ASHTACA gentecunami Jesús imashna huañushcata yachan. Jesusca ishcai shuacunapa chaupipimi shuj caspipi clavai tucushpa huañurca (Mat. 27:35-38). Bibliapica Jesús huañushca jipaca shujcuna paipa cuerpota pambashcatami ricuchin (Mar 15:42-46). Pero huaquin gentecunaca chaica na ciertochu can ninmi.

Jesuspa tiempopi causashca gentecunamanda estudiajcunaca, caspipi huañushca gentecuna enterrai tucun cashcataca na criinllu. Paicunaca caspipi huañushca gentecunaca na enterrai tucunllu cashcanga ninmi. Ariel Sabar shuti shuj periodistaca gentecuna imamanda shina pensashcatami intindichin. Nalipacha gentecunatallami caspipi clavashpa huañuchin carca. Y chaimandami huaquingunaca nin: “Cashna gentecunaca imamandata pambai tucuna cashcangayari” nishpa. Romano gentecunaca cai nalicunata rurashca gentecunataca pingaichingapaj munaimandami paicuna huañujpica, paicunapa cuerpotaca angacuna o sacha animalcuna micuchun chai pushtupillata saquin cashcanga. Shinallata puchushca tullucunataca jipamanmi shuj utujuta allashpa yangata pamban cashcanga.

Shinapash arqueologocunapa tarishcacunaca, Jesuspa tiempopi caspipi huañuchij tucushca gentecunapash aliguta enterrai tucun cashcatami ricuchin. Huata 1968​pimi judiocunata pamba pushtupica shuj cajapi churashca huaquin tullucunata tarirca. Chai jaripa tullucunapica paipa talondaca shuj tablapi jatun jatun clavohuan clavashcatami tarirca. Ariel Sabar periodistaca cutinllatami nin: “Chai talonga Jehohanán shuti jaripa tullumi carca. Cai tullucunapimi Jesusmanda Bibliapi parlashca cosascuna cierto cashcata ashtahuan ricuchirca” nin. Shinami Bibliapi Jesusta pambashcamanda villashca shimicuna cierto cashcata yachaj chayarca. Shinaca cai “Jehohanán jaripa tullucunata tarishpami Jesuspa tiempopi caspipi clavashca gentecunata enterranlla cashcatapash ashtahuan yachaj chayarca”.

Gentecunaca cunangamanmi Jesús imashina huañushcamandapash shuj shuj yuyaicunata charin. Shinapash Jehohanán jaripa tarishca tullucunapimi Jesuspa tiempopi huañushca nali gentecunaca yanga shuj utujupi yangata na pambai tucushcata, ashtahuangarin shuj ali entierrota charishcata ricuchin. Shinaca Bibliapica Jesustaca pambarcami nishpaca na llullanllu. Cai pruebacunami Bibliapi escribishca cosascuna cierto cashcata ricuchin.

Shinallata shuj ashtahuan importante pruebapashmi tian. Jehová Diosca Jesús huañushpaca enterrai tucungami nishpa villashcami carca. Y Jehovapa nishcacuna pactarichunga pipash na jarcai ushanllu (Is. 53:9; 55:11).