siempremi juchacunata rurajpipash arripintirijpica perdonangapaj dispuesto can (Neh. 9:17; Sal. 86:15).

 5. Salmo 103:13, 14​pi nishcashnaca, Jehová Diosca ñucanchita ¿imashinata tratan?

⁵ Jehová Dios ñucanchita ruraj Dios caimandaca tucuitami ñucanchimandaca yachan. Cada unotami ali ali rijsin (Sal. 139:15-17). Shinaca Jehová Diosca tucuicunallata juchayucuna cajtaca alimi yachan. Chaimandami paica ñucanchi imashna viñashcata, ima laya gentecuna cashcatapash ali intindin. Ñucanchicunata ali ali rijsimandami Jehová Diosca ñucanchicunataca llaquishpa tratan (Sal. 78:39; Salmo 103:13, 14​ta liipangui).

 6. Jehová Dios perdonangapaj munashcataca ¿imashinata ricuchishca?

⁶ Jehová Diosca perdonangapaj munashcatami ricuchishca. Jehová Diosca Adán, Evapa culpamanda tucui gentecuna juchayuj cajtaca alimi yachan (Rom. 5:12). Ñucanchimandallataca huañuimanda, juchamanda salvaritaca na ushashcanchichu. Shinallata ni pita salvaitapash na ushashcanchichu (Sal. 49:7-9). Pero Jehová Diosca ñucanchita ninanda llaquimandami ñucanchita salvangapaj shuj arreglota rurarca. Juan 3:16​pica, Jehová Diosca gentecunata ninanda juyaimandami paipa único Churiguta gentecunamanda huañuchun cachamurca nijunmi (Mat. 20:28; Rom. 5:19). Jesusmi tucui gentecunamanda huañuna tucurca. Shinami Jesuspi crij gentecunaca salvari ushan (Heb. 2:9). Jehová Diospaca paipa Churi Jesús llaquinaita llaquichi tucushpa huañuchi tucujujta ricunaca manllanai llaquimi carianga. Jehová Dios gentecunata na perdonangapaj munashpaca paipa Churi shina llaquinaita huañuchi tucuchunga na saquinmanllu carca.

 7. Jehová Dios ¿picunata perdonashcatata Bibliapica ricuchin?

⁷ Bibliapica ashtaca gentecunata Jehová Dios perdonashcatami ricuchin (Efes. 4:32). Rey Manasesmanda ¿yuyaripanchichu? Rey Manasesca jatun nali juchacunatami rurarca. Rey Manasesca Jehová Diospa ñaupapi yanga dioscunata  adorashpami yanga dioscunamandaca paipa propio huahuacunatapash rupachirca. Ashtahuangarin Jehová Diospa templo ucupipachami yanga dioscunata churarca. Bibliapica rey Manasesca: “Mandaj Diospaj ñaupajpi chashna yapa nalita rurashpami, ninandapacha fiñachijurca” nijunmi (2 Crón. 33:2-7). Shinapash rey Manasés ciertopacha tucui shungu arripintirijpica, Jehová Diosca perdonashpami cutin pai rey tucuchun saquirca (2 Crón. 33:12, 13). Shinallata rey Davidpashmi shuj jatun juchacunapi urmarca. Paica huainayana juchapi, huañuchina juchacunapimi urmarca. Shinapash David pai na alita rurashcata tucui shungu arripintirijpica, Jehová Diosca perdonarcami (2 Sam. 12:9, 10, 13, 14). Shinaca Jehová Dios perdonangapaj munajtaca seguromi cana capanchi. Jehová Diospa perdonga gentecunapa perdonashcahuan ricujpica diferentepachami can.

 8. ¿Imamandata Jehová Diosca alipacha juezmi can nipanchi? Alipacha juez caimandaca ¿imacunatallata ricun?

⁸ Jehová Diosca mundo entero gentecunapa Juezmi can (Gén. 18:25). Shuj ali juezca tucui leycunata ali alimi yachana can. Y Jehová Diosca tucui leycunata yachashca jahuapash paipachami leycunataca callarichishca (Is. 33:22). Jehová Dioshnaca nipipash ima ali cajta ima nali cajta aliguta ricuitaca na ushanllu. Shinallata shuj ali juezca imamandapash nara sentenciashpallatami imamanda ima nalitapash rurashcata, imashpa shina rurashcataca ali ali ricuna can. Chashna ruraitaca nipi juezpash na ushanllu. Solamente Jehová Diosllami chashna ruraitaca ushan.

 9. Perdonangapaca Jehová Diosca ¿imacunatallata ricun?

⁹ Jehová Diosca na gentecunashnaca juzganllu. Paica imata juzgagrijushpapash imamanda shina pasashcataca ali alimi yachan (Gén. 18:20, 21; Sal. 90:8). Chaimandami Jehová Diosca ñucanchicuna imashna cajta, imashna viñashcata ricushpa, imata pensajta, imata sintijtapash ricushpami juzgan. Shinallata Jehová Diosca cada gentepa shungu ucupi ima pensamientocunata charijta, tucuitami ricun. Jehová Diosmandaca nimapash na pacalla canllu (Heb. 4:13). Shinaca Jehová Diosca imatapash ali ali yachashpa, ali ali ricushpami perdonan.

10. ¿Imamandata Jehová Diosca imata decidishpapash na pandarinllu nipanchi? (Deuteronomio 32:4).

¹⁰ Jehová Diosca imata decidishpapash na pandarinllu. Jehová Diosca pitapash perdonangapaca na agllashpallaca perdonanllu o culquita charijtaiman ricushpalla, imapipash rijsishca cashcata ricushpallaimanga na perdonanllu (1 Sam. 16:7; Sant. 2:1-4). Jehová Diostaca imatapash rurachun obligaitaca na ushanchichu, ni culquita pagashpapash na obligaita ushanchichu (2 Crón. 19:7). Jehová Diosca na imamandapash shaijushca sintirimandalla, pimandapash llaquirishcamandallaca imatapash ruranllu (Éx. 34:7). Jehová Diosca tucui juezcunata yali, ashtahuan mejor juezmi can. Jehová Diosllami ñucanchi ima causaita charishcata, imashpa chashna cajtapash tucui tucuita intindin (Deuteronomio 32:4​ta liipangui).

11. Jehová Diospa perdonga ¿imamandata nipipa perdonhuanbash na igualan?

¹¹ Escrituras Hebreasta escribijcunaca Jehová Diospa perdonga nipipa perdonhuanbash na igualajtaca alimi yacharca. Y Sinónimos del Antiguo Testamento, traducción y adaptación de Santiago Escuain libropi nishcashnaca huaquinbica “Taita Diospa perdonmanda” parlangapaca hebreo shimipica shuj shimitapachami utilizan carca. Chai shimitaca “gentecunapa perdonmanda parlangapaca nunca na churanllu carca” ninmi. Juchata rurashcamanda tucui shungu arripintirijpica, Jehová Diosca  tucuita cungashpa perdonaitapachami perdonan. Jehová Dios ñucanchita perdonajpica ¿imashinata sintiripanchi?

12, 13. a) Jehová Dios perdonajpica ¿imashinata sintiripanchi? b) ¿Jehová Dios perdonashpaca pandarishcacunataca yarishpachu catin?

¹² Jehová Dios ñucanchita perdonashcata seguro sintirishpaca ñucanchi pensamientocunapipash, ñucanchi concienciapipash ‘tranquilomi’ sintirinchi. Gentecunapa perdonashcahuanga na shina sintirinchichu. Jehová Diospa perdonashcallami shina sintichin (Hech. 3:19). Jehová Dios perdonashpaca, ñucanchicuna ima nalita rurashca cajpipash cungaitapacha cungashpami cutin paipa amigocuna cashpa catichun saquin.

¹³ Jehová Diosca ña perdonashca jipaca na cutinga ima nalita rurashcatapash yarishpa cutin chaicunamandaca llaquichijunllu (Is. 43:25; Jer. 31:34). Juchacunata ña perdonashpaca, Jehová Diosca ‘indi llujshimujuj ladomanda, indi huashajujun’ pushtucaman, caru caruta shitashpa saquinshnami cungan (Sal. 103:12). b Jehová Dios imashna ñucanchita perdonajta yachashpaca ninandami agradicishpa cushijushca sintiripanchi (Sal. 130:4). Pero Jehová Diosca ¿picunatata shina perdonan?

14. Caicamanga Jehová Diospa perdonmandaca ¿imatata yachajupashcanchi?

¹⁴ Caicamanga juchata rurashcamanda ciertopacha arripintirijpica ima jucha cajpipash Jehová Diosca perdonanlla cashcatami yachajupashcanchi. Jehová Diosca ñucanchita ruraj Dios caimanda, paillata leycunatapash callarichi Dios caimanda, alipacha Juez caimandaca pitapash perdonanata o na perdonanata ricungapaca tucui tucuita aligutapacha ricushpami imata ruranatapash decidin. Shinaca perdonanata o na perdonanata ricungapaca ¿imacunatata ricun?

15. Lucas 12:47, 48​pi nishcashnaca, Jehová Diosca pitapash perdonanata o na perdonanata ricungapaca ¿imacunatata yaipi charin?

¹⁵ Jehová Diosca shuj personata perdonanata o na perdonanata ricungapaca, chai persona na yachashpallata juchata rurashcata o yachashpata juchata rurashcatami ali ricun. Chaitaca Lucas 12:47, 48​pimi Jesusca aliguta intindichirca (Lucas 12:47, 48​ta liipangui). Si pipash Jehová Diospa ñaupapi nali cajta yachashca jahua, chaitallata rurashpaca Jehová Diospa  ñaupapica jatun juchatami ruran. Yachashca jahua shina rurajpica, Jehová Diosca talvez na perdonangachu (Mar. 3:29; Juan 9:41). Shinapash nalita rurashcamanda, ciertomi nalita rurashcani nishpa reconocijpica ¿Jehová Diosca perdonangacha? Ari, perdonangami. Pero imamanda Jehová Dios chai casocunapi perdonajta ricupashunchi.

16. Arripintirinaca ¿imata can? ¿Imamandata arripintirinaca minishtirishca can?

¹⁶ Jehová Diosca juchacunamanda perdonangapaca ciertopacha tucui shungu arripintirishcatami ricun. Arripintirina nishpaca ¿imatata ningapaj munan? Arripintirina nishpaca ñucanchi imapash nalita rurashcata ama cutin rurangapaj ñucanchi ruraicunapi cambianatami nijun. Shinallata pipash ciertopacha arripintirishpaca, nalita rurashcacunamanda ninanda llaquiyashpa nalipacha sintirishcatami ricuchin. Juchata rurashcamanda nali sintirishpapash ashtahuanbachaca Jehová Diosmanda caruyaimandami shina nalita rurashcani yashpami ninanda llaquirin. Cunanga rey Manasespi, rey Davidpi pensaripashunchi. Paicunataca jatun juchacunata rurashca cajpipash, tucui shungu arripintirishcamandami Jehová Diosca perdonarca (1 Rey. 14:8). Jehová Diosca juchata rurashcamanda llaquirishcamandallaca na perdonanllu. Juchata rurashcacunamanda ciertopacha arripintirishcata ricuchijpimi perdonan. Shinaca arripintirishcataca ñucanchi ruraicunahuanmi ricuchina capanchi. c Shinaca imacunata ricushpa Jehová perdonajta ashtahuan ricupashunchi.

17. Cambiota ruranaca ¿imata can? Cambiota ruranaca ¿imamandata importante can? (Isaías 55:7).

¹⁷ Perdonangapaca Jehová Diosca ¿imatata ashtahuan ricun? Cambiocunata rurajtami ricun. Cambiocunata rurana nishpaca, ima nalita rurajushcatapash, ima nali causaitapash huashaman saquitapacha saquishpa Jehová Dios mandashcashna causai callarinatami nijun (Isaías 55:7​ta liipangui). Cambiocunata rurashpaca ñucanchi yuyaicunata Jehová Diospa yachachishcacuna mandachunmi saquina capanchi (Rom. 12:2; Efes. 4:23). Cambiota rurashpaca ñucanchipa malo pensamientocunata, nali ruraicunataca saquitapacha saquingapami decidido cana can (Col. 3:7-10). Shinapash ñucanchipa juchacunamanda Jesús huañushcapi  tucui shungu feta churajpimi Jehová Diosca ñucanchipa juchacunataca perdonanga. Jehová Diosca Jesús gentecunapa juchamanda pagashpa huañushcamandami ñucanchicuna cambiocunata rurangapaj esforzarijujta ricushpaca perdonan (1 Juan 1:7).

18. Jehová Diospa perdonmandaca ¿imatata yachajupashcanchi?

¹⁸ Cai yachajuipi ima importante yuyaicunata yachajushcata yaripashunchi. Jehová Dios perdonashcashnaca nipipash na perdonanllu. ¿imashpata shina nipanchi? Primeroca Jehová Diosca siempremi perdonangapaj dispuesto can. Catijpica Jehová Diosca ñucanchimandaca tucuita ali alimi yachan. Paica ciertopacha arripintirishcataca ricunllami. Cutin catipica Jehová Diosca juchamanda perdonashpaca cungaitapachami cungan. Jehová Dios shina perdonashcamandami ali concienciata charishpa Jehová Diospa ñaupapipash ali ricuri ushapanchi.

19. Juchayucuna caimanda pandarishpapash ¿imamandata cushilla caita ushapanchi?

¹⁹ Juchayucuna caimandaca siempremi imagupipash pandarishun. Shinapash Perspicacia para comprender las Escrituras, libropi volumen 1, página 209​pi nishca shimicunami ninanda animachin. Perspicacia libropica: “Jehová Diosca paita sirvijcunaca juchayucuna caimanda pandarijtaca ali yachaimandami, paicunataca juyashpa llaquin. Chaimandami pandarishcacunata yarishpaca na cutin cutin llaquirijuna can (Sl 103:8-14; 130:3). Jehová Dios mandashcacunata pactachishpa causangapaj esforzarijushpaca cushillami sintirina can (Flp 4:4-6; 1Jn 3:19-22)”. Cai shimicunaca ¿imashinata sintichin?

20. Cati yachajuipica ¿imatata yachajugripanchi?

²⁰ Ñucanchi juchacunamanda ciertopacha tucui shungu arripintirijpi Jehová Dios perdonangapaj dispuesto cashcamandaca ninandami agradicipanchi. Pero perdonanamandaca ¿imashinata Jehová Diospa ejemplota cati ushapanchi? Jehová Diospa perdonhuan gentecunapa perdonhuan ricujpica ¿imapita cazi parecido? Cutin ¿imapita diferente can? Caita aliguta intindinaca ¿imamandata importante can? Cati temapimi cai tapuicunapa respuestacunataca ricupashun.