1. Apostolcunapa punllacunapi causanajuj huauquipanicunaca ¿imatata chimbapurana tucurca?

“LLACTAMANDA Ilujchishpa cachai tucushpa, caita chaita rishpa Ponto, Galacia, Capadocia, Asia, Bitinia shuti llactacunapi” causanajuj huauquipanicunamanmi apóstol Pedroca shuj cartata escribirca. Chai cartataca huata 62manda 64​camanmi escribirianga (1 Ped. 1:1). Chai huauquipanicunaca shuj shuj llactacunamandami carca. Paicunaca “ninan llaqui” punllacunapi causanajuimandami animachun, ayudachun minishtirca. Chai huauquipanicunaca shinlli punllacunapimi causanajurca. Chaimi apóstol Pedroca cashna escribirca: “Ima tiashcapash, tucuilla tucurina punllami ña chayamujun” nishpa. Chashna nishcamandaca 10 huatacunapash na yalircachu. Chai llaqui punllacunaca Jerusalén llactata tucuchijpimi tucurigrijurca. Chai llaqui punllacunata aguantachunga ¿imashi paicunataca ayudagrijurca? (1 Ped. 4:4, 7, 12).

2, 3. Apóstol Pedroca ¿imamandata caishujhuan chaishujhuan mingachirinami canguichi nirca? (Callari dibujota ricupangui).

² Apóstol Pedroca caitapashmi nirca: ‘Caishuj chaishuj mingachirina canguichi’ nishpa (1 Ped. 4:9). Griego shimipi “mingachirina” nishpaca “na rijsishca gentecunata ali tratanatami”  shina nijun. Shinapash apóstol Pedroca nircami, ‘Caishujhuan chaishujhuanmi’ mingachirina canguichi nishpa. Shina nishpaca rijsicunahuan, amigocunahuan mingachirina cashcatami nijurca. Apóstol Pedropa shimicunaca ¿imashinata huauquipanicunataca ayudagrijurca?

³ Chai huauquipanicuna tandanajushca cachunmi ayudagrijurca. Cunanga ñucanchipi pensaripashunchi. Shuj pani o shuj huauqui paicunapa huasiman ñucanchita invitajpica ¿nachu cushilla, ali yalircanchi? Shinallata shuj huauquita o shuj panita ñucanchi huasiman invitashpaca ¿nachu ali amigo tucushcanchi? Ñucanchi huauquipanicunata invitashpaca paicunataca ashtahuanmi ali rijsishun. Apóstol Pedropa tiempopica, llaquicuna ashtahuan miraimandami huauquipanicuna tandanajushca canaca minishtirishcapacha carca. Shinallata ñucanchipash ‘tucurimui punllacunapi’ causanajuimandami huauquipanicunahuan tandanajushca canaca minishtirishcapacha can (2 Tim. 3:1).

4. ¿Ima tapuicunatata cai temapica yachajupashun?

⁴ Mingachijcuna cashcataca ¿imashinata ricuchi ushapanchi? Huauquipanicunata mingachichun ama imapash jarcachunga ¿imatata rurana capanchi? Huauquipanicuna mingachijpica ¿imashinata agradicishcata ricuchi ushapanchi?

5. Mingachijcuna cashcataca ¿imashinata tandanajuipi ricuchita ushapanchi?

⁵ Tandanajuicunapi cashpa. Tandanajuicunamanga Jehová Diospash, paipa organizacionbashmi ñucanchitaca invitashca. Gentecuna tandanajuiman shamushpa ali sintirichunmi munapanchi (Rom. 15:7). Ashtahuanbachaca primera vez tandanajuiman shamujcunatami ali chasquina capanchi. Jehová Diosmi paicunatapash invitashca. Chaimi maijan llactamanda cajpi, ima ropata churajushca cajpipash ali chasquinalla capanchi (Sant. 2:1-4). Pipash shamujta ricushpaca uchallami ali chasquishpa tandanajui tucuringacaman paicunahuan tiarina capanchi. Tandanajuipi Bibliapa textocunata mascashpa ayudajpica paicunaca agradicingami. Shina rurashpaca Romanos 12:13​pi shimicunatami pactachinajushun.

6. ¿Picunatata ashtahuanbachaca invitana capanchi?

⁶ Micungapaj invitashpa. Punda tiempopi gentecunaca pitapash invitashpaca paicunahuan ali amigo cangapaj, ali cangapaj munashcatami ricuchin carca (Gén. 18:1-8; Juec. 13:15; Luc. 24:28-30). Ñucanchicunaca ¿picunatata ashtahuanbachaca invitana capanchi? Ñucanchi congregacionbi huauquipanicunatami invitana capanchi. Paicunami ñucanchi familiashna can. Ñallami llaqui punllacuna chayamunga. Chaimandami Jehovata tucui shunguhuan sirvij, ali amigocunata charinaca minishtirishcapacha can. Estados Unidos llactapa Betelpica Villajun revistataca 6:45 chishipimi yachajun carca. Shinapash huata 2011​pica Cuerpo Gobernantepi huauquicunaca 6:15 chishimanmi yalichirca. ¿Imamandata shina rurarca? Villajun revistata yachajushca jipa Betelpi sirvij huauquipanicunahuan ashtahuan ali llevarichunmi chai arreglotaca rurarca. Shuj Betelcunapashmi shinallata rurarca. Chai arreglo tiashcamandami Betelpi huauquipanicunaca shuj familia shina causan.

7, 8. Discursota cungapaj shamuj huauquicunataca ¿imashinata mingachi ushapanchi?

⁷ Shuj congregacionmanda huauquicuna, superintendente de circuito huauqui,  huaquinbica Betelpi sirvij huauquimi tandanajuipi shuj discursota cungapaj shamun. Chaipimi mingachijcuna cashcata ricuchina capanchi (3 Juan 5-8, liingui). Chai huauquicunataca micungapaj invitanallami capanchi.

⁸ Estados Unidos llactamanda shuj paniguca ninmi: “Ñuca cusaguhuanga siempremi tandanajuipi discursota cuj huauquicunata paipa huarmigucunandi invitan carcanchi. Shina rurashpaca siempremi cushilla yalin carcanchi. Ashtahuanbachaca espiritualmente shinlli catichunmi ayudan carca. Shina invitashcamandaca ninandami cushijunchi” nishpa.

9, 10. a) Unaillaguta mingachichunga ¿picunata minishtin? b) ¿Pobre, uchilla huasiguta charishpapash mingachi ushapanchichu? Shuj ejemplomanda parlapai.

⁹ Unaillaguta mingachina cajpi. Punda tiempopi gentecunaca rijsicunata paicunapa huasipi mingachinllami carca (Job 31:32; Filem. 22). Cunanbipash mingachinaca minishtirishcapachami can. Por ejemplo, superintendente de circuito huauquicunaca congregaciongunata visitangapaj shamushpaca pipash mingachichunmi minishtin. Jehovapa organización churashca escuelacunaman rij huauquipanicunatapash mingachinallami capanchi. Shinallata Tandanajui Huasicunata rurashpa ayudaj huauquipanicunatapash mingachinallami can. Ashtahuanbash llaqui apashca familiacunapa huasicunata arreglangacamanga, paicunataca mingachinallami capanchi. Shinapash na pensanachu capanchi jatun, ali huasita charijcunallami mingachina can nishpa. Tal vez ñachari mingachipashcanguichi. ¿Pobrella, uchilla huasigu cajpipash mingachi ushapanchichu?

¹⁰ Corea del Sur llactamanda huauquica Jehovapa organización churashca escuelacunaman rij huauquipanicunatami paipa huasipi mingachin carca. Paica ninmi: “Chairalla cazarashca caimanda, uchilla huasigupi causajuimandami ashata preocuparishca carcani. Shinapash chai huauquipanicunata ñuca huasigupi mingachishcamandaca ninandami cushijuni. Ashtahuanbash cazarashcacuna Jehovata sirvishpa espiritual metacunata pactachishpa cushilla causai ushashcatami cuenta japircanchi” nishpa.

11. Congregacionbi sirvingapaj shamuj huauquipanicunataca ¿imashinata ayudai ushapanchi?

¹¹ Huauquipanicuna ñucanchi congregacionbi sirvingapaj shamujpi. Huaquin huauquipanicunaca villachinapi ayudangapami ñucanchi llactapi causangapaj shamun. Cutin shuj huauquipanicunaca precursor shina sirvichun cachamujpimi ñucanchi congregacionman shamun. Tucuicunapallatami callaripica shuj llactapi causana, shuj congregacionbi sirvina, shuj shimita yachajuna, shuj costumbrecunata yachajunaca shinlli ricurin. Chai huauquipanicunataca micungapaj, purichingapaj pushanallami capanchi. Shina rurashpaca ashtahuan huauquipanicunata rijsichun, chai llactapi yacharichunmi ayudashun.

12. ¿Mingachingapaca ashtaca micunata ruranachu minishtirin? Shuj experienciata parlapai.

¹² Mingachingapaca ashtaca micunata ruranaca na minishtirinllu (Lucas 10:41, 42, liingui). Shuj huauquica paipa huarmigundimi  jovenguna cashpallata misionero shina sirvinajurca. Paicunaca shuj llactapi caimandaca llaquillami sintirirca. Chai huauquica ninmi: “Shuj chishica ñuca huarmiguca llaqui llaquimi carca. Imashina ayudanatapash na atinarcanichu. Ña tutayajujpimi punguta pichari huactachimurca. Ricujpica Bibliamanda yachajuj huarmigumi quimsa naranjaguta chariria visitangapaj shamushcarca. Huasiman invitashpami shuj vaso yacuguta cararcanchi. Chai jipaca cunuj yacugutami rurarcanchi. Chai huarmiguca inglés shimitaca na yacharcachu. Ñucanchipash suajili shimitaca na yacharcanchichu. Chai punllamandapachami chai llactamanda huauquipanicunahuan ali llevarishpa cushilla yalin carcanchi” nishpa.

13. Mingachinaca ¿imashinata ayudan?

¹³ ¿Quiquinbaca huauquipanicunata mingachinaca facilchu can? Huauquipanicunata mingachishpaca cushilla alimi sintirishun. Shina rurashpaca na ñucanchilla sintirishunllu, ali amigocunatapashmi charishun. Shinaca huaquingunapaca ¿imamandashi mingachinaca na fácil can? Chaipaca huaquin yuyaicunata ricupashun.

14. Ashtaca ruraicunata charishpapash shuj huauquipanicuna invitajpi, ñucanchipash paicunata invitangapaca ¿imatata rurana capanchi?

¹⁴ Tiempota na charishpa, shaijushca cashpa. Jehovata sirvijcunaca ashtaca responsabilidadcunata charimandami ocupado yalinchi. Chaimi huaquin huauquipanicunaca pensarin mingachingapaca tiempotapash na charinica, shaijushcamari cani nishpa. Ashtaca ruraicunata charishpapash shuj huauquipanicuna invitajpi, ñucanchipash paicunata invitangapaca tiempota llujchinami capanchi. Bibliapica mingachinataca na cunganachu canguichi ninmi (Heb. 13:2). Huauquipanicunahuan cangapaj tiempota llujchinami capanchi. Na minishtirishca cosascunata ruranapa randica huauquipanicunahuan yalingapami tiempota llujchina capanchi.

15. ¿Imapita na yapata preocuparina capanchi?

¹⁵ Mingachinataca na ushashachu yashpa. Huaquinbica ¿imamandata na mingachi ushashcanchi? Pingaimanda, parlaita na atinaimanda o na chaipi cangapaj munangachu yashpachari na mingachishcanchi. Shinallata culquita na yapalla charimanda o shuj huauquipanicunashna na carai ushaimandachari na invitashcanchi. Huauquipanicunata mingachingapaca jatun huasita charinaca na minishtirinllu. Ashtahuangarin huasigu limpio, ali arreglashca cajpi, ali chasquijpica huauquipanicunaca cushillami sintiringa.

16, 17. Pitapash mingachishpa ama yapata preocuparichunga ¿imata ayudanga?

¹⁶ Mingachigrijushpaca tucuicunallatami preocuparinchi. Gran Bretaña llactamanda anciano huauquica ninmi: ‘Pitapash mingachigrijushpaca preocuparinchimi. Shinapash huauquipanicunata mingachishpaca ashtaca bendiciongunatami charinchi. Huauquipanicunahuan cafeguta ufiashpa, parlashpaca cushillami sintirishcani’ nishpa. Ñucanchi huasipi pitapash mingachishpaca alimi tratana capanchi (Filip. 2:4). Casi tucuicunami paicunapa causaimanda parlangapaj munan. Chaimi paicunahuan cashpaca parlana capanchi. Cutin shuj anciano huauquica ninmi: “Huauquipanicunata ñuca huasipi mingachimandami paicunata ashtahuan ali intindichun, ali rijsichun ayudahuashca. Ashtahuanbachaca imashina Jehová Diosta rijsishcatami yachai ushashcani” nishpa. Huauquipanicunahuan yalingapaj tiempota llujchishpaca cushillami yalishun.

 ¹⁷ Shuj precursora paniguca, Jehovapa organización churashca escuelacunaman rij huauquipanicunatami mingachin carca. Paica ninmi: “Pobrella huasiguta charimanda, mushuj cosasgucunata na charimandami mingachingapaj ashata preocuparishca carcani. Shinapash chai escuelacunapi yachachij turipa huarmigumi ama yapata preocuparichun ayudahuarca. Paica nihuarcami, congregaciongunata visitangapaj rishpaca espiritual huauquipanicunahuan mingarishpami cushilla sintirishcani. Chai huauquipanicunami ñucanchishnallata Jehovata sirvishpa, minishtirishca cosascunahuanlla causan nishpa. Chai ñañaguta uyashpaca uchilla cajpi ñuca mamita nishcatami yarircani. Paica ninmi carca, “aicha illaj caldogutalla micushpapash, juyarishpa causanami ashtahuan ali” can” nishpa (Prov. 15:17). Shinaca na yapata preocuparijunachu capanchi. Chaipa randica ñucanchi huasipi mingarishca huauquipanicunata juyaihuan tratangapami esforzarina capanchi.

18, 19. Mingachinaca ¿imashinata shujcunahuan ali llevarichun ayudan?

¹⁸ Shujcunata na ricunayachishpa. ¿Congregacionbica pitapash na ricunayachishpachu causanajunchi? Ñucanchi na uchalla cambiajpica chai yuyaica na tucuringachu. Huaquinbica shuj huauquita o shuj panita imagumandapash nalicachishpachari na invitanchi. Shinallata shuj huauqui o shuj pani ñucanchita nali sintichishcata na cungaimandachari na invitanchi.

¹⁹ Bibliapica ninmi, contracunahuanbash, shujcunahuanbash ali llevarichunmi  mingachinaca ayudan nishpa (Romanos 12:20, liingui). Paicunata invitanami nali sintichishcatapash cungashpa paicunahuan ali llevarichun ayudanga. Ashtahuanbash paicunapa ali cualidadcunata ricuchunmi ayudanga. Chai ali cualidadcunata paicunapi ricushpami Jehová Diosca paipa llactapi cachun saquishca (Juan 6:44). Juyaimandami huauquipanicunataca invitana capanchi. Shina ruranami paicunahuan ali llevarichun ayudanga. ¿Ciertopacha juyaimandachu invitajuni? Chaipaca Filipenses 2:3​pi shimicunatami yarina capanchi. Chai textopica ninmi, ‘shujcunami ñucatapash yali ashtahuan ali yashpami, na jariyashpa tucuicunatallata alicachina canguichi’ nishpa. Chai huauquipanicunapa shinlli feta charishcata, aguantashpa catishcata o shuj ali cualidadcunatapashmi paicunamandaca yachajui ushapanchi. Chai ali cualidadcunata alicachinami juyaimanda paicunata mingachichunbash ayudanga.

20. a) Pipash invitajpi ari nishca cashpaca ¿imatata rurana capanchi? b) ¿Imamandata shina rurana capanchi?

²⁰ Davidca Jehová Diostaca tapurcami, can invitachunga ¿ima cualidadcunata charinata minishtirin? nishpa (Sal. 15:1). Masque shinlli cajpipash ari nishcata pactachijcunatami Jehová Diosca invitan (Sal. 15:4). Pipash invitajpi ari nishca jahua yanga cosascunamanda quedashpaca, chai invitaj huauquipanicuna imata rurashcatapash na valichishcatami ricuchinchiman (Mat. 5:37). Huaquingunaca pipash invitajpi ari nishca cashpapash shuj ashtahuan ali invitacionda cujpimi chaishujtaca na nishpa chaishujmanra rin. Shina rurashpaca juyashcatapash, respetashcatapash na ricuchinllu. Mingachij huauquipanicuna imaguta carajpipash tucui shunguhuanmi agradicina capanchi (Luc. 10:7). Na yashcapi imapash pasajpica, invitaj huauquipanicunamanga uchallami na ushagrinichu nishpa villanalla capanchi. Shina rurashpaca juyashcata, consideracionda charishcatami ricuchishun.

21. Huauquipanicuna invitajpica ¿imatata yaipi charina capanchi?

²¹ Cada llactapa costumbrecunatami respetana capanchi. Huaquin llactacunapica na villashpa yangata chayana costumbretami charin. Cutin shuj llactacunapica villashparami chayan. Huaquin ladocunapica invitashcacunamanga ashtahuan ali micunatami caran. Cutin shuj ladocunapica tucuicunatallatami igual tratan. Shuj ladocunapica pipash invitajpica imagutapash apashpami rin. Cutin shuj ladocunapica na chai costumbreta charinllu. Huaquin pushtucunapica cutin cutin invitajpipash na nijpica na resintirinllu. Cutin shuj pushtucunapica resintirinllami. Huauquipanicuna invitajpica, paicuna cushilla sintirichunmi ñucanchica esforzarina capanchi.

22. ¿Imamandata ‘caishuj chaishuj mingachirinaca’ minishtirishcapacha can?

²² Cunan punllacunapimi apóstol Pedropa shimicunaca cierto cashcata ricupanchi. Paica nircami: ‘Ima tiashcapash tucuilla tucurina punllami ña chayamujun’ nishpa (1 Ped. 4:7). Ninan Manllanai Llaqui Punllacunaca ñallami chayamunga. Llaquicuna ashtahuan mirajpimi caishujhuan chaishujhuan juyaita ricuchina capanchi. Apóstol Pedropa shimicunata pactachishpami ‘caishuj chaishuj mingachirina’ capanchi (1 Ped. 4:9). Chaimi caishuj chaishuj mingachirinaca ali can. Mingachinaca siempremi minishtirishcapacha canga.