1. Jesusca ¿imamandata Jehová Diostaca paipa catijcunata cuidachunga mañarca?

JESUSCA ña huañugrijushpaca paipa catijcuna ima llaquicunatalla charinapi pensarishpami preocupado carca. Chaimandami Jesusca paipa taitataca paipa catijcunata Diablopa trampacunamanda cuidachun mañarca (Juan 17:14, 15). Jesús jahua cieloman rishca jipa Diablo, Jehovata sirvijcunata llaquichishpa catinataca Jesusca alimi yacharca. Chaimi Jehovata sirvijcunaca Jehová Diospa ayudata minishtigrijurca.

2. Ñucanchi mañashcacunata Jehová Dios uyanataca ¿imamandata seguro caita ushapanchi?

² Jehová Diosca paipa Churiguta juyaimandami pai imata mañashcatapash ali uyarca. Ñucanchicunapash Jehová Diospa munaita rurangapaj esforzarijpica, ñucanchitapash juyaimandami ima mañashcaguta ali uyanga. Jehová Diosca shuj juyaj taitashnami ñucanchicunataca siempre cuidasha nin. Chaita na pactachishpaca paillatami nalipi quidanman.

3. Jehová Diospa ayudataca ¿imamandata minishtipanchi?

³ Diabloca cai Alpaman shitai tucushcamandami “ninanda” culirashca can. Chaimi ñucanchicunaca Jehová Diospa ayudata ashtahuan minishtipanchi (Apoc. 12:12). Satanasca Jesusta ali catijcunata llaquichingapaca shuj gentecunatami utilizashca. Cai gentecunaca Jesusta catijcunata llaquichishpaca, ‘Taita Diospa munaitami pactachinajunchi’ yanmi. Satanás pandachishcamandami gentecunaca chashna yuyaicunata charishca (Juan 16:2). Cutin Diospi na crij huaquingunaca cai mundopa nali ruraicunata Jesuspa catijcuna na catijta ricushpami ninanda llaquichishca. Gentecuna catiriashpa llaquichijpipash Bibliapica “Jehová Diospajlla causaj tucui cangunaca, paita juyaichiyari. Paita cazujcunatami paica cuidariajun” ninmi (Sal. 31:23, TNM). Cai shimicunapi tucui shunguhuan crimandami imatapash na manllapanchi. Jehová Diosca ñucanchitaca ¿imashinata cuidajun? Chaipaca ishcai yuyaicunata ricupashunchi.

4. Efesios 6:13-17​pi nishcashnaca ¿imatata Jehová Diosca cushca?

⁴ Jehová Dios cushca tucui churajunacunata churajushpallami Diablotaca mishai ushashun (Efesios 6:13​manda 17​caman liipangui). Jehová Dios cushca tucui churajunacunaca alipachami can. Shinapash siempre churajujpillami cai churajunacunaca ñucanchitaca ayudanga. Cunanga Jehová Dios cushca churajunacuna maijanguna cajta ricupashunchi.

5. a) Cinturaspi churajuna correashnaca ¿imata can? b) ¿Imamandata correata ali churajunshna Bibliataca ali yachajuna capanchi?

⁵ Bibliapi yachachishcacunaca shinlli shayaringapaj cinturaspi churajuna correashnami can. Chaimandami Bibliataca ali yachajuna capanchi. ¿Imamandata shina nipanchi? Diablotaca Bibliapica ‘llullapa taitami can’ ninmi (Juan 8:44). Diabloca ashtaca ashtaca huatacunatami cai mundopi tucui gentecunata umachijushca (Apoc. 12:9). Shinapash Diablo ñucanchita ama umachichunga Bibliapi yachachishcacunami ñucanchitaca ayudaita ushan. Bibliata ali yachajunaca shinlli shayaringapaj cinturaspi correata churajunshnami can. Bibliata ali yachajushpallami Jehová Diostaca pai munashcashna adoraita ushashun. Shinallata Bibliata ali yachajunaca ama llullashpa parlangapaj, tucuita ali rurangapami ayudanga (Juan 4:24; Efes. 4:25; Heb. 13:18).

6. a) Jirruhuan rurashca churajunaca ¿imata can? b) ¿Imamandata cai churajunata churajunshna Jehovapa mandashcacunataca yaipi charina capanchi?

⁶ Jehovapa mandashcacunaca cuerpopi o pechopi imapash ama pasachun jirruhuan rurashca shuj soldadopa churajunashnami can. Chaimandami Jehovapa mandashcacunataca pactachina capanchi. Shuj soldadoca macanajungapaj rishpaca cuerpopi o paipa corazonbi imapash ama pasachunga jirruhuan rurashca churajunatami churajun carca. Shina cuendami cai mundopi nali yuyaicuna ñucanchi shunguta ama pandachichunga Bibliapa mandashcacunataca jirruhuan rurashca churajunata churajunshna yaipi charina capanchi (Prov. 4:23). Jehová Diosca paita juyaimanda tucui shunguhuan sirvichunmi munan (Mat. 22:36, 37). Chaimi Satanasca cai mundopi yuyaicunata cushpa Jehová Diosmanda caruyachingapaj, Jehová nalicachishca cosascunatapash rurachunmi munan (Sant. 4:4; 1 Juan 2:15, 16). Cashna cosascunahuan Jehovata sirvijcunata Jehovamanda na caruyachita ushashpaca, cutin cutinmi Jehová Diosmanda caruyachingapaca imatapash ruranga.

7. Jirruhuan rurashca churajunataca ¿imashinata churajushcashna causapanchi?

⁷ Jehovapa mandashcacunata pactachishpa causangapaca jirruhuan rurashcata churajunshnami causana capanchi (Sal. 97:10). Huaquingunaca ninmi, “Jehovapa mandashcacunata ruranaca na libre cachunga saquinllu” nishpa. Shinapash Jehovapa mandashcacunata na cazushpaca, shuj soldado paipa shunguta cuidaj chai churajunata anchuchishcashnami canchiman. Talvez soldadoca ningapashchari: “Cai churajunaca yapa llashajmi can. Cai guerrapi cangapaca na ayudahuanllu” nishpa. Shinapash chai churajunata anchuchishpaca paillatami chai guerrapica llaqui apanga. Jehovata juyajcunapaca Jehovapa ‘mandashca shimicunaca pactachi ushanallacunami’ can (1 Juan 5:3).

8. Botasta churajunshnami alichirishcalla causana canguichi nishpaca ¿imatata Pabloca ningapaj munarca?

⁸ Pabloca casilla, ali causaiguta yachachij ali villaita villajungapaca botasta churajunshnami alichirishcalla causana canguichi nircami. Caita nishpaca maipipash Diospa Reinomanda villachina cashcatami nijun. Shujcunaman Bibliamanda parlashpaca ñucanchi fellatami shinlli tucun. Mundo enteropi Diosta  sirvijcuna maipi cashpapash gentecunaman villachijta ricushpaca ninandami cushijupanchi. Por ejemplo, trabajopi, escuelapi, negocio pushtucunapi, huasin huasin rishpa, randingapaj rishpa, na Testigo familiacunata visitangapaj rishpa, rijsicunamanbashmi villachingapaj esforzarinchi. Huasimanda na llujshi ushashpapash imashinapash predicangapami esforzaripanchi. Shuj soldado guerrapi cashpa paipa chaquipi churajushcata llujchishpaca paillatami chugrishpa llaqui apanga. Shinallata paita ñaupaman pushajtapash na cati ushangachu. Shina cuendami manllaimanda villachinata saquishpaca ñucanchillata llaqui apashun. Ñaupaman catitapash na ushashunllu.

9. ¿Imamandata jatun escudotashna shinlli feta charina capanchi?

⁹ Ñucanchi fe o alipacha crinaca shuj jatun escudoshnami can. Shamuj punllacunapi Jehovapa nishcacuna pactarinataca ninandami confiapanchi. Feta charinami ‘nalicunata yarichij Diablopa flecha pundapi ninata japichishpa shitamushcacunata huañuchichun’ ayudanga. Shinallata, apostatacunapa llullacunata ama crichun, ñucanchimanda burlarijpipash ama desanimarichun ayudanga. Feta charishpaca shujcuna Jehovapa mandashcacunata ama cazuchun atichinajujpipash, Jehovapa mandashcacunata cazungapami fuerzaguta charipashun. Shinallata trabajopi, colegiopi ñucanchi crishcacunamanda  parlashpaca ñucanchicunaca ashtahuan fetami charipashun (1 Ped. 3:15). Jehovata ashtahuan sirvingapaj munaimanda shuj alipacha trabajota na chasquishpaca ñucanchicunaca Jehovapi confiashcatami ricuchipanchi (Heb. 13:5, 6). Shinallata jarcaicunata, llaquicunata aguantashpaca shinlli feta charishcatami ricuchipanchi (1 Tes. 2:2).

10. Umapi churajuna jirrushnaca ¿imatata ricuchin? Shinallata ¿imapata ayudanga?

¹⁰ Umapi churajuna jirrushna o cascoshnaca jipa punllacunapi Jehová Dios ali causaiguta carasha nishcapi crinatami ricuchijun. Jehová Diosca paita cazujcunataca huañuimanda quishpichishpami ashtacata bendicianga (1 Tes. 5:8; 1 Tim. 4:10; Tito 1:1, 2). Umapi churajuna jirru o cascoca shuj soldadopa umata cuidangapami ayudan. Shina cuendami jipa punllacunapi ali causaigu tianata crinaca ñucanchipa yuyaicunata, pensamientocunata cuidachun ayudan. ¿Imashinata ayudan? Jehová Diospa nishcacunapi yaria causanaca llaquicunata charishpapash ama yapata preocuparichunmi ayudan. Chaimi Jehová Diospa nishcacuna ñucanchita ayudachunga, Jehová Dioshna pensangapaj esforzarina capanchi. Chaitaca ñucanchi charishca cosascunapi na yapata confiashpa, chaipa randica Taita Diospa nishcacunapi confiashpami ricuchipanchi (Sal. 26:2; 104:34; 1 Tim. 6:17).

11. a) Diospa espíritu caramushca espadaca ¿imata can? b) ¿Imamandata utilizana capanchi?

¹¹ Diospa espíritu caramushca espada nishpaca Bibliamandami parlanajupanchi. Bibliaca shuj espadashna ninan ushaita charimandami gentecunapa panda yachachishcacunata, nali ruraicunatapash saquichun ayudashca (2 Cor. 10:4, 5; 2 Tim. 3:16, 17; Heb. 4:12). Ñucanchicuna Bibliamanda ali ali yachajushpa, shinallata Jehovapa organización cushca ayudacunatapash ali aprovechashpami Bibliata ali utilizanataca yachajunchi (2 Tim. 2:15). Shinapash Jehová Diosca ñucanchita cuidashpa catingapaca shuj ayudacunatapashmi cujun. Chai ayudacunamanda ricupashunchi.

12. ¿Imamandata ñucanchi huauquipanicunapa ayudata minishtipanchi?

¹² Shuj soldadoca pailla shuj guerrata na mishai ushashcata, paipa amigocunapa ayudata minishtishcatapash alimi yachan. Chashnallatami ñucanchicunapash Satanaspa trampacunata mishangapaca ñucanchi huauquipanicunapa ayudata minishtipanchi. Chaimandami Jehová Diosca ñucanchicunata ayudangapaca mundo enteromanda huauquipanicunata cushca (1 Ped. 2:17).

13. Hebreos 10:24, 25​pi nishca shinaca tandanajuicunaca ¿imacunapallata ayudan?

¹³ Ñucanchi huauquipanicunapa ayudata chasquingapaca tandanajuicunamanmi rina capanchi (Hebreos 10:24, 25​ta liipangui). Huaquinbica tucuicunallatami desanimaripashcanchi. Shinapash tandanajuicunapi huauquipanicunapa comentariocunata, discursocunata, asignaciongunatapash uyanami ñucanchicunataca Jehová Diosta sirvishpa catichun ayudashca. Shinallata tandanajuicuna nara callarijpillata, tandanajui jipapash ñucanchi huauquipanicunahuan parlanami ashtacatapacha animan (1 Tes. 5:14). Tandanajuicunaman rishpaca shujcunata ayudana oportunidadtapashmi charipanchi. Chaimi tucuicunallata ninanda cushijupanchi (Hech. 20:35; Rom. 1:11, 12). Shinallata tandanajuicunapica imashina villachinata imashina ashtahuan ali yachachinatapashmi yachajupanchi. Por ejemplo, tandanajuicunapimi publicaciongunahuan imashina villachinata, videocunata imashina, ima hora ricuchinatapash yachajupanchi. Chaimi tandanajuicunapaca ali prepararina capanchi. Imata yachajushcatapash ali uyashpami pactachina capanchi. Shinallami tucuicunallata “Jesucristopaj alipacha soldadoshna llaquicunata” apaita ushapashun (2 Tim. 2:3).

14. ¿Picunapa ayudatata ashtahuan charipanchi?

 ¹⁴ Shinallata Jehová Diospa ashtaca millón angelcunapa ayudatapashmi charipanchi. Shuj viajeca shuj angelllami tauca tauca gentecunata huañuchirca. Ashtaca millón angelcunacarin ashtahuan cosascunatami rurai ushan (Is. 37:36). Jehová Diospa ashtaca millón angelcunataca ni pipash na mishai ushanllu. Chaimandami Jehová Dios ñucanchihuan cajpica ni pipash na mishai ushanga (Juec. 6:16). Cai shimicunataca trabajopi, escuelapi o na Testigo familiacuna imatapash nishpa ñucanchita nali sintichijpimi yarina capanchi. Na sololla capanchichu, Jehová Diosmi ñucanchitaca ayudajun.

15. Isaías 54:15, 17​pi nishca shinaca ¿imamandata villachishpa catichunga pipash na jarcai ushanga?

¹⁵ Cai mundo enterotaca Diablomi mandajun. Cai mundopa ruraicunapi, guerracunapi na chapurishcamandami, Diabloca ñucanchicunataca na ricunayachin. Ashtahuangarin Jehová Diosmanda, Diospa Reino jipa punllacunapi ali causaiguta apamunatami parlapanchi. Shinallata cai mundota mandaj Diablo llullaj, millai cashcatami na manllashpa villapanchi (Juan 8:44). Cai mundoca ñallapacha tucurinatapashmi villachipanchi. Chaita rurachunga Diablo ashtaca poderta charishpapash na jarcai ushashcachu. Jehová Diosmandaca ashtaca gentecunamanmi villachi ushapashcanchi. Chaicunataca Jehová Dios ñucanchita ayudajushcamandallami pactachi ushapashcanchi (Isaías 54:15, 17​ta liipangui).

16. Ninan Manllanai Llaqui Punllacunapica ¿imashinata Jehová Diosca paipa sirvijcunataca salvanga?

¹⁶ Ninan Manllanai Llaqui Punllacuna chayamujpica Jehová Diosca ¿imatata ruragrin? Callaripica Jehová Diosca cai alpapi tiaj gobiernocunata utilizashpami Babilonia jatun pueblota o tucui panda religiongunata tucuchishpa, paita sirvijcunataca salvanga (Apoc. 17:16-18; 18:2, 4) Catipica Armagedón guerrapimi Satanasta, paipa catijcunatapash tucuchishpa Jehová Diosca paipa sirvijcunatalla salvanga (Apoc. 7:9, 10; 16:14, 16).

17. ¿Imamandata Jehovata sirvishpa catina capanchi?

¹⁷ Jehová Diosta sirvishpa catijpica Diabloca ñucanchitaca na para siempre llaquichishpa catita ushangachu. Ashtahuangarin Diablomi ñallapacha para siempre tucuchi tucunga (Rom. 16:20). Chaimandami ñucanchicunaca Taita Dios carashca tucui churajunaguta siempre churajushca cana capanchi. Ñucanchi huauquipanicunahuan ayudarishpami, Jehová Diospa mandashcacunatapash pactachishpa catina capanchi. Shina rurajpica Jehová Diosca ñucanchicunataca siempremi shinllichishpa ayudanga (Is. 41:10).