1. Disciplinamandaca ¿imatata Bibliapica yachachin?

DISCIPLINA shimita uyashpaca ashtaca gentecunaca astishpa llaquichinamandami parlajun yuyanmi. Shinapash disciplinaca llaquichinatallaca na ningapaj munanllu. Disciplinaca ñucanchipallata ali cashcatami Bibliapica ricuchin. Disciplinamanda parlashpaca ali yuyanamanda, juyanamanda, causanamanda, imatapash yachajunamandami Bibliapica parlan (Prov. 1:2-7; 4:11-13). Jehová Diosca ñucanchita juyaimanda, para siempre causachun munaimandami disciplinan (Heb. 12:6, NM). Jehová Diosca disciplinashpapash na yapata llaquichinllu. Shinaca shuj taita paipa churita juyaimanda imashina yachachinatami disciplina ningapaj munan.

2, 3. Carlospa mamaca ¿imashinata disciplinarca? (Callari fotocunata ricupangui).

² Shuj ejemplota ricupashunchi. Carlos shuti huahuaca pelotahuanmi huasi ucupi pugllajun. Shina pugllajujpimi paipa mamaca nin: “Huasi ucupica ama pugllajuichu, imatapash faquinguimi” nishpa. Mamata na cazushpami paica pugllajunlla. Shina pugllajuimandami shuj alpa mangaguta faquin. Mama chaita  ricushpaca ¿imashinata Carlostaca disciplinanga? Paihuan parlashpami imamanda nali cashcata intindichin. Taitamamata cazuna ali cashcata, pai rurai ushanatalla mandajushcatami mamaca intindichun munan. Nalita rurashcata yachajuchunmi Carlospa mamaca pelotahuan ama pugllachun huaquin punllacunata pelotata quichun. Shina rurajpi nali sintirishpapash Carlosca taitamamacunata na cazunaca paipallata nali cashcatami intindinga.

³ Jehovata sirvijcunaca ‘Diospa huasipimi’ sirvinajunchi (1 Tim. 3:15). Chaimi Jehová Dios mandanata, gentecuna paita na cazujpi juyaihuan disciplinana derechota charishcatapash ñucanchica respetanchi. Jehovata na cazuimandami llaquicunataca charinchi. Chaimandami Jehová Dios disciplinajpica paita cazuna minishtirishca cashcata cuenta japinchi (Gál. 6:7). Jehová Diosca ñucanchitaca ninandami juyan. Chaimi sufrichunga na munan (1 Ped. 5:6, 7).

4. a) Jehová Diosca ¿imashina disciplinachunda munan? b) Cai temapica ¿imatata yachajupashun?

⁴ Bibliapa consejocunata catishpa disciplinajpica ñucanchi huahuacuna, Bibliamanda yachajujcunapash Jesusta ali catijcunami tucunga. Diospa Shimimanda yachachishpaca, Bibliamanda yachajujcuna Jesuspa mandashcacunata intindishpa pactachichunmi ayudanchi (2 Tim. 3:16; Mat. 28:19, 20). Jehová Diosca shina yachachichunmi munan. Shina rurajpimi Bibliamanda yachajujcunapash shuj gentecunata Jesuspa ali catijcuna tucuchun ayudanga (Tito 2:11, 12, 14, liingui). Cai temapica cai quimsa tapuicunatami yachajupashun: 1) Disciplinaca ¿imashinata Jehovapa juyaita ricuchin? 2) Jehová Dios disciplinashca gentecunamandaca ¿imatata yachajui ushapanchi? 3) Disciplinana cashpaca ¿imashinata Jehovapa, Jesuspa ejemplota cati ushapanchi?

5. ¿Imamandata Jehová Diosca disciplinan?

⁵ Jehová Diosca juyaimandami consejashpa disciplinan. Ñucanchicuna paipa amigocuna tucushpa para siempre causachunmi munan (1 Juan 4:16). Jehová Diosca imatapash yangata nishpaca na llaquichinllu. Shinallata imapapash na valijtashnaca na sintichinllu (Prov. 12:18). Chaipa randica Jehová Diosca ñucanchi ali cualidadcunatami ricun. Shinallata ima ali cashcata, ima nali cashcata ñucanchillata agllachunmi saquin. Jehová Diosca Bibliahuan, publicaciongunahuan, taitamamacunahuan, congregacionbi ancianocunahuanmi disciplinan. Shina disciplinajpica ¿juyaimanda disciplinashcatachu cuenta japingui? Ñucanchicuna ‘nalita rurajpica’ uchallami ancianocunaca juyaihuan, pacienciahuan consejashpa disciplinan. Chaita rurashpami Jehová Dios cuenda juyashcata ricuchin (Gál. 6:1).

6. Disciplinaca ¿imashinata ayudan?

 ⁶ Disciplinashpaca consejaitallaca na consejanachu can. Pipash shuj jatun juchapi urmajpica congregacionbi privilegiotami quichun. Shina disciplinashpami Jehová Diosca juyashcata ricuchin. Privilegiocunata quichujpimi juchapi urmajca estudio personalta rurangapaj, imata yachajushcapi pensaringapaj, Diosta mañangapaj ashtahuan tiempota llujchina importante cashcata cuenta japinga. Chai ruraicunami Jehovahuan ali amigo cashpa catichun ayudanga (Sal. 19:7). Tal vez tiempohuanga congregacionbi privilegiocunata cutinmi chari ushanga. Expulsanaca Jehová Dios juyashcatami ricuchin. Shina ruranaca congregacionbi nali ruraicuna ama tiachunbashmi ayudan (1 Cor. 5:6, 7, 11). Ashtahuanbash Jehová Diosca ñucanchipa alipallatami disciplinan. Chaimi pipash congregacionmanda expulsai tucushpaca, jatun juchapi urmashcata cuenta japishpa arripintirichun ayudanga (Hech. 3:19).

7. a) Sebná runaca ¿pita carca? b) Sebná runaca ¿ima nali cualidadtata chari callarirca?

⁷ Cunanga disciplinana imamanda minishtirishca cashcata ricupashunchi. Chaipaca Jehová Dios disciplinashca gentecunamanda yachajupashunchi. Rey Ezequías causashca tiempopi Sebná runamandami yachajupashun. Shinallata Graham shuti huauquimandapashmi ricupashun. Pundapica Sebná runamanda parlapashun. Paica rey Ezequiaspa mayordomomi cashcanga. Chaimandami ashtaca autoridadta charirca (Is. 22:15). Shinapash ashtahuan importante cangapaj munaimandami Sebná runaca jariyashca tucurca. Shina jariyashca caimandami paica valishca pambana utujuta paipa rurarca. Paica juyailla carretacunapipashmi purin carca (Is. 22:16-18).

8. a) Jehová Diosca ¿imashinata Sebná runataca disciplinarca? b) Sebná runaca ¿imatata yachajurca?

⁸ Sebná runa jariyashca tucujpimi, paipa randi Eliaquim mayordomo tucuchun Jehová  Diosca churarca (Is. 22:19-21). Jerusalén llactata rey Senaquerib llaquichigrijuj punllacunapimi shina tucurca. Judiocuna manllarichun, Ezequías ama macanajuchunmi Senaqueribca mandajcunata, ashtaca soldadocunatapash cacharca (2 Rey. 18:17-25). Ezequiasca chai soldadocunahuan parlachunmi, Eliaquim runaguta, ishcai jaricunandi cacharca. Paicunapurapica Sebná runapashmi carca. Paica rey Ezequiaspa secretariomi carca. Chaica ricuchinmi Sebná runaca punda charishca privilegiota ñana charishpapash na culirashpa, na risintirishpa humilde tucushcata. Chaimi secretario shina paica sirvijurca. ¿Imatata caimandaca yachajupanchi? Quimsa yuyaicunata yachajupashun.

9-11. a) Sebná runahuan ima tucushcata ricushpaca ¿imatata yachajupanchi? b) Sebná runata Jehová Dios imashina tratashcamandaca ¿imatata yuyapangui?

⁹ Primero. Sebná runahuan ima pasashcata ricushpaca Proverbios 16:18​pi shimicuna cierto cashcatami ricupanchi. Chai textopica ninmi: “Nara llaqui japijpillami jariyashpa causanajun. Nara urmashpallami, yuyaipi jariyashpa causanajun” nishpa. Congregacionbi privilegiota charijpimi tal vez shujcunaca ñucanchitaca ashtahuan importante cashcata ricui callarin. Shina pasajpica ¿humilde cashcatachu ricuchijupangui? ¿Quiquinba ruraicunahuanga Jehová Diosta jatunyachishcatachu ricuchijupangui? (1 Cor. 4:7). Apóstol Pabloca nircami: ‘Canguna yachajuchunmi tucuicunaman villajuni. Na cangunapa munai alicachirishpa jariyanachu canguichi. Ashtahuangarin aliguta yarishpami tucuicuna causana canguichi’ nishpa (Rom. 12:3).

¹⁰ Segundo. Sebná runa cambianata yachashpami Jehová Diosca disciplinarca (Prov. 3:11, 12, NM). Cunan punllacunapi imapash privilegiota quichujpica caitami yarina capanchi. Culirashpa risintirinapa randica Jehovata ashtahuan sirvingapami esforzarina capanchi. Shinallata juyaimanda Jehová Dios disciplinashcatami cuenta japina capanchi. Humildecuna cajpica Jehová Diosca bendiciangami (1 Pedro 5:6, 7, liingui). Jehová Dios cushca disciplinata chasquishpami alpa mangagutashna Jehová Dios formachun saquina capanchi.

¹¹ Tercero. Sebná runata Jehová Dios imashina disciplinashcata ricushpaca taitamamacunapash, ancianocunapash alipachami yachajui ushan. Jehová Diosca gentecunapa nali rurashcacunata na ricunayachishpami disciplinan. Shina disciplinashpaca juyashcatami ricuchin. Jehová Diosca gentecunapa ali cualidadcunatapashmi ricun. Disciplinata cugrijushpaca ¿imashinata Jehovapa ejemplota cati ushapangui? (Jud. 22, 23).

12-14. a) Disciplinajpica ¿imashinata huaquingunaca sintirin? b) Bibliaca ¿imashinata shuj huauqui cambiachun ayudarca?

¹² Huaquingunaca disciplinajpi risintirishpami Jehovamandapash, congregacionmandapash caruyan (Heb. 3:12, 13). Shina pasajpica ¿imatata rurana capanchi? Chaipaca Graham shuti huauquimanda ricupashunchi. Paica expulsai tucurcami. Tiempohuanga cutinmi congregacionman tigrarca. Shinapash chai jipallami tandanajuicunaman, villachinamanbash ñana rirca. Huaquin huatacuna jipaca shuj anciano huauquimanmi Bibliata yachajungapaj munani nirca.

¹³ Chai anciano huauquica ninmi: “Graham huauquica jariyashcami carca. Paita expulsashca anciano huauquicunatami nalicachishpa parlan carca. Chaita ricushpami  Graham huauquita Bibliamanda yachachijushpaca jariyanamanda Biblia imata yachachijta, jariyana imamandata nali cashcata yachachin carcani. Chaimi Graham huauquica imapilla cambiana cashcata cuenta japirca. Chai jipaca jariyana shuj ‘caspi’ cuenda jarcajushcata, shujcunamanda huashalla parlana nali cashcatapashmi paica cuenta japirca. Chaimi uchalla cambiashpa, tucuilla tandanajuicunaman ri callarirca. Shinallata Bibliamandapash ashtahuan yachajushpa, Diostapash cada punllami mañai callarirca. Paipa familiatapashmi espiritualmente ayudai callarirca. Chaimi paipa huarmigupash, paipa ushigucunapash cushilla sintirirca” nishpa (Luc. 6:41, 42; Sant. 1:23-25).

¹⁴ Anciano huauquica caitapashmi nirca: “Graham huauqui imata nijta uyashpaca ninandami cushijurcani. Graham huauquica nircami: ‘Ashtaca huatacunatami Bibliamandaca yachajushcani, precursor shinapash sirvishcani. Shinapash cunanmi Jehová Diostaca tucui shunguhuan juyani’ nishpa. Graham huauquica asha tiempo jipallami tandanajuicunapi microfonota yalichishpa ayudai callarirca. Chai privilegiotaca ninandami alicachirca. Pipash na jariyashpa Jehovapa disciplinata chasquishpaca, ashtaca bendiciongunata charinatami Graham huauquipa causaipica ricurcani” nishpa.

15. Quiquin pitapash disciplinana cashpaca ¿imatata rurana capangui?

¹⁵ Shujcunaman ali yachachi ushangapaca ñucanchirami Bibliata ali yachajuna capanchi (1 Tim. 4:15, 16). Quiquin pitapash disciplinana cashpaca na jariyashpami Jehová Dios ayudachun saquina capangui. Quiquin humilde cajta ricushpami respetashpa quiquin consejajtaca aliman chasquinga. Cunanga Jesuspa ejemplota ricupashunchi.

16. Jesuspa ejemplomandaca ¿imatata yachajupanchi?

¹⁶ Shinlli cajpipashmi Jesusca tucuipi Jehovata cazurca (Mat. 26:39). Jesusca pai imata yachachijushcata, pai imata yachashcatapash Jehová Diosmanda shamujtaca alimi yacharca (Juan 5:19, 30). Jesusca humilde caimandami tucuipi cazurca. Juyaihuan, llaquishpa yachachijpimi gentecunaca alicachishpa paitaca uyan carca (Mateo 11:29, liingui). Desanimarishca, llaquilla gentecunatami Jesusca cushichin carca (Mat. 12:20). Apostolcunaca paicunapilla pensarishpami pi ashtahuan yali cashcata yachangapaj munarca. Paicunata shina ricushpapash Jesusca na culirashpami juyaihuan consejarca (Mar. 9:33-37; Luc. 22:24-27).

17. Huauquipanicunata ayudangapaca ancianocunaca ¿imatata rurana can?

¹⁷ Ancianocunaca Biblia nishcashna disciplinangapaca Jesuspa ejemplotami catina can. Shinami Jehovapash, Jesuspash ayudachun munashcata ricuchinga. Apóstol Pedroca nircami: “Cangunapurapi Taita Diospaj tandanajushca llamagucunataca ricuriashpa michipaichi. Na pipash mandajpillatami,  cangunapaj munaillata ricuriana canguichi. Imatapash culquimandalla nalitaca na rurashpami, ashtahuangarin cushijushpa, uchalla rurana canguichi. Aliguta ricuchun cangunaman mingashca, tandanajushca llamagucunataca, na yapata mandanachu canguichi. Ashtahuangarin cangunata ricushpa catichunmi, aliguta causana canguichi” nishpa (1 Ped. 5:2-4). Ancianocunaca Jehovapash, Jesuspash ayudachunmi saquina can. Shinami paicunapash, shuj huauquipanicunapash beneficiarichun ayudanga (Is. 32:1, 2, 17, 18).

18. a) Jehová Diosca ¿ima responsabilidadtata taitamamacunamanga cushca? b) Chai responsabilidadta pactachichunga ¿imashinata Jehová Diosca ayudanga?

¹⁸ Cunanga familiapi disciplinata cunamanda yachajupashunchi. Jehová Diosca taitacunamanga ninmi: “Cangunapaj huahuacunataca na yangamanda fiñachinachu canguichi. Ashtahuangarin nalita rurajpica, shinlli tacurishpami aliguta yarichishpa [Jehová Dios, NM] munashcashna viñachina canguichi” nishpa (Efes. 6:4). Taitamamacunapaca chaica shuj jatun responsabilidadmi can. Bibliapica ricuchinmi huahuacunata na disciplinashpaca Jehová Diospa ñaupajpi taitamamacuna nali ricurishcata (1 Sam. 3:12-14). Taitamamacunaca Jehová Diosta mañashpa paipa espiritu santo ayudachunmi saquina can. Shinallata Diospa Shimi paicunapa causaipi ayudachunbashmi saquina can. Shina rurajpimi Jehová Diosllata ali yuyaita, fuerzatapash cushpa taitamamacunataca ayudanga (Santiago 1:5, liingui).

19, 20. a) Jehovapa disciplinata chasquishpaca ¿ima bendiciongunatata charishun? b) Cati temapica ¿imatata yachajupashun?

¹⁹ Jehovapa disciplinata chasquinami capanchi. Shinallata disciplinata cuna cashpaca Jehovapa, Jesuspa ejemplotami catina capanchi. Chaimi ashtaca bendiciongunata charishun. Shinallata familiapipash, congregacionbipash tucuicunallatami respetarishpa, juyarishpa ali causai ushashun. Shamuj punllacunapicarin ashtahuan ali causaitami charishun (Sal. 72:7). Jehová Diospa disciplinaca shamuj punllacunapi shuj familiashna para siempre casilla ali causai ushachunmi ayudan. Chaitaca na cunganachu capanchi (Isaías 11:9, liingui). Shinami Jehová Dios juyaimanda ñucanchita disciplinashcata intindishun.

²⁰ Familiapipash, congregacionbipash disciplinata cunamandami cati temapica ashtahuan yachajupashun. Shinallata imashina jarcarinatapashmi ricupashun. Jehovapa disciplinata na chasquishpaca ñucanchipallata nali cashcatami yachajupashun.