1, 2. Bibliamanda yachajujcuna bautizarichunga ¿picunallata ayudaita ushan?

FIYI llactamanda Amy paniguca nircami: “Bibliamanda yachajunataca ninandami gushtan carcani. Shinallata Bibliamanda yachachishcacuna cabal cashcatapash alimi yacharcani. Shinapash ñuca causaipica cambiocunataca na rurajurcanichu. Ñuca causaipi cambiocunata rurashpa bautizarichunga congregacionmanda turiñañagucunahuan ali llevarinami ayudahuarca” nishpa. Amy panigupa ejemploca ñucanchitapashmi ayudaita ushan. Congregacionbi tucuicunallata ayudajpica shuj estudioca bautizaringapaj munangami.

² Tucui publicadorcunallatami congregación mirashpa catichunga ayudaita ushapanchi (Efes. 4:16). Vanuatu llactamanda Leilani shuti precursora paniguca: “Ñuca llactapica shuj huahuaguta viñachingapaca shuj llacta enteromi minishtirin’ nishpami parlan. Chashnallatami Bibliamanda yachajujcunahuanbash pasan yanimi. Paicuna bautizarichunga tucuicunallatami ayudana capanchi” ninmi. Imashinami shuj huahuagu ali viñachunga familiacuna, amigocuna, profesorcuna ayudan, shinallatami publicadorcunapash Bibliamanda yachajuj bautizarichunga consejocunahuan, ejemplohuanbash animashpa ayudaita ushan (Prov. 15:22).

3. Ana, Dorín, Leilani huauquipanicunamandaca ¿imatata yachajupanchi?

³ Bibliamanda pimanbash yachachijushpaca ¿imamandata shuj publicadorcunapa ayudatapash chasquinalla capanchi? Chaipaca Ana shuti precursora especial panigumanda yachajupashunchi. Paica Moldavia llactapimi causan. Paica ninmi: “Bibliamanda yachajujca ashtacatami imacunapipash ayudachun minishtin. Chaimi shujllaca na tucuita yachachitaca usharin” nin. Chai llactamandallata precursor especial Dorín shuti huauquipash  cashnami nin: “Casi siempremi shuj publicadorpa nishcacuna Bibliamanda yachajujcunapa shunguman chayajta ricushcani. Shuj publicadorca ñuca na pensashcata nishpami Bibliamanda yachajujtaca ayudashca” nin. Shujcunapa ayudata chasquinamanda parlashpaca panigu Leilanipash cashnami nin: “Juyaihuan, ali tratajta ricushpami Bibliamanda yachajujca ñucanchicuna ciertopacha Jehová Diosta ali sirvijcuna cashcata cuenta japin” nishpa (Juan 13:35).

4. Cunanga ¿imatata yachajugripanchi?

⁴ Na ñucanchipa estudiocuna cajpipash ¿imashinata ayudaita ushapanchi? Cunanga pipash Bibliamanda yachachingapaj cumbahuai nijpi, shinallata shuj estudiante tandanajuiman ri callarijpi imata rurai ushashcatami yachajupashun. Shinallata ancianocunapash Bibliamanda yachajujcuna bautizarichun imashina ayudai ushashcatapashmi yachajupashun.

5. Bibliamanda yachachingapaj cumbahuai nijpica ¿imatata yarina capanchi?

⁵ Bibliamanda yachachijushpaca Bibliamanda yachachijmi Bibliataca ali ali intindichina responsabilidadta charin. Bibliamanda yachachingapaj pitapash cumbashpaca paicunata ayudangapaj chaipi cashcatami yarina capanchi (Ecl. 4:9, 10). Shinaca ¿imashinata Bibliamanda yachachijujpi ayudai ushapanchi?

6. Pitapash Bibliamanda yachachingapaj cumbagrijushpaca ¿imashinata Proverbios 20:18​pi shimicunataca pactachi ushapanchi?

⁶ Aliguta prepararipashunchi. Pundapica huauquigupa o panigupa estudiomanda ashaguta parlachunmi mañaita ushapanchi (Proverbios 20:18​ta liipangui). Huauquita o panitaca, “quiquinba estudioca ¿imashinata can? Cunanga ¿imatata yachajugripanguichi? ¿Imatata nita o na nita ushapani? ¿Imashinata ayudai ushapani?” nishpami tapuita ushapanchi. Huauqui o panica Bibliamanda yachajujpa causaimandaca na tucuita villangachu. Shinapash imaguta villashcahuanmi Bibliamanda yachajujtaca ayudai ushapanchi. Joy shuti misionera paniguca ninmi: “Bibliamanda yachajujcuna imashina cashcata yachanaca, ñuca cumbagutaca imashina ayudanata, imata ninatapash yachachunmi ashtacata ayudashca” nin.

7. Bibliamanda yachachingapaca ¿imamandata aliguta prepararina capanchi?

⁷ Pitapash Bibliamanda yachachingapaj cumbagrijushpaca aligutami prepararina capanchi (Esd. 7:10). Párrafo 3​pi parlashca Dorín huauquica ninmi: “Ñucata cumbagrijcuna aliguta prepararishca cajpica ninandami agradicipani. Shinami aliguta ayudaita ushahuan” nin. Ñucanchicuna tucui temata na preparari ushashpapash minishtirishca yuyaicunata prepararinami ayudanga. Bibliamanda yachajuj ishcandi prepararishcata ricushpaca paipashmi animarishpa ali prepararinata yachajunga.

8. Bibliamanda yachachingapaj cumbajushpa imatapacha mañanata yachachunga ¿imata ayudanga?

 ⁸ Bibliamanda nara yachachi callarishpallata Jehovata mañanaca minishtirishcapachami can. Chaimi Bibliata yachachingapaj cumbajushpaca nara mañapai nijpillata imata ninataca pensarishcalla cana capanchi. Shinami imata mañanataca ali yachapashun (Sal. 141:2). Japón llactamanda Hanae paniguca paita yachachingapaj shamuj panigupa cumbagu imashina Taita Diosta mañan cashcatami cunangaman yuyarin. Paica ninmi: “Paica Jehová Dioshuan ali amiga cashcatami cuenta japircani. Paishnalla cangapami munarcani. Shinallata ñuca shutita nishpa Jehová Diosta mañajpica ñucata juyashcatami sintircani” nin.

9. Bibliamanda yachachijujpica Santiago 1:19 nishcashnaca ¿imashinata shuj ali cumbagu caita ushapanchi?

⁹ Bibliamanda yachachijujpi ayudapashunchi. Nigeria llactamanda shuj precursora especial paniguca ninmi: “Bibliamanda yachachijujpi shuj ali cumbaguca siempremi ali ali uyajun. Bibliamanda yachachijllata yachachina cashcata yarishpami na yapata parlan” nin. Shinaca ¿ima hora, imashinata parlana capanchi? (Prov. 25:11). Ima hora parlanata yachangapaca Bibliamanda yachachijta, estudiotapash ali alimi uyana capanchi (Santiago 1:19​ta liipangui). Shinallami paicunata ayudangapaj listo capashun. Shinapash Bibliamanda yachachijuj huauqui ali parlajujpita ñucanchicunara satirishpa imacunatapash nijunaca na valinllu. Chaimandami imaguta nina cashpapash uchalla, ashalla shimicunapi nina canchi. Shuj ejemplota o shuj tapuita rurashpapash alimi intindichina capanchi. Huaquinbica imapipash na ayudai ushanshnami sintirishun. Shinapash Bibliamanda yachajujta felicitashpa, paita animashpaca ashtacatami pai ñaupaman catichun ayudapashun.

10. Bibliamanda yachajujcunataca ¿imashinata ñucanchi experienciacunaca ayudaita ushan?

¹⁰ Ñucanchipa experienciamanda parlapashunchi. Usharijpica Bibliamanda yachajujcunamanga ñucanchicuna imashina Bibliata yachajui callarishcata, llaquicunahuan cajpi Jehová Dios imashina ayudashcatapashmi ashalla shimicunapi parlaita ushapanchi (Sal. 78:4, 7). Caicunata uyanami paipa feta shinlliyachishpa, jarcaicunata mishashpa bautizarichunbash ayudaita ushan (1 Ped. 5:9). Brasil llactamanda Gabriel shuti precursor huauquiguca Bibliamanda yachajujujpi paita ima ayudashcatami nin: “Huauquipanicunapa experienciacunami Jehová Dios ñucanchi problemacunata intindijta cuenta japichihuarca. Paicuna chai problemacunata mishai ushashcajpica ñucapashmi ushasha yarcani” nin.

11, 12. Bibliamanda yachajujcuna reuniongunaman shamujpica ¿imamandata juyaihuan chasquina capanchi?

¹¹ Tucui tandanajuicunaman rinami Bibliamanda yachajuj bautizarichunga ayudanga  (Heb. 10:24, 25). Shuj estudioca Bibliamanda yachachij tandanajuiman invitajpimi primera vezca shamunga. Chaimi tucuicunallata tucui tandanajuicunaman shamuchun animai ushapanchi. Shinapash ¿imashinata animai ushapanchi?

¹² Tandanajuicunaman shamujpi ali chasquipashunchi (Rom. 15:7). Ali chasquijpica Bibliamanda yachajujca cutin shamushpa catingapami munanga. Cushilla saludashpa, shuj huauquipanicunatapashmi rijsichina capanchi. Shinapash imatapash tapushpa, imatapash nishpa nali sintichingapaca na munapanchichu. O shuj huauqui o shuj pani ñami paitaca ayudajunga yashpapash na pensanachu capanchi. Tal vez paita yachachij huauqui o panica imagutapash rurashpami ocupado canga. Chaimi paipaman quimirishpa, paita parlachishpapash paitaca ali ali uyana capanchi. Chaicunata rurajpica ¿imata pasanga? Dimitri shuti huauquica asha tiempotallami ña bautizarishca can. Shinapash cunanga ñami siervo ministerial can. Paica primera vez tandanajuiman rijpi ima pasashcata yarishpaca cashnami nin: “Tandanajui Huasi canllapimi manlla manllagu carcani. Shinapash shuj huauqui quimirishpami ñucataca ucuman pushahuarca. Tucuicunami cushijushpa, aliguman chasquishpa saludahuarca. Chaimi ñucaca alipacha sintirircani. Chaimi ‘cada punlla tandanajuicuna tiashpacarin alimi canman’ nishpa pensan carcani. Chai punllataca nunca na cungashachu” nin.

13. ¿Imashinata ñucanchi ali ejemploca Bibliamanda yachajujcunata ayudaita ushan?

¹³ Shuj ali ejemplota ricuchipashunchi. Bibliamanda yachajujcunaca ñucanchicuna Bibliapa yachachishcacunata pactachijta ricushpami ñucanchicuna Jesusta ali catijcuna cashcata cuenta japinga (Mat. 5:16). Moldavia llactamanda Vitali shuti precursor huauquica ninmi: “Congregacionmanda huauquipanicuna imashina causajta ricushpa, imata yuyajta ricushpa, imasha cajta ricushpapashmi testigo de Jehovacunaca ciertopacha ali religión cashcata cuenta japircani” nin.

14. ¿Imashinata ñucanchi ejemploca Bibliamanda yachajujcunataca ashtahuan ayudaita ushan?

¹⁴ Bibliamanda yachajuj bautizaringapaj munashpaca paipa causaipimi Bibliapa nishcacunata pactachina can. Chaita pactachinaca na siempre fácil canllu. Shinapash Bibliapa consejocuna ñucanchi causaipi imashina ayudajujta ricushpami, paicunapash Bibliapa mandashcacunata pactachingapaj munanga (1 Cor. 11:1). Párrafo 8​pi parlashca Hanae paniguca ninmi: “Ñuca imata yachajushcata turiñañagucuna paicunapa causaipi pactachijujta ricushpami shujcunata animangapaj, juyaita ricuchingapaj, perdonanatapash yachajurcani. Paicunashnami cangapaj munarcani” nin.

15. Proverbios 27:17 nishcashnaca ¿imamandata Bibliamanda yachajujcunahuan amigo tucuna capanchi?

¹⁵ Bibliamanda yachajujcunapa amigocuna tucupashunchi. Tandanajuicunaman  shamujpica paicunapi preocuparishcatami ricuchina capanchi (Filip. 2:4). Chaipaca paipa trabajomanda, familiamanda, shinallata Bibliamanda yachajujushpa imata gushtashcatapashmi tapuita ushanchi. Shinapash paipa causaimandaca na yapata tapuchijunachu capanchi. Bibliata yachajushpa paipa causaipi pactachi callarishcamandapashmi felicitana capanchi. Shinami Bibliamanda yachajujpa amigocuna tucushpa, paitaca bautizaringapaj munachunbash ayudaita ushapashun (Proverbios 27:17​ta liipangui). Cunanbica Hanae paniguca precursora regularmi can. Pai tandanajuiman ri callarishca horasmanda imashina sintirishcata parlashpami cashna nin: “Congregacionbi amigocunata chari callarishpami shaijushca cashpapash, tucui tandanajuicunaman ringapaj munarcani. Congregacionmanda amigocunahuan ashtahuan llevaringapaj munaimandami punda amigocunata saquircani. Y Jehovaman ashtahuan quimiringapaj munaimandapash bautizarircani” nin.

16. Bibliamanda yachajuj congregacionbi ali sintirichunga ¿imatapashta ruraita ushapanchi?

¹⁶ Bibliamanda yachajuj Bibliapa yachachishcacunata pactachishpa catijujpica congregacionbi shuj familiashna cashcata sintichingapami ayudana capanchi. ¿Imashinata chaitaca ricuchita ushanchi? Ñucanchi huasiguman paita invitashpami chaitaca ricuchita ushapanchi (Heb. 13:2). Moldavia llactamanda Denís huauquiguca Bibliamanda yachajujujpi paita y paipa huarmiguta ima ayudashcatami parlan: “Huauquipanicunaca paicunahuan yalichunmi invitan carca. Shinallata paicunata Jehová Dios imashina ayudashcata parlajta uyashpami ninanda animarin carcanchi. Paicunahuan yalinami Jehovata sirvingapaj munachun, shuj ali causaigu tianata crichunbash ayudarca” nin. Shinallata Bibliamanda yachajuj publicador tucujpica ñucanchihuan villachichunmi invitaita ushapanchi. Brasil llactamanda huauqui Diegoca ninmi: “Ñucataca tauca huauquicunami villachingapaj invitahuan carca. Shinami paicunataca ashtahuan rijsircani. Paicunamandapash ashtacatami yachajurcani. Shinallata Jehovaman, Jesusmanbashmi ashtahuan quimiri ushaparcani” nin.

17. Ancianocunaca ¿imashinata Bibliamanda yachajujcunataca ayudaita ushan?

¹⁷ Bibliamanda yachajujcunahuan parlangapaj shuj tiempota llujchipai. Bibliamanda yachajujcunaca, ancianocuna juyaihuan paicunamanda preocuparijta ricushpaca bautizaringapami munanga. Ancianocunaca, cada tandanajuipimi paicunahuan parlangapaj asha tiempoguta llujchita ushapanguichi. Comentariocunata cungapaj munajpi, paicunapa shutita yarijta ricushpacarin ninandami cushijunga. Shinallata Bibliamanda yachachingapaj shuj publicadorta cumbangapapashmi tiempoguta llujchita  ushapangui. Chaimi Bibliamanda yachajujca quiquinbash cumbajta ricushpa ali sintiringa. Nigeria llactamanda Jackie shuti precursoraca ninmi: “Tauca estudiantecunaca ñucata cumbashpa rishca turigu anciano cajta yachashpaca manllarishpami quedashca. Shuj estudioca nircami: ‘Ñuca iglesiamanda pastorca ima horapash na chaitaca ruranllu. Charij charij, rico gentecunapa huasicunamanllami rin. Chaipash pagajpillami rin’” nircami. Cunanga cai estudioca tandanajuicunaman rijunmi.

18. Hechos 20:28​pi shimicunataca ¿imashinata ancianocunaca pactachita ushan?

¹⁸ Publicador huauquipanicunata yachachishpa animapaichi. Ancianocunaca congregacionmanda publicadorcunata ali villachijcuna, ali yachachijcuna cachun ayudana responsabilidadtami charin (Hechos 20:28​ta liipangui). Shuj publicador quiquinba ñaupapi Bibliamanda yachachingapaj manllajujpica quiquinmi: “Bibliamanda yachachita ayudashachu” nishpa tapuita ushapangui. Chaishuj parrafopi parlashca Jackie paniguca ninmi: “Tauca viajecunatami ancianocunaca ñucapa estudiocunamanda tapuhuashca. Imapash problemacunata charijpica paicunaca alipacha consejocunata cushpami ayudahuashca” nin. Ancianocunaca publicadorcuna Bibliamanda yachachishpa catichunmi animaita ushan (1 Tes. 5:11). Jackie paniguca ninbashmi: “Ancianocuna ñucata animajpi, alitami rurajungui nijpica ninandami cushijupani. Paicunapa shimicunaca shuj rupai rupai punllapi chirilla yacugushnami can. Paicuna animajpimi Bibliamanda yachachishpa catingapapash ashtahuan munapani” nin (Prov. 25:25).

19. ¿Imata rurashpata tucuicunallata cushijuita ushapanchi?

¹⁹ Cunan horas shuj estudiota na cujushpapash, shujcunapa estudiocuna bautizarichunmi ayudaita ushapanchi. Bibliamanda yachachingapaj cumbashpapash aliguta prepararishpa, imagutapash ashalla shimicunapi nishpami ayudaita ushapanchi. Shinallata Bibliamanda yachajujcuna tandanajuiman shamujpica, paicunahuan ali amigo cangapaj, paicunapa ali ejemplo cangapaj esforzarishpami ayudaita ushapanchi. Huauqui ancianocunapashmi Bibliamanda yachajujcunahuan parlangapaj, animangapaj tiempoguta llujchita ushan. Shinallata publicadorcunata yachachingapaj, animangapaj, felicitangapapashmi tiempoguta llujchita ushan. Shinaca tucuicunallatami Jehová Diosta juyashpa, paita sirvichun pitapash ayudashpaca ninanda cushijupashun.