1. Babiloniapi israelitacunahuanga ¿imata pasagrijurca?

 JEHOVÁ Diosca Persia llactamanda ‘Ciro shuti reytami’ Babilonia llactamanda israelitacuna libre quidachunga utilizarca. Chaimandami judiocunaca cushijushcapacha carca. Cai reyca israelitacuna Jerusalenman rishpa ‘Taita Diospa huasita cutin shayachichunmi’ shuj leyta churarca (Esd. 1:1, 3). Cai leyta llujchishcamandaca cushijushcapachami carca. Paicunaca Jerusalenman tigrashpa Taita Diosta pai munashcashnami cutin adorai ushana carca.

2. Babilonia llactamanda judiocuna Jerusalenman cutin tigrashpaca ¿imatata rurai callarirca?

² Jesús cai alpaman nara shamujpi huata 537pimi Babiloniaman esclavo apai tucushca israelitacunaca cutin Jerusalenman tigramurca. Israelitacuna Jerusalenman tigrashpaca uchallami Taita Diospa templotaca shayachi callarirca. Chaimandami ña huata 536​paca callari rumicunataca ña churashca carca.

3. Judiocunaca ¿ima jarcaicunatata chimbapurana tucurca?

³ Judiocuna Jehovapa templo huasita shayachinajujpimi chai llactapi causajcunaca Judiocunata imatapash nishpa desanimachishpa ‘Diospa huasita ama shayachichunga manllachinajurca’ (Esd. 4:4). Chaimandami paicunaca Diospa templo huasitaca na tranquilo shayachi ushanajurca. Jesús cai alpaman nara shamujpi huata 522​picarin Persia llactapica shuj mushuj reymi yaicurca. Paica Artajerjesmi carca. * Cai mushuj rey yaicujpicarin Taita Diospa templota ama shayachichun munashca contra gentecunaca cai mushuj reypaman rishpami templo huasita ama shayachichun jarcaicunata churanajurca (Sal. 94:20). Paicunaca rey Artajerjesmanga shuj cartata cachashpami judiocunaca reypa contracuna tucungapami munanajun nishpa escribishpa cacharca (Esd. 4:11-16). Cai contra  gentecunapa cartapi nijushcata cai mushuj rey crishpami Jehová Diospa templo huasita ama shayachichun prohibirca (Esd. 4:17-23). Templo huasita ama shayachichun prohibishcamandami judiocunaca templo huasitaca ñana shayachi ushanajurca (Esd. 4:24).

4. Jehová Diospa templo huasita ama rurachun jarcai callarijpica Jehová Diosca ¿imatata rurarca? (Isaías 55:11).

⁴ Jerusalén llacta ladolla causaj gentecunaca Jehová Diostaca na adoranllu carca. Chaimandami Persia llactapa autoridadcunaca Jehovapa templo huasita ama shayachichun jarcangapaj decidido carca. Shinapash Jehová Diosca paipa templo huasita shayachichunga pipash na jarcachun saquigrijurcachu. Jehová munashca shinami templo huasita shayachichun ayudagrijurca (Isaías 55:11ta liipangui). Jehová Diosca Zacariasta profeta cachun nombrashpami paimanga 8 cosascunata muscuipi cuenta ricuchirca. Zacarías muscuipishna ricushca cosascunami judiocunataca animagrijurca. Chaimandami chai muscuipishna ricushca cosascunataca judiocunaman villachun Jehová Diosca mandarca. Zacariaspa muscuipishna ricushcacunami judiocunataca ama contra gentecunata manllashpa, Jehová Diospa templo huasita shayachishpa catichun ayudarca. Zacariasca 5 viajeta ña muscuipishna ricujushpaca shuj candelabrota, ishcai olivos yuracunatami ricurca.

5. Cai yachajuipica ¿imatata yachajugripanchi?

⁵ Zacarías 5 viajepi muscuipishna ricushcacunaca israelitacunataca ninandami ayudarca. Cunan punllacunapica tucuicunallatami huaquinbica desanimaripanchi. Chaimandami Zacarías muscuipishna ricushcacunata yachajunaca llaquicunata charijpi, o imapash jarcaicuna ricurijpi o imapash cambiocuna tiajpica ninanda ayudaita ushan.

6. Zacarías 4:1manda 3caman Zacarías muscuipishna ricushcacunaca ¿imashinata judiocunataca ayudarca? (Callari fotota ricupangui).

⁶ (Zacarías 4:1-3ta liipangui). Zacariasca shuj candelabrota, shinallata shuj ishcai olivos yuracunatami shuj muscuipishna ricurca. Caicunami judiocunataca jarcaicunata charishpapash ñaupaman catichun ayudarca. Paicunataca ¿imashinata ayudarca? Por ejemplo candelabro ama apagarishpa micha sindirishpa catichunga, chai candelabromanga aceiteca siempremi yalijun. Cai aceiteca cai ishcai olivos yuracunamandami candelabropa jahuapi tiajuj shuj platogupi jundashpa, shuj ñañu tubogutashna candelabromanga aceiteca yalijun. Chaimandami chai candelabroca na apagarin. Zacariasca cai muscuipishna ricushcacunaca ‘¿imata capan?’ nishpami Jehová Diospa angeltaca tapurca. Shina tapujpimi ‘soldadocunahuan, ninan ushaihuanga na mishanguichu, ashtahuangarin ñuca espirituhuanllami mishai ushangui’ ninmi tucuita Mandaj Diosca’ nishpa tigrachirca (Zac. 4:4, 6). Aceiteca Jehová Diospa espíritu santotami ricuchijurca. Jehovapa espirituca nunca na tucuringachu. Shinaca Persia llactamanda ashtaca ashtaca soldadocunapash Jehová Diospa espíritu santohuanga nuncapash na igualangachu. Jehová Diospa espíritu ayudajpimi templo huasita rurachunga pipash na jarcai usharca. Shinaca cai chimbapuraica judiocunataca ninandami animarca. Judiocunaca trabajashpa catingapaca Jehová Diospillami confiashpa catina carca. Chaimandami templota shayachichun prohibishca cajpipash paicunaca templo huasigutaca shayachishpa trabajashpa catirca.

7. Judiocuna templota huasiguta rurashpa catichunga ¿ima cambiota ayudarca?

⁷ Shinallata judiocunapaca ñapashmi shuj cambio ricurimurca. Jesús cai alpaman nara shamujpi huata 520pica rey Darío 1mi mushuj rey tucurca. Pai ña ishcai huatacunata mandajushpami templota ama shayachichun nishpa prohibishca leyca nali cashcata cuenta japirca. Chaimandami cai reyca cutin Taita Diospa templo huasita shayachishpa tucuchichun mandarca (Esd. 6:1-3). Cai noticiata uyashpaca tucuicunallatami manllarishca quedarca. Rey Darioca Jerusalén ladolla causaj gentecunataca templo huasita ruranapica ama jarcachun, ashtahuangarin culquihuan o imapash charishca  cosascunata cushpa Jerusalenbi templo huasita shayachichun ayudana nishpami mandarca (Esd. 6:7-12). Chaimandami chuscu huatacuna jipa huata 515​paca Taita Diospa templo huasigutaca shayachishpa tucuchi usharca (Esd. 6:15).

8. ¿Imamandata jarcaicunata churajpica na manllashpa ñaupaman catina capanchi?

⁸ Cunan punllacunapipashmi Jehovata sirvijcunaca ashtaca jarcaicunata charipanchi. Huaquin huauquipanicunaca Jehová Diosta sirvinata prohibishca llactacunapimi causan. Chaimandami chai llactacunapica Jehová Diosmanda villachijpica carcelcunaman churashpa ‘juezcunapa ñaupaman apan’ (Mat. 10:17, 18). Shinapash tiempohuanmi chai llactacunapillata shuj gobiernocuna yaicushpa shuj leycunata churashpa testigo de Jehovacuna legalmente villachishpa catichun saquita ushan. O huaquinbica shuj ali juezmi testigo de Jehovacuna legalmente villachishpa catichun juiciocunatapash ganachita ushan. Tucui testigocunallatami shuj shuj jarcaicunata charipanchi. Huaquin huauquipanicunaca Jehová Diosta sirvichun na jarcaj llactacunapimi causan. Shina cajpipash paicunataca familiacunami Jehová Diosta sirvinapica jarcaicunata churan (Mat. 10:32-36). Shina jarcaicunata churanajujpipash Jehová Diosta sirvishpa catijta ricushpami familiacunaca ñana imatapash rurashpa tranquilo saquin. Huaquinbicarin ninanda jarcashca familiacunami jipacunamanga Testigocunapash tucushca. Shinaca Jehovata sirvinapi jarcaicuna ricurijpica ama manllapaichu, Jehová Diosmi ayudanga. Jehová Diosca paipa espíritu santohuanga tucuipimi ayudanga. Shinaca nimatapash na manllanachu capanchi.

9. Taita Diospa templo huasita shayachi callarijpica ¿imamandata huaquin judiocunaca ninanda llaquirishpa huacanajurca?

⁹ Templo huasita shayachingapaj callari rumicunata o columnacunata churashcata ricushpaca huaquin mayorlla judiocunaca ninandami llaquirishpa huacai callarirca (Esd. 3:12). Paicunaca ¿imamandata shina huacanajurca? Paicunaca chai templo huasi, punda rey Salomón rurashca templo huasishna na cashcata comparaimandami llaquilla sintirinajurca. Chai shayachigrinajushca templo huasica rey Salomonba templo huasihuan ricujpica imapapash na sirvij cuendami ricurigrijurca (Ageo. 2:2, 3). Zacarías muscuipishna ricushcacunaca ¿imashinata judiocunataca ama shina sintirichun ayudaita usharca?

10. Zacarías 4:8-10pi nishca shimicunaca ¿imashinata judiocunataca cutin cushilla sintirichun ayudarca?

¹⁰ (Zacarías 4:8-10ta liipangui). Bibliapica: “Cai huasita rurai callarijui punllata yangapi churajcunami, tucuchishcata ricushpa cushijunajunga. Plomadatapash, Zorobabel shuti runa charijujtami ricunajunga” nijurcami. Cai shimicunahuanga  ¿imatata ningapaj munarca? Shuj plomadaca construcciongunapica shuj pared o columnacuna recto cashcata ricuchunmi ayudan. Shinaca Jehová Diospa angelca chai shayachigrinajushca templo huasi Salomón rurashca templo huasihuan na igual cashpapash, Taita Diospa ñaupajpi ali ricurigrijushcata yachachunmi judiocunamanga villarca. Chai templo huasita rurashcamanda Jehová Dios cushijushca cana cajpica, judiocunaca na llaquilla sintirijunachu carca. Shinaca templo huasi imashina cajpipash, Jehová Dios mañashcashna adoranami ashtahuanbachaca importante cagrijurca. Chaimandami judiocunaca Jehová Dios mañashcashna adorashpaca Jehová Diospa ñaupajpi ali ricurishpa cushilla sintirita usharca.

11. Huaquin huauquipanicunapaca ¿ima cambiocunata shinlli ricurishca?

¹¹ Ñucanchi causaipica imapash cambiocuna ricurijpica shinllimi caita ushan. Por ejemplo tiempo completo sirvinajushca huauquipanicunaca huaquinbica shuj asignaciongunatami chasquishca. Cutin shuj huauquicunaca ña mayorlla caimandami paicunapa gushtashca asignaciongunatapash saquina tucushca. Shinaca cashna cambiocunata chasquishpaca llaquillami sintirita ushanchi. Shinapash chaica normalmi can. Callaripica shuj mushuj asignacionbi cambiocunata nali intindimandami talvez na de acuerdo caita ushapanchi. O na cashpaca talvez ñucanchi punda asignacionhuan yapata yacharishca caimandami talvez llaquilla sintirita ushapanchi. Shinallata chai mushuj asignacionda ñucanchicuna imashina na ali pactachi ushasha yashpapashmi desanimarita ushapanchi (Prov. 24:10). Shina pasajujpica, Zacariaspa muscuipishna ricushcacunami ñucanchitapash ayudaita ushan.

12. Zacariaspa muscuipishna ricushcacunaca ñucanchi causaipi cambiocuna ricurijpica ¿imashinata cushilla cachunga ayudanga?

¹² Ñucanchi causaipi cambiocuna ricurijpica imata cashpapash Jehová Dios ricushca shinami ñucanchipash ricuna capanchi. Jehová Diosca cunan punllacunapica ashtaca cosascunatami rurajun. Chaicunapi ñucanchipash Jehová Diosta sirvina oportunidadtami charipanchi (1 Cor. 3:9). Ñucanchipa asignacionguna cambiajpipash Jehová Diosca ñucanchitaca siempremi juyashpa catinga. Jehovapa organizacionbi imapash cambiocuna tiashcamanda, punda charishca asignaciongunapi pensarishpa llaquirijunapa randica, cai cambiocunapi yacharingapaj ayudahuai nishpami Jehová Diosta mañana capangui (Ecl. 7:10). Shinaca pundashna ima cosascunatapash na rurai ushashpapash imacunatalla rurai ushashcapi pensaripangui. Zacarías muscuipishna ricushcacunaca ima cambiocuna tiajpipash cushilla Jehová Diosta sirvishpa catina yuyaita charina ashtahuan importante cashcatami yachachin.

13. Huaquin judiocunapa ricuipica ¿imashpata templo huasita rurashpa catinaca nalishnalla ricurita ushanman carca?

¹³ Taita Diospa templo huasita shayachina prohibishca cajpipashmi, sumo sacerdote Josué (Jesúa) shinallata Zorobabelpash ‘Diospa templo huasitaca shayachishpa’ catinata decidirca (Esd. 5:1, 2). Chaita decidijpica huaquin judiocunaca templo huasi jatun jatun cashcamandaca pacalla rurashpa catitaca na usharingachu, contracuna cuenta urmangami yashpami na ali decidishcatashna ricui ushanman carca. Chaimandami Josuepash Zorobabelpash, Jehovapa ayudata minishtigrinajurca. Y Jehová Diosca paicunataca ayudarcami. Paicunata imashina ayudashcata ricupashunchi.

14. Zacarías 4:12, 14pi nishcacunaca Josueta, Zorobabeltaca ¿imashinata ayudarca?

¹⁴ (Zacarías 4:12, 14ta liipangui). Zacariasmanga Jehovapa angelca cai ishcai olivos yuracuna ima nisha nijtami villarca. Cai ishcai yuracunaca Josué y Zorobabeltami ricuchijurca. Paicunaca, ‘Taita Diospa agllashcacuna cashcatami’ ricuchijurca. Cai angelca, ‘cai ishcai jaricunaca Jehovapa ladopimi shayanajun’ nircami. Shina nishpaca Josuepi y Zorobabelpi Jehová Dios confiashcatami ricuchijurca. Chaimandami israelitacunaca Josueta, Zorobabelta utilizashpa Jehová Dios paipa llactata cuidajushcapi confiana carca.

15. Jehovapa instrucciongunata respetashcataca ¿imashinata ricuchi ushapanchi?

¹⁵ Cunan punllacunapica Jehová Diosca Bibliata utilizashpami ñucanchicunamanga instrucciongunata cushpa catijun. Bibliapimi paita imashina ali adorana cashcata yachachijun. Shinaca Jehovapa instrucciongunata respetashcataca ¿imashinata ricuchita ushapanchi? Paipa instrucciongunata respetashcataca Bibliata liingapaj tiempoguta llujchishpa, liishcapi pensarishpami caicunata respetashcataca ricuchipanchi. Chaimandami cashna tapuri ushapanchi: “Bibliata liishpaca ¿chai liishcacunapi pensaringapaj tiempoguta llujchinichu? Imaguta na intindishpapash ¿ima nisha nijta ali intindingapachu esforzaripani? O ¿chaipi nishca shimicunataca liina cashcamandallachu yangata liijuni?” nishpa (2 Ped. 3:16). Jehovapa yachachishcacunapi pensaringapaj tiempoguta llujchishpami Jehovapa mandashcacunata cazushpa, predicashpa catita ushapashun (1 Tim. 4:15, 16).

16. Cuerpo Gobernante huauquicunapa instrucciongunata nali intindishpapash paicunata cazushpa catichunga ¿imata ayudanga?

¹⁶ Jehová Diosca mediante Cuerpo Gobernante huauquicunami ñucanchicunamanga instrucciongunata cushpa catijun (Mat. 24:45). Huaquinbica chai instrucciongunataca na ashta ali intindipanchichu. Huaquinbica terremotocuna, acapanacuna tiajpi ama llaqui apachunmi huaquin  instrucciongunata cun. Talvez chai cosascunaca ñucanchi causajuj pushtupi o llactapica na pasangachu, deganami cai instrucciongunataca cun yashpa pensaita ushapanchiman. Shinallata cai corona virusmanda cushca instrucciongunamandapashmi yapata exagerashpami ninajun yashpa pensaita ushapanchiman. Paicunapa consejocuna ñucanchicunata na ayudajujta sintishpaca ¿imatata rurana capanchi? Por ejemplo, israelitacunatami yarina capanchi. Paicunaca Josuepa, Zorobabelpa decisiongunata catishcamandami ninanda beneficiarirca. Shinallata Bibliapi, shuj shuj gentecunapa causaipipashmi pensarita ushapanchi. Por ejemplo punda tiempocunapipash Taita Diosta sirvijcunaca, huaquinbica na ayudanashnalla consejocunatami chasquirca. Shina chasquishpapash chai consejocunata uyaimandami paicunaca salvari usharca (Juec. 7:7; 8:10).

17. Jehová Dios Zacariasman muscuipishna ricuchishca candelabro, chai ishcai olivos yuracunapash ¿imashinata judiocunataca ayudarca?

¹⁷ Shinaca Zacariasman Jehová Dios muscuipishna ricuchishcacunaca judiocuna templo huasiguta cushilla trabajashpa catichun, Jehová Diosta ali adorashpa catichunmi ayudarca. Judiocunaca Zacarías muscuipishna ricushcacunata yachajushpa, chai yachajushcacunata paicunapa causaipi pactachishpami Jehová Dios paicunata juyaihuan cuidajushcata intindirca. Jehová Diosmi paipa espíritu santota utilizashpa, Jehová Diospa templo huasiguta cushilla trabajashpa Jehová Diosta sirvishpa catichun ayudarca (Esd. 6:16).

18. Zacariasman Jehová Dios muscuipishna ricuchishcacunaca ¿imashinata ñucanchi causaipica ayudaita ushan?

¹⁸ Jehová Dios Zacariasman shuj muscuipishna ricuchishca candelabro, chai ishcai olivos yurapash ñucanchicunataca ninandami ayudaita ushan. Imashinami ricupashcanchi, Zacariasman muscuipishna ricuchishcaca, Jehová Diosta sirvingapaj imapash jarcaicuna ricurijpi ñaupaman catingapaj, shinallata ñucanchi causaipi imapash cambiocuna shamujpi cushilla Jehová Diosta sirvishpa catingapaj, mushuj instrucciongunata cujpi na intindishpapash chaicunata cazushpa catingapami ñucanchitaca ayudaita ushan. Shinaca ñucanchi causaipi imapash shinlli ricurijujpica ¿imatata rurai ushapanchi? Callaripica, Zacariasman Jehová Dios muscuipishna ricuchishcatami yarina capanchi. Jehová Diosca Zacariasman caita muscuipishna ricuchishpaca Jehová Dios paita sirvijcunamanda preocuparishcatami ricuchirca. Caicunata yachajushpaca ñucanchi causaipimi pactachina capanchi. Shinallata Jehová Diospi confianatami yachajuna capanchi. Shinallata Jehová Diostaca tucui shungu pai munashcashna adorashpa catipashun (Mat. 22:37). Shina rurajpica, para siempre paita sirvishpa catichunmi Jehová Diosca ñucanchitaca ayudanga (Col. 1:10, 11).