1. Mateo 24:9​pi nishcashnaca ¿imamandata shujcuna nalicachishpa, contrashpa ricujpica na manllarina capanchi?

JEHOVÁ Diosca ñucanchicuna shujcunata juyachun, shujcuna ñucanchita juyachunmi rurarca. Chaimi shujcuna contrashpa ricujpica ninanda llaquiripanchi. Europa llactamanda Georgina paniguca ninmi: “Ñuca mamitaca Jehovata sirvijushcamandami ninanda contrahuarca. Ñucaca 14 huatacunatallami charircani. Ñuca mamita contrashpa ricujpica ñucaca nali gentepachami cani yarin nishpa pensai callarircani” nin. * Huauqui Daniloca ninmi: “Testigo cashcamandami soldadocuna ñucata ushashcata rimashpa ninanda macahuarca. Yapatami humillahuan yashpami ninanda llaquirircani”. Shinlli cajpipash cai llaquicunata charinataca Jesusca ñami villarca (Mateo 24:9​ta liipangui).

2, 3. Gentecunaca ¿imamandata ñucanchicunataca contrashpa ricun?

² Ñucanchitaca Jesushnallata “na cai pachapajta rurashpa” causajcuna cashcamandami mundomanda gentecunaca contrashpa ricun (Juan 15:17-19). Ñucanchicunaca gobiernocunata respetashpapash Taita Diosta yalica na paicunataca juyanchichu. Ñucanchica Jehová Diostallami sirvingapaj munapanchi. Chaimi “Jehová Diosllami tucui gentecunata mandana derechotaca charin” nishpa villachinchi. Cutin Diablopash, paita catijcunapash Taita Dios mandana derechotaca na respetanllu (Gén. 3:1-5, 15). Diospa Gobiernolla tucui llaquicunata tucuchinata, Jehovapa contracunatapash ñallapacha tucuchinatami villachishpa puripanchi (Dan. 2:44; Apoc. 19:19-21). Ali shungu gentecunapaca caicunaca shuj ali noticiagucunami can. Cutin nali gentecunapaca caica shuj nali noticiami can (Sal. 37:10, 11).

 ³ Mundopi gentecunaca ñucanchicuna Jehovapa munaita rurashpa causajta ricushpami nalicachishpa ricun. Por ejemplo, cunanbi ashtaca gentecunaca Sodoma, Gomorra llactapi nalicunata rurashpa causashca gentecunashnallatami nalicunata rurashpa causan. Shinallata chaita rurashpa causajcunatapash alicachishpami ricun (Jud. 7). Huainayana juchata, shuj shuj nali ruraicunatapash ñucanchicuna nalicachijpimi tauca gentecunaca, “cangunaca yapapachami canguichi” nishpa burlarin (1 Ped. 4:3, 4).

4. ¿Ima cualidadta charinashi nalicachishpa rimanajujpi aguantachun ayudanga?

⁴ ¿Ima cualidadta charinashi gentecuna nalicachishpa rimanajujpi aguantachun ayudanga? Jehová Diospi tucui shunguhuan crinami aguantachun ayudanga. ‘Nalicunata yarichij diablo flecha pundapi ninata japichishpa shitamushcata huañuchichunga’ tucui shunguhuan crinami shuj jatun escudoshna jarcaita ushan (Efes. 6:16). Tucui shunguhuan crishpapash juyanatami minishtipanchi. Juyaimi ‘na ñapash fiñarichun’ ayudan. Juyaimandami ninanda llaquichinajujpipash aguantai ushashun (1 Cor. 13:4-7, 13). Cunanga contracuna llaquichijpipash Jehová Diosta, ñucanchi huauquipanicunata, contracunatapash juyana imashina aguantachun ayudajtami yachajupashun.

5. Jehovata juyaimandaca ¿imatata Jesusca rurai usharca?

⁵ Jesusta nara huañuchijpillatami Jesusca paipa catijcunataca: “Cai pachapi causajcuna ñuca Taitata juyajta yachachunmi, ñuca Taita mandashcashna imatapash pactachijuni” nirca (Juan 14:31). Jesusca Jehová Diosta juyaimandami ima llaquicunata charishpapash ñaupaman catirca. Ñucanchicunapash Jesushnallatami Jehová Diosta juyaimandaca ima llaquicunata charishpapash ñaupaman cati ushapanchi.

6. Romanos 5:3-5 nishca shinaca catiriashpa llaquichijpipash ¿imashinata sintiripanchi?

⁶ Jehová Diosta juyanami catiriashpa llaquichinajujpipash aguantachun ayudan. Judiocunata mandajcuna Taita Diosmandaca na villachinachu canguichi nishpa jarcajpipash, apostolcunaca Jehová Diosta juyaimandami villachishpa catirca. Chaimi paicunaca, “Taita Diostami, runacunatapash yali ashtahuan cazunapacha canchi” nirca (Hech. 5:29; 1 Juan 5:3). Huaquin llactacunapica ñucanchi huauquipanicunataca gobiernocunaca ninandami llaquichin. Shinapash apostolcunashna Jehová Diosta juyaimandami paicunaca ñaupaman catinajun. Gentecuna ñucanchita catiriashpa llaquichijpipash ñucanchicunaca ashtahuan cushijushpami ñaupaman catipanchi (Hech. 5:41; Romanos 5:3​manda 5​caman liipangui).

7. Familiacuna llaquichijpipash ¿imatata rurana capanchi?

⁷ Bibliamanda yachajui callarijpica familiacunaca ninandami jarcanga, llaquichitapash ninandami llaquichinga. O ashtahuan nalipashmi tratanga. Talvez paicunaca pensangami: “Paica umachitami umachi tucushca yarin” o “locomi tucushca yarin” nishpa (Marcos 3:21​huan chimbapurashpa ricupangui). Shinallata familiacunaca ashtahuan nalipachapashmi tratanga. Pero na manllarinachu canchi. Jesús cai Alpapi cashpaca: “Fiñajcunaca, quiquin huasi ucupurallatami canga” nircami (Mat. 10:36). Ñucanchicunata imashina tratajpipash ñucanchicunaca ñucanchi familiacunataca juyaihuan, alimi tratashpa catinchi. Jehová Diosta juyaimandami shujcunatapash ashtahuan juyanata yachajupanchi (Mat. 22:37-39). Shujcunata juyashpapash gentecunapa ñaupapi ali ricurinamandallaca Bibliapa mandashcacunataca na huashaman saquinchichu.

8, 9. Shuj paniguta catiriashpa llaquichijpica ¿aguantashpa catichunga imata ayudarca?

⁸ Párrafo 1​pi parlashca Georgina paniguca Bibliamanda ama yachajushpa catichun, paipa mama ninanda jarcajpipash aguantashpami catirca. Paica ninmi: “Testigocunahuan Bibliata yachajui callarishpaca ishcandimi yachajui callarircanchi. Pero 6 quillacuna jipa tandanajuicunaman ri callarigrijujpica ñuca mamitaca  shujpachami tucurca. Ñuca mamitaca apostatacunahuan parlan cashcatami cuenta japircani. Chaimi ñucataca nalipacha tratai callarihuarca. Cungamanda japishpa o ajchamanda chutashpami nali tratahuan carca. Shinallata ñucapa publicaciongunatapashmi basuraman shitan carca. Ña 15 añosta charishpami bautizarircani. Jehová Diosta ama sirvishpa catichunmi ñuca mamaca shuj nali jovengunapash causaj huasipi vichahuarca. Chaipica drogata chupajcuna, nali cosascunata rurajcunami tiarca. Chaimi familiallata jarcashpa ninanda llaquichijpica shinllipachami can nipani” nin.

⁹ Chai llaquipi cajpica panigu Georginataca ¿imata aguantashpa catichun ayudarca? Paica ninmi: “Ñuca mamita ñuca contra tucushca punllapipachami justo ñucaca Biblia enterota lii tucuchishca carcani. Bibliata liishcamandami ñucaca ciertopacha Jehová Diosman quimiri ushashcata, ali religionda tarishcatapash segura carcani. Chaimi Jehová Diostaca cutin cutin mañan carcani. Chai nali jovenguna causaj huasipi causajuj tiempopica shuj ñañagumi paipa huasiman invitahuan carca. Paihuanmi Bibliamanda ashtahuan yachajun carcanchi. Chai tiempopica turiñañagucunami ashtacata ayudahuarca. Paicunaca shuj familiapi cashcashnapachami sintichihuarca. Shinami Jehová Dios ñucata juyashcata, ñucanchi contracunatapash yali Jehová Dios poderta charishcata cuenta japiparcani” nin.

10. ¿Imatata seguro caita ushapanchi?

¹⁰ Apóstol Pabloca nima “ñucanchi Apunchi Cristo Jesusmanda Taita Dios juyajujtaca, ñucanchimandaca napacha anchuchi ushangachu” nircami (Rom. 8:38, 39). Llaquicunahuan cajpipash Jehová Diosca ñucanchitaca nunca na saquingachu. Siempremi aguantashpa catichunbash fuerzaguta caranga. Imashinami panigu Georginata huauquipanicunahuan ayudarca, shinallatami ñucanchitapash huauquipanicunahuan ayudanga.

11. Juan 15:12, 13​pi shimicunaca ¿imashinata Jesuspa catijcunataca ayudarca? Shuj ejemplomanda parlapai.

¹¹ Huañungapaj shuj tuta faltajpimi Jesusca paipa catijcunataca caishuj chaishuj juyarinami canguichi nishpa mandarca (Juan 15:12, 13​ta liipangui). Ñucanchicunata catiriashpa llaquichijpipash aguantashpa catichunga ñucanchipurallata randimanda juyarina ayudanataca Jesusca alimi yacharca. Chaimi chai shimicunataca nirca. Cunanga Tesalónica llactamanda congregacionbi pensaripashunchi. Tesalónica llactamanda huauquipanicunataca callarimandapachami contracunaca catiriashpa llaquichirca. Chai llaquicunata charishpapash paicunaca randimandami juyarin carca (1 Tes. 1:3, 6, 7). Chaimandami Pabloca: ‘Ashtahuan juyarishpa catichi’ nirca (1 Tes. 4: 9, 10). Juyarinami llaquilla cajcunatapash, ñana catingapaj munanichu nijcunatapash ayudashpa catichun ayudarca (1 Tes. 5:14). Cai mandashcataca chai huauquipanicunaca pactachircami. Chaimi cati cartapica apóstol Pabloca cashna nirca: ‘Ashtahuan caishuj chaishuj ninan juyaita charishpami, shujcunatapash juyanajunguichi’ nirca (2 Tes. 1:3-5). Randimanda juyarinami ima llaquicunata charishpapash ñaupaman catichun, catiriashpa llaquichijpipash aguantashpa catichun ayudarca.

12. Shuj llactamanda huauquipanicunaca ¿imashinata randimanda juyarishcata ricuchirca?

¹² Párrafo 1​pi parlashca Danilo huauquigumanda, paipa huarmigumandapash ricupashun. Paicunapa llactapi shuj jatun guerra callarijpica paicunaca na desanimarishpami tandanajuicunamanbash rishpa, villachishpapash catirca. Shinallata huauquipanigucuna micunaguta minishtijujpipash paicunaca micunaguta cushpami ayudanajurca. Shuj punllaca huauqui Danilopa huasiman rishpami soldadocunaca huauqui Danilotaca macarca. Paica ninmi: “Ñucapa crishcacunata saquichun nishpami mandahuarca. Shinapash chaitaca na rurashachu nijpimi ninanda macashpa huañuchishami nishpa disparashpami uma jahuata yalichirca. Shinapash nara rishpallatami: ‘Cutin tigramushpaca canba huarmitaca violashunmi’ nishpa manllachirca. Chaimi huauquipanigucunaca shuj llactaman trenbi cacharca. Huauquipanicuna shina ayudashcataca nunca na cungashunllu. Shuj llactaman chayajpica chaipi huauquipanicunaca micunaguta, huasiguta, shinallata trabajoguta mascashpapashmi ayudarca. Shina ayudashcamandami shuj huauquipanigucuna guerramanda pacajushpa shamunajujtapash ñucanchica ayudaita usharcanchi” nin. Cashna experienciacunata uyanami llaquicuna ricurijpipash randimanda juyarishpa, aguantashpa catichun ayudan.

13. Ñucanchita llaquichishpa catirianajujpipash ¿imashinata Diospa espíritu santoca catichun ayudanga?

¹³ Jesusca catiriashpa llaquichijcunata juyanami canguichi nishpami mandarca (Mat. 5:44, 45). Caita ruranaca na fácil canllu. Shinapash espíritu santo ayudajpica usharingami. Diospa espíritu santomi ñucanchitaca ‘juyarishpa causachun, na ñapash fiñarichun, na jariyashpa causachun, nali munaicunatapash mishachun’ ayudan (Gál. 5:22, 23). Taucacunaca paicunapa huarmi, cusa, churi o vecinocuna ali cajta ricushpami paicunapa yuyaicunataca cambiashca. Huaquingunacarin Testigopashmi tucushca. Chaimi ñucanchita catiriashpa llaquichijcunata juyana shinlli cajpica, Jehová Diosta paipa espíritu santota carahuai nishpa mañana capanchi (Luc. 11:13). Ama cungapashunchichu, Taita Dios  mandashcata pactachinami siempre ali canga (Prov. 3:5-7).

14, 15. Romanos 12:17-21​pa consejota pactachinaca ¿imashinata panigu Yasmindaca ayudarca?

¹⁴ Cunanga Yasmín panigumanda parlapashun. Testigo de Jehová tucujpica paipa cusaca: “Paita umachishcami yarin” nishpami pensarin carca. Chaimandami Diosta sirvinata saquichun imacunatapash rurarca. Paicunapa familiapaman, iglesiata ñaupaman pushajcunapaman, brujocunapaman rishpami chai paniguta amenazachun mandarca. Shinallata paipa culpamandami paipa familiapi separarinajun nichun mandarca. Shuj punllacarin paipa cusa Tandanajui Huasiman yaicushpami huauquipanicunata ninanda caparishpa rimarca. Chaimi Yasmín paniguca ninanda huacashpa causan carca.

¹⁵ Tandanajuicunapimi huauquipanicunaca chai paniguta ama yapata llaquirichun animarca. Shinallata ancianocunaca Romanos 12:17-21​pa shimicunata pactachichunmi consejarca (chai textota liipangui). Yasmín paniguca ninmi: “Bibliapi mandashcata pactachinaca na fácil carcachu. Shinapash Jehovatami chai mandashcacunata pactachingapaj ayudahuachun ninanda mañarcani. Ñucapashmi chaita pactachingapaj ninanda esforzarircani. Ñuca cusa cocinata de adrede mapayachijpipash limpiashpami catin carcani. Rimajpipash na ñapash fiñarishpami aguantan carcani. Pai ungujpipash cuidangapami esforzarin carcani” nin.

16, 17. Yasmín panigupa experienciamandaca ¿imatata yachajupanchi?

¹⁶ Yasmín paniguca ninmi: “Juyaita ricuchinami ñuca cusa cambiachun ayudarca”. Shinallata “ñuca nunca na llullajta yachashpami ñucapi ashtahuan confiai callarirca. Religionmanda parlai callarijpica, ñucataca respetohuanmi ñuca cusaca uyan carca. Shinami huasipica tranquilo, ali causai callarircanchi. Tandanajuicunamanbashmi richun animahuarca. Cunanbica aligutami llevaripanchi. Ima horapash ñuca cusagu Bibliamanda yachajushpa, ishcandillata Jehovata sirvina esperanzatami charipani” nin.

¹⁷ Yasmín panigupa causaimi ñucanchitaca juyaica ‘tucui llaquita apanlla, tucuita shuyanlla, ima nalita rurajpipash saquinlla’ cashcata ricuchin (1 Cor. 13:4, 7). Gentecuna catiriashpa llaquichijpica ñucanchica ninandami llaquiyai ushapanchi. Shinapash juyaihuan tratashpaca shujcunata ashtacatami ayudai ushapanchi. Shinallata Jehová Diostapashmi cushichipanchi. Shinapash contracuna ñucanchita catiriashpa llaquichijpipash o imacunatapash nalita ruranajujpipash ñucanchicunaca cushilla cashpa catita ushapanchimi. ¿Imamandata cushilla cashpa cati ushapanchi? Ricupashun.

18. Ñucanchita catiriashpa llaquichijujpipash ¿imamandata cushilla cashpa cati ushapanchi?

¹⁸ Jesusca nircami: “Cangunata millanayachijpi [...] ninanda cushijuichi” nishpa (Luc. 6:22). Ñucanchita catiriashpa llaquichichunga na munapanchichu. Shinapash ¿imamandata cushilla cashpa cati ushapanchi? Cai quimsa yuyaicunata ricupashun. Primero, ñucanchita catiriashpa llaquichijpipash aguantashpaca, Taita Diospa ñaupapimi ali ricurishun (1 Ped. 4:13, 14). Segundo, ñucanchi fellatami shinlli tucunga (1 Ped. 1:7). Tercero, ñucanchi aguantashpaca shamuj punllacunapi para siempre causaigutapashmi tari ushapashun (Rom. 2:6, 7).

19. Apostolcunata macashpa llaquichijpipash ¿imashinata cushilla cashpa catita usharca?

¹⁹ Catiriashpa llaquichijpipash cushijunami canguichi nishca shimitaca apostolcunaca Jesús causarishca jipami ali intindirca. Apostolcunaca paicunata ushashcata macajpipash, “na villachinachu canguichi” nishpa jarcajpipash paicunaca cushillami carca. Paicunaca “Jesuspa Shutimanda llaquita apachun Dios saquishcamandami, ninanda cushijunajurca” (Hech. 5:40-42). Apostolcunaca Jesustami ninanda juyarca. Chaimi contracuna llaquichijpipash na manllashpa villachishpa catirca. Cunanbipashmi tauca huauquipanicunaca llaquicunata charishpapash cushijushpa villachin, Jehová Diostapash tucui shunguhuan sirvishpa catin. Paicunaca Jehová Dios paicunapa rurashcacunata nima hora na cunganata yaria cashpami chaitaca ruranajun (Heb. 6:10).

20. ¿Imatata cati temapica yachajupashun?

²⁰ Cai mundopi nali ruraicuna tiashpa catijpipash, catiriashpa llaquichijpipash aguantashpami catina capanchi (Juan 15:19). Shinapash na manllanachu canchi. Cati temapica Jehová Dios paipa sirvijcunata imashina cuidashpa ayudajtami yachajupashun (2 Tes. 3:3). Shinaca Jehová Diosta, huauquipanicunata, catiriashpa llaquichijcunatapash juyashpa catipashunchi. Shinami Jehová Diostapash jatunyachi ushapashun. Tucuicunallata shujllashna tandanajushca caitapashmi ushapashun. Ñucanchi fepash ashtahuan shinlli cashpa catinga. Chashnami catiriashpa llaquichijpipash juyaica ashtahuan shinlli cashcata ricuchipashun.