1. Bibliata nara yachajushpaca ¿imashina causaitata chariparcanchi?

 TESTIGO de Jehovacunahuan Bibliata nara yachajushpaca ¿imashina causaitata chariparcangui? Imashina causaita charishcataca ashtaca huauquipanicunaca yaringapallapash na munanllu. Talvez ñucanchicunaca imata rurangapapash gentecunapa nishcata o gentecunapa yuyaita catishpallami causashcashun. Shina causashca cashpaca, imapash esperanza illaj, ‘Taita Diostapash na rijsishpami’ causashcashun (Efes. 2:12). Shinapash Bibliata yachajujpimi ñucanchi causaica cambiashca.

2. Bibliata yachajushpaca ¿imatata yachaj chayaparcangui?

² Bibliata yachajushpami shuj Dios tiashcata, chai Dios quiquinda shuj Taita shina juyaj cashcata yachaj chayaparcangui. Shinallata Taita Diospa ñaupapi ali ricuringapaj munashpa, Jehovapa organizacionbi cangapaj munashpaca, quiquinba causaipi cambiocunata rurana cashcatapashmi cuenta japipariangui. Ashtahuanbash Jehová Diospa leycunata, consejocunata respetana cashcatapashmi yachaj chayapashcangui (Efes. 5:3-5).

3. a) Colosenses 3:9, 10​pi nishcashnaca, Jehová Diosca ¿imata rurachunda munan? b) Cai temapi yuyaicunata yachajunaca ñucanchitaca ¿imapata ayudanga?

³ Jehová Diosca tucuita ruraj Dios cashcamanda ñucanchipa Taita cashcamandapashmi ñucanchicuna imashina causanamanda, comportarinamandapash consejocunata cuna derechota charin. Chaimi bautizaringapaj munajcunataca quiquingunapa ‘punda causaita y punda ruraicunataca ladomanmi saquina canguichi’ nin * (Colosenses 3:9, 10​ta liipangui, TNM). Quiquinga ¿Jehová Diosta sirvingapaj munaimandachu bautizaringapaj munapangui? Cai yachajuipimi quimsa tapuicunata ricupashun. Callaripica punda causai nishpaca imata nijushcata, shinallata Jehová Dios imamanda  chai punda causaita saquichun munashcata, imashina punda causaita saquina cashcatami yachajugripanchi. Shinallata ña bautizarishca cashpapash cai yachajuipica ama punda causashcashna imatapash rurangapami ñucanchitaca ayudanga.

4. Punda causaita na saquij personaca ¿imashinata caita ushan?

⁴ “Punda causaita” na saquij personaca juchayu caimandaca pai munashcashna imatapash pensarishpa, pai munashcashnami imatapash ruran. “Punda causaita” na saquij ushajcunaca talvez imagumandapash ñapash culiraj, paipilla pensarij, agradicinata na yachaj, orgullosocunami huaquinbica caita ushan. Huaquinbicarin talvez pornografiata, nali peliculacunataiman ricunatapashchari gushtan. Chaicunata rurajushpapash shuj mala personaca na canllu. Chaimandami talvez paica nalicunata nishpa o nalicunata rurashpaca talvez nali sintirijunga. Chaimandami nali cosascunata saquishpa cambiangapaca pipash animachun minishtita ushan (Gál. 5:19-21; 2 Tim. 3:2-5).

5. Punda causaita saquinamandaca ¿imatata yuyana capanchi? (Hechos 3:19).

⁵ Juchayucuna caimandami nali yuyaicunata, nali munaicunata tucuita saquitaca na ushapanchi. Chaimandami huaquinbica imatapash nishpa o rurashca jipara arripintirinchi (Jer. 17:9; Sant. 3:2). Shinapash ña punda causaita saquishca cajpica nali munaicunaca na mishangachu. Ñucanchicunataca alita rurashcamandami rijsinga (Is. 55:7; Hechos 3:19​ta liipangui).

6. Jehová Diosca ¿imamandata nali pensamientocunata, nali costumbrecunataca saquichun munan?

⁶ Jehová Diosca ñucanchicunataca nali pensamientocunata, nali costumbrecunata saquichunmi mandan. Jehová Diosca ñucanchita ninanda juyaimanda, ñucanchi causaipi ali causaiguta charichun munaimandami shina nin (Is. 48:17, 18). Jehová Diosca ñucanchicuna nali cosascunata rurashpa, ñucanchillata llaquirishpa shujcunatapash llaquichina cashcata yachaimandami ñucanchicunataca nali cosascunamanda caruyachun mandan. Jehová Diosca ñucanchicuna llaqui apachunga na munanllu. Ñucanchicuna llaqui apajpica ninandami llaquirin.

7. Romanos 12:1, 2​pi nishcashnaca ¿ima decisiondata japina capanchi?

⁷ Ñucanchi familiacuna o amigocunaca ñucanchi causaipi cambiocunata rurashpa, alita rurangapaj esforzarijujta ricushpaca talvezpashmi burlarita ushan (1 Ped. 4:3, 4). Talvez paicunaca:“Ñucanchi munashcata ruranallami canchi. Ñucanchi imata ruranata o imata na ruranataca pipash na mandanachu can” ningapashchari. Jehovapa leycunata,  consejocunata na cazushpa causaj gentecunaca libremi causanchi yuyanmi. Shinapash chaica na ciertochu can. Ashtahuangarin ciertota parlashpaca Jehovata na rijsij gentecunaca cai mundopi yuyaicuna pandachijpimi chai yuyaicunata catishpa causan (Romanos 12:1, 2​ta liipangui). Tucuicunallatami punda causashca yuyaicunata saquinata o Jehová Diospa mandashcacunata cazushpa causanata aliguta decidina capanchi (Is. 64:8).

8. Nali pensamientocunata, nali costumbrecunata saquingapaca ¿ima ayudacunatata charipanchi?

⁸ Jehová Diosca nali pensamientocunata, nali costumbrecunata saquina shinlli cashcataca alimi yachan. Shinallata chaicunata saquingapaj tiempo minishtirishcatapashmi ali yachan (Sal. 103:13, 14). Shinapash cashna nali pensamientocunata, costumbrecunata saqui ushachunga Jehová Diosmi ali yachaita cushpa fuerzata cushpa ñucanchicuna cambiachun ayudan. Chaipaca Bibliata, paipa espíritu santota, paipa organizaciondapashmi utilizan. Quiquinga seguromi cunangaman Jehová Dios imashina quiquinda ayudashcataca ricupashcangui. Shinapash cati parrafocunapimi imashina punda causaita saquishpa catinata, bautizaringapaj ima cosascunatalla pactachina cashcata yachajushpa catipashun.

9. Bibliata liinaca ¿imapata ñucanchitaca ayudaita ushan?

⁹ Ñucanchicuna imashinapacha cashcata ali yachangapaca Bibliatami liina capanchi. Bibliaca ñucanchipaca shuj espejo shinami can. Chaimandami ñucanchicuna imashinapacha cashcata yachachun ali ayudaita ushan (Sant. 1:22-25). Bibliamanda yachachij huauqui o shuj experienciata charij huauquipanicunami quiquindaca ayudaita ushan. ¿Imashinata ayudaita ushan? Paicunaca quiquin imata ali rurai ushashcata, imapi mejorana cashcata ricushpami Bibliahuan ayudaita ushan. Shinallata nali pensamientocunata, costumbrecunata saquichunga chaicunamanda parlaj informaciongunata mascanata yachajuchunmi ayudaita ushan. Jehová Diosca ñucanchita ayudangapaca siempremi listo can. Paica ñucanchita ali rijsimandami ñucanchitaca ali ayudaita ushan (Prov. 14:10; 15:11). Chaimandami cada punlla Jehová Diosta mañana, Bibliata liina costumbreta charina capangui.

10. Elie shuti huauquipa causaimandaca ¿imatata yachajupanchi?

¹⁰ Jehovapa leycuna, consejocuna tucuimanda yali ali cashcatami seguro cana capanchi. Jehová Diospa tucui yachachishcacunaca ñucanchipa alipallatami can. Chaimandami paipa consejocunata cazujcunaca paicunallata ali sintirishpa, paicunapa causaipipash ciertopacha cushilla causaita tarin (Sal. 19:7-11). Shinapash Jehovapa mandashcacunata na cazushpa, na pactachijcunaca paicunallatami llaqui apan. Chaitaca Eliepa ejemplopi ricupashunchi: Paipa taitacuna Jehová Diosta sirvijcuna cajpipashmi paica joven cashpaca nali amigocunahuan llevarishpa, drogacunata chupashpa, shuj shuj huarmicunahuan puñushpa, shuhuashpa causai callarirca. Cashnacunata rurashpa causashpaca paica asha ashami millai millai tucushpa shujcunatapash macanlla carca. Shinapash paica pai uchillagu cajpi paipa taitacuna Bibliamanda yachachishca cosascunataca na cungashcachu carca. Chaimandami tiempohuanga Bibliata cutin yachajui callarirca. Chai jipaca viciocunata saquingapaj esforzarishpami Jehovata sirvingapaca huata 2000​pi bautizarirca. Shinaca cai huauquigutaca Jehovapa mandashcacunata cazushpa pactachinaca paipa causaipica ¿imashinata ayudashca? Paica ninmi: “Cunanga ñucaca tranquilomi sintirini, ñuca concienciapipash alimi sintirini” nishpa. * Shinaca imashinami Eliepa ejemplopi ricupashcanchi Jehová Diospa mandashcacunata na cazushpa, na pactachijcunaca paicunallatami llaqui apan. Shinapash Jehová Diosca cambiachun ayudangapaca listomi can.

11. Jehová Diosca ¿ima cosascunatata nimamanda na ricunayachin?

¹¹ Jehová Dios millanayachishca cosascunata millanayachipashunchi (Sal. 97:10). Bibliapica Jehová Diosca, “jariyashpa purijta, llullashpa parlaj  jalluta, ima nalitapash na ruraj runata huañuchishpa yahuarta jichajtami ninanda millanayachin” nijunmi (Prov. 6:16, 17). Shinallata, “huañuchishpa, umachishpa causajcunatapash, Mandaj Diosca na ricunayachingachu” nijunmi (Sal. 5:6). Jehová Diosca cai tucui nali cosascunataca ricuitapachami na ricunayachin. Chaimandami Noepa punllacunapica ashtaca gentecuna cashna comportamientocunata charishcamanda cai alpapi gentecunataca shuj jatun tamiata cachamushpa tucuchirca (Gén. 6:13). Jehová Dios imata ashtahuan na ricunayachishcataca Malaquías libropipashmi nijun. Malaquías libropica Jehová Diosca cusata o huarmita traicionashpa divorciarijtaca nimamanda na ricunayachinllu. Diosta sirvijuni nishpapash cashna nali cosascunata ruranajujpica Jehová Diosca paicunapa adoraciondaca na chasquinllu. Ashtahuangarin cashna cosascunata rurashpa causajcunataca Jehová Diosmi juzganga (Mal. 2:13-16; Heb. 13:4).

12. Nalicunata na ricunayachinaca ¿imata can?

¹² Jehová Diosca ‘nalita ruranataca na ricunayachishpami causana canguichi’ nijunmi (Rom. 12:9). Imatapash na ricunayachinaca shungumanda imatapash millanayachinami can. Caipi pensaripashun: Pipash ñucanchiman shuj ismushca micunata micuchun cujpica ¿imashinashi sintiripanchiman? ¿Manachu chai micunataca micunapi pensarishpallata lansaita lansanayanman? Shina cuendallatami Jehová Dios na ricunayachishca cosascunata pensarishpaca sintirina capanchi

13. ¿Imamandata ñucanchi pensamientocunapica cuidarina capanchi?

¹³ Nali pensamientocunamanda cuidaripashunchi. Ñucanchicunaca imata pensashcatami rurapanchi. Chaimandami Jesusca imapash nali juchata rurachina pensamientocuna shamujpica uchallami anchuchina canguichi nishpa yachachirca (Mat. 5:21, 22, 28, 29). Jehová Diostaca tucuicunami cushichingapaj munapanchi. Chaimandami imapash nali pensamientocuna shamujpica uchalla anchuchina capanchi.

14. a) Ñucanchipa parlashcacunaca ¿imatata ricuchita ushan? b) Chaimanda ¿imatata cada uno tapurita ushapanchi?

¹⁴ Yangata parlanamanda cuidaripashunchi. Jesusca, “Nali shimicunata rimanaca, shungumandami llujshimun” nircami (Mat. 15:18). Ñucanchipa parlashcacunaca ñucanchicuna imashina cashcatami ricuchin. Chaimandami masqui ima pasana cajpipash ¿siemprechu cabalguta o na llullashpa parlani? Casado o casada cashpaca ¿shujcunahuan asirinajunamandaca cuidadota charinichu? ¿Mapa, nali ruraicunamanda parlajunataca jarcarinichu? O pipash ninanda culirachijpica ¿tranquilochu comportarini?” nishpa tapuripashunchi. Cashna tapuicunapi pensarinami ñucanchicuna imashinapacha  cashcata yachai ushachun ayudanga. Shinaca ñucanchipa punda nali causaita saquingapaca caparishpa o culirashpa parlanata o llullashpa parlanata, mapa parlocunata parlanataca saquinami capanchi.

15. Ñucanchipa punda causaita saqui ushangapaca ¿imatata rurana capanchi?

¹⁵ Punda causaita saquinata decidipashunchi. Apóstol Pabloca shuj ali ejemplota utilizashpami ñucanchi causaipi cambiocunata rurana importantepacha cashcataca ricuchirca. Paica ñucanchipa punda nali causaitaca jatun racu caspipi clavashcashnami saquina canguichi nircami (Rom. 6:6). Jesusca paipa taitapa ñaupapi ali ricuringapaca sufrishpa jatun jatun racu caspipi huañuchi tucuna cashpapash huañungapaca dispuestomi carca. Ñucanchicunapash Jesushnallatami Jehová Diospa ñaupapi ali ricuringapaj munashpaca pai millanayachishca nali ruraicunata, nali costumbrecunataca saquingapaj dispuesto cana capanchi. Shinami ñucanchi concienciapi ali sintirishpa, shinallata cai alpapi para siempre causana bendiciondapash chasqui ushashun (Juan 17:3; 1 Ped. 3:21). Jehová Diosca ñucanchicuna cushilla sintirichunllaca na paipa mandashcacunataca cambiangachu. Más bien ñucanchicunami, paipa mandashcacunata pactachishpa causangapaj cambiocunata rurana capanchi (Is. 1:16-18; 55:9).

16. ¿Imamandata nali munaicuna mishangapaj esforzarina capanchi?

¹⁶ Nali munaicunata, nali yuyaicunata mishangapaj esforzaripai. Bautizarishca jipapashmi nali ruraicunapi ama urmangapaca esforzarishpa catina tucupanga. Por ejemplo Mauricioca jovengumandapachami homosexual carca. Shinapash tiempohuanga testigo de Jehovacunata rijsishpami Bibliamanda yachajui callarirca. Jipaca paipa causaipi cambiocunata rurashpami 2002 huatapica bautizarirca. Paica Jehová Diosta ashtaca huatacunata sirvijushpapash “ñucaca todavía huaquinbica nali ruraicunapi, nali munaicunapi ama urmangapaca esforzarishpa catinami tucupashcani” ninmi. Shinapash chaicuna paita desanimachunga na saquishcachu. Ashtahuangarin paica ninmi: “Nali ruraicunapi ama urmangapaj esforzarishcamanda Jehová Dios cushijushca cashcata yachashpaca, ninandami cushijuni” nishpa. *

17. Nabihapa experienciaca ¿imata rurachunda ayudan?

¹⁷ Ñucanchicunapi confianapa randica Jehová Diosta ayudahuai nishpa, paipa espíritu santopa ayudapi confiapashunchi (Gál. 5:22; Filip. 4:6). Punda causaita saquishpa nali ruraicunapi ama cutinlla urmangapaca ninandami esforzarina capangui. Por ejemplo Nabiha shuti huarmiguhuan ima pasashcata ricupashun. Nabihapa taitaca, pai  6 añoscunata charijpimi jichushpa rishcarca. Paica: “Ñuca taita jichushpa rijpica ninandami llaquirircani” ninmi. Chaimandami ña viñarishpaca millai millai tucurca. Jipamangarin drogacunata jatujuimandami paica ashataca huatacunata carcelpi yalirca. Shinapash testigo de Jehovacuna carcelta visitajpimi paicunahuan Bibliamanda yachajui callarirca. Shinami paica, paipa causaipi jatun cambiocunata rurai usharca. Nabiha huarmiguca ninmi: “Huaquin viciocunata saquinaca facilmi carca. Shinapash tabacota chupanata saquinaca shinllipachami cahuarca” ninmi. Nabiha huarmiguca cai viciota saquingapaca casi huata yalita esforzarishpami saqui usharca. Paica: “Jehová Diospa ayudata cutin cutin mañashpami chai viciotaca saquita usharcani” ninmi. Paica, “ñuca Jehová Diosta cushichingapaj cambiocunata rurai ushashca cajpica shujcunapash cambiai ushangami” ninmi. *

18. 1 Corintios 6:9-11 nishcashnaca, ashtaca Jehová Diosta sirvijcunaca ¿imatata rurai ushashca?

¹⁸ Apostolcunapa punllacunapica Jesushuan jahua cielopi gobernachunga, huaquin jaricunata, huaquin huarmicunatami Jehová Diosca agllarca. Shinapash cai agllashca puracunamandaca huaquingunaca Diosta nara rijsishpaca nali cosascunata rurashpami causan carca. Por ejemplo, huaquingunaca huainayashpa, shuhuashpa, huarmicunashna causajcunami carca. Shinapash Jehová Diospa espíritu santopa ayudahuanmi chai nali ruraicunataca saqui usharca (1 Corintios 6:9-11​ta liipangui). Cunan punllacunapipash shinallatami Bibliaca ashtaca gentecunata cambiocunata rurachun ayudashca. * Paicunaca nali ruraicunata, nali costumbrecunata saquina shinlli cajpipash Jehová Diospa ayudahuanga saquita ushashcami. Cai ejemplocunami ñucanchi causaipi cambiocunata rurashpa bautizari ushana cashcata ricuchin.

19. Cati temapica ¿imatata yachajugripanchi?

¹⁹ Bautizaringapaj munashpaca punda nali causaita, nali ruraicunata saquingapaj esforzarishpapash, mushujta churajunshna causangapami esforzarina capangui. Cati temapica mushujta churajunshna causai ushangapaj imata rurai ushashcata, shujcuna imashina ayudai ushashcatapashmi ricupashun.